Piiligu 26

Yisaaka ni Abimeliki yela

1Jemanso, kom daa n lini paaligu maa, pa kom so n daa n li Ibrahim jemani la, ŋala daa n kurini. Kom maa jemani n na Yisaaka nyisigi n we Filisiti naaba Abimeliki saani yi Gera.

2Niŋi n na, Duuma nyisi o maŋŋa wusi Yisaaka, ka yeli u n ŋa, “Da pa gaa Yijipiti paaligu, ba tiŋgbanso ni yetira i ŋa niŋi. 3Ba kpe paaligu daba ayi, m ni ba e saani, ka nafa i. M ya n pa ni m naŋgbantiibu so ni ti e ba Ibrahim la, m ni naa tiŋgbaŋaa zaa ti e ni e yaŋsi. 4M ni ti e yaŋsi wasi, a zoo maa ŋmeribiisi, m ni kpabira ba yela, ka dolli ba niŋi nafa durinye balisi zaa. 5M ya n niŋini n ŋa, a kpali e ba Ibrahim ni wumi n ti ma, a pa m zaaligusi zaa zu la.”

6A zu, Yisaaka zi Gera 7Rabeeka daa n niŋini pogiso n veela ga, nisaaniŋi dabsi daa n boosira u o yela, o yeli ni o sunzopoga n na. O daa n zorini dabeem, o n di n yeli ba ni o poga n na, ba n di n ku, ka naa poga maa. 8Yisaaka zi nisaaniŋi yuu.

Dindaso Abimeliki Filisiti naaba nyaasi o tokuro niŋi, ka nye Yisaaka ni gbaa o poga Rabeeka kpabirisimtiri. 9Naaba Abimeliki booli Yisaaka, a boosi u, “E poga n niŋi pogaa? Ka wula zu n na, e yeli e sunzopoga n niŋi u?” Yisaaka yeli u, “M feni maa ba ni ku ma kpali o zu.” 10“Bo n na e niŋi ti seema? Ka dabsaa yinni zaa di mari e pogaa do, ti di niŋi yabetintaa.” 11A zu, naaba Abimeliki kpaasi so zaa tuba, ni so zaa ni siisi dabaa ni o pogaa, ni koŋŋi o nyevuri.

Yisaaka loobi bindaana

12Niŋi n na, Yisaaka daa n ko, a buri bini tiŋgbaŋŋu maa niŋi, a niŋi ga, bumburubiluŋko zaa daa niŋini bindira koowa, a kpali Duuma n daa n nafa u zu. 13O daa n loobini bindaana, ka o bini na si n paasira. 14O daa marini naagi, peeri, a ni gurunsi. Binaa zu, o yela daa n marini Filisiti dima pubeerim.

15A zu, ba gbi tana nyetira buluseesi o ba Ibrahim n daa n ti o gurunsi gbi la zaa. 16Dindaso, naaba Abimeliki yeli Yisaaka, “Yi ti puwa, a kpali bo, e kpeeŋu nyaŋŋi ti.” 17Niŋi n na, Yisaaka nyisigi ba puwa, a gaa Gera nantaŋŋu puwa, a wa ti sabi o gbana suga yi niŋi, a zi nisaaniŋi.

18O n gaa n niŋi maa, o lee maali n yaa buluseesi ba n daa n gbi Ibrahim jemani la, ka Filisiti dima daa nyeri a, Ibrahim kum nyaaŋa la, Yisaaka lee n naa yuseesi o ba n daa n digili a la gbagba n digili a. 19Dindaso, Yisaaka gurunsi gbi bulugu yi nantaŋŋu maa puwa, ka nye koom. 20A daa n bi yuu, ka Gera buŋkokpagiriba ni Yisaaka buŋkokpagiriba daa zabira ni, bulugu maa niŋini ba toori. A zu, Yisaaka digili lala bulugu maa yuuri Zabiri.

21Niŋi n na, Yisaaka gurunsi maa lee n gbi bulugu, ba ni Gera buŋkokpagiriba maa lee n mari o naŋgbanchee, Yisaaka digili o yuuri Diŋŋu.

22A kpali ba naŋgbanchee maa zu, Yisaaka nyisigi nisaaniŋi, a wa ti zi zipaali, ka lee n gbi bulupaali. Nisaaniŋi wune, naŋgbanchee daa n lee n ka niŋi, a zu, o digili niŋi yuuri niŋgbirimaasim.

23Ŋama nyaaŋa, o lee n nyisigi n gaa Beesiiba. 24Dindaari maa yiiŋu, Duuma nyisi o maŋŋa wusi u, ka yeli u, “Mani n niŋi e ba Ibrahim Naawunni la, a zu, da zora dabeem, m ni ba e saani, ka nafa i, ka ti e yaŋsi zoo, a kpali m guruŋu Ibrahim zu.” 25Niŋi n na, Yisaaka me sariga daaŋu, ka kpeesi Duuma, ka sabi o gbana suga.

26Dindaso, Abimeliki ni Ahuza, o jinatoora, a ni Fikoli o soojasi kpeema yi Gera ta Yisaaka saani. 27Niŋi n na, Yisaaka boosi ba, “Bo n na ya chena m saani ya ti niŋi? Ni daa n ba ya saani, ya daa n chisi ma ni, ka kari ma yi ya saani.” 28Ba yeli u, “Ti nyeya maa Duuma bani e saani, a zu, ti ta, ti niŋi naŋgbanluŋko, a pe, ka digili noori ti taaba, 29a maa e ki niŋi ti daaŋu zaa, seema ti gba ni daa n bi namsi i, jemanso e n daa n ba ti saani la, ka yi ni niŋgbirimaasim. Ti baŋiya maa, Duuma nafa i ni.”

30Niŋi n na, Yisaaka dugi bindira ga, ba di, ka ŋu. 31A n chee bee bogufiili, ba zaa nyisigi n digili noori ti taaba, ka Yisaaka beeli ba soori, ba mari sufupeelim kuli. 32Dindaari maa gbagba, Yisaaka gurunsi ta o saani ti yeli u, seema ba n gbi bulugu, a paa koom n ŋa. 33Yisaaka daa digili bulugu maa yuuri Siiba, o gbinni n niŋi naŋgbandigiligu. Seema a n di, ba boona tiŋŋa maa Beesiiba n na la, halli zinni.

Isawu pogiba yela

34Isawu daa niŋini yuma pisinaasi poin, ka daa n naa Hititi pogiba bayi, Judifu, Beeri biya, a ni Basemeti, Alon biya. 35Pogiba bayi maa daa ti ni beebu loobi toom ti Yisaaka ni o poga Rabeeka.

Currently Selected:

Piiligu 26: hag

Highlight

Copy