Pédáesh 30

1Wahdé Ráhilá dist ke man pa Ákubá hecch chokk nayáwortag, wati goháray sará hasaddig but. Gorhá gón Ákubá gwashti: “Maná chokk o awlád beday, agan na mana merán.” 2Ákub áiay sará zahr gept o gwashti: “Záná man Hodá án ke tai démon dáshtag ke chokk mayáray?” 3Ráhilá gwasht: “Esh ent mani móled Bellah. Gón eshiá wapt o wáb bekan ke pa man chokk byárit o áiay barkatá maná ham awlád bebit.”

4Gorhá Ráhilá wati móled Bellah pa jani Ákubárá dát o Ákubá gón áiá wapt o wáb kort. 5Bellah lápporr but o pa Ákubá mardénchokké áworti. 6Gorhá Ráhilá gwasht: “Hodáyá mani dádrasi#30:6 Dádrasi, bezán hakkén paysalah, hamá shawr ke cha dádgáhána kayt, dáwari, ensáp. kortag. Mani peryáti gósh dáshtag o maná chokké dátagi.” Paméshká áiay námi Dán#30:6 Dánay labz cha dádrasiay labzá jórh butag o máná enti: “Áiá dádrasi kortag”. kort.

7Ráhilay móled Bellah padá lápporr but o pa Ákubá dega mardénchokké áworti. 8Gorhá Ráhilá gwasht: “Maná gón wati gohárá mazanén jang o jérhahé butag o man katthetag.” Paméshká é chokkay námi Naptáli#30:8 Naptáliay máná ent: “Mani jang”. kort.

9Bale wahdé Lyáhá dist ke man chokk áworta nakanán, wati móled Zelpahi chest kort o pa jani Ákubárá dát. 10Gorhá Lyáhay móled Zelpahá pa Ákubá mardénchokké áwort o 11Lyáhá gwasht: “Chónén wasshén bahté!” Paméshká é chokkay námi Jád#30:11 Jáday máná ent: “Washbahti”. kort. 12Lyáhay móled Zelpahá pa Ákubá dega mardénchokké áwort. 13Gorhá Lyáhá gwasht: “Man sakk gal án. Janénán mani nám kortag ‘Galátun’.” Paméshká chokkay námi Ásher#30:13 Ásheray máná ent: “Gal o shádmán”. kort.

14Gallahay rón o móshay wahdá Ruben shot o dhagáréá lahtén mehrkáhi#30:14 Mehrkáh káhé ke wandhál o risshagi chó mardomi báládá ent. Engrézi zobáná: “mandrake”. dar gétk o pa wati mát Lyáhá áwort. Gorhá Ráhilá gón Lyáhá gwasht: “Cha wati chokkay mehrkáhán maná kammé beday.” 15Bale Lyáhá gwasht: “Taw mani mard bortag, bass naent? Nun mani chokkay mehrkáhán ham pacha geray?” Ráhilá gwasht: “Sharr ent, tai chokkay mehrkáháni mozzá, enshapi Ákub gón taw bwapsit.” 16Gorhá wahdé Ákub bégáhay wahdá cha dhagárá per tarret, Lyáh dhanná áiay démá dar átk o gón áiá gwashti: “Gón man bwaps ke man wati chokkay mehrkáháni badalá tará keréh kortag.” Gorhá á shapá Ákubá gón Lyáhá wapt o wáb kort. 17Hodáyá Lyáhay peryát gósh dásht o Lyáh lápporr but o panchomi randá pa Ákubá mardénchokké áworti. 18Gorhá Lyáhá gwasht: “Man wati móled wati mardárá dát o Hodáyá mani mozz dát.” Gorhá é chokkay námi Issákár#30:18 Issákáray labz cha mozzay labzá jórh butag. kort. 19Lyáh padá lápporr but o shashomi randá pa Ákubá mardénchokké áworti. 20Gorhá Lyáhá gwasht: “Hodáyá maná kimmatién sawgáté bakshátag. Nun mani mard mani ezzatá kant ke man pa áiá shash mardénchokk áwortag.” Gorhá chokkay námi Zebulun#30:20 Zebulunay máná “sawgát o théki” yá “ezzat” ent. kort.

