Gálatas 1

So Pablo ÿamaxa aso lede so 'amqajnataxanaxaicpi mayi netaña yi Galacia

1Aÿim Pablo, aÿim lamaxashic so Jesucristo. Qaq sa ishit da aÿim lamaxashic qataq da aÿim ÿideuo ca chochi shiÿaxaua, cha'ayi nachiso so Jesucristo qataq ñim lta'a Dios mayi nca'aleeguesop naq'en somayi da nleuaxa. 2Aÿim qataq 'enauac nam qadqaÿañicpi mayi aÿim hueta'aguet qami' samaxasaxalo ana qodede, qami' 'amqajnataxanaxaicpi mayi qoñiitaña na 'alhua Galacia. 3Ñishitaique da qauacoñiiguet da nqouagaxanaqtaic qataq da nlagaxayic mayi chigoqo'ot ñi qadta'a Dios qataq so qadataxala' Jesucristo, 4som nañanguet co'olloxochiyi da nalaataguec, souaxat nam qadasouaxashitpi, da yaqto' qomi' nca'alaxateeguesopa nam qauemsat mayi huetalec ana 'alhua. Qaq ipacchigui da maichi lhuennataxa ñim qadta'a Dios. 5Qaq ÿoqo'oyi ¡nachi 'eetai' qome da qaÿi'oxodeetac ñi Dios! Aja', nachi 'eetec de'eda.

Qaica ca lÿa n'aqtaguec da nca'alaxa

6Aÿim ÿataqta lta'adaic da i'aalaxa da qoñiita, yi ÿataqta saqaÿalqo' da qoquiÿa'ai ñi Dios ñim ÿachigoxotchigui da lauotaxanaqtaic da shinaqta so Cristo co'ollaq qami' iÿaxanalo. Ÿataqta sa'aalac da qoquiigue da ÿaqa'a n'aqtaxanaxac mayi qoÿiitega chigaqaigui da nca'alaxa. 7Sa ishit da 'en da huo'o ca lÿa n'aqtaxanaxac mayi chigaqaigui da nca'alaxa. Qalaxayi huo'o nam sa ishit da qami' ÿalemaxa't, qataq nshitaique da nqochinaxat dam n'aqtaxanaxac mayi chigaqaigui da nca'alaxa mayi chigoqo'ot so Cristo. 8Qalaxayi da huo'o ca qami' i'axatema ca lÿa n'aqtaguec da nca'alaxa da huo'otaq sa ishit da natenguet dam mashi qami' sa'axatema, qalaq camayi qaÿauo'o qome ca lta'adaic nhuaxanaguec, nai'ctaxa da huo'otaq nachaÿim, huo'otaq chigaqshiguem Dios lamaxashic. 9Damayi sogote co'ollaxa da i'aqtac, qalaxayi nagui qaltaq shi'iguelaxalec da shinapec: Da huo'otaq huo'o ca qami' i'axatema ca lÿa n'aqtaxanaxac mayi 'eetega chigaqaigui da nca'alaxa, da huo'otaq sa natenguet dam mashi qauacoñiiguet, qalaq camayi qaÿauo'o qome ca lta'adaic nhuaxanaguec.

10Qaq da aÿim shinapec de'eda, qaq ¿peta'a chochi ñishitaique da aÿim ÿaÿamaxadeeta na shiÿaxauapi, huo'otaq ñi Dios? Loqo' chaq ¿chochi ñishitaique da saqca ca da ñaq'en na shiÿaxauapi? Cha'ayi da huo'otaq ña ñishitaique da chochi aÿim ÿaÿamaxadeeta na shiÿaxauapi, qaq sa ishit da aÿim l-latac so Cristo.

Da 'eetec so Pablo da Jesús lamaxashic

11Qalaxayi qami' ÿaqaÿa't, aÿim ñishitaique da qauaÿajñiita de'eda n'aqtac mayi qami' sa'axattapeguema, damayi sa ishit da chochi maichi lhuennataxac ca shiÿaxaua. 12Damayi sa ishit da chochi sachigoxoto'ot ca camachaqca shiÿaxaua. Qataq sa ishit da huo'o ca chochi aÿim lapaxaguenatac, cha'ayi nachiso so Jesucristo so aÿim ÿaÿajnaxanaxanec damayi.

13Qataq sogote da qau'aqaitapeguelec co'ollaxa da 'eetec da ÿataxac can ñaq shictaigui dam 'eetec da l'amqajnataxanaxac na judiopi. Qataq sogote da qauaÿajñi da shiitec da ÿayiloxo co'ollaq secanaxaatapigui nam lalamaxatpi ñi Dios da ñishitaique da ñilaxajñi. 14De'eda l'amqajnataxanaxac na judiopi co'ollaq sootaigui, qalaq aÿim ÿataqta qalota na ñapacalec na maichi iuo' l'ecpi mayi ñaloxouapi. Cha'ayi aÿim ÿataqta shicteguelo da saÿamaxa't na napaxaguenaxaco som hua'au ita'alpi. 15Qalaxayi ñi Dios aÿim lca'aguishic co'ollaq saxanaxa da sañiguiñi, souaxat da lta'adaic lauotaxanaqtaic co'ollaq aÿim iÿaxana. Nachi co'ollaq 'eetec de'eda ñimayi, 16nachi huaña, qaq aÿim ÿauattonaxanaxanguet so llalec, da yaqto' aÿim sa'axatem nam saq judiopi da l'aqtac mayi chigaqaigui da nca'alaxa. Qaq co'ollaq mashi ime de'eda, nachi aÿim sa ishit da huo'o ca ñinate'. 17Qataq sa ishit da saigue da Jerusalén da huo'otaq ñoqo'onalo soua nachi 'eetai'salo da lamaxa'shi so Jesús. Chaqdata da aÿim sa ñaÿaloxon da saigue da Arabia. Qaq co'ollaq ime, nachi ñi'iguelaxa yi Damasco.

18Qaq co'ollaq mashi inoxoodeec soua tres vi'iyi, nachi aÿim saigue da Jerusalén. Huaña, nachi aÿim sauatton so Pedro, nachi soota'asop somayi, ivi' naua quince na'axa'te. 19Qalaxayi sa ishit da huo'o ca lÿa da sela'a so laÿipi, chaqsota so Santiago som lalamaxat lqaÿa so qadataxala' Jesús. 20Qaq ÿauaachigui ñi Dios nagui de'eda shiyiñi da qami' samaxalo, qaq damayi ÿataqta 'eesa.

21Qaq co'ollaq ime de'eda, nachi ñoqo'ona yim 'alhua Siria qataq yi Cilicia. 22Qaq nam qadqaÿañicpi mayi i'amaqteetac so Cristo mayi netaña yi 'alhua Judea, namayipi sa ishit co'ollaxa da aÿim ÿauatton. 23Chaqdata da chochi hua'aqtapeguelecnaxa da n'aqtaxanaxac da qoÿiita': “Som shiÿaxaua mayi qomi' icaata'pe caillayi, qalaq nagui i'axattac da npi'iÿaxac dam huotaique co'olloxochiyi da nlaxajñi.” 24Nachi ÿi'oxodeetac ñi Dios, souaxat aÿim.

Currently Selected:

Gálatas 1: TBSNT

Highlight

Copy