Piiligu 27

Seema Yisaaka n daa n nafa Yakubu n ŋa

1Yisaaka n daa n ti kurigi, ka bi lee n nyaara nene, dindaso, o booli o bikpeema daana Isawu, “M biya.” O sagi “Mani n ŋa.”

2Niŋi n na, Yisaaka yeli u, “Pimparaŋa m kurigiya, ka bi baŋŋi jemanso m di n kpi. 3Nyisigi n naa e logu ni o piima gaa moo niŋi, a wa ti ku valiga ti ti ma. 4Ka e mari n ŋa valigaa ta, e naag u dugi bindira meesa ti ti ma, m di, ka nafa i poin, ka kpi.”

5Jemanso Yisaaka ni togsira o bii Isawu saani maa, ka o ma Rabeeka gba wumina a zaa nyem. Niŋi n na, Isawu gaa moo puwa, o wa ti kpabi valiga maa ta. 6Niŋi Rabeeka yeli o bii Yakubu, “Nyaasi, m wumi e ba n yetira e beeri Isawu, 7ni o wa ti ku valiga ti dugi bindira meesa ti o di, ka nafa u poin, ka kpi. 8A zu, m biya, yoo tuba nene wumi, ka niŋi seema ni ya n yeli i ŋa. 9Yi dinyaaŋa we buŋkobiri la puwa, a wa ti gbaa bupola ayi ta, m dugi bindira meesa ti e ba, 10e naa bindira maa wa ti ti e ba o di, ka nafa i poin, ka kpi.”

11Niŋi n na, Yakubu yeli o ma Rabeeka, “Ka m beeri niŋa zaa ni mari koba, ka m mi niŋa n ka koba ŋa. 12Ka m ba siisi ma, o ni yeli mani n yomsira u, ka ki nafa ma, ama o ni si ma noori.”

13O ma yeli u, “Cheli naŋgbansiibu maa o niŋi m toori, nyiwune e niŋi seema ni yeli i maa de, wa ti gbaag a ti ti ma.”

14Niŋi n na, Yakubu wa ti gbaa buusi maa ti ti o ma, o dugi bindira meesa, seema gbagba Yisaaka ni kpabira la. 15Ka naa o bii Isawu, so n niŋi kpeema la, bimpilisuma n ba dii pili o sunzo Yakubu. 16Ka lee n naa buusi la gbana muuri Yakubu nuusi ni o nuŋgori, seelasi ni ka koba la. 17O n pili u n ŋa baasi, o naa bindira maa ni paanu so o ni se la paasi.

18Niŋi n na, o dee bindira la gaa o ba saani, ka yeli, “M ba.” O ba sagi, m biya, “Wunbo n na?”

19Yakubu yeli o ba, “Mani Isawu, e bikpeema n na. M niŋi seema e ni yeli ma ni n niŋi la, a zu, nyisigi n zi, a di bindira maa, ka nafa ma.”

20Yisaaka boosi u, “M biya, wula n na e nye e valigaa yoom seema?” O yeli, “Duuma so n niŋi e Naawunni la n ti ma zusuŋŋu.”

21Niŋi n na, Yisaaka yeli u, “Vuu n ta m saani, m siisi i nyee, m bii Isawu gbagba n na ŋa, koo ka wune n na?”

22Yakubu vuu n we o ba saani, o siisi u, ka yeli, “E goo niŋini Yakubu goo, ka e nuusaa mi niŋi Isawu nuusi.” 23O daa n bi tee n baŋŋi u, o niŋa koba la zu, a kpali seema Isawu nuusi koba ni be n na la, a zu, o nafa u. 24Ama, poin ka o nafa u maa, o boosi u ni, “M bii Isawu gbagba n ŋa?” O sagi, “Mm.”

25A zu, Yisaaka yeli u, “Naa moo puu valiga ni bindira maa ta, m di, ka nafa i.” Yakubu naa bindira maa ti ti u, o di, ka naa daseesi gba ti u, o ŋu. 26Niŋi n na, o ba Yisaaka yeli u, “M biya, vuu n ti mugisi ma.”

