Lucas 16
16
Qaÿaloqnaxana som ilotague' so nma' mayi i'ashaxanai' dam npe'e
1So Jesús nataq'en 'enapega so lapaxaguenatacpi, 'eeta':
–Huo'o so shiÿaxaua ÿataqta sallaxanec. Qaq somayi huo'o so ipataxaguet da ilo'ogue naq'en so lma'. Nachi qai'aqtaxaneu'a somayi da se'eso ilotague' naq'en so lma' somayi chochi ÿaqataqchit de'eda nsallaxa. 2Nachi se'eso n'aco' iÿaxaneuga somayi, nachi 'enapega, 'eeta': “¿Chaq huá'ague ca 'eetec da aÿim qan'axateu'a, souaxat 'am? Ña 'analoqna't qome da 'ad'onataxanaxac. Ime, qaq aÿim 'andou'a. Cha'ayi sa ishit qome da queta da 'am 'aulotague' yi ima'.” 3Nachi se'eso ilotague' so nma' deuennataxaatac, 'eeta': “¿Chaq hua'agom ca shiitec nagui, cha'ayi ñi ñi'aco' sa ishit da ÿauo'o ca i'onatac? Yi aÿim qaica ca i'añaxac da so'onataxan na 'alhua, qataq ÿataqta huo'o da icoxo da chochi sashilaxaatac. 4Aja', sanata nagui da shiitec, da yaqto' huo'oi qome ca aÿim ÿacongueta qom sau'a ca lma', qom ivita da qaica ca i'onatac.” 5Nachi iÿaxaatauga ñi 'oonolec som neto'ot aso lavigaxaiste som n'aco'. Nachi som l'auaxanec inat, 'eeta': “¿Négue't aca neto'ot 'adavigaxaiste so ñi'aco'?” 6Nachi somayi 'enapeco': “Qomyi cien aso laÿi' na aceite aso ÿavigaxaiste.” Nachi som ilotague' so nma' 'eeta': “'Ana ana 'adavigaxaiste lmalate; 'auÿalapigui' qome, 'anso'ooñi, ime, qaq 'anquigaxajñi, 'iyiñi aca cincuenta.” 7Ime, qataq inat so lÿa, 'eeta': “Qaq 'am, ¿négue't aca 'adavigaxaiste?” Nachi somayi 'enapeco', 'eeta': “Qomyi cien aso naloqnaxaqui na trigo.” Nachi som ilotague' so nma' 'eeta': “'Ana ana 'adavigaxaiste lmalate; 'anquigaxajñi, 'iyiñi qome aca ochenta.” 8Huaña, nachi so 'aco' sa ishit da ÿoqolguet da se'eso lhuataxanaxanec mayi qauem, somayi ÿataqta sa nqalaat da huo'o ca i'ot. Qaq 'eda da 'eetec nam ÿauotec nam huetalec ana 'alhua, namayipi ÿataqta sa nqalaat da huo'o ca i'otec ca lÿa, qaq saq 'en'am nam huetaigui na yi'oqchiguiñi.
9Qaq ÿoqo'oyi qami' saqatalo da qau'onataxañiÿa dam lsallaxa na shiÿaxauapi mayi i'otta'pe naua qauema, da yaqto' huo'o ca qanauochaxauai, yaqto' qom ivita da imeuo da nsallaxa, qa nachi ishit da huo'o ca qami' ÿacongueta cam nma' mayi chochaq tateec da piguem.
10Cam 'onaxaic da n'aqtaguec souaxat cam saq 'amaqtaq mayi ilotague', qaq nachi 'en'am no'on da n'aqtaguec da ilo'ogue ca qalota; qaq cam qauem da n'aqtaguec da ilotague' cam saq 'amaqtaq, qaq nachi 'en'am qauem da n'aqtaguec da ilo'ogue ca qalota. 11Qaq ÿoqo'oyi de'eda lsallaxa nam shiÿaxauapi mayi i'otta'pe naua qauema, da huo'otaq sa ishit da no'on da qan'aqtaguiiqui da qauloÿigue, qaq ¿négue'to' ca ishit da qami' pi'iÿa'alo da qami' ipataxalguete cam nsallaxa mayi saq cha'a? 12Qataq da huo'otaq qauem da qan'aqtaguiiqui da qauloitague' cam sa ishit da qadalamaxachi, qaq ¿négue'to' ca ishit da qami' ÿanema cam qadalamaxachi?
13Qaica ca nlatac da ishit da do'onataxanoto caua dos n'aco'yi, cha'ayi da huo'otaq nquiÿa ca lÿa, qataq ÿauotec ca lÿa; huo'otaq da sa ishit da ÿaxaneec ca 'oonolec, qaq ca lÿa ÿaÿimec. Qaq sa ishit da qai'onataxanot ñi Dios qataq da nsallaxa.
14Nachi hua'aqtega 'enauac de'eda nam fariseopi mayi ÿataqta lqopitaxat da nsallaxa, nachi ÿi'iitac so Jesús. 15Nachi so Jesús 'enapeco':
–Qami' mayi nachiqami' chochi qanachaxañiitega 'enauac na shiÿaxauapi da qami' no'on, qalaxayi ñi Dios ÿauatto'n naua qadquiyaqchilli'. Cha'ayi cam ÿamata'ac nam shiÿaxauapi da 'eetega 'amaqtaqaic, qaq nachica cam ÿataqta ÿaÿimec ñi Dios.
