Piiligu 29

Yakubu kpe Leban yiri

1Yakubu lee n gbaa soori ti paa niseesi n ba wuluŋpusigu tiŋgbaŋŋu maa niŋi. 2Niŋi n na, o nye bulugu, ka peeri tulum buta zu do o see, a kpali, bulugu maa n na ba ŋoo n niŋini peeri maa. Kugiyeliŋu n daa pa bulugu maa noori. 3Peeri maa zaa yi ti laŋsi, pekpagiriba maa yi bilimini kugiri la, ka ŋoo koom niŋi peeri maa. Ba yi lee n porini kugiri maa pa bulugu maa noori. 4Yakubu boosi pekpagiriba maa, “M zodima, ya n na ya yi?” Ba yeli u, “Ti yini Haran.” 5O lee n boosi ba, “Ya baŋŋi Naho yaŋŋu Leban?” Ba sagi, “Mm, ti baŋŋi u.” 6Yakubu boosi ba, “O mari alaanfiya?” Ba yeli u, “O mari alaanfiya. Nyaasi, o bipuŋŋu Rachel ni o peeri n chena la.” 7O yeli ba, “Ya nyaasi, wuluŋu na zooya ga, jemani na bi paa maa peeri maa zaa di n laŋsi. Ya ŋoo koom niŋi a, ka mari a pori n gaa diibu ziya.” 8Ba yeli u, “Ti ki tee, ama peeri maa zaa laŋsini poin, ka ti tee n bilimi kugiri maa yi bulugu maa noori, ka ŋoo koom niŋi a.” 9Jemanso Yakubu na n togsira ba saani maa, ka Rachel mari o ba peeri ta, wune n daa kpagiri a.

10Yakubu n nye Rachel ni o nyesiba Leban peeri, o gaa bulugu maa see bilimi kugiri la, ka ŋoo koom niŋi o nyesiba peeri maa. 11Niŋi n na, Yakubu mugisi Rachel, ka kumi, a ni sufupeelimtiri. 12Ka yeli Rachel maa, o niŋini o ba sunzopoga Rabeeka biya. Rachel chee yoom wa ti yeli o ba.

13Leban ni si n wumi Rabeeka biduu Yakubu baaru, o zo yoom ti tuusi u. A ŋaami u tabi o nyaari, ka mugisi u, ka mari u ta laanta, Yakubu yeli u bunso zaa n niŋi. 14Leban yeli u, e niŋini m valiga ni m zeem, Yakubu ba o saani ŋmerigunni.

Yakubu tumi Leban Rachel ni Liya zu

15Leban boosi u, “A kpali e nira n niŋi ma zu, e tumi n ti ma jaga? Yeli ma e sanyoori.” 16Bipunsi bayi n na Leban daa n mari, kpeema daana la yuuri n niŋi Liya, bibila daana la mi yuuri n niŋi Rachel. 17Liya nimbiisi daa n bi niŋi dede, ama Rachel wune daa n veela pogisara ga. 18Yakubu daa n kpabira Rachel, a zu, o yeli u, m ni tumi n ti i yuma ayapoin, ka e naa e bibila daana Rachel ti ma.

19Leban yeli u, “M ni naag u ti i n so, m ni naag u ti dabyindaana. Zi n saani kpe.” 20Yakubu tumi yuma ayapoin, a kpali Rachel zu, ka a ŋmaani maa daasi beela yi o saani, seema o n kpabira Rachel la zu. 21Dindaso, Yakubu yeli Leban, “M tuma la jemani baasiya, cheli m ni e bii Rachel kulisi.”

22A zu, Leban laŋsi tiŋŋa maa niriba zaa, a ti ba dugi poginaagirisim bindira ti ba. 23Ama yiiŋu n zibi, o naa Liya ti Yakubu, o mari u do. 24(Leban naa o guruŋbipuŋŋu Zilipa ti Liya, o niŋi o bipoga.)

25Bee n ti chee Yakubu baŋŋi maa Liya n na. O wa ti boosi Leban, “Bo n na e niŋi ma lala? M tumi i ni, ka e naa Rachel ti ma, wula zu n na e yomsi ma?”

26Leban yeli u, “Ti kpe, ti kaari chisirini bii ni daŋŋi kpeema kulisi. 27Baasi e pogipaali yaniŋisa zaa daba ayapoin nyaaŋa, ka m naa Rachel ti i, ka e lee n tumi n ti ma yuma ayapoin.” 28Yakubu sagi, ka baasi poginaagirisim yaniŋisa maa daba ayapoin maa, Leban naa o bipuŋŋu Rachel ti u o niŋi o poga. 29(Leban naa o guruŋbipuŋŋu Biliha ti Rachel, o niŋi o bipoga.) 30Yakubu mari Rachel gba do, ka kpabira u gaa Liya. Niŋi n na, o lee n tumi yuma ayapoin ti Leban.

31Duuma nye maa, o bi kpabira Liya maa Rachel, o yoog o dogim, ka Rachel niŋi poginyee. 32Liya mari puwa, a dogi biduwa, ka yeli, “Duuma nye m nimbaa, pimparaŋa m sira ni kpabira ma.” A zu, o digili o bii maa yuuri Rubin#29.32 Rubin gbinni n niŋi, nyaasi biduwa..

33O lee n mari puwa, a dogi biduwa, ka yeli, “Duuma na ti ma ni biduwaa, a kpali o wumiya maa m ka kpabira.” A zu, o digili o yuuri Simiyon. 34O lee n maali n mari puwa, a dogi biduwa. Ka yeli, “Pimparaŋa m sira ni vuu n kpari ma, a kpali m dogini biduusi bata ti u.” A zu, o digili o yuuri Livai.

35O lee n maali n mari puwa, a dogi biduwa, ka yeli, “Pimparaŋa wune m ni naa kpeesigu ti m Duuma.” A zu, o digili bii maa yuuri Juuda. Niŋi n na, o dogim tisi.

Currently Selected:

Piiligu 29: hag

Highlight

Copy