Gálatas 3

Na nqataxacpi huo'otaq da npi'iÿaxac

1¡Aicoue, qami' Galacia lashi', ÿataqta qaico' ca qauaÿajñiÿapec! ¿Chaq négue't ca qami' ÿayi'n, yi sa ishit da qaualaqailec dam 'eesa n'aqtac? Yi so hua'auchiguiñi qad'aqtaxanaxac ÿataqta nachiso so Jesucristo so qami' sachaxanaqtalo som qaipe'enguet co'olloxochiyi so qo'ipaq. 2Ñaq aÿim qau'aqtaxañiim nagui de'eda, 'eeta': ¿Qami' peta'a qauachigoxochiichigui da qau'ochiitac na nqataxacpi mayi chigoqo'ot so Moisés da huo'o mshi qauacoñiiguet so Espíritu mayi chigoqo'ot ñi Dios? loqo' chaq ¿chigoqchigui can qau'amaqchiñi da qau'aqaichigui? 3¿Tá'ainco' qami' yi ÿapacteec da qaica ca qauaÿajñiÿapec? ¿Qami' qaupi'itaxañiitega peta'a da maichi qaumachi da qau'ochi dam dalaxaic qanachaalataxaqui mayi chigoqo'ot so Espíritu? 4¿Peta'a sa ishito' da huo'o ca naigui 'enauac da qanque'ejnaxaqui? ¡'Onaxaico' da huo'o ca qauachigoxochiÿaigui damayi! 5Ñim Dios mayi qami' ÿanema co'olloxochiyi so n'Espíritu, qataq ÿachaxan nam i'ot da n'aalaxa da huaigui naq'en da qoñiita, qaq ¿chaq tá'ainco' yi i'ot? Ñimayi i'ot namayipi, qalaxayi sa ishit da souaxat da qami' qau'ochiitac na nqataxacpi mayi chigoqo'ot so Moisés. Mayi souaxat da qami' qau'amaqchiñi da qau'aqaichigui co'ollaxa n'aqtac.

6So Abraham huo'o da lpi'iÿaxac ñi Dios, nachi de'eda lpi'iÿaxac chigoqchigui da ñi Dios ÿaÿamaxadeeta somayi. Nachi ÿamata'ac somayi da no'on shiÿaxaua. 7Qaq ÿoqo'oyi qami' ishit da qauaÿajñiita da na ÿataqta 'eesa da llalaqpi so Abraham, nachina na huo'o da lpi'iÿaxac. 8Cha'ayi naua ñiyigui'shi l'aqtaqa ñi Dios, nal'ena co'ollaxa da ilota'a da nataq'en nam sa ishit da judío l'ecpi, qalaq ÿataqta ÿaÿamaxadeeta ñi Dios nam huo'o da lpi'iÿaxac. Nachi naua ñiyigui'shi da'aqtaxanema so Abraham da no'on l'axaÿaxac, 'eeta': “'Enauac qome na ÿotta'a't shiÿaxauapi huo'o da nqouagaxa 'am chigoqchigui.” 9Qaq ÿoqo'oyi cam da'amqajnataxan nachi huo'o da nqouagaxa 'eeta'am so Abraham mayi 'amqajnataxanaxaic.

10Qaq ÿoqo'oyi nam ÿachito'ot da lpi'iÿaxac nam nqataxacpi mayi chigoqo'ot so Moisés, namayipi huetalec da lta'adaic nhuaxanaguec. Cha'ayi naua ñiyigui'shi n'aqtaqa 'eeta': “'Enauac nam sa ishit da ipaguelec nam 'enapecpi nam 'enauac nanettalec anam nanedaxalate na nqataxacpi, nachi namayipi huetalec da lta'adaic nhuaxanaguec.” 11Qaq ÿoqo'oyi ÿataqtegue da lataxac da sa ishit da chochi huo'o ca ÿaÿamaxadeeta ñi Dios da souaxat da i'ottac cam damaxasoxoolec na nqataxacpi. Cha'ayi naua ñiyigui'shi l'aqtaqa ñi Dios 'eeta': “Cam ÿaÿamaxadeeta ñi Dios, camayi da nachaalataxac ÿachigoxotchigui da lpi'iÿaxac.” 12Cha'ayi na nqataxacpi mayi chigoqo'ot so Moisés sa ishit da chigaqaigui da npi'iÿaxac. Chaqdata da 'eeta': “Cam i'ot cam 'enapec na nqataxacpi, camayi da nachaalataxac chigoqchigui da i'ot ca 'enapec namayipi.”

