مَتّا 21

اورشلیما ایسّایا وشّاتکَ کننت

(مَرکاس 11‏:1‏–11؛ لوکا 19‏:28‏–38؛ یوهَنّا 12‏:12‏–15)

1وهدے ایسّا و آییئے مُرید اورشَلیمئے نزّیکّا رستنت و زئیتونئے کۆها بئیت‌پاجیئے مێتگا آتکنت، ایسّایا دو مُرید رئوان دات و 2گوَشتنتی: ”دێمی مێتگا برئوێت، اَنچُش که اۆدا رَسێت، هَرے گِندێت که بستگ و کُرّگی هم گۆن اِنت. آیان بۆجێت و په من بیارێت. 3اگن کَسێا گۆن شما چیزّے گوَشت، بگوَشێت که واجها پَکار اَنت و دَمانا راهِشَ دنت.“#21‏:3 یا که: واجها پکار اَنت. گڑا واهند دنتِش. 4اے ڈئولا نبیئے کُرتگێن اے هبر راست و سَرجم بوت:

5 ”گۆن سَهْیونئے جنکّا بگوَشێت:

’تئیی بادشاه په تئو پێداک اِنت،

بێشان و بێکِبرے، کُرّگێا بزان کسانێن هَرێا سوار اِنت.‘“ # 21‏:5 زَکَریا نبیئے کتاب 9‏:9. سَهْیون کۆهے که اورشَلیمئے شهرئے بُنرِد اے کۆهئے سرا اێر کنگ بوتگ. سَهْیونئے جنکّ، بزان اورشَلیمئے مردم.

6گڑا مُرید شتنت و هما پئیما که ایسّایا گوَشتگ‌اَت، هما ڈئولا کرتِش. 7آیان هر و کُرّگ آورتنت، وتی شال و کباهِش هرانی پُشتا اێر کرتنت و ایسّا سوار بوت. 8بازێنێا وتی شال و کباه راهئے سرا چێرگێجان کرتنت، دگه بازێن مردمێا درچکانی ٹال و تاک بُرِّت و راهئے سرا اێر کرت. 9رُمبا، ایسّائے دێمئے و پُشتئے مردم کوکّار کنانا گوَشگا اَتنت:

”هوشیانا،#21‏:9 هوشیانا، بزان ”مارا انّون برَکّێن“. او داوود بادشاهئے چُکّ!

مبارک اِنت هما که هُداوندئے ناما کئیت،

هوشیانا، بُرزین اَرشا.“

10وهدے ایسّا اورشَلیما رَست، گڑا شۆر و شارے مَچِّت. سجّهێن شهر جُستا اَت ”اے کئے اِنت؟“ 11مُچّیئے مردمان گوَشت: ”اے هما نبی ایسّا اِنت. جَلیلئے شهر ناسِرَهئے مردمے.“

چه مزنێن پرستشگاها سئوداگرانی در کنگ

(مَرکاس 11‏:15‏–18؛ لوکا 19‏:45‏–48)

12ایسّا مزنێن پرستشگاها شت و چه اۆدا سئوداگر و گِراکی#21‏:12 گِراک، بزان هما که چیزّے بها گیپت. گَلّێنت#21‏:12 گلّێنَگ، بزان تاچێنَگ، دَر کنگ، دور راه دئیگ. و در کرتنت. سَرّاپانی#21‏:12 سَرّاپ، بزان هما مردم که زَرّ بها زوریت و زَرّ بَها کنت. ٹێبَل#21‏:12 ٹێبل، بزان مێز، مزنێن چارپادگ. و کپۆت بها کنۆکانی کُرسی‌ای چَپّی کرتنت. 13گوَشتی: ”هُدائے کتابا نبشته اِنت: منی لۆگ دْوا کنگئے جاگه گوَشگَ بیت،#21‏:13 اِشئیا نبیئے کتاب 56‏:7. بله شما ڈُنگانی پَناهگاهے کرتگ.“

14مزنێن پرستشگاها، بازێن کۆر و لَنگے ایسّائے کِرّا آتک و آییا دْراه کرتنت. 15وهدے مزنێن دینی پێشوا و شَریَتئے زانۆگران ایسّائے مۆجزه و اَجِکّایی کار دیستنت و اے هم دیستِش که پرستشگاها چُکّ په کوکّار ”هوشیانا، او داوود بادشاهئے چُکّ“ گوَشگا اَنت، زَهر گپتنت و 16چه ایسّایا جُستِش کرت: ”اِشکنگا ائے اے چُکّ چے گوَشگا اَنت؟“ گوَشتی: ”هئو! بله شما هچبر نئوانتگ که:

’تئو وتی ستا و سنا چُکّ و شیرمِچێن نُنُّکانی دپا هم داتگ

که ترا ستا بکننت‘؟“#21‏:16 زَبور 8‏:2.

