Genesis 18
18
Iqmoeq 18
Daq-i hail gaq lee-a nail ganl
1Heeqphaq Miqyail neq, Aqbhaqlaqhaq bhai Manqleiq nail aqbhaol bhaol ma jiav nail bhai bhi moel-a nail ngaol. N-gaol phao nl tsal kav dee dee khi, Aqbhaqlaqhaq neq, aivq nail haqphal saiqgov govkhoiq bhai jaol-a nail ngaol.
2Aivq maivphaoq gaol lel khi hel daiq-u phao, tsaol-aq hail gaq aivq nail aqjail bhai thul phaol khi jaol nail bhai ya moel-a nail ngaol. Aqyu juq bhai moel-u phao, hav lavq-ail nail dai khi mail, tsaol-aivq-a nail ngaol. A bhai nee ngal-aq, aivq miltsaq bhai gaol beiv khi
3niail hai ge bhiq-a nail ngaol: "Ngaq nail heeqphaq-ol, ngaq-i mail hav lavq nail bhai noeq meeq haq neq, niai teevq yanq jaol lavq yaoq.
4Aqkhil tsiq nail galduq ulcuvq bhi oil leevq lavq yaoq. Aqbhaol niil nail daoqthaoq bhai iqsanl, gaq naq naq kivq nail ngaol.
5Nul juq gaq aol lal khi gailkhaol gaoq dov-ail kivq dai, jaq nail daol nail galduq aqjal micil bhi oil leevq lavq yaoq. Ngaq bhai niail hai bhi nl nail galduq, naoq nail yaqkav nail ilkhaol bhai nalga lee-a nail phaq pevq nail ngaol" dai, ge bhiq-a nail ngaol. Aqyu juq gail, "Aqmeeq nial. Naoq-i mail ge nail khe-ai nl yaoq" dai, ge bhiq-a nail ngaol.
6Aqbhaqlaqhaq neq, haqphal saiqgov lavqkhoel bhai jaol nail Saqlal bha lavqtsail tsaoq bhoel laivq khi, "Lavqtsail mail, khal meeq jaiq nail tsoelthoel hail gaoq oil khi khaqmul lav sav khi mail poiv yaoq" dai, khoel bhiq-a nail ngaol.
7Aqbhaqlaqhaq neq, niaoqnel jaol nail bha tsaol-aivq khi mail, aqgoil khal tsul nail niaoqnel niaoq yaq teevq maol tsel dov khi, aivq nail yaqkav teevq gaq bhai av bhiq-a nail nee ovqtavq, yaqkav al gaq iqsanl, lavqtsail mail teevq maol maol lao-ail nl jaq-a nail ngaol.
8A bhai nee ngal-aq, niaoqnel aqtsil lalhu dai khi, niaoqnel aqtsil maqkhaiq, niaoqnel teevq maol maol lao nail haqjoil jaltsoiq maqkhaiq, daq-i juq nail sivtavq bhai tsiq thaq gai bhiq-a nail ngaol. Aqyu juq, jaq thail thaiq-u phao, Aqbhaqlaqhaq neq, aqjail bhai jiav nail aqbhaol aqhaiq bhai jaol-a nail ngaol.
9Aqyu juq neq, "Naoq nail khaqma Saqlal khaq bha jaol nail-aiq" dai, nal daiq bhiq-u phao, "Haqphal saiqgov lavqkhoel bha jaol naol" dai, Aqbhaqlaqhaq ge kovq bhiq-a nail ngaol.
10Daq-i juq nail lavqkhoel khe teevq gaq neq ge nail: "Naq yaq kovq niil yanq bhai ngal kovq lee-ai haq nail ngaol. Yanq al yanq bhai, naoq nail khaqma Saqlal yaqyov teevq gaq jaol nail ngaol" dai, ge bhiq-a nail ngaol. Aq-u phao, Saqlal neq, aqyu juq nail haoqnaol phao haqphal saiqgov nail govkhoiq bhai jaol khi mail nal daiq nail ngaol.
11Aqbhaqlaqhaq khi mail Saqlal neq, aqkovq al jaiq-ail jiav lal khi Saqlal neq, bhala maq lee dai, pevq ail-aoq nail ngaol.
