Gálatas 2

Soua lamaxa'shi so Jesús naÿamaxadeetre' so Pablo

1Qaq co'ollaq mashi inoxoodeec soua catorce vi'iyi, nachi qaltaq saigue da Jerusalén, ñinaictague' so Bernabé, qataq sauec so Tito. 2Qaq saigue damayi, cha'ayi ñi Dios ÿauo'o co'ollaxa da ÿauanaqchic, da yaqto' aÿim saigue damayi. Qaq co'ollaq huaña yi Jerusalén co'ollaq huaigui so ÿaqauga ltaxaÿaxac som nachi 'eetai'salo da nataxala'te, nachi sa'aqtaxaatapeguema da 'eetec dam n'aqtac mayi sa'axattapeguem nam saq judiopi. Qaq so'ot de'eda, cha'ayi sa saÿamaxaden da qaica ca naigui dam mashi semat qataq ñaq shicto'ot da so'ottac nagui. 3Qaq so Tito mayi ñinaictague', qalaxayi ñaqaiyita sa ishit da qoÿinapega da i'ot ca n'anaxashit na l'oc, nai'ctaxa da somayi sa ishit da judío l'ec. 4Qaq ÿoqta 'eesa da huo'o na n'enaqchingui da 'eetega qadqaÿañicpi. Namayipi nqañoxottañi da chochi qomi' ÿalectaiguilo da nshitaique da qaÿauo'o ca n'anaxashit somayi. Qaq namayipi chochi 'axaÿaxanaxanecpi, da yaqto' imeten da qadataxac mayi huesochiguiñi da ñi'adaqtau'a so Cristo Jesús, cha'ayi nshitaique da qaltaq qomi' l-lataqa naq'en na nqataxacpi. 5Qalaxayi qomi' ÿataqta sa ishit da cada'acolec da ña shinaqta da qolaxague namayipi. Cha'ayi sauoqtaique da qami' nachi 'eetai' da qami' hueto'oto dam 'eesa n'aqtaxanaxac mayi chigaqaigui da nca'alaxa.

6Qaq sa ishit da huo'o ca aÿim ÿanem dalaxaic lapaxaguenataxanaxac soua qoÿiitegalo nachi 'eetai'salo nataxala'te; nai'ctaxa da aÿim sa ishit da ÿoqta selotapigui ca 'eetec ca lataxa'c soomayi, cha'ayi ñi Dios sa ishit da ilotapigui ca yi'oqchigui nataxac. 7Qaq aÿim taxaaso' da namayipi qaltaq aÿim ÿanem cam lapaxaguenataxanaxac, lamaxasai' chaqdata da namayipi ila'a da nachiñi ñi Dios ñi aÿim ipataxalec da sa'axatem na saq judiopi da nca'alaxa, 'eeta'am da 'eetec so Pedro da qaipataxalec da da'aqtaxanem na judiopi. 8Qaq ñim Dios mayi ÿanagui da Jesús lamaxashic naq'en so Pedro, da yaqto' da'aqtaxanem na judiopi, nachiñi ñi aÿim ÿanagui da Jesús lamaxashic naq'en aÿim, da yaqto' sa'aqtaxanem nam saq judiopi.

9Qaq ÿoqo'oyi so Santiago, Pedro, qataq so Juan mayi l'auaxanqa da nataxala'te, soomayi ÿauattoote' da nachiñi ñi Dios ñi aÿim ÿanem de'eda i'onataxanaxac. Qaq ÿoqo'oyi soomayi nachi aÿim nashileto qataq so Bernabé. Qaq de'eda qanashilaxac naigui da maichi qomi' nÿa't, qataq da qaÿaÿamaxadeeta da qomi' so'onataxanaxaigui nam saq judiopi, qaq soomayi qalaxayi do'onataxaadoigui nam judiopi. 10Qaq chaqdata da qomi' iÿaxanoto da seuennaqta'a da setauanaq na choxodaqpi. Qaq damayi nachi 'eetai' quenaxa da ñiuogoqtapeguelec da so'ot.

