مَتّا 20

مُزّورئے مُزّ

1آسمانی بادشاهی، باگێئے هما واهُندئے پئیما اِنت که سباها ماهلّه در کپت که مُزّور دَر بگێجیت و وتی انگوری باگا په کار کنگا دێم بدنت. 2آییا مُزّ رۆچے یکّ دینارے گیشّێنت و مُزّور باگا رئوان داتنت. 3کِساس سئے ساهتا رَند#20‏:3 اَسلیگێن یونانی نبشتانکَ گوَشیت: ”سئیمی ساهتا“، بزان ساهت نُها. یَهودیانی رۆچئے هساب، ساهت سُهبئے شَشا بُنگێجَ بوت. در آتک و دیستی که دگه لهتێن مردم بازارا بے کار و رۆزگارا اۆشتاتگ. 4گوَشتی: ’شما هم برئوێت، منی باگا کار کنێت. هرچے که شمئے هَکَّ بیت، شمارا دئیان.‘ 5گڑا آ شتنت. نێمرۆچئے وهدا#20‏:5 اَسلیگێن یونانی نبشتانکَ گوَشیت: ”ششمی ساهتا“. و دێم په بێگاها#20‏:5 اَسلیگێن یونانی نبشتانکَ گوَشیت: ”نُهمی ساهتا“، بزان ساهت سئیا. پدا ڈنّا در آتک و اَنچُشی کرت. 6رۆزَردئے نزّیکّا#20‏:6 اَسلیگێن یونانی نبشتانکَ گوَشیت: ”یازدهمی ساهتا“، بزان ساهت پنچا. هم در آتک و دیستی که دگه لهتێن مردم اۆشتاتگ، چه آیان جُستی کرت: ’شما چێا سجّهێن رۆچا بے کارا اۆشتاتگێت؟‘ 7گوَشتِش: ’مارا هچکَسا کار نداتگ.‘ باگئے واهُندا گوَشت: ’شما هم برئوێت، منی باگا کار کنێت.‘

8رۆچ که اێر نِشت، باگئے واهُندا گۆن کارندهانی مسترا گوَشت: ’مُزّوران لۆٹاێن و آیانی مُزّا بدئے، چه رندیگان بِندات کن و ائولیگان برئو.‘ 9همایان که رۆزردئے نزّیکّا کار شُرو کرتگ‌اَت، هریَکّێا یکّ دینارے رَست. 10پدا همایانی باریگ آتک که پێسرا کارِش شُرو کرتگ‌اَت. آیان گوَشت بلکێن مارا گێشترَ رَسیت، بله آیان هم یکّ یکّ دینارے رَست. 11وتی مُزِّش زرت و باگئے واهُندئے سرا نُرنڈگا لگّتنت، گوَشتِش: 12’رَند رَندی مُزّوران بسّ یکّ ساهتے کار کرتگ و ما سجّهێن رۆچا گرمئے سرا کار کرتگ، بله تئو مئیگ و آیانی مُزّ برابر کرتنت.‘ 13باگئے واهُندا گۆن یکّێا گوَشت: ’سنگت! من گۆن تئو ناهَکّی نکرتگ. منی و تئیی کَرار یکّ دینارێئے نه‌اَت؟ 14پمێشکا همینچُک که تئیی هَکّ اِنت، بزور و برئو. من وتی مَستر وت آن که هرچے ترا دئیان، همینچُک رَند رَندیگا هم بدئیان. 15زانا، منا اے هَکّ نێست که گۆن وتی چیزّان هما ڈئول بکنان که منَ لۆٹان؟ یا تئو منی دسپَچیئے سرا هسَدَّ کنئے؟‘ 16اے ڈئولا آهِری ائوَلیَ بنت و ائوَلی آهِریَ بنت.“

ایسّائے مَرکئے سئیمی پێشگۆیی

(مَرکاس 10‏:32‏–34؛ لوکا 18‏:31‏–34)