13Qaq so Cristo qomi' nca'alaxateeguesopa dam lta'adaic qanhuaxanaguec mayi chigoqchigui na nqataxacpi, cha'ayi somayi nañanguet da lta'adaic nhuaxanaguec souaxat qomi'. Cha'ayi naua ñiyigui'shi l'aqtaqa ñi Dios 'eeta': “Ÿataqta sa qaichoxonnai' qome da qaÿauo'o da nhuaxanaguec ca qaicoñida'aguet cam qo'ipaq.” 14Qaq damayi nachi qoÿina'ac, yaqto' da lqouagaxanaqtaic ñi Dios mayi ÿachaxanapecot co'olloxochiyi so Abraham, damayi qoÿami' nam sa ishit da judiopi da chigoqchigui qanqoÿin so Cristo Jesús; qaq yaqto' 'enauaque qomi' ishit da chigoqchigui da qadpi'iÿaxac da saconaxaguet som Espíritu Santo mayi ÿachaxanapec co'olloxochiyi ñi Dios.

Na nqataxacpi qataq som qaÿachaxanapec

15Qami' ÿaqaÿañicpi, huo'o da saloqnaxana, damayi chigaqaigui na yi'oqchigui shiÿaxauapi, 'eeta': Ca shiÿaxaua da huo'otaq naÿamaxate' ca lÿa, huo'otaq da i'ot aca l'aqtac lmalate, qaq da ime, nachi nanedelec. Huaña, nachi sa ishit da huo'o ca ishit da nsogoñi, huo'otaq da ishit da nqochinaxateec.

16Qaq ñi Dios huo'o co'ollaxa so ÿachaxanapecot so Abraham qataq cam llalec. Qaq nam ñiyigui'shi l'aqtaqa ñi Dios sa ishit da 'eeta': “ca llalaqpi,” da 'eeta'am da huo'otaq qalota cam detaqtega shiÿaxauapi. Cha'ayi ñimayi 'eeta': “ca 'ai'alec.” Qaq damayi naigui qone' da 'oonolec ca qaitaqtega shiÿaxaua. Qaq somayi nachiso so Cristo. 17Qaq dam shiitega 'eeta': Ñi Dios co'olloxochiyi i'ot so naÿamaxataxac da naÿamaxate' so Abraham. Qaq co'ollaq ime, nachi nanedelec. Qaq co'ollaq mashi ivi' naua cuatrocientos treinta vi'iyi, qanachi anac so nqataxacpi, chigoqchigui so Moisés. Qalaxayi se'eso nqataxacpi sa ishit da huo'otaq nlaxajñi se'eso aÿamaxataxac, qataq sa ishit da huo'otaq qaica ca naigui naq'en dam ÿachaxanapec ñi Dios. 18Cha'ayi ca ÿan ñi Dios da huo'otaq chigoqchigui naq'en na nqataxacpi mayi chigoqo'ot so Moisés, qanachi de'eda ÿan sa ishit da ÿachaxanapec. Qalaxayi ñi Dios co'ollaq huo'o da ÿachaxanapeguem so Abraham, qalaq sa ishit da huo'o aca lashiue naq'en.