So Pablo ividaxato'ot so Pedro co'ollaq huaña yi Antioquía

11Qalaxayi so Pedro co'ollaq taÿa yi la ciudad Antioquía, huaña, nachi ÿataqta sevidaxato'ot, souaxat da i'ottac ÿataqta sa ÿaÿamaxañi. 12Cha'ayi somayi i'auaxaañi da dequi'iÿa'ai' nam sa ishit da judío l'ecpi, chochi ivitta'a co'ollaq nvi't soua shiÿaxa'u mayi lamaxa'shi so Santiago. Huaña, nachi somayi ca'ai namayipi da sa ishit da lqui'axaua, cha'ayi souaxat da ñi'iÿa nam quetaigui da qaÿauo'o na n'anaxashit naq'en ca shiÿaxaua. 13Huaña, nachi na laÿipi judiopi mayi 'amqajnataxanaxaicpi nachi qai'enaxat so Pedro dam lli'iÿaxa. Qaq ivida'a nataq'en so Bernabé ÿalectoigui somayi da lli'iÿaxa. 14Qalaxayi co'ollaq aÿim sela'a da sa ishit da natenguet da lataxac da lapaxaguenataxanaxac dam n'aqtac mayi chigaqaigui da nca'alaxa, nachi aÿim sevidaxato'ot so Pedro, ÿauaachigui ñaq'en 'enauac nam 'amqajnataxanaxaicpi. Shiita': “'Am, 'am judío l'ec, qalaq so lÿa na'a'q 'au'enaxat da n'onataxac na saq judiopi da 'axaañi da n'onataxac na judiopi, qalaq ¿tá'ainco' nagui da 'anshitaique 'eleetac na saq judiopi, da yaqto' i'enaxat da n'onataxac na judiopi?”

Na judiopi nachi 'eeta'am na laÿipi shiÿaxauapi da deca'alligui da lpi'iÿaxac

15Qomi' na qadta'alpi judío l'ecpi, qaq sa ishit da shinaqta'am nam ÿotta'a't shiÿaxauapi mayi 'itaxaloxoicpi. 16Qalaxayi ñaqaiyita qomi' saÿajnaqta da sa ishit da huo'o ca 'oonolec da laÿamaxannatac ñi Dios, souaxat da i'ot na nqataxacpi mayi chigoqo'ot so Moisés, cha'ayi chaqdata da qai'amaqten so Jesucristo. Qaq ÿoqo'oyi qomi' nataq'en sa'amaqtenaq so Jesucristo, da yaqto' ishit da qomi' ÿaÿamaxadeete' ñi Dios souaxat de'eda qadpi'iÿaxac, qaq sa ishit da chigoqchigui da huo'otaq so'otaq na nqataxacpi. Cha'ayi sa ishit da huo'o ca chochi ÿaÿamaxadeeta ñi Dios souaxat da i'ottac na nqataxacpi.

17Qaq ÿoqo'oyi nagui da huo'otaq qomi' ñishoqtaique da chigoqchigui so Cristo da qomi' ÿaÿamaxadeete' ñi Dios, qaq ishit da yi'oqta da nataq'en qomi' 'itaxaloxoiqa, qaq ¿peta'a ishito' da so Cristo qomi' 'itaxaloxoiqa naq'en? ¡'A'i, sa ishit! 18Cha'ayi da huo'otaq 'ico' ñilaxajñi na nqataxacpi, ime, qataq shi'iguelaxalec da ñi'oxooshiguem, huaña, qaq ÿoqta 'eesa da huo'o ca ÿasouaxashit. 19Cha'ayi aÿim mashi sogote da 'eeta'am da seleu, da yaqto' sa ishit da aÿim ÿauectac na nqataxacpi mayi chigoqo'ot so Moisés. Qaq nachiso se'eso nqataxac so aÿim ÿalauat, da yaqto' aÿim ñica'aleec, da yaqto' so'onataxanot ñi Dios. 20Cha'ayi aÿim sogote da 'ico' seleu, iÿatchiguem so Cristo co'ollaq qaiuaxaneuo. Qaq ÿoqo'oyi nagui sa ishit da maichi ÿalamaxat da ñachaalataxac, cha'ayi nachiso so Cristo so nachattaigui damayi. Qaq de'eda ñachaalataxac mayi yi'oqchigui, damayi chigoqchigui da ipi'iÿaxac da sepi'iÿa'a so llalec ñi Dios mayi aÿim ÿauotec qataq nañanguet da nalaataguec souaxat aÿim. 21Qaq ÿoqo'oyi sa ishit da semaqpec da lqouagaxanaqtaic ñi Dios. Cha'ayíctaxa da huo'o ca ishit da ÿaÿamaxadeeta ñi Dios souaxat da ÿalaxaguet cam 'enapec na nqataxacpi mayi chigoqo'ot so Moisés, nachi huañáctaxa qaq sa ishit da huo'o ca naigui da l-leuaxa so Cristo.

Currently Selected:

Gálatas 2: TBSNT

Highlight

Copy