17وهدے ایسّا اورشَلیما رئوَگا اَت، آییا دوازدهێن کاسد یکّ کِرّے برتنت و گۆن آیان گوَشتی: 18”بچار، ما اورشَلیما رئوێن، اۆدا انسانئے چُکّا گرنت و مزنێن دینی پێشوا و شَریَتئے زانۆگرانی دستا دئینت. آییا مَرکئے سزا دئینت و 19درکئومێن مردمانی دستا دئینت. درکئوم آییا کَلاگَ زورنت، گۆن شَلّاک و هئیزران مانَ بندنت و سَلیبئے سرا دْرنجنتی. بله سئیمی رۆچا، آ پدا زندگَ بیت و جاهَ جنت.“

ناجائِزێن واهگ

(مَرکاس 10‏:35‏–45)

20همے وهدا زِبْدیئے چُکّانی مات، گۆن وتی چُکّان ایسّائے کِرّا آتک، آییئے پادان کپت و گوَشتی: ”من چه تئو چیزّے لۆٹان.“ 21ایسّایا گوَشت: ”چے لۆٹئے؟“ گوَشتی: ”لَبز کن که تئیی بادشاهیا منی دوێن چُکّ تئیی کِرّا نندنت، یکّے تئیی راستێن کشا و دومی چپّێن کشا.“ 22ایسّایا پَسّئو دات: ”شما نزانێت چے لۆٹگا اێت. آ پیاله که منا نۆشگی اِنت، شما نۆشِتیَ کنێت؟“#20‏:22 چه پیالها ایسّائے مکسد وتی مرک، بزان سلیبئے سکّی و سۆری اَنت. گوَشتِش: ”جی هئو، ما نۆشتیَ کنێن.“ 23ایسّایا گوَشت: ”شمارا منی پئیاله نۆشگی اِنت، بله اے منی دستا نه‌اِنت که کئے منی راستێن و کئے چپّێن کَشا بنندیت. اے جاگه همایانیگ اَنت که منی پتا په آیان گیشّێنتگ‌اَنت.“

24وهدے آ دگه دَهێن مُریدان اے هبر اِشکت، دوێن براتانی سرا زَهر گپتنت. 25گڑا ایسّایا سجّهێن مُرید لۆٹاێنتنت و گۆن آیان گوَشتی: ”شما زانێت که درکئومانی هاکم مردمانی سرا واجهیَ کننت و مستر وتی زۆرا چێردَستێن مردمانی سرا کارَ بندنت. 26بله شما چُش مکنێت. چه شما هرکَس که مزنیَ لۆٹیت، باید اِنت سجّهێنانی هِزمتکار ببیت و 27چه شما هرکَس که مستریَ لۆٹیت، شمئے کَستر و هزمتکار ببیت. 28همے ڈئولا، انسانئے چُکّ نئیاتکگ که مردم آییئے هِزمتا بکننت، آتکگ که مردمانی هِزمتا بکنت و گۆن وتی ساهئے دئیگا، بازێنێا برَکّێنیت.“

دو کۆرئے دْرهبکشی

(مَرکاس 10‏:46‏–52؛ لوکا 18‏:35‏–43)

29وهدے ایسّا و مرید چه اَریهائے شهرا در آیگا اَتنت، مزنێن رُمبے ایسّائے همراه بوت. 30آیانی راهئے سرا نِشتگێن دو کۆرا اِشکت که ایسّا گوَزگا اِنت، کوکّارِش کرت و گوَشتِش: ”او هُداوند، او داوود بادشاهئے چُکّ! مئے سرا رَهم کن.“ 31مردمان آ هَکّل داتنت و گوَشتِش: ”بێتئوار بێت،“ بله آیان گَنتر کوکّار کرت و گوَشتِش: ”او هُداوند، او داوود بادشاهئے چُکّ! مئے سرا رَهم کن.“ 32ایسّا اۆشتات، تئواری کرتنت و گوَشتی: ”شما چه من چے لۆٹێت؟ په شما چے بکنان؟“ 33آیان پَسّئو دات: ”او هُداوند! مئے چمّان رُژنا کن.“ 34ایسّایا بَزّگ بوت، دَستی آیانی چمّان پِر مُشت و هما دمانا آیانی چمّ رُژنا بوتنت و آ ایسّائے همراه بوتنت.

Currently Selected:

مَتّا 20: HPKB

Highlight

Copy