27Yakubu vuu n wa ti mugisi u, Yisaaka ni wumi o bimpinna maa ŋuwa, o nafa u, ka yeli n ŋa, “Ee, m biyaa si n ŋusirini maa tiŋgbaŋaa Duuma ni nafa. 28Naawunni n ti i saazu magilim, a ti i pubindira ga, halli chi baligu ni buŋŋuura zaa. 29Naawunni o ti balisi ba tumina i, ka durinye dima ba dobira i tiŋŋa. E ni niŋi yidaandaba yi e mabiisi niŋi. Ka niseesi ni si i noori ni nye naŋgbansiibu, ka seesi ni nafa i, ni nye nafa.”

Isawu suusi nafa yi Yisaaka saani

30Yisaaka ni si n nafa Yakubu ti baasira, ka o beeri Isawu yi o moo puu goorim ta. 31Niŋi n na, o gba dugi bindira meesa ti ti o ba, ka yeli u, “M ba, nyisigi n zi, a di m bindira, ka nafa ma.”

32O ba Yisaaka boosi u, “Ŋani n na?” Bii maa yeli, “Mani e bikpeema Isawu.” 33A ku Yisaaka noori, o niŋa dammi u, o boosi, “Ka ŋani mini n go moo, a ku valiga dugi n ti ti ma? M si n dini baasi, ka nafa u, beela ka e ta la. Yamonsi, o ni nye nafa.” 34Isawu n wumi seema o ba n yeli maa, o chaari kpeeŋtiri ni sufusaaŋu, ka yeli o ba, “Nafa m gba, m ba.”

35“E sunzo tee n ti yomsi ma, a deeg e nafa maa.”

36Niŋi n na, Isawu yeli o ba, “O buyi daana n na la, o n puni ma, a jaa, a zu, o yuuri di Yakubu. O daa n dee m dogim kpebilim, ka lee n dee m nafa.” Ka o lee n boosi o ba, “Ama, e bi che nafa maa yinni zaali ma?”

37Yisaaka yeli o bii Isawu, “M tee n naag u loobi e yidaana, ka naag o mabiisi zaa loobi o nachiinsi. O ni nye chi baligu ga, a ni daam ga. Wula n na ma lee n ya niŋi i, m biya?”

38Niŋi n na, Isawu boosi o ba, “M ba, nafaluŋko n na e mari? Nafa m gba.” Ka chaari kpeeŋtiri.

39O ba Yisaaka yeli u, “E ziiziya ni tiŋgbansuŋŋu ni ba wogilim, magilim ki yi saazu ti maag e tiŋgbaŋŋu. 40E tokobi niŋi n na, e ni dolli n dira, ka e ni niŋi e sunzo nachiima. Ama, dindaso zaa e ni zagsi suurisi maa, e ni fa e zu yi o nuusi niŋi.”

Yakubu zo n gaa Leban saani

41Niŋi n na, Isawu chisi Yakubu, a kpali nafa la o ba n nafa u la zu, ka fe n ŋa yi o sufu niŋi. “A ki lee n yuu, ka m ba o kpi, ti kumi o kuuri, kuuri maa nyaaŋa n na ma ni ku m sunzo Yakubu.”

42Rabeeka ni baŋŋi seema Isawu ni le o sufu niŋi, o tumi n booli o bibila daana Yakubu, a yeli u, “E beeri Isawu ya n ku i ni, a yo samini. 43A zu, biya, wumi nene, ka niŋi seema ni ya n yeli i ŋa. Yi kpe yoom, a zo n gaa m sunzodaba Leban saani, a yi Haran tiŋŋa. 44Ka ba o saani daba ayi, e beeri suuri o maa poin. 45Ka o suuri ti maa, m ni tolimi booli i. A kpali, m bi kpabira n koŋŋi ya bayi zaa dindaluŋko.”

46Niŋi n na, Rabeeka yeli o sira Yisaaka, “M sufu bi maa ma, a kpali, Hititi pogiba la zu. Ka Yakubu gba lee n naa Hititi poga, m di kpiya so.”

Currently Selected:

Piiligu 27: hag

Highlight

Copy