Genesis 16
16
Iqmoeq 16
Haqgaqlal khi mail Ilsaqmeiqlav
1Aqbhaqlaq nail khaqma Saqlaqiq bhai yaq teevq gaq gail maq jaol-ail. Aivq bhai Haqgaqlal dai khul nail Iljiltuv nail yaqkav teevq gaq jaol nail ngaol.
2Al heel ngel-i mail, Saqlaqiq neq, Aqbhaqlaq bhai ge bhiq-a nail: "Heeqphaq Miqyail neq, ngaq bhai yaq maq bhi jaol lee lavq-il. Ngaq nail yaqkav jaol nail bha ail khi mail, iq thaiq-ail yaoq. Aivq bhaq da nee ngal yaq ya-ail jaol-aq" dai, ge bhiq-a nail ngaol. Aqbhaqlaq gail, Saqlaqiq nail ge nail bhai neema tsaq nail ngaol.
3A bhai nee mail, Saqlaqiq neq, Haqgaqlal bhai aivq nail aqlavq lavqkhoel-ai av bhiq-a nail ngaol. Aqbhaqlaq neq, Khaqnanq milkhaoq bhai 10 kovq jaol khi mail pultavq, Haqgaqlal bhai hevq-a nail ngaol.
4Aqbhaqlaq neq, Haqgaqlal nee mail jaol tavq khi yaq ceiv lai-a nail ngaol. Haqgaqlal neq, aivq yaq phi lai-a nail bhai heeq nia-u phao, Saqlaqiq bhai hel daiq theq lal-a nail ngaol.
5Aq-u phao, Saqlaqiq neq, Aqbhaqlaq bhai ge bhiq-a nail: "Naol bhaq da nee ngal niail hai ya daq-a nail ngaol. Ngal aivq bhai naoq nail aqlavq lavqkhoel-ai av bhiq khi, aivq yaq ceiv lai-a nail bhai heeq nia-u phao, ngaq bhai hel daiq theq lavq-a nail ngaol. Naol dai khi ngaq nail gaiqlaq bhai, Heeqphaq Miqyail yalkhaq bhi dal dei-eiq" dai, ge nail ngaol.
6Aqbhaqlaq ge nail: "Aivq neq, naoq nail yaqkav ngel-i mail, naoq nail aqlavq lavqkhoel bhai jiav nail ngaol. Naol aivq bhai khal hai nl bhiq movq gaoq nl nail, ya nail ngaol" dai, ge bhiq-a nail ngaol. Aq-u phao Saqlaqiq neq, Haqgaqlal bhai khoeq bhiq jiovq bhiq-a nail ngel-i mail, Haqgaqlal aivq jaol nail nee tsaoq dol-aivq-a nail ngaol.
7A bhai nee ngal-aq, Heeqphaq Miqyail nail nqtavq gaqkhoel neq, tsalhail daikav bhai jiav nail ulcuvq laol bev dov nail lovduq teevq duq nail aqjail bhai Haqgaqlal-ai ya moel-a nail ngaol. A bhai neq, Sullav nail meenq bha ail nail gailkhaol ngaol.
8Aq-u phao, nqtavq gaqkhoel al gaq, Haqgaqlal bhai ge bhiq-a nail: "Saqlaqiq nail yaqkav Haqgaqlal-ol, naol khaq bha nee lee khi, khaq bha ail nail-aiq" dai, nal daiq bhiq-a nail ngaol. Haqgaqlal ge nail: "Ngal neq, ngaq nail ilheel pevq nail Saqlaqiq jaol nail nee mail tsaoq dol leevq-a nail ngaol" dai, ge kovq bhiq-a nail ngaol.
9Heeqphaq Miqyail nail nqtavq gaqkhoel ge bhiq-a nail: "Naoq nail ilheel gaq jaol nail bha gaoq kovq lai khi aivq nail kov-uvq bhai jaol lai yaoq" dai, ge bhiq-a nail ngaol.
10Nqtavq gaqkhoel gaoq ge bhiq-a nail: "Naoq-ai nee mail yavq kha lee thaq nail yaq juq bhai gail, maq ge gil tsaol-u kev dai, bhi mao lal nail ngaol.
11Naol yaqyov teevq gaq ya bhao nail ngaol. Heeqphaq Miqyail neq, naoq-i mail haqaoq nl khi meel nail aqthel bhai gaiq-ao nail ngel-i mail, yaqyov al gaq bhai Ilsaqmeiqlav#16.11 Ilsaqmeiqlav Ilsaqmeiqlav dai, ge nail daoqceevq neq, 'Miqyail gaiq-ao nail ngaol' dai, ge movq nail ngaol dai, ya mil bhiq nail ngaol.
12Yaqyov al gaq neq, hel daiq phail nail gaq maq jaol nail haqtsoiq moeqphaq khe-ai dul nail ngaol. Aivq neq, tsaol-aq yaoq gaq yaoq-ao nee bhai, genl dev khi yu iqsanl aivq bhai genl dev lal nail ngaol. Aivq neq, aivq nail aqivq jaqbheq juq nee mail neejiav jiav nail lavqkhoel nee, ya jaol nail ngaol" dai, ge bhiq-a nail ngaol.
13Aq-u phao, Haqgaqlal neq, al hai ge nail Heeqphaq Miqyail bhai Eil Lol-il#16.13 Eil Lol-il Eil Lol-il dai, ge nail daoqceevq neq, ngaq bhai moel nia nail Miqyail dai, ge movq nail ngaol. dai aqmil khul bhiq-a nail ngaol. Al ovqtavq, aivq neq, "Ngaq bhai moel-a nail gaq bhai, ngal ya moel-a nail neq, mal dil ngel naol laiq" dai, iqsanl, ge-a nail ngaol.
14Al heel ngel-i mail, ulcuvq lovduq al duq-ai: "Bheiq Laqhil Lol-il#16.14 Bheiq Laqhil Lol-il Bheiq Laqhil Lol-il dai, ge nail daoqceevq neq, ngaq bhai moel nia nail Miqyail nail ulcuvq lovduq dai, ge movq nail ngaol" dai, mil bhiq-a nail ngaol. Lov duq al duq neq, yaq n n-gaol kev dai, Kaqdeiqsav nail meenq dai khi Bheiq leivq nail meenq gaiqlaq bhai jiav nail ngaol.
15A bhai nee ngal-aq, Aqbhaqlaq neq, Haqgaqlal nee mail yaqyov teevq gaq ya khi, aivq yaqyov al gaq bhai Ilsaqmeiqlav dai, mil bhiq-a nail ngaol.
16Haqgaqlal Ilsaqmeiqlav bhao gaq-u phao, Aqbhaqlaq neq, 86 kovq bhee-aiq nail ngaol.
Currently Selected:
Genesis 16: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
