Genesis 17
17
Iqmoeq 17
Aqbhaqlaq bhai Aqbhaqlaqhaq dai mil bhiq-a nail ganl
1Aqbhaqlaq nail aqkovq 99 kovq bhee lal-u phao, Heeqphaq Miqyail neq, aivq bhai bhi moel khi ge bhiq-a nail: "Ngal neq, iqsanl nail kovtavq bhai uv thaiq nail bhaqaoq eeq nail Miqyail pevq nail ngaol. Ngaq nail sivtavq bhai saljial ivq khi oeqbal thaq duq maq jiav dai, aqdoevq doevq yaoq.
2Ngal naoq-ai nee mail daoqma saljial jaq khi naoq-ai nee mail yavq kha lee thaq nail yaq juq bhai bhi mao lal nail ngaol" dai, ge bhiq-a nail ngaol.
3Aqbhaqlaq neq, aivq nail maivphaoq miltsaq bhai tuv dai soiq iq thaiq khi jaol-u phao, Miqyail ge nail:
4"Ngal naoq bhai jaq-ai thaq nail daoqma saljial neq, niail hai ngaol: Naoq bhai tsaol jeq-e juq nail aqbhu bhi pevq lal nail ngaol.
5Ya hao teevq pov, naoq nail aqmil bhai Aqbhaqlaq dai maq khul yaoq-aol. Naoq nail aqmil bhai Aqbhaqlaqhaq#17.5 Aqbhaqlaqhaq Aqbhaqlaqhaq dai, ge nail daoqceevq neq, jeq-e jaq-a juq nail aqbhu dai, ge movq nail ngaol. dai, khul nail ngaol. Khul khi mail dai ngal-aq, ngal naoq bhai tsaol jeq-e mao dai nail aqbhu bhi pevq lal nail ngaol.
6Ngal naoq-ai nee mail yavq kha lee thaq nail yaq juq bhai bhi mao lal khi aqyu juq nail lavqkhoel nee heeqphaq juq bhi dov lal nail ngaol. Al ovqtavq, aqyu juq neq, tsaol jeq-e mao dai jeq-a pevq lal nail ngaol.
7Naol dai khi naoq-ai nee mail yavq kha lee thaq nail yaq juq bhai ngaq-i mail jaq-ai thaq nail daoqma saljial neq, teevq yeel nee teevq yeel ivq nail daoqma saljial bhi pevq nail ngaol. Daoqma saljial al neq, niail hai ngaol: 'Ngal neq, naoq nail Miqyail pevq khi naoq-ai nee mail yavq kha lee thaq nail yaq juq nail Miqyail iqsanl, pevq nail ngaol.
8Niil aq-il naoq-i mail daq-i jiovq khi jaol thail thaiq nail Khaqnanq milkhaoq teevq khaoq khaoq lao naol dai khi naoq-ai nee mail yavq kha lee thaq nail yaq juq bhai ngal nqmaq maqluv halyeel bivq nail ngaol. Ngal gail, aqyu juq nail Miqyail pevq nail ngaol'" dai, ge bhiq-a nail ngaol.
9A bhai nee ngal-aq, Miqyail gaoq ge nail: "Naol dai khi naoq-ai nee yavq kha lee thaq nail yaq juq gail, ngaq nail daoqma saljial bhai teevq yeel nee teevq yeel, ya tsao the nail ngaol.
10Al neq, naol dai khi naoq-ai nee mail yavq kha lee thaq nail yaq juq iqsanl mail yaqyov-aq yaoq gaq yaoq-ao nee, bavkov uqjaq oev nail aol ya nl gil nail ngaol.
11Bavkov uqjaq oev nail neq, ngal dai khi nul juq-i mail jaq-ai thaq nail daoqma saljial nail salkhil pevq nail ngaol.
12Naoq nail jeq-e jaq-a nail lavqkhoel, teevq yeel nee teevq yeel, yaqyov-aq yaoq gaq yaoq-ao nee mail, eivq n bhee lal haq neq, bavkov uqjaq ya oev gil nail ngaol. Yovqgavq nail ilkhaol bhai bhao thaq nail yaqkav juq maqkhaiq, yu nail jeq-e jaq-a bhai phul-i mail ul-ai thaq nail yaqkav juq maqkhaiq, ya oev gil nail ngaol.
13Yaqyov-aq juq yaoq gaq yaoq-ao nee mail, bavkov uqjaq ya oev gil nail ngaol. Thail hai nl nail neq, naol dai khi ngaq-i mail daoqma saljial jaq-ai thaq nail bhai, nqmaq maqluv halyeel ivq dai, aqmaol kovtavq bhai moel lal nail salkhil teevq laiq pevq nail ngaol.
14Bavkov uqjaq maq oev nail yaqyov-aq yaoq gaq yaoq-ao nee mail neq, ngaq-i mail jaq-ai thaq nail daoqma saljial bhai maq tsao the nail ngel-i mail, jeq-e jaq-a nail lavqkhoel nee ya the dov nail ngaol" dai, Aqbhaqlaqhaq bhai ge bhiq-a nail ngaol.
