مَرکاس 3

دگه مُنڈێئے دْرهبکشی

(مَتّا 12‏:9‏–14؛ لوکا 6‏:6‏–11)

1دگه رَندے، ایسّا کَنیسَها شت. مردے همۆدا اَت که دستی هُشک و مُنڈ اَت. 2مردمانی چَمّ ایسّایا سکّ اَتنت که اگن ایسّا شبّتئے رۆچا اے مردا دْراه بکنت، گڑا ما آییئے سرا بُهتام#3‏:2 بُهتام، بزان ملامت، تُهمت. جتَ کنێن. 3ایسّایا گۆن مُنڈێن مردا گوَشت: ”بیا، دێما بۆشت.“ 4نون گۆن مردمان گوَشتی: ”شَبَّتئے رۆچا، نێکی کنگ رئوا اِنت یا بدی کنگ؟ زِندئے رَکّێنگ#3‏:4 رَکّێنگ، بزان نِجات دئیگ، بچّێنگ. یا زندئے گرگ؟“ مردم بێتئوار اتنت. 5ایسّایا په زَهر چارتنت، چێا که چه آیانی سِنگدلیا سکّ پَدَرد اَت. گۆن آ مردا گوَشتی: ”دستا شهار دئے!“ آییا دست شهار دات و دستی وشّ و دْراه بوت. 6گڑا پَریسی دمانا ڈنّا در آتکنت و گۆن هیرودیان#3‏:6 هیرودی، بزان هیرودیس بادشاهئے دۆزواه. په ایسّائے کُشگا پندلئے#3‏:6 پندَل، بزان سازِش، رِپک و هُنَر. سازگِش بِندات#3‏:6 بِندات، بزان بُنگێج، شُرو. کرت.

بازێن مردمے ایسّائے رَندگیرَ بیت

(لوکا 6‏:17‏–19)

7ایسّا گۆن وتی مُریدان چه مردمان دور، گوَرمئے لَمبا شت. چه جَلیلا مزنێن رُمبے مردم آییئے رندا رئوان بوت. 8چه یَهودیَه، اورشَلیم، اِدومیَه و اُردُنئے کئورئے آ دستا و چه سور و سئیدونئے چپّ و چاگردا هم بازێن مردمے آییئے کِرّا مُچّ بوت. چێا که آیان اِشکتگ‌اَت که ایسّا چے کنگا اِنت. 9مُچّی مێڑیئے#3‏:9 مێڑی، بزان مزنێن مُچّی و شلوکی. سئوَبا ایسّایا گۆن مُریدان گوَشت: ”بۆجیگے تئیار کنێت که چه مردمانی مُچّیا دور ببێن.“ 10آییا بازێن مردمے دْراه کرتگ‌اَت، پمێشکا نادْراهێن مردم تێلانک دئیان و دێما کِنزان اَتنت که ما ایسّایا دست بجنێن. 11جِنّی نادْراهان هر وهدا که ایسّا دیست، آییئے پادانَ کپتنت، کوکّارِشَ کرت و گوَشتِش: ”تئو هُدائے چُکّ ائے.“ 12ایسّایا کَڈّنَ کرتنت که کَسّا هال مدئیێت.

دوازده کاسِدئے گچێن کنگ

(مَتّا 10‏:1‏–2؛ لوکا 6‏:12‏–16)

13رَندا، ایسّا کۆهئے سرا سر کپت و هما مردم که آییا لۆٹت که بیاینت، تئواری کرتنت و آ ایسّائے کِرّا آتکنت. 14ایسّایا دوازده کَس گچێن کرت و وتی کاسِد نامێنتنت که گۆن آییا همراه ببنت و آیان په وشّێن مِستاگئے جارئے جنگا رئوان بدنت. 15جِنّ کَشّگئے اِهتیاری هم داتنت. 16اے دوازدهێن کاسدانی نام اِش اَنت:

شَمون که ایسّایا آییئے دومی نام، ”پِتْرُس“#3‏:16 یونانی زبانا، ”پِتْرا“ سِنگێن کۆه و تَلارا گوَشنت و ”پِتْرُس“ ڈۆکا گوَشنت. کرت،

