Piiligu 28

1Yisaaka booli Yakubu ti nafa u, ka yeli u, “Da pa ti naa Keenan paaligu poga. 2Ama, gaa Mesopoteemiya paaligu, a wa ti kpe e yaadaba Betuwel laanta. Naa poga yi nisaaniŋi, a yi e ma sunzodaba Leban bipunsi puwa. 3Naawunni, kpeeŋu zaa daana, o nafa e kulisigu, a ti ya bidamta. Lala jemani, e ni ti loobi balidamta ba. 4Wune n ni nafa e ni e yaŋsi maa seema o n daa n nafa Ibrahim la, a ti tiŋgbaŋaa loobi e toori, so niŋi e ni be ŋa, wune Naawunni n daa naa n ti Ibrahim la.” 5A zu, Yisaaka ti Yakubu gaari Mesopoteemiya, Leban saani. Leban ba n niŋi Betuwel, so n niŋi Aram nira, ka niŋi Yakubu ni Isawu ma Rabeeka sunzodaba. 6

Isawu lee n naa poga paasi

Isawu wumi Yisaaka ni nafa Yakubu, ka ti o gaa Mesopoteemiya, o wa ti naa poga nisaaniŋi, ka lee n wumi maa o nafa u, ka yeli u, “Da pa ti naa Keenan paaligu poga.” 7Yakubu wumi o ba ni o ma noori ka gaa Mesopoteemiya. 8Isawu baŋŋi maa Keenan paaligu pogiba maa yela bi peri o ba Yisaaka. 9A zu, o gaa Ibrahim bii Isimeel saani wa ti naa o bipuŋŋu Mahalaf, Nebayof sunzopoga, a paasi o pogiseesi o mari la niŋi.

Yakubu zaasim yela a yi Betel

10Yakubu yi Beesiiba wara Haran tiŋŋa. 11O n paa seela, o do niŋi bee o chee, a kpali wuluŋu liya. Ka naa kugiri loobi zukogu kogi n do. 12O zaasi zaasim, a nye darigu n za tiŋŋa wa ti tisi sagbana, ka Naawunni malaakasi duura o niŋi, ka sigira. 13Ka Duuma za n begi darigu maa yi saazu, ka yeli, “Mani n niŋi Duuma la, Ibrahim Naawunni, a ni Yisaaka Naawunni. Tiŋgbaŋŋu so niŋi e ni do ŋa, m ni naag u ti e ni e yaŋsi. 14E yaŋsi ni sagi maa tambisigu yi durinye ŋa puwa, ya ni saligi n gaa wulunliya, wuluŋpusigu, kiŋkagili sagbinni, a ni kiŋkagili sazu. M ni nafa balisi zaa yi durinye ŋa puwa, a dolli e ni e yaŋsi niŋi. 15Teesira, m ni ba e saani, a kogira i seela zaa e n wara, m ni mari i pori n ta tiŋgbaŋaa niŋi. M ki cheli i, ama bunso zaa ni digili noori yeli, m ni niŋi maa niŋini.”

16Jemanso Yakubu ni nyisigi gbeem maa niŋi, o yeli, “Yamonsitiri, Duuma ba kpe, ka ma bi baŋŋi, o lala.” 17Dabeem gbaag u, o yeli, “Kpe yela mari dabeem gbagba. Ka buŋ zaa n lee na n paasi Naawunni dii ni Alizaana dinaŋgbanni.” 18A n chee bee bogufiili, Yakubu naa kugiri la o n kogi la damsi n sabi, ka kpaa kpaam pa o niŋi, a naag u pobi Naawunni nuusi. 19Ka digili nisaaniŋi Betel. Tiŋŋa maa yuuri n daa n niŋi Luzi. 20Yakubu digili noori yeli, “Naawunni, ka e yi ba m saani, a kogira ma yi n cheni ŋa puwa, ka tira ma bindira ni bimpinna, 21ma lee n ti pori n gaari m ba yiri ni alaanfiya, nyini n ni niŋi m Naawunni. 22Teesigu kugiraa ni sabi seela ŋa, ni niŋi e kpeesigu ziya, ka bunso zaa e n ti ma, m ni nyisi a piipii zu ti i.”

Currently Selected:

Piiligu 28: hag

Highlight

Copy