17نون ایسّایا آ یله کرتنت و چه شهرا در آتک و بئیت‌اَنیائے مێتگا شت و همۆدا وتی شپی رۆچ کرت.

اِنجیرئے درچکئے هُشک بئیگ

(مَرکاس 11‏:12‏–14، 20‏–24)

18وهدے ایسّا سباها ماهلّه پِر ترّگ و شهرئے نێمگا رئوگا اَت، گُژنَگ بوت. 19راهئے سرا اِنجیرئے درچکے دیستی، آییئے نزّیکّا شت بله اَبێد چه تاکا دگه هچّی ندیست. گڑا گوَشتی: ”پدا هچبر بورّ و بَر مکناتئے.“ درچک هما دمانا هُشک بوت. 20مُریدان که دیست، هئیران بوتنت. جُستِش کرت: ”اے دْرچک دَمانا چۆن هُشک بوت؟“ 21ایسّایا پَسّئو دات: ”شمارا راستێنَ گوَشان، اگن شمارا ایمان ببیت و دلا شکّ مئیارێت، گڑا هما ڈئولا که گۆن اِنجیرئے درچکا بوت، شما هم اَنچُش و اَنگت گێشتر کرتَ کنێت. اگن شما اے کۆها بگوَشێت که وتا چه اِدا چست کن و دریایا دئور بدئے، گڑا همے ڈئولا بیت. 22اگن شمارا باوَر ببیت، هرچے که وتی دْوایانی تها لۆٹێت، شمارا دئیگَ بیت.“

ایسّائے اِهتیار

(مَرکاس 11‏:27‏–33؛ لوکا 20‏:1‏–8)

23هما وهدا که ایسّا مزنێن پرستشگاها شت و تالیم دئیگا لگّت، مزنێن دینی پێشوا و کئومئے کماش آییئے کِرّا آتکنت و جُستِش کرت: ”تئو گۆن کجام هَکّ و اِهتیارا اے کارانَ کنئے؟ کئیا ترا اے اِهتیار داتگ؟“ 24ایسّایا آیانی پَسّئوا گوَشت: ”منا هم چه شما جُستے هست، اگن منی جُستئے پَسّئوا بدئیێت، گڑا من شمارا گوَشان که گۆن کجام هَکّ و اِهتیارا اے کارانَ کنان. 25یَهیایا چه کجا پاکشۆدی دئیگئے اِهتیار رَستگ‌اَت، چه آسمانا یا چه انسانئے نێمگا؟“ آیان وت‌مان‌وتا شئور و سَلاه کرت و گوَشتِش: ”اگن بگوَشێن چه آسمانا، گڑا مارا گوَشیت: ’پرچا شما آییئے سرا باور نکرت؟‘ 26اگن بگوَشێن چه انسانئے نێمگا، گڑا چه مردمان بتُرسێن، چێا که سجّهێن مردمانی دلا یَهیایا نبیے.“ 27پمێشکا پَسّئواِش دات: ”ما نزانێن.“ ایسّایا گوَشت: ”گڑا من هم شمارا نگوَشان که گۆن کجام هَکّ و اِهتیارا اے کارانَ کنان.“