17زِبْدیئے چُکّ آکوب و آکوبئے برات یوهَنّا که ایسّایا آیانی نام ”بو آنِرگێس“، بزان گْرندئے چُکّ کرت،

18اَنْدْریاس،

پیلیپُس،

بَرتولوما،

مَتّا،

توما،

هَلْپیئے چُکّ آکوب،

تَدّا،

سَرمچارێن شَمون#3‏:18 بازێنے گُمانَ کنت که سرمچارئے مانا اِش اِنت: شَمون یَهودیانی یکّ دینی سیاسی پارٹیێئے باسک بوتگ که رومیانی دێما اۆشتاتگ. و

19یَهودا اِسْکَریوتی که رَندا ایسّایی دْرۆهِت#3‏:19 درۆهگ، بزان همراهداری نکنگ، هلاپا رئوگ. اربی و پارسیا ”خیانت“. و دژمنانی دستا دات.

ایسّا و بِلزَبول

(مَتّا 12‏:22‏–32؛ لوکا 11‏:14‏–23)

20رَندا، ایسّا لۆگێا شُت. همینچُک مردم پدا آتک و مُچّ بوت که ایسّا و مُریدان نان ورَگئے مۆه#3‏:20 مۆه، بزان وهد، پُرست، مۆکل، وار و گێگ. هم نبوت. 21ایسّائے سیاد و وارس که سَهیگ بوتنت، آییئے رندا آتکنت، چێا که لهتێنا گوَشتگ‌اَت که ایسّا سرِ وت نه‌اِنت. 22چه اورشَلیما آتکگێن شَریَتئے زانۆگران گوَشتگ‌اَت که ایسّایا جِنّ پِر و گۆن جِنّانی سردار بِلزَبولئے زۆرا جِنّانَ کَشّیت. 23ایسّایا اے مردم لۆٹاێنتنت، مِسالے دات و گوَشتی: ”شئیتان چۆن شئیتانا کَشّتَ کنت؟ 24اگن مُلکێا ناتِپاکی ببیت، آ مُلک برجاهَ نمانیت و 25اگن لۆگێا ناتِپاکی ببیت، آ لۆگ برجاهَ نمانیت. 26همے ڈئولا، اگن شئیتان وتی جندئے هلاپا پاد بیئیت و گۆن وت ناتپاک ببیت، اۆشتاتَ نکنت، هلاسَ بیت. 27زۆراورێن مردمێئے لۆگا هچکَس پُترت و پُل و پانچ#3‏:27 پُل و پانچ، بزان زۆربُرد، لُٹّ و پُل. کرتَ نکنت، تان وهدے که آ زۆراورێن مردما مگیپت و مبندیت. رَندا آییئے لۆگا پُل و پانچ کرتَ کنت. 28شمارا راستێنَ گوَشان، مردمانی سجّهێن گناه و کُپر بَکشگَ بنت، 29بله هما که پاکێن روهئے بارئوا کُپرَ کنت، هچبر بَکشگَ نبیت و اَبدی گُنهکارَ مانیت.“ 30ایسّایا پمێشکا اے هبر کرت که آ گوَشگا اَتنت: ”ایسّایا جِنّے پِر اِنت.“

ایسّائے مات و برات

(مَتّا 12‏:46‏–50؛ لوکا 8‏:19‏–21)

31ایسّائے مات و برات آتکنت و ڈنّا اۆشتاتنت، مردمے دێمِش دات که ایسّایا تئوار کن. 32ایسّائے چپّ و چاگردا باز مردم نِشتگ‌اَت، ایسّااِش هال دات: ”تئیی مات و برات ڈنّا اۆشتاتگ‌اَنت و ترا لۆٹگا اَنت.“ 33ایسّایا آیانی پَسّئوا#3‏:33 پَسّئو، بزان جواب جُست کرت: ”منی مات و برات کئے اَنت؟“ 34پدا ایسّایا گِرداگِرد نِشتگێن مردمانی نێمگا چارت و گوَشت: ”منی مات و برات اِش اَنت! 35هما مردم که هُدائے واهگ#3‏:35 واهگ، بزان لۆٹ، تلَب، هاجَت. و رَزائے سرا اَملَ کنت، منی مات و گهار و برات هما اِنت.“

Currently Selected:

مَرکاس 3: HPKB

Highlight

Copy