21Moddatéá rand Lyáhá janénchokké áwort o áiay námi Dinah kort. 22Nun Hodá Ráhilay tránagá kapt, áiay némagá delgóshi gwar kort o chokké baksháti. 23Ráhil lápporr but o mardénchokké áworti. Gwashti: “Hodáyá mani kamsharapi dur kortag.” 24Paméshká chokkay námi Issop#30:24 Issopay máná ent: “Á gésh bekanát” o gón dur kanagay labzá ham nazzik ent. kort. Gwashti: “Hodáwand maná dega mardénchokké ham bedayát.”

Ákub máldára bit

25Wahdé Ráhilá Issop áwort, Ákubá gón Lábáná gwasht: “Nun maná razá beday ke wati jenday dhéhá wátarra kanán. 26Pa é jan o chokkánigi ke tai hezmaton kortag, eshán maná beday ke zuránesh o rawán. Taw wata zánay ke man pa taw chinchok kár kortag.” 27Lábáná gwasht: “Maná ezzat beday. Dazbandia kanán hamedá bedár. Man pál#30:27 Pál, bezán láthari, bay o shartbandi, másag. Démay hálay zánag yá gisshénagay háterá pál janaga bit. jatag o maná é sarpadi rasetag ke Hodáwandá pa taigi maná barkat dátag.” 28Padá gwashti: “Wati mozzá begwash, tará dayáni.”

29Ákubá gwasht: “Taw zánay ke man che paymá pa taw kár kortag o tai mál o dalwat man chón sharr dáshtagant. 30Cha mani áyagá pésar tará kammok hastat o nun sakk báz butagant. Har jáh ke man wati pád ér kortag, Hodáwandá tará hamódá barkat dátag. Bale man kadi pa wati jenday lógá káré bekanán?” 31Lábáná jost kort: “Tará ché bedayán?” Ákubá passaw tarrént: “Maná hecch maday, bale agan é yakkén kárá pa man bekanay, gorhá man angat tai ramagay shepánki o páspániá kanán. 32Bell maróchi tai sarjamén ramagáni nyámá gardán. Sajjahén thekk thekkén espétpas o syáhén gwarándh o sajjahén thekk thekkén syahpasán jetá kanán. É mani mozza bant. 33Bándá róch agan hamé mozzá becháray ke taw maná dátag, mani rásti o tachki wat pa man gwáhia dant. Agan taw mani kerrá anchén syahpasé dar gétk ke thekk thekk mabit yá anchén gwarándhé ke rangi syáh mabit, bezán á dozzetagén málé.” 34Lábáná gwasht: “Sharr ent. Anchosha kanén.” 35Á róchi Lábáná sajjahén thekk o thagárén páchen, sarjamén thekk thekkén boz ke espétén neshánesh per at o sajjahén syáhén gwarándh jetá kort o wati mardénchokkáni dastá dát o 36cha Ákubá say róchay ráhá dur bortant. É wahdá Ákub, Lábánay á dega pasán chárénagá at.

37Bale Ákubá espédár, bádám o chenáláni nók borretagén sháharh zort o póst pátk o sháharháni tahay espéti dará kortant ke espétén tal záher bebant. 38Padá pátkagén sháharhi zort o ápdánay tahá ér kortant ke dalwat ke ápá káyant, sháharhesh démá bebant. Wahray#30:38 Wahr, bezán mast, pa jopt bayagá tayár. wahdá, dalwat ke ápá átkant, 39sháharháni démá jopta butant. Paméshká thekk o thagárén chokkesha áwort.

40Ákubá kasánén gwarag jetá kortant o é degaráni démi gón thagárén pas o syáhén pasán kort ke Lábánayg atant. É paymá wati dalwati jetá kortant o gón Lábánay dalwatán hóri nakortant. 41Har wahdá ke zrengén mádagén dalwat wahra butant, Ákubá sháharh áyáni démay ápdánáni tahá éra kortant ke dalwat é sháharháni kerrá jopt bebant. 42Bale hamá pas ke nezór atant, sháharhi áyáni démá éra nakortant. É paymá nezórén pas Lábánay némagá shotant o zrengén Ákubay némagá. 43É dhawlá Ákub sakk sér o ábád but o baláhén ramagáni wáhond but. Golám o móled o oshter o hari ham báz but.

Currently Selected:

Pédáesh 30: HPKB

Highlight

Copy