مَتّا 19

سور و سئونئے بارئوا

(مَرکاس 10‏:1‏–12)

1وهدے ایسّایا اے هبر هلاس کرتنت، جَلیلئے دَمگی یله دات و دێم په یَهودیَهئے هما هَند و دَمگا شت که اُردُنئے کئورئے دومی دستا اِنت. 2مردمانی مزنێن رُمبے آییئے رَندا کپت و ایسّایا اۆدا آیانی نادْراهێن مردم دْراه کرتنت.

3لهتێن پَریسی ایسّائے چَکّاسگا آییئے کِرّا آتک و جُستِش کرت: ”په مردا رئوا اِنت که هر پئیمێن سئوَبێا وتی جَنئے تلاک و سئونان بدنت؟“ 4پَسّئوی تَرّێنت: ”شما نئوانتگ که هُدایا جهانئے جۆڑ کنگئے وهدا انسان اَڈّ کرتگ، مردێن و جنێن#19‏:4 پێدائِش 1‏:27. و 5گوَشتگی: پمێشکا مرد وتی پت و ماتا یلهَ کنت و گۆن وتی جَنا هۆر و یکجاهَ بیت. مرد و جَن، یکّ جسم و جانَ بنت.#19‏:5 پێدائِش 2‏:24. 6اے پئیما، نون آ دو نه‌اَنت، یکّ جسم و جان اَنت. پمێشکا، آ که هُدایا یکّ کرتگ‌اَنت، انسان آیان جتا مکنت.“ 7جُستِش کرت: ”گڑا موسّایا پرچا پرمان داتگ که مرد وتی جنا تلاک‌نامَهے بدنت و نون چه لۆگا دَری بکنت؟“ 8ایسّایا پَسّئو دات: ”شمئے سِنگدلیئے سئوَبا موسّایا شمارا جنێنانی سئون دئیگئے اجازت داتگ، چه بُنگێجا اے ڈئول نبوتگ. 9شمارا گوَشان: هرکَس چه زِناکاریا اَبێد، دگه سئوَبێا وتی جنێنئے سئون و تلاکان بدنت و گۆن دگه جنێنێا سور و سانگ بکنت، بزان زنا کنگا اِنت.“

10مُریدان گوَشت: ”اگن مردێن و جنێنئے نیاما هال و جاوَر اِش اِنت، گڑا سور نکنگ شرتر اِنت.“ 11گوَشتی: ”اے تالیما هرکَس زرتَ نکنت، هما کَس زرتَ کنت که آییا اے واک و توان بَکشگ بوتگ. 12لهتێن سور کرتَ نکنت چێا که چه پێدائِشا اَنچُش اَنت، لهتێن مردمان گوَهتگ#19‏:12 گوَهتگ، بزان هما که آییئے نرێنگی در کنگ بوتگ. کرتگ و لهتێن په آسمانی بادشاهیا چه سور و سانگا سرَ گوَزیت. هرکَس که اے هبرا سرپدَ بیت، انچۆ بکنت.“

ایسّا و کَسانێن چُکّ

(مَرکاس 10‏:13‏–16؛ لوکا 18‏:15‏–17)

13رندا کسانێن چُکِّش ایسّائے کِرّا آورتنت که وتی دستا آیانی سرا پِر بمُشیت و په آیان نێک‌دْوایی بکنت، بله مُریدان نِهرّ و هَکّل داتنت. 14ایسّایا گوَشت: ”چُکّان بِلّێت منی کِرّا کاینت، اِشانی دێما مدارێت، چێا که آسمانی بادشاهی اَنچێنانیگ اِنت.“ 15ایسّایا آیانی سرا دست پِر مُشت و رندا چه اۆدا راه گپت.

زَردارێن وَرنا و اَبدمانێن زِند

(مَرکاس 10‏:17‏–31؛ لوکا 18‏:18‏–30)

16همے وهدا مردے ایسّائے کِرّا آتک و جُستی کرت: ”او استاد! من کجام نێکیا بکنان که اَبدمانێن زِندئے واهند ببان؟“ 17ایسّایا گوَشت: ”تئو چێا نێکیئے بارئوا چه من جُستَ کنئے؟ ’نێکێن‘ تهنا یکّے و آ هُدائے جند اِنت. اگن تئو ابدمانێن زِندَ لۆٹئے، گڑا هُدائے پرمانانی سرا اَمَل کن.“ 18جُستی کرت: ”کجام پرمانانی سرا؟“ ایسّایا گوَشت: ”هۆن مکن، زنا مکن، دُزّی مکن، درۆگێن شاهدی مدئے، 19وتی پت و ماتا اِزَّت بدئے، وتی همساهگا وتی جندئے پئیما دۆست بدار.“#19‏:19 لاویان 19‏:18. 20وَرنایا گۆن ایسّایا گوَشت: ”اے سجّهێن پرمانانی سرا من اَمل کرتگ. دگه کجام کار پَشت کپتگ؟“ 21ایسّایا پَسّئو دات: ”اگن لۆٹئے کامِل ببئے، برئو وتی سجّهێن مال و هستیا بها کن و زَرّان گریب و نێزگاران بدئے. اے پئیما ترا آسمانی گنجے رسیت. نون بیا و منی رَندگیریا بکن.“ 22وَرنایا که اے هبر اِشکت، گمیگ بوت و شت، چێا که سێر و هَزگارێن مردے اَت.

23ایسّایا گۆن مُریدان گوَشت: ”شمارا راستێنَ گوَشان، په سێر و هَزگارێن مردمان آسمانی بادشاهیا پادئے اێر کنگ سکّ گران اِنت. 24هئو، شمارا گوَشان، سوچنئے دُمکا اُشترئے گوَزگ وَه باز گران اِنت، بله په هزگارێن مردمێا هُدائے بادشاهیا پادئے اێر کنگ اَنگت گرانتر اِنت.“ 25اے هبرئے اِشکنگا، مُرید سکّ هئیران بوتنت و وت‌مان‌وتا گوَشتِش: ”گڑا کئے رَکّتَ کنت؟“ 26ایسّایا آیانی نێمگا چارت و گوَشت: ”اے کار انسانئے دستا نبیت، بله هُدائے دستا هر چیزَّ بیت.“

27گڑا پِتْرُسا گوَشت: ”ما وتی هر چیزّ یله داتگ و تئیی رَندگیریا کنگا اێن، مارا چے رَسیت؟“ 28ایسّایا گۆن آیان گوَشت: ”شمارا راستێنَ گوَشان، هما نۆکێن دنیایا وهدے انسانئے چُکّ وتی شان و شئوکتئے تَهتئے سرا نندیت، شما که منی همراه اێت، دوازده تَهتئے سرا نندێت و بنی اِسراییلئے دوازدهێن کَبیلهانی کَزاوَتا#19‏:28 کَزاوَت، بزان هَکّێن پئیسله، هما شئور که چه دادگاهانَ کئیت، داوَری. کنێت. 29هرکَسا که په منی نامئیگی لۆگ یا برات یا گهار یا پت یا مات یا چُکّ یا ڈگار یله داتگ‌اَنت، آییا سَد سری گێشترَ رَسیت و اَبدمانێن زِندئے واهندَ بیت. 30بله بازێنے که ائولی اِنت، آهِریَ بیت و بازێنے که آهِری اِنت، ائولیَ بیت.

Currently Selected:

مَتّا 19: HPKB

Highlight

Copy