دو چُکّئے مِسال

28”نون شما چے گوَشێت؟ مردے هست‌اَت، آییئے دو بَچّ اَتنت. وتی مسترێن چُکّئے کِرّا شت و گوَشتی: ’او منی چُکّ! مرۆچی برئو و منی انگوری باگا کار کن.‘ 29جوابی دات: ’منَ نرئوان،‘ بله رَندا پشۆمان بوت و شت. 30گڑا دومی چُکّئے کِرّا شت و همے ڈئولا گوَشتی. آییا جواب دات: ’شَرّ، منی واجه! منَ رئوان،‘ بله نشُت. 31چه اے دوێنان کجام چُکّا وتی پتئے هبر زرت؟“ آیان پَسّئو دات: ”ائولیا.“ ایسّایا گۆن آیان گوَشت: ”شمارا راستێنَ گوَشان، سُنگی و مالیاتگیر و بَدکارێن جَنێن چه شما پێسر هُدائے بادشاهیا رئونت. 32چێا که یَهیا پهرێزکاریئے راها شمئے کِرّا آتک، بله شما آییئے سرا باوَر نکرت. سُنگی و بَدکارێن جنێنان آییئے سرا باور کرت و شما اے چیزّ گۆن وتی چمّان دیست، بله اَنگت شما تئوبه نکرت و آییئے سرا باور نکرت.

گَندگێن باگپانانی مِسال

(مَرکاس 12‏:1‏–12؛ لوکا 20‏:9‏–19)

33دِگه یکّ مِسالے گۆش دارێت: زمیندارێا انگوری باگے اَڈّ کرت و آییئے چپّ و چاگردا پَلّے بستی. په انگورانی شیرگئے گِرگا کَلّے جتی و په نِگهپانیا بُرجے هم بستی. پدا باگی په کُننده‌کاری#21‏:33 کُننده‌کاری، بزان پئیمانکاری، ٹێکه. لهتێن باگپانئے دستا دات و وت سپرێا شت. 34وهدے انگورئے مۆسم بوت، په وتی بهرئے گرَگا، هِزمتکاری باگپانانی کِرّا راه داتنت. 35بله باگپانان آییئے هِزمتکار گپتنت، کسے لَٹّ و کُٹِّش کرت، کسے جت و کُشتِش و کسے سِنگسارِش کرت. 36پدا چه پێسریگێنان گێشتر هِزمتکاری راه دات، بله باگپانان گۆن اِشان هم همے ڈئولا کرت. 37گُڈسرا وتی چُکّی راه دات. گوَشتی بلکێن منی چُکّئے اِزّتا کننت. 38بله وهدے باگپانان آییئے چُکّ دیست، وت‌مان‌وتا گوَشتِش: ’میراسدار همِش اِنت، بیاێت اِشیا کُشێن و اِشیئے میراسا بَرێن.‘ 39گڑا گپت و چه باگا ڈنّ برت و کُشتش. 40نون وهدے باگئے واهُندَ کئیت، گۆن اے باگپانان چے کنت؟“ 41آیان پَسّئو دات: ”اے بَدکارێن باگپانان گار و گُمسارَ کنت و باگا اَنچێن باگپانانی دستا دنت که آییئے بهرا په وهدَ دئینت.“ 42ایسّایا چه آیان جُست کرت: ”شما هُدائے پاکێن کتابان هِچبر نئوانتگ:

آ سِنگ که بان‌بَندان # 21‏:42 بان‌بَند هما اِنت که لۆگئے بندگا زانتکار اِنت. رد کرت

هما سِنگ بُنهِشت # 21‏:42 بُنهِشت، بزان لۆگئے ائولی هِشت یا سِنگ. بوت.

اے هُداوندئے کار اِنت و

مئے چمّان پُرکَمال اِنت.“ # 21‏:42 زَبور 118‏:22‏–23.

43”پمێشکا شمارا گوَشان که هُدائے بادشاهی، چه شما پَچ گِرگَ بیت و اَنچێن کئومێا دئیگَ بیت که آییئے بَر و سَمرا کاریت. 44هرکَس که اے سِنگئے سرا کپیت، ٹُکّر ٹُکّرَ بیت و سِنگ که کسێئے سرا کپیت، آییا هورتَ کنت.“#21‏:44 لهتێن دَزنبشتا بَند 44 نێست.

45وهدے مزنێن دینی پێشوا و پَریسیان ایسّائے مِسال اِشکتنت، سرپد بوتنت که مئے بارئوا هبرا اِنت. 46لۆٹتِش ایسّایا دَزگیر بکننت، بله چه مردمانَ تُرستِش، چێا که مردمانی دلا ایسّا نبیے اَت.

Currently Selected:

مَتّا 21: HPKB

Highlight

Copy