Pédáesh 31

Ákub cha Lábánay kerrá tachit

1Ákubá eshkot ke Lábánay chokk gwashagá ant: “Ákubá may petay sajjahén mál o hasti poshtá kasshetag. Cha may petay málán watá chó sér o hazgári kortag.” 2Ákub sarpad but ke Lábán maná pésari paymá nachárit.

3Gorhá Hodáwandá gón Ákubá gwasht: “Wati pet o pirok o syádáni molká wátarr kan. Man gón taw gón án.” 4Ákubá pa Ráhil o Lyáhá kolawé dém dát ke gyábáná, mani ramagay kahchará byáét. 5Gón áyán gwashti: “Mana gendán ke shomay pet maná pésari paymá nachárit, bale mani petay Hodá gón man gón butag. 6Shomá zánét ke man gón wati sajjahén wák o twáná pa shomay petá kár kortag, 7bale angat shomay petá maná rad dátag o mani mozzi dah randá badal kortag, bale Hodáyá shomay pet naesht ke maná táwán bedant. 8Wahdé Lábáná gwasht: ‘Thekk thekkén pas tai mozza bant,’ sajjahén ramagáni zank o bar thekk thekkéna butant. Wahdé áiá gwasht: ‘Thagár thagárén pas tai mozza bant,’ sajjahén ramagáni zank o bar thagár thagáréna butant. 9É paymá Hodáyá shomay petay ramag pach gept o maná dátant.

10Yakk randé, ramagay wahray mósomá man wábé dist ke man wati sar chest kort o dist ke hamá páchen ke ramagay bozána ráénant,#31:10 Ráénag, bezán pa ápos kanagá swár bayag. thekk o thagárén ant. 11Gorhá Hodáay préshtagá wábay tahá maná gwasht: ‘Ákub!’ Man gwasht: ‘Ji.’ 12Gwashti: ‘Sará chest kan o bechár, ramagay bozáni ráénókén sajjahén páchen thekk o thagárén ant. Man distag ke Lábáná gón taw ché kortag. 13Man Bayt-Élay Hodá án, hamá jágahay Hodá án ke taw ódá chédagéárá rógen per mosht o gón man kawlé kort. Nun pád á, cha é sardhagárá dar á o wati pédáeshi molká wátarr kan.’ 14Ráhil o Lyáhá gwasht: ‘Márá wa nun petay lógá mirásé nést. 15Á márá ham darámadéay hesábá chárit. Áiá márá bahá wa kortag, may baháay zarri ham wártagant. 16Á sajjahén mál ke Hodáyá cha may petá pach gept, allamá mayg o may chokkánig ent. Gorhá hamá paymá bekan ke Hodáyá tará gwashtag.’”

17Gorhá Ákub pád átk, wati jan o chokki oshterán jammáz kortant o 18Paddán-Arámá wati katthetagén sajjahén mál o hastii zort o wati sajjahén ramagi sar dayán kort o dém pa Kanhánay molká wati pet Esákay némagá ráh gept.

19Lábán pasáni chéná#31:19 Pasáni chén, pasáni mudáni chenag o dur kanag. shotagat. Ráhilá wati petay lógay botén Hodá dozzetant. 20Ákubá Lábán Aramái rad dát, háli nadát o cha Lábánay kerrá tatk. 21Ákub gón wati sajjahén mál o hastiá tatk, cha Parátay kawrá gwast o wati démi gón Gelyáday kóhestagén damagá kort.

Lábán Ákubay randá kapit

22Sayomi róchá Lábáná hál raset ke Ákub tatkag. 23Lábáná wati syád zortant o tán hapt róchá Ákubay randá kapt o Gelyáday kóhestagén damagá rasénti. 24Hodá shapá Lábán Aramáiay wábá átk o gwashti: “Habardár! Ákubá hecch magwash, na sharr, na haráb.”

25É wahdá ke Lábán gón Ákubá dochár kapt, Ákubá wati gedán Gelyáday kóhestagén damagá mekk kortagat o Lábán o syádán ham hamódá wati gedán mekk kortant. 26Lábáná gón Ákubá gwasht: “Taw chéá chó kort? Taw maná rad dát o mani jenekk chó jangi bandigán bortant. 27Taw chéá maná rad dát o chérokái tatkay? Chéá maná hálet nadát? Man shomárá pa shádehi gón sawt o kanjari#31:27 Kanjari tablahay dhawlén sázé. o changay sázán rahádag kortagat. 28Taw inchoká ham sabr nakort ke man wati nomásag o jenekkán bechokkán o roksat bekanán. Taw hórh o ahmakén káré kort. 29Man tará ázár dáta kanán, bale dóshi tai petay Hodáyá gón man gwasht: ‘Habardár! Gón Ákubá hecch magwash, na sharr, na haráb.’ 30Taw paméshká shotay ke tará pa wati petay lógá sakk zahir kanagá at, bale taw mani Hodá chéá dozzetant?” 31Ákubá passaw dát: “Maná torset ke taw wati jenekkán pacha geray, 32bale agan taw wati Hodá kaséay kerrá dar gétkant, á koshaga bit. Mani sajjahén mál o hastiá bechár, agan eshán tai chizzé mán, mardománi démá maná péshi dár o bari.” Ákubá nazánt ke é botén Hodá Ráhilá dozzetagant.

