مَرکاس 3

دگه مُنڈێئے دْرهبکشی

(مَتّا 12‏:9‏–14؛ لوکا 6‏:6‏–11)

1دگه رَندے، ایسّا کَنیسَها شت. اۆدا مردے هست‌اَت که دستی هُشک و مُنڈ اَت. 2نِشتگێن مردم ایسّائے اِنتزار و وَدارا اَتنت که اگن اے مردئے دستا شَمبِهئے رۆچا دْراه بکنت، گڑا ما آییئے سرا شَبَّتئے رۆچا کار کنگئے بُهتاما#3‏:2 بُهتام، بزان ملامت، تُهمت. جتَ کنێن. 3ایسّایا گۆن مُنڈێن مردا گوَشت: ”بیا دێما بۆشت.“ 4رَندا گۆن آ نِشتگێن مردمان گوَشتی: ”شَبَّتئے رۆچا، نێکی کنگ رئوا اِنت یا بدی؟ انسانئے زِندئے رَکّێنگ#3‏:4 رَکّێنگ، بزان نِجات دئیگ، بچّێنگ. یا کُشگ و گار کنگ؟“ آ بێتئوار بوتنت. 5ایسّایا په زَهر چارتنت، چێا که چه آیانی سِنگدلیا سکّ پَدَرد بوت. گۆن آ مردا گوَشتی: ”دستا شهار دئے!“ آییا دست شهار دات و دستی وشّ و دْراه بوت. 6گڑا پَریسی ڈنّا شتنت و په ایسّائے کۆشارێنگا گۆن هیرودیان#3‏:6 هیرودی، بزان هیرودیس بادشاهئے دۆزواه. شئور و سَلاهِش بُنگێج کرت.

بازێن مردمے ایسّائے رَندا راهَ گیپت

(لوکا 6‏:17‏–19)

7ایسّا چه مردمان دور، گۆن وتی مریدان گوَرمئے لَمبا شت. بازێن جَلیلی مردمے آییئے پدا رئوان بوت. 8چه یَهودیَه، اورشَلیم، اِدومیَه و اُردُنئے کئورئے آ دستا هم بازێن مردمے مُچّ بوت، سور و سئیدونئے چپّ و چاگردئے نندۆک هم آتکنت. چێا که آیان ایسّائے مۆجزهانی بارئوا اِشکتگ‌اَت. 9ایسّایا گۆن مریدان گوَشت، بۆجیگے په آییا تئیار بکننت تانکه چه بازێن مردمانی مُچّیئے اَنگِرّ#3‏:9 اَنگِرّ کنگ، بزان چَپّ و چاگِردا گِرَگ، پارسیئے محاصره. و آشۆپا دور ببیت. 10آییا بازێن مردمے وشّ و دْراه کرتگ‌اَت، پمێشکا نادْراهێن مردم په آییئے دست پِر کنگا، تێلانک دئیان، دێما کِنزان اَتنت. 11همایان که جِنّ پِر اَت، وهدے ایسّااِش دیست آییئے پادان کپتنت، کوکّارِش کرت و گوَشتِش: ”تئو هُدائے چُکّ ائے.“ 12ایسّایا هُکم داتنت: ”گۆن کَسّا مگوَشێت من کئے آن.“

دوازده هاسێن کاسِدئے گچێن کنگ

(مَتّا 10‏:1‏–2؛ لوکا 6‏:12‏–16)