12Al heel ngel-i mail Saqlal neq, "Ngal neq, joiqmaoq maoq-ail khi, gaq gail gil lai-aoq nail ngaol. Ngaq nail yovjil gail joiqmaoq maoq lai-aoq nail ngaol. Khal hai khi mail jaol tavq nail phao lavqkhiq gaoq tsail heeq" dai, noeq khi hel sil-a nail ngaol.
13Aq-u phao, Heeqphaq Miqyail Aqbhaqlaqhaq bhai ge bhiq-a nail: "Saqlal neq, 'Ngal nii dai aqkovq jiav lal khi mail pultavq, yaq gaoq jaol lee nia-ai haq nail laiq' dai, noeq khi, khul khi mail hel sil nail meeq.
14Heeqphaq Miqyail maq nl nia nail phaq dai, jiav nail laiq. Naq yaq kovq niil yanq bhai, ngal teevq pov gaoq lee nail ngaol. Aq-u phao, Saqlal neq, yaqyov teevq gaq jaol nail ngaol" dai, Aqbhaqlaqhaq bhai ge bhiq-a nail ngaol.
15Saqlal neq, gee sil lal bhiq khi, "Ngal maq hel sil-al" dai, ge bhiq-a nail ngaol. Thail hai ngaol-aoq, Heeqphaq Miqyail neq, "Naol mal dil hel sil-aoq nail ngaol" dai, ge kovq bhiq-a nail ngaol.
Saoldoq meenq nail galduq, Aqbhaqlaqhaq thaoq hal-a nail ganl
16Aqyu juq dov lai khi, Saoldoq meenq bhai moel lal nail jaolduq daqmoe teevq duq bhai kev lai-a nail ngaol. Aqbhaqlaqhaq gail, aqyu juq bhai hevq ha lai nail galduq, tsao thel laivq-a nail ngaol.
17Heeqphaq Miqyail ge nail: "Ngaq-i mail nl-ail nail dai khi, lainq-ai thaq nail juq, Aqbhaqlaqhaq bhai maq ge bhiq dai, maq oil uvq-ail.
18Aivq nail jeq-e neq, eeq dee dee khi, bhaqaoq eeq nail tsaoljeq-e pevq lal nail ngaol. Aivq bhaq da nee miltsaq kovtavq bhai jaol nail jeq-e jaq-a juq iqsanl mail geeqlaoq ya nail ngaol.
19Aivq neq, aivq nail yaqyov juq dai khi, aivq nail phaqyaq ma yaq juq bhai cavq bhi cov bhiq nail lavqkhoel nee, ngaq nail daoq bhai bhi nal daiq khi bhi tsao the nail nee ovqtavq, daol coev dai doevq khi, tsaq nail daol nail phaq bhi nl nail galduq, aivq bhai ngal tsel dov-a nail ngaol. Aqyu juq, al hai nl khi tsao the haq neq, Aqbhaqlaqhaq bhai ngaq-i mail saljial khal jaq-ai thaq nail iqsanl mail, nl bhiq gil nail ngaol" dai, noeq nail ngaol.
20Al heel ngel-i mail, Heeqphaq Miqyail neq, Aqbhaqlaqhaq bhai, "Saoldoq meenq dai khi Gaolmaollav meenq nail ganl bhai kav dee dee nail gul nail aqthel ngal ya gaiq-il. Khul khi mail dai ngal-aq, aqyu juq nail oeqbal neq, al jaiq-ail nl bheeq dee dee nail ngaol.
21Ngaq-i mail ya gaiq nail aqthel niil, aqyu juq-i mail nl nail nee tsaq maq tsaq dai, heeq kivq movq nail ngel-i mail, ngal ail khi hel daiq-ail naol" dai, ge bhiq-a nail ngaol.
22Aqyu juq hail gaq nail lavqkhoel khe nvq gaq neq, Saoldoq nail meenq phao ail-a nail ngaol. Heeqphaq Miqyail neq, Aqbhaqlaqhaq nee mail jaol-ail ceevq-a nail ngaol.
23Aqbhaqlaqhaq neq, jiiv bal laiq khi ge bhiq-a nail: "Naol neq, tsaq nail daoq nail juq bhai haqeiv nail juq nee mail teevq gaq khe-ai, mal dil lav cov bhiq nail khi laiq.
