مَتّا 22

بادشاهئے چُکّئے آرۆس

(لوکا 14‏:15‏–24)

1ایسّایا پدا گۆن مردمان په مِسال و دَروَر هبر کرت و گوَشت: 2”آسمانی بادشاهی، هما بادشاهئے پئیما اِنت که په وتی چُکّئے آرۆسا مهمانیے کرتی. 3گُلامی لۆٹتگێن مهمانانی رندا راه داتنت، بله آیانی دلا نلۆٹت بیاینت. 4گڑا آییا دگه لهتێن گُلام راه دات و هُکمی کرت که گۆن هما لۆٹتگێن مردمان بگوَشنت: ’شامُن تئیار کرتگ، کاییگر#22‏:4 کاییگر، بزان مزنێن نَرێن گۆک. و پابُندی#22‏:4 پابُندی، بزان هما پس و گۆک اِنت که په هِلار کنگا لۆگئے دپا دارنتی. گوَسک#22‏:4 گوَسک، بزان گۆلۆ، گۆکئے چُکّ. هِلار کنگ بوتگ‌اَنت و هر چیزّ تئیار اِنت، بیاێت آرۆسئے مهمانیا گۆن ببێت.‘ 5بله پَرواهِش نکرت و هرکَس وتی کارئے نێمگا شت، یکّے ڈگارانی نێمگا و یکّے دێم په وتی سئوداگریا. 6آ دگران آییئے گُلام گپت و سُبکّ و بے‌اِزّت کرت و کُشتنت. 7بادشاه سکّ زهر گپت و په هۆنیگانی جنَگ و آیانی شهرئے سۆچگا سپاهیگی راه داتنت. 8گڑا گۆن وتی گُلامان گوَشتی: ’آرۆسئے مهمانی تئیار اِنت، بله هما که لۆٹگ بوتگ‌اَتنت، آیگئے لاهک نه‌اتنت. 9پمێشکا برئوێت چارراهانی سرا هرکَسا که گِندێت، آیان منی مهمانیا بیارێت.‘ 10بادشاهئے گُلام شتنت و شَرّ و گَندگ، هرکَسِش که دیست، سجّهێنِش یکجاه کرت و آورتنت و آرۆسئے تالار چه مهمانا پُرّ بوت.

11نون وهدے بادشاه مهمانانی چارگا آتک، یکّ اَنچێن مردے دیستی که سوری گُدی گوَرا نه‌اَت. 12بادشاها چه آییا جُست کرت: ’همبل! بے سوری پۆشاکا، تئو چۆن تۆکا پترتگئے؟‘ بله آییا هچّ پَسّئو دات نکرت. 13گڑا بادشاها گۆن وتی هِزمتکاران گوَشت: ’اِشیئے دست و پادان بندێت و ڈنّا تَهاریا دئور بدئیێت.‘ اۆدا گرێونت و دَنتان په دنتانَ درُشنت. 14چێا که لۆٹتگێن باز اَنت، بله گچێن کرتگێن کمّ.“

مالیاتئے بارئوا

(مَرکاس 12‏:13‏–17؛ لوکا 20‏:20‏–26)

15همے وهدا پَریسی شتنت و اَنچێن پندل#22‏:15 پَندَل، بزان سازِش، رِپک و هُنَر. و رِپکے کرتِش که ایسّایا چۆن چه آییئے جندئے هبران مان بگیشّێننت و داما دئور بدئینت. 16نون لهتێن شاگردِش گۆن هیرودیانی#22‏:16 هیرودی، بزان هیرودیس بادشاهئے دۆزواه. همراهیا آییئے کِرّا رئوان دات تان بگوَشنت: ”او استاد! ما زانێن که تئو تچک و راستێن مردمے ائے و هُدائے راها په راستیا سۆجَ دئیئے و هچکَسێئے نێمگا نگرئے، چێا که سجّهێنان په یکّ چمّێا چارئے. 17مارا بگوَش، تئیی هئیالا رومئے بادشاه کئیسَرا سُنگ و مالیات دئیگ رئوا اِنت یا نه؟“ 18ایسّایا آیانی گَندگێن پِگر زانت و گوَشتی: ”او دوپۆستێن شَتَلکاران! چێا منا چَکّاسگا اێت؟ 19چه هما زَرّان که په مالیاتا دئینت، یکّے منا پێش بدارێت.“ آیان یکّ دینارے پێش کرت. 20ایسّایا چه آیان جُست کرت: ”اِشیئے سرا کئیی نام و نَکش پِر اِنت؟“ 21گوَشتِش: ”کئیسَرئے.“ نون ایسّایا درّاێنت: ”گڑا کئیسَرئیگا کئیسَرا بدئیێت و هُدائیگا هُدایا بدئیێت.“ 22اے هبرانی اِشکنگا آ هئیران بوتنت و ایسّااِش اِشت و شتنت.