Saqlaqiq bhai Saqlal dai mil bhiq-a nail ganl
15Heeqphaq Miqyail Aqbhaqlaqhaq bhai gaoq ge bhiq-a nail: "Naoq nail khaqma bhai gail ya hao teevq pov Saqlaqiq dai maq khul yaoq-ao, aivq bhai Saqlal dai, ya khul nail ngaol.
16Ngal aivq bhai geeqlaoq bivq khi naoq nail haqbhoil, yaqyov teevq gaq bhi jaol lee nail ngaol. Ngal aivq bhai geeqlaoq bivq nail bhaq da nee, aivq neq, tsaol jeq-e mao dai nail aqma ya pevq lal nail ngaol. Aivq nee mail yavq kha lee thaq nail yaq juq nail lavqkhoel nee heeqphaq juq dov lal nail ngaol" dai, ge bhiq-a nail ngaol.
17Aqbhaqlaqhaq neq, aivq nail maivphaoq miltsaq bha tuv ail-u kev dai nvq pov teevq pov soiq iq thaiq khi mail jaol-u phao, "Aqkovq 100 bhee lal thaq nail gaq neq, yaq gaoq jaol lee nia-ai haq nail meeq nial. Aqkovq 90 bhee nail Saqlal bhai iqsanl, yaq gaoq jaol lee nia-ai haq nail meeq nial" dai, noeq lal bhiq khi hel sil nail ngaol.
18A bhai nee ngal-aq, aivq Miqyail bhai ge bhiq-a nail: "Ilsaqmeiqlav bhai naoq nail sivtavq-ai geeqlaoq ya nail gaq bhi pevq yaoq" dai, ge bhiq-a nail ngaol.
19Aq-u phao, Miqyail ge kovq bhiq-a nail: "Thail hai nl khi ngaol-aoq, naoq nail khaqma Saqlal neq, yaqyov teevq gaq bhao nail ngaol. Yaqyov al gaq bhai neq, Ilcav#17.19 Ilcav Ilcav dai, ge nail daoqceevq neq, hel sil nail dai, ge movq nail ngaol. dai, ya mil bhiq nail ngaol. Ngal neq, aivq nee mail maqkhaiq, aivq nee mail yavq kha lee thaq nail yaq juq nee mail maqkhaiq, jaq-ai thaq nail daoqma saljial bhai nqmaq maqluv halyeel bhi ivq nail ngaol.
20Ilsaqmeiqlav nee tavq lai khi, naoq-i mail pevq movq nail phaq bhai gail, ngal ya gaiq-ao nail ngaol. Al heel ngel-i mail, ngal aivq bhai geeqlaoq bivq khi, yaqmiq yaqyov juq mao dai bhi mao lal nail ngaol. Aivq nee mail yavq kha lee thaq nail yaq juq bhai iqsanl, bhi mao dee dee lal nail ngaol. Aivq bhai, uv thaiq nail 12 gaq nail aqbhu bhi pevq lal khi aivq nail jeq-e bhai jeq-e jeq-e ma bhi pevq lal nail ngaol.
21Thail hai ngaol-aoq, ngaq-i mail jaq-ai thaq nail daoqma saljial neq, naoq nail yaqyov Ilcav bhai bhi ivq nail ngaol. Aivq neq, naq yaq kovq niil yanq bhai Saqlal-i mail bhao nail ngaol" dai, ge bhiq-a nail ngaol.
22Miqyail neq, Aqbhaqlaqhaq bhai ge bhiq gaq-al nee ngal-aq, dav lai-a nail ngaol.
23Aqbhaqlaqhaq neq, Miqyail-i mail ge bhiq-a nail khe-ai aivq nail yaqyov Ilsaqmeiqlav, aivq nail ilkhaol khe bhao-ai thaq nail yaqkav juq dai khi, phul-i mail ul-ai thaq nail yaqkav juq nail yaqyov juq iqsanl mail, aq-u n-gaol teevq pov taivq-ail bavkov uqjaq oev gil bhiq-a nail ngaol.
24Aqbhaqlaqhaq neq, bavkov uqjaq oev-u phao 99 kovq bhee yaoq nail ngaol.
25Aivq nail yaqyov Ilsaqmeiqlav neq, 13 kovq bhee yaoq nail ngaol.
26Aqbhaqlaqhaq dai khi mail, aivq nail yaqyov Ilsaqmeiqlav neq, teevq n bhai bavkov uqjaq oev-a nail ngaol.
27Aivq nail ilkhaol nee tavq nail yaqyov-aq juq neq, aivq nail ilkhaol nee mail tavq nail yaqyov-aq juq maqkhaiq, phul-i mail ul-ai thaq nail yaqkav juq maqkhaiq, aivq nee mail teevq gaq khe-ai, bavkov uqjaq oev gil-a nail ngaol.
Currently Selected:
Genesis 17: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
