Genesis 15
15
Iqmoeq 15
Heeqphaq Miqyail Aqbhaqlaq bhai daoqma saljial jaq-a nail ganl
1A bhai nee ngal-aq, Heeqphaq Miqyail neq, Aqbhaqlaq bhai aqhaqlal lavqkhoel nee niail hai phao daiq bhiq-a nail ngaol: "Aqbhaqlaq-ol, thaq gee sil. Ngal naoq nail doeqdaqduq pevq khi, naoq-i mail ya nail kovpavq neq, eeq dee dee nail ngaol" dai, ge bhiq-a nail ngaol.
2Thail hai ngaol-aoq, Aqbhaqlaq ge bhiq-a nail: "Ngaq nail heeqphaq-ol, Heeqphaq Miqyail-ol, ngaq bhai yaqyov teevq gaq-ail, maq jaol nail neq, naoq-i mail ngaq bhai bivq lavq-a nail geeqlaoq iqsanl mail khul nail ganl tsoiq nail-aiq. Daqmaqsail nail meenq khe jaol nail Eillaqsaq neq, ngaq nail jaiqbhoil ovq nail gaq pevq-ail nial.
3Naol ngaq bhai yaqyov teevq gaq iqsanl mail maq bivq lavq nail ngel-i mail, yaqkav al gaq neq, ngaq nail jaiqbhoil ya nail ngaol" dai, ge kovq bhiq-a nail ngaol.
4Aq-u phao, Heeqphaq Miqyail ge nail: "Yaqkav thoil gaq naoq nail jaiqbhoil maq ovq-ail. Naoq nail aqsivq haqjoil pevq nail gaq taivq-ail, jaiqbhoil ya ovq nail ngaol" dai, ge bhiq-a nail ngaol.
5A bhai nee ngal-aq, Aqbhaqlaq bhai lavqniil phao khul dov-aivq khi, "Nqtavq bha gaol lel daiq nail nee ovqtavq, aqgil bhai ge daiq gil kivq haq neq, ge daiq yaoq. Naoq-ai nee mail yavq kha lee thaq nail yaq juq neq, thail hai mao lal nail ngaol" dai, ge bhiq-a nail ngaol.
6Aqbhaqlaq neq, Heeqphaq Miqyail bhai neema thaq tsaol nail ngel-i mail, Heeqphaq Miqyail neq, aivq bhai tsaq nail daol nail gaq dai, saol-nvq bhiq-a nail ngaol.
7A bhai nee ngal-aq, Heeqphaq Miqyail neq, Aqbhaqlaq bhai gaoq ge bhiq-a nail: "Ngal neq, naoq bhai miltsaq niil bivq nail galduq, Khaqlaqdail tsaol-aq jaol nail Ullav meenq bha khul dol leevq-a nail Heeqphaq Miqyail pevq nail ngaol" dai ge bhiq-a nail ngaol.
8Aqbhaqlaq Miqyail bhai ge kovq bhiq-a nail: "Ngaq nail Heeqphaq-ol, Heeqphaq Miqyail-ol, miltsaq niil ngal ya naol dai, khal hai khi mail ya heeq kivq nail-aiq" dai, ge bhiq-a nail ngaol.
9Heeqphaq Miqyail ge bhiq-a nail: "3 kovq bhee lal thaq nail niaoqnel niaoq ma teevq maol, civqmeiv aqma teevq maol, yaol yaol bhuq teevq maol ngal jaol nail bha tseel lavq yaoq. Al ovqtavq, khaoqkhoiq teevq maol dai khi salmil khaoqkhoiq aqyaq teevq maol iqsanl nieil lavq yaoq" dai, ge bhiq-a nail ngaol.
10Aqbhaqlaq neq, Miqyail-i mail khal ge nail khe-ai, jaiqyaq juq bhai tseel lavq-a nail nee ovqtavq, gaoltsi nee mail nvq pav dev pav khi mail, nvq henl bavq thaq gai-a nail ngaol. Thail hai ngaol-aoq, keivq-avq al nvq maol bhai neq, maq dev pav mail bhi jiav-a nail ngaol.
11Niaoqjaoq joelma juq neq, jaiqyaq nail kovtavq bhai bhail thaq lee-u phao, Aqbhaqlaq neq, the-a nail ngaol.
12Nlma ga bhoel-ail nail aqyanq bhai Aqbhaqlaq neq, iq thaiq kov dee deel laivq-a nail ngaol. Aq-u phao, aivq nail kovtavq bhai gee sil lal heeq phaq-ail tsaq nail aqnav, uv thaiq lee bhiq-a nail ngaol.
13Aq-u phao, Heeqphaq Miqyail Aqbhaqlaq bhai ge bhiq-a nail: "Naoq-ai nee mail yavq kha lee thaq nail yaq juq neq, yu nail milkhaoq bha daq-i pevq khi ya jaol nail ngaol dai, heeq kivq yaoq. A bhai aqyu juq 400 kovq bhee dai, yaqkav jiovq khi haq nail aoq nail bhai ya daq nail ngaol.
14Thail hai ngaol-aoq, aqyu juq bhai yaqkav bhi jiovq nail gaq bhai ngal dal bhiq nail ngaol. Al ovqtavq, milkhaoq al khaoq nee mail dov lal-u phao, ildaoq maoqgaiq juq mao dai oil khi mail, dov lal nail ngaol.
15Naol neq, naoq nail aqphiq aqbhal jaol nail bha neesal ovq nail lavqkhoel ya lai nail ngaol. Aqkovq jiav lal khi sil-u phao, ya bhi duq pheeq nail ngaol.
16Naoq-ai nee mail yavq kha lee thaq nail yaq juq, yeel liq yeel bhee dai, yu nail milkhaoq bha jaol khi mail pultavq, milkhaoq niil khaoq bhai ya kovq lal nail ngaol. Khul khi mail dai ngal-aq neq, Aqmaolliv nail tsaol-aq juq, oeqbal teevq bhee teevq lovq nl bhee-u phao, milkhaoq niil khaoq nee mail ngal the dov nail ngaol" dai, ge bhiq-a nail ngaol.
17Nlma ga bhoel-ail khi aqnav nav lai-u phao, moiqkhoiq dov nail miqjaq khaoltsil dai khi, miqjaq tovq nail miqjaq miqthoi neq, dov lal khi haqjoil dev pav-ai thaq nail gaoltsi nee mail, ail ceiv-a nail ngaol.
18Aq-u n-gaol, Heeqphaq Miqyail neq, Aqbhaqlaq nee mail daoqma saljial niail hai jaq tavq-a nail ngaol: "Ngal naoq-ai nee mail yavq kha lee thaq nail yaq juq bhai, Iljiltuv nail laoljaol nee mail Pheqlaqtaq nail laoljaol jaol ma bha kev dai, bivq nail ngaol.
19Jaol duq al juq neq, tsaol-aq niil juq jaol nail bha kev nail ngaol: Keiqnil nail tsaol-aq, Keiqniqsil nail tsaol-aq, Kaqdaqmaolniv nail tsaol-aq,
20Hiltiv nail tsaol-aq, Pheiqliqsil nail tsaol-aq, Leiqphaqinq nail tsaol-aq,
21Aqmaolliv nail tsaol-aq, Khaqnanq nail tsaol-aq, Gillavgaqsil nail tsaol-aq dai khi, Yeiqbhulsil nail tsaol-aq juq ngaol" dai, ge bhiq-a nail ngaol.
Currently Selected:
Genesis 15: aeu
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