آهِرت و سانگ و سور

(مَرکاس 12‏:18‏–27؛ لوکا 20‏:27‏–40)

23رَندا، لهتێن سَدوکی که آهِرَتئے نمَنّۆک اَنت، ایسّائے کِرّا آتک و جُستِش کرت: 24”او استاد! موسّایا گوَشتگ: ’اگن کَسے بے پُشپَدا بمریت، باید اِنت آییئے برات گۆن آییئے جنۆزاما سور بکنت، تان په وتی براتا رَند و راهے بِلّیت.‘#22‏:24 موسّائے واز 25‏:5 و رَند. 25مئے نێمگا هپت برات هست‌اَت. ائولی براتا سور کرت، بے چُکّا مُرت و وتی جنی په آ دگه براتا اِشت. 26پدا گۆن دومی و سئیمی تان هپتمیا اَنچُش بوت. 27گُڈسرا، آ جنێن هم مُرت. 28نون تئو بگوَش، آهِرتئے رۆچا اے جنێن چه هپتێن براتان کجام براتئیگَ بیت؟ چێا که سجّهێن براتان باریگ باریگا گۆن آییا سور کرتگ‌اَت.“

29ایسّایا پَسّئو دات: ”شما رَد وارتگ، چێا که نه چه پاکێن کتابان چیزّے سَرکِچَ ورێت و نه هُدائے واک و زۆرا سرپدَ بێت. 30آهِرتا، نه کَسے سورَ کنت و نه سور دئیگَ بیت، آسمانی پرێشتگانی ڈئولا بنت. 31مُردگانی پدا زندگ بئیگ و جاه جنَگئے بارئوا، زانا شما هما هبر نئوانتگ که هُدایا شمارا گوَشتگ‌اَت: 32من آن، اِبراهێمئے هُدا، اِساکئے هُدا و آکوبئے هُدا؟#22‏:32 دَررئو 3‏:6. بزان آ، مُردگانی هُدا نه‌اِنت، زندگێنانی هُدا اِنت.“ 33مردم چه ایسّائے اے هبرانی اِشکنگا هئیران و هَبَکَّه بوتنت.

مسترێن هُکم

(مَرکاس 12‏:28‏–34؛ لوکا 10‏:25‏–28)

34وهدے پَریسی سهیگ بوتنت که ایسّایا چۆن گۆن وتی پَسّئوا سَدوکیانی دپ بستگ، گڑا هۆر بوت و آتکنت. 35چه آیان یکّێا، که شَریَتئے کازیے اَت، په ایسّائے چَکّاسگا چه آییا جُست کرت: 36”او استاد! شَریَتئے مسترێن هُکم کجام اِنت؟“ 37ایسّایا پَسّئو دات:

”وتی هُداوندێن هُدایا په دل، گۆن سجّهێن جان و ساه و گۆن سجّهێن پَهم و پِگرا دۆست بدار.#22‏:37 موسّائے واز 6‏:4 و رَند. 38چه سجّهێنان مسترێن و ائولی هُکم همِش اِنت. 39دومی هُکم هم، همِشیئے ڈئولا اِنت: گۆن وتی همساهگا وتی جندئے پئیما مِهر بکن.#22‏:39 لاویان 19‏:18. 40همے دوێن هُکم، موسّائے شَریَت و سجّهێن نبیانی پرمانانی بُنیاد اَنت.“

ایسّا کئیی چُکّ اِنت؟

(مَرکاس 12‏:35‏–37؛ لوکا 20‏:41‏–44)

41همے وهدا که پَریسی یکجاه مُچّ اَتنت، ایسّایا چه آیان جُست کرت: 42”مَسیهئے بارئوا شما چے گوَشێت؟ آ کئیی چُکّ اِنت؟“ آیان پَسّئو دات: ”داوود بادشاهئے چُکّ اِنت.“ 43نون گوَشتی: ”گڑا چێا داوود چه پاکێن روهئے شُبێن و اِلهاما، آییا وتی هُداوندَ زانت، وهدے گوَشیت:

44 هُداوندا گۆن منی هُداوندا # 22‏:44 ”منی هُداوند“، بزان ایسّا مَسیه. گوَشت:

’منی راستێن نێمگا بنند

تان هما وهدا که تئیی دژمنان تئیی پادانی چێرا دئور بدئیان.‘ # 22‏:44 زَبور 110‏:1.

45نون اگن داوود، مَسیها وتی هُداوندَ گوَشیت، گڑا مَسیه چۆن آییئے چُکّ بوتَ کنت؟“ 46هچکَسا آییئے هبرانی پَسّئو دات نکرت و چه آ رۆچا و رند، کَسێا هم چه آییا جُست کنگئے دل و جُریت نێست‌اَت.

Currently Selected:

مَتّا 22: HPKB

Highlight

Copy