Nam nqataxacpi qataq da l'onataxanaxac ñi Dios da ilo'ogue 'enauacna
16Na nqataxacpi mayi chigoqo'ot so Moisés qataq nam lapaxaguenataxanaxacpi som l'aqtaxanaxanecpi ñi Dios, namayi ñaq huo'o, chochi ivitta'a co'ollaq nvi' so Juan. Huaña, nachi qai'axat da l'onataxanaxac ñi Dios da ilo'ogue 'enauacna, nachi 'enauac na shiÿaxauapi ÿataqta n'añaxat da inoxoneu'a damayi.
17Qaq nai'ctaxa qome da imeuo na piguem qataq ana 'alhua, qalaxayi sa ishit da sa ipacchigui cam i'axat ñim 'oonolec saq 'amaqtaq nam ledaxatpiolec nam nqataxacpi.
So Jesús i'axat da lataxac ca nalate' aca lhua
(Mateo 19.1-12; Marcos 10.1-12)
18Ca shiÿaxaua da huo'otaq nalate' aca lhua, ime, qaltaq huadonguet aca lÿa 'alo, nachi camayi qaÿamata'ac huadonaxaic. Qataq cam huadonguet aca 'alo mayi nalate' ca lhua, nataq'en camayi qaÿamata'ac huadonaxaic.
Som shiÿaxaua mayi sallaxanec qataq so Lázaro
19Huo'o so shiÿaxaua ÿataqta sallaxanec, somayi ÿaatrañi naua no'oñi anogo, qataq qaica ca 'en'ama. Qaq somayi i'ottac 'enauaque naua na'axa'te da lta'adaic lqui'axac. 20Qataq nataq'en huo'o so shiÿaxaua ÿataqta choxodaq, l'enaxat da Lázaro. Somayi ÿataqta imoota na l'oc na lli'i na lquesaxa, qaq somayi nso'ootangui na 'alhua, netau'a na laÿi so nasom som sallaxanec. 21Se'eso choxodaq, somayi nshitaique da icomatec na lsochi na nallic mayi najñi se'eso lqui'axala' som sallaxanec. Qaq ivida'a da anac na pioxotpi, napitac na lli'i na l'oc somayi. 22Qaq huo'o so na'a'q nachi se'eso choxodaq ileu. Nachi anac na lamaxashic piguem l'ecpi ñi Dios da ÿaueegue da piguem cam hueta'a so Abraham. Qaq som sallaxanec nataq'en ileu. Ime, nachi qailayiñi. 23Nachi se'eso sallaxanec ÿataqta huo'o da nque'ejnaxac co'ollaq mashi huetaña cam laponqa' na lqui'ipi nam leuaxaicpi. Huaña, nachi namatashiguem, nachi ila'a so Abraham ÿataqta saqaÿoqotchiguema, qataq so Lázaro nachi huaqta'ai' somayi. 24Nachi i'alaq, 'eeta': “'Am ita'a Abraham, aÿim 'auchoxoden qome. Ña 'anamaq na Lázaro, da yaqto' ipet na llaxaata lshiinec ca 'etaxat da ipet na ÿachaxat, ten ÿapacteec da ñique'ejnaxac da sootangui ne'ena nodec.” 25Qalaxayi so Abraham 'enapego' somayi, 'eeta': “'Am ÿalec, 'auennate co'ollaq 'auaconguet da 'auaÿamaqchiguiñi, saqca ca da da 'anachaalataxac, qaq ñi Lázaro qalaq qauem da lliquiaxac. Qaq ñimayi nagui huo'o da ntaunaguec ne'ena hueta'a, qaq 'am machaq huo'o da 'anque'ejnaxac. 26Qaq saqdata 'enauac de'eda, cha'ayi huo'o nam ÿataqta saqaÿoqchiguiñi tocot lta'adaic mayi npaxatta'agueta qami' nataq'en qomi'. Qaq ÿoqo'oyi sa ishit da huo'o ca chigoqchiine'ena da tañicna, qataq sa ishit da huo'o ca chigaqañicna da nashiguema ne'ena souaqta'a.” 27Nachi som sallaxanec 'enapeco': “'Am ita'a Abraham, 'am ñachoxonnot nagui da 'auamaq ñi Lázaro da 'auamaxa yi lma' ca ita'a 28yim netraña caua cinco ÿaqaÿa't, da yaqto' da'aqtaxanema, yaqto' caamayi sa ishit da nada nataq'en ne'ena que'ejnaqa'. 29Qalaxayi so Abraham 'enapega somayi, 'eeta': ‘Caamayi sogote da hueto'oto nam lliyigui'shi so Moisés qataq som l'aqtaxanaxanecpi ñi Dios; ¡nachinaua qome no'on da ÿalaxalguete!’ ” 30Nachi som sallaxanec ÿasat, 'eeta': “Aja' 'am ita'a Abraham, qalaxayi da huo'o ca qaltaq nca'aleec nam leuaxaicpi da nqo'onalo caamayi, qaq ishit qome da ÿaxaadeec naua n'onataxaco.” 31Qalaxayi so Abraham 'enapeco': “Da sa ishit da ÿalaxaguet so Moisés qataq som l'aqtaxanaxanecpi ñi Dios, qaq ¡huá'aguectoxo' da ishit da da'amqajnataxan, nai'ctaxa da huo'o ca qaltaq nca'aleec!”
Currently Selected:
Lucas 16: TBSNT
Highlight
Share
Copy
Want to have your highlights saved across all your devices? Sign up or sign in
Nuevo Testamento Toba Qom, Dios Nvita Na Shiỹaxauapi © Sociedades Bíblicas Unidas, 1981.