19Nachi ¿negue'to' qone' cam naigui na nqataxacpi mayi chigoqo'ot so Moisés? Qomyi namayipi ÿaqa'aguet qanqoÿin, da yaqto' ishit da ÿachaxan na nasouaxashitpi. Nachi namayi do'onataxan, chochi ivitta'a da nvi' que'eca ñalec mayi taÿa'a de'eda qaÿachaxanapec. Ne'ena nqataxacpi co'ollaq qai'axat, qalaq chigoqchigui qanqoÿin so namaxashicpi piguem l'ecpi. Qaq so Moisés qalaq taiguet da ntaxaÿaxanaxanec. 20Qalaxayi sa ishit da qaiuen ca chochi ntaxaÿaxanaxanec da huo'o ca ÿachaxanapec ca 'oonolec shiÿaxaua. Qaq ñim Dios 'oonolec, qaica ca lÿa.

Da l'onataxanaxac na nqataxacpi

21Qaq ¿damaxa peta'a 'eetega da na nqataxacpi mayi chigoqo'ot so Moisés 'ico' da npa'aguene' dam ÿachaxanapec co'olloxochiyi ñi Dios? 'A'i, sa ishit da nachi 'eetec de'eda. Cha'ayíctaxa da huo'otaq qoÿan ca nqataxac da ishit da deca'alaqtaxan, qanachi ishíttaxa da huo'o ca ÿaÿamaxadeeta ñi Dios souaxat da i'ot cam damaxasoxoolec na nqataxacpi. 22Qalaxayi naua ñiyigui'shi l'aqtaqa ñi Dios i'axa't da 'enauac na shiÿaxauapi lcoñitaguishic na nasouaxashitpi. Qaq damayi nachi qoÿina'ac, yaqto' ca da'amqajnataxan ishit da ÿaconguet cam ÿachaxanapec ñi Dios, chigoqchigui da i'amaqten so Jesucristo.

23Qaq co'ollaq saxanaxa da nvi' de'eda npi'iÿaxac, nachi na nqataxacpi 'ico' da qomi' ÿapotau'alo, iuatta'a da qai'axategue ca llic da qaipi'iÿa'a so Jesucristo. 24Qanachi ne'ena nqataxacpi co'ollaxa chochi qomi' ilotagueto, 'eeta'am naq'en qomi' ca nogotolec da qomi' ÿapaxagueeta'pe, ivitta'a co'ollaq nvi' so Cristo, yaqto' da sa'amaqtenaq somayi, nachi ñi Dios ishit da qomi' ÿaÿamaxadeete'. 25Qaq nagui da mashi nvi' de'eda npi'iÿaxac, nachi sa ishit da souaqto'ot da lapaxaguenataxanaxac na nqataxacpi.

26Cha'ayi de'eda npi'iÿaxac nachida da huo'o mshi 'enauac da qoñiita qami' llalqa ñi Dios, souaxat da qan'ayiitau'a so Cristo Jesús. 27Qaq ÿoqo'oyi 'enauac da qoñiita mayi qaunoxoñiu'a da qan'ayiitau'a so Cristo can qami' qanachilaxa'n. Huaña, nachi qami' ÿanaxanaxaanguilo da lataxac somayi, 'eeta'am ca yi'oqchigui nogoxot. 28Qaq ÿoqo'oyi nagui sa ishit da huo'o ca ÿaqa'a ca lataxac, nai'ctaxa da huo'otaq qami' judío lashi', huo'otaq ca saq judío l'ec, huo'otaq ca nlatac, qataq ca sa nlatac, ÿale, huo'otaq 'alo. Cha'ayi da mashi qan'ayiitau'a so Cristo Jesús, nachi 'enauac da qoñiita 'eeta'am da qami' 'oonolec. 29Cha'ayi da mashi qami' lalamqa'te so Cristo, qaq nataq'en qami' lalamqa'te llalqa so Abraham, qaq nataq'en qauacoñiiguet qome cam ÿachaxanapec co'olloxochiyi ñi Dios.

Currently Selected:

Gálatas 3: TBSNT

Highlight

Copy