33Gorhá Lábáná Ákubay gedán o Lyáhay gedán o doén móledáni gedán patthetant, bale hechi nadist. Wahdé cha Lyáhay gedáná dar átk, Ráhilay gedáná potert, 34bale Ráhilá botén Hodá zortag o wati oshteray lachá#31:34 Lach, bezán mazanén sapté ke bári mána kanant o har yá oshterá laddhanti. kortagatant o wat lachay sará neshtagat. Lábáná sajjahén gedán patthet, bale hecchi nadist. 35Ráhilá gón wati petá gwasht: “Wájah! Zahr mager, man tai démá pád átka nakanán ke mani janéni máhánagáni wahd ent.” Lábáná patthet, bale botén hodái dast nakaptant. 36Ákub zahr gept o Lábáni malámat kort. Gón Lábáná gwashti: “Mani mayár ché ent? Man che gonáh kortag ke taw zahrá zahr mani randá kaptagay? 37Nun ke taw mani sajjahén chizz patthetagant, tará choshén chizzé dast kapt ke taig ent? Agan dast kaptag, mani o wati syád o mardománi démá éri kan. Belli hamá mani o tai paysalahá kanant. 38Man bist sálá tai kerrá butagán. Tai yakk mésh o bozéá nagétkag#31:38 Géjag, bezán cha wahdá pésar jánwaray záyag o némtamánén chokkay árag.. Man tai ramagay yakk gwarándhé nawártag. 39Man hechbar dalwaté tai kerrá nayáwortag ke rastarán jatag o koshtag. Har táwáné ke butag, badal man cha wat porr kortag. Agan yakk chizzé róchá dozzag butag yá shapá, áiay kimmat taw cha man lóthetag. 40É mani hál butag. Róchá maná garmá koshtag o shapá gwahrá. Mani chammáni wáb shotag. 41Tai lógá bist sálá mani hál hamé butag. Man chárdah sál tai doén jenekkáni háterá pa taw kár kortag o shash sál tai ramagáni háterá. Angat taw dah randá mani mozz badal kortag. 42Agan mani petay Hodá, Ebráhémay Hodá o Esákay Hodá#31:42 Asligén Ebráni nebeshtánka gwashit Esákay haybat, bezán hamá Hodá ke Esáká cha áiá torsetag. gón man gón mabutén, allamá taw maná hórk o háligén dastán ráh dátagat, bale Hodáyá mani bazzagi o zahmat distag o dóshi tará neherr o hakkali dátag.”

43Lábáná gwasht: “É jenekk mani jenekk ant, chokk mani chokk o ramag ham mani ramag ant. Harché ke gendagá ay, manig ent. Bale maróchi mani dast gón wati é jenekk o esháni pédá kortagén chokkána narasit. 44Byá, man o taw gón yakdegará ahd o paymáné bandén. Belli é ahd mani o tai nyámá gwáh o sháheda bit.” 45Gorhá Ákubá sengé zort o chédagé addh kort o 46gón wati syádán gwashti: “Seng mocch kanét.” Áyán seng zort o kót#31:46 Kót, bezán sar pa sar kortagén chizz. kortant o hameshiay kerrá wargesh wárt. 47Lábáná eshiay nám Jégar-Sahadutah#31:47 Jégar-Sahadutah Aramái zobánay labzé o máná enti: “Sháhediay kót”. kort o Ákubá Galid#31:47 Galid Ebrani zobánay labzé o eshiay máná ham “Negahpániay borj” ent.. 48Lábáná gwasht: “Maróchi é sengkót manig o tai nyámá sháhedé.” Paméshká é Galid náménag but o 49Lábáná eshiay nám Mespah#31:49 Mespahay máná ent: “Sháhediay borj”. ham kort ke gwashti: “Wahdé man wati ráhá rawán o taw watigá, Hodáwand maná o tará gendit. 50Agan gón mani jenekkán sharr mabay o mani jenekkáni sará dega jan begeray, bell toré kass magendit, bale béhayál mabay ke Hodá maná o tará gendit.”

51Lábáná gón Ákubá chó ham gwasht: “Esh ent sengkót o esh ent hamá chédag ke man watig o tai nyámá mekk kortag. 52É sengkót sháhedé o é chédag ham sháhedé ke man pa tai ázár dayagá cha é sengkótá nagwazán o dém pa taw nayáyán o taw ham pa mani ázár dayagá cha é sengkót o chédagá nagwazay o dém pa mana nayáay. 53Ebráhémay Hodá, Náhóray Hodá, áyáni petay Hodá mani o tai nyámá dádras bát.” Gorhá Ákubá wati pet Esákay Hodáay#31:53 Asligén Ebráni nebeshtánka gwashit Esákay haybat, bezán hamá Hodá ke Esáká cha áiá torsetag námá sawgend wárt. 54Hamódá, kóhestagén damagá korbánigé korti o syád o wáresi waragéá dáwat dátant. Waragá rand shapá hamódá dáshtesh.

55Domi sabáhá, máhallah Lábáná wati jenekk o nomásag chokket o barkat dátant. Padá dar átk o wati lógá per tarret.

Currently Selected:

Pédáesh 31: HPKB

Highlight

Copy