13رَندا، ایسّا کۆهئے سرا سر کپت و چه وتی مریدان لهتێنی همۆدا لۆٹت و آ ایسّائے کِرّا آتکنت. 14ایسّایا چه آیان دوازده کَس گچێن کرت و وتی هاسێن کاسِد نامێنتنت، تانکه گۆن آییا همراه ببنت و آیان په وشّێن مِستاگئے شِنگ کنگا رئوان بکنت. 15جِنّ کَشّگئے اِهتیاری هم داتنت. 16آ دوازدهێنانی نام اِش اَنت: شَمون که ایسّایا آییئے دومی نام، ”پِتْرُس“#3‏:16 یونانی زبانا، ”پِتْرائے“ مانا ”تَلار“ اِنت. پِر بست، 17زِبْدیئے چُکّ، آکوب و آییئے برات یوهَنّا که ایسّایا ”گْرند و گِرۆکئے چُکّ“ نام پِر بستنت، 18اَنْدْریاس، پیلیپُس، بَرتولوما، مَتّا، توما، هَلْپیئے چُکّ آکوب، تَدّا، سَرمچارێن شَمون#3‏:18 بازێنے گُمانَ کننت که سرمچارئے مانا اِش اِنت: شَمون یَهودیانی یکّ دینی سیاسی پارٹیێئے باسک بزان اُزْو بوتگ که رومیانی دێما اۆشتاتگ. و 19یَهودا اِسْکَریوتی که رَندا ایسّایی دْرۆهگی#3‏:19 درۆهگ، بزان همراهداری نکنگ، هلاپا رئوگ. اربی و پارسیا ”خیانت“. و دژمنانی دستا دئیگی اَت.

ایسّا و بِلزَبول

(مَتّا 12‏:22‏–32؛ لوکا 11‏:14‏–23)

20رَندا، ایسّا لۆگا آتک و اۆدا مردم همینچُک باز اَت که ایسّا و آییئے مریدان ورگئے مۆه هم نرَست. 21وهدے آییئے سیاد و وارس سَهیگ بوتنت، آییئے برگا آتکنت، چێا که لهتێنا گوَشتگ‌اَت که آ سار نه‌اِنت. 22چه اورشَلیما آتکگێن شَریَتئے زانۆگران هم اَنچُش گوَشتگ‌اَت که ایسّایا جِنّ پِر و گۆن جِنّانی سردار بِلزَبولئے سرۆکیا، جِنّانَ کَشّیت. 23گڑا ایسّایا آ لۆٹتنت، مِسالی دات و گوَشتی: ”شئیتان، چۆن شئیتانا کَشّت و در کرتَ کنت؟ 24اگن یکّ مُلکێا ناتِپاکی ببیت، آ مُلک برجاهَ نمانیت و 25اگن یکّ لۆگێئے مردم وت‌مان‌وت ناتِپاک ببنت، آ لۆگ هم پَشتَ نکپیت. 26همے ڈئولا، اگن شئیتانئے وتی جندئے هلاپا بۆشتیت، گار و بێگواهَ بیت. اے آییئے هلاسی اِنت. 27یکّ زۆراورێن مردمێئے لۆگا هچکَسَ نپُتریت و آییئے لۆگا پُل و پانچ#3‏:27 پُل و پانچ، بزان زۆربُرد، لُٹّ و پُل. کرتَ نکنت، تان وهدے که هما زۆراورێن مردما مگیپت و مبندیت. رَندا آییئے لۆگا پُل و پانچ کرتَ کنت. 28باور کنێت که مردمانی گناه و کُپر بَکشگ بنت، 29بله هما که هُدائے پاکێن روهئے هِلاپا کُپرَ کنت، هچبر پهِلّ کنگَ نبیت و اَبدی گُنهکارَ مانیت.“ 30ایسّایا پمێشکا چُش گوَشت که آ گوَشگا اَتنت، ایسّایا جِنّے سرا اِنت.

ایسّائے مات و برات

(مَتّا 12‏:46‏–50؛ لوکا 8‏:19‏–21)

31ایسّائے مات و برات آتک و ڈنّا اۆشتاتنت، کُلئو و پئیگامِش رئوان دات که ایسّا آیانی کِرّا بیئیت. 32بازێن مردمے آییئے چپّ و چاگردا نِشتگ‌اَت و هالِش دات: ”تئیی مات و برات ڈنّا اۆشتاتگ و ترا لۆٹنت.“ 33ایسّایا آیانی پَسّئوا جُست کرت: ”منی مات و برات کئے اَنت؟“ 34نون ایسّایا نِشتگێن مردمانی نێمگا چارت و گوَشتی: ”منی مات و برات اِش اَنت! 35آ که هُدائے واهگ و رَزائے سرا کارَ کننت، هما منی مات و برات و گهار اَنت.“

Currently Selected:

مَرکاس 3: HPKB

Highlight

Copy