24Meenq thoil meenq bhai tsaq nail daol nail tsaol-aq 50 gaq jaol lao khi mail ngaol-aoq, teevq meenq meenq lao lav cov bhiq naol laiq. Al 50 gaq bhai hel daiq khi meenq bhai maq lav cov mail, maq jaol yaoq-aol laiq.
25Mal dil naol neq, al hai nl nail gaq maq ngel-ail. Tsaq nail daol nail juq bhai haqeiv nail juq nee mail teevq gaq khe-ai, nl bhiq khi lav cov nail gaq iqsanl, maq ngel-ail. Maldil naol neq, thail hai maq nl-ail. Miltsaq teevq heeq heeq lao bhai yalkhaq dal nail gaq neq, tsaq nail daol nail lavqkhoel nee, dal bhiq nail maq ngel-ail laiq" dai, ge bhiq-a nail ngaol.
26Heeqphaq Miqyail neq, "Saoldoq meenq bhai tsaq nail daol nail 50 gaq jaol lao haq neq, aqyu juq bhai hel daiq khi, ngal maq lav cov-ail" dai, ge bhiq-a nail ngaol.
27Aqbhaqlaqhaq teevq pov gaoq ge bhiq-a nail: "Ngal neq, khaqlail dai khi civqbhaol laltsal khe-ai dul khi ngaol-aoq, ngaq nail Heeqphaq bhai gaoq ge kovq tseq-ai haq nail ngaol.
2850 gaq maq jaol dai, 45 gaq jaol-ail jaol-aq, thail hai ngaq gaq loq nail bhaq da nee, teevq meenq meenq lao lav cov nail ngaol laiq" dai, nal daiq bhiq-a nail ngaol.
Heeqphaq Miqyail neq, "45 gaq taivq-ail jaol khi ngaol-aoq, ngal meenq al meenq bhai maq lav cov ail" dai, ge bhiq-a nail ngaol.
29Aqbhaqlaqhaq gaoq ge nail: "40 gaq jaol haq neq, lav cov naol laiq" dai, nal daiq bhiq-a nail ngaol. Heeqphaq Miqyail ge kovq bhiq-a nail: "40 gaq jaol haq neq, ngal meenq al meenq bhai maq lav cov ail" dai, ge bhiq-a nail ngaol.
30Aqbhaqlaqhaq gaoq ge nail: "Heeqphaq-ol, neema thaq phail lavq dei-eiq. Niil aq-il teevq pov gaoq ge movq-ail nial. 30 gaq taivq-ail jaol lao haq thoil-oiq, lav cov naol laiq" dai, nal daiq bhiq-a nail ngaol. Heeqphaq Miqyail ge nail: "30 gaq taivq-ail jaol khi ngaol-aoq, ngal meenq al meenq bhai maq lav cov-ail" dai, ge bhiq-a nail ngaol.
31Aqbhaqlaqhaq teevq pov gaoq ge nail: "Ngaq nail Heeqphaq-ol, ngal maq gee sil dai, naoq bhai teevq pov gaoq hal nail ngaol. 20 gaq taivq-ail jaol lao haq thoil-oiq" dai, gaoq nal daiq bhiq-a nail ngaol. Heeqphaq Miqyail ge nail: "20 gaq taivq-ail jaol khi ngaol-aoq, meenq al meenq bhai maq lav cov-ail" dai ge bhiq-a nail ngaol.
32Haoqnao teevq pov Aqbhaqlaqhaq gaoq nal daiq bhiq-a nail: "Ngaq nail Heeqphaq-ol, ngal teevq pov gaoq nal daiq nail bhai, neema thaq phail lavq dei-eiq. 10 gaq taivq-ail jaol lao haq thoil-oiq" dai, nal daiq bhiq-a nail ngaol. Heeqphaq Miqyail ge nail: "10 gaq taivq-ail jaol khi ngaol-aoq, ngal meenq al meenq bhai maq lav cov-ail" dai, ge bhiq-a nail ngaol.
33Heeqphaq Miqyail neq, Aqbhaqlaqhaq nee mail daoq ge tsaoq gaq khi mail, aivq nail gailkhaol aivq tsao dal laivq-a nail ngaol. Aqbhaqlaqhaq gail, aivq nail haqphal saiqgov bha kovq lal-a nail ngaol.
Currently Selected:
Genesis 18: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
