پێدایش 50

آکوبئے کبر و کپَن

1ایسُّپا وتارا پتئے سرا دئور دات، گرێتی و پتی چُکّت. 2گڑا هما داکتر که ایسُّپئے هِزمتا اَتنت، ایسُّپا گۆن آیان گوَشت که منی پت اِسراییلا مۆمیایی#50‏:2 مۆمیایی کنگ مِسریانی رسمے بوتگ که مُرتگێن مردمِش دَرمان جتگ و پێتکگ که جۆن مگَهیت و هراب مبیت. کنێت و آیان اِسراییل مۆمیایی کرت. 3اے کارا چِلّ رۆچ جت که اینچُک وهد په مۆمیایی کنگا اَلّمی اَت. مِسریان هپتاد رۆچ په آییا پُرس داشت.

4وهدے پُرسئے رۆچ هلاس بوتنت، ایسُّپا گۆن پِرئونئے لۆگئے مردمان گوَشت: ”اگن منی اِزّتا کنێت، په منیگی گۆن پِرئونا هبر کنێت و بگوَشێتی 5که منی پتا منا سئوگند داتگ و گوَشتگ: ’من مِرَگی آن. منا هما کبرا کَلّ کن که من په وت کَنهانئے مُلکا کۆتکگ.‘ نون منا رَزا دئے که رئوان و وتی پتا کبرَ کنان و کایان.“ 6پِرئونا گوَشت: ”برئو، وتی پتا هما پئیما کبر کن که ترا سئوگندی داتگ.“

7گڑا ایسُّپ وتی پتئے کبر کنگا شت. پِرئونئے سجّهێن هِزمتکار هم آییئے همراه اَتنت. پِرئونئے لۆگئے مسترێن مردم و مِسرئے سجّهێن کماش شتنت گۆن. 8ایسُّپئے لۆگئے سجّهێن مردم، آییئے پتئے لۆگئے مردم و آییئے برات هم گۆن اَتنت. اێوکا چُکّ و رمگ و گۆرُم گۆشِنا منتنت. 9اَرّابه‌سوار و اَسپ‌سوار هم شتنت گۆن. سکّێن مزنێن رُمبے اَت.

10وهدے آ اُردُنئے کئورئے نزّیکّا اَتادئے جۆهانا#50‏:10 جۆهان، بزان کِشارانی مُشگ و دانانی مُچّ کنگئے جاگه. سر بوتنت، کوکّارِش کرت و زارِش جت. ایسُّپا اۆدا هپت رۆچا په وتی پتا پُرس داشت. 11وهدے اۆدئے نندۆکێن کَنهانیان اَتادئے جۆهانا داشتگێن اے پُرس دیست، گوَشتِش: ”مِسریان بلاهێن پُرسے داشتگ.“ پمێشکا آ جاگه که اُردُنئے کئورئے نزّیکّا اِنت، آ جاگهئے نامِش آبِل‌مِسراێم#50‏:11 آبِل‌مِسراێمئے مانا اِنت: ”مِسریانی پُرس“. کرت.

12گڑا آکوبئے چُکّان هما پئیم کرت که پتا هُکم داتگ‌اَتنت. 13آکوبِش کَنهانئے مُلکا برت و هما گارا کبر کرت که مَکپێلَهئے ڈگارا، مَمرِهئے نزّیکّا اَت. اِبراهێما آ گار گۆن ڈگارا چه اِپرون هیتّیا بها زرتگ‌اَت که کبرستانے بکنتی. 14چه پتئے کبر کنگا رند ایسُّپ گۆن وتی براتان و گۆن سجّهێن همراهان که آییئے پتئے کبر کنگا آتکگ‌اَتنت، مِسرا پِر ترّت.

ایسُّپ پدا براتان دلجمیَ دنت

15وهدے ایسُّپئے براتان دیست که مئے پت مُرتگ، گوَشتِش: ”اگن ایسُّپا کێنگ دلا اِنت، هما سجّهێن بدیانی بێرا گیپت که ما گۆن آییا کرتگ‌اَنت.“ 16گڑا آیان په ایسُّپا کلئوے راه دات و گوَشتِش: ”تئیی پتا مَرکا پێش اے وَسیَت کرتگ: 17’ایسُّپا بگوَشێت که منی دَزبندی اِنت که وتی براتانی مئیار و گناهان بِبَکش که گۆن تئو بدی‌اِش کرتگ. وتی پتئے هُدائے بَندهانی بدیان پَهِلّ کن.‘“ وهدے آیانی پئیگام ایسُّپا سر بوت، گرێتی.

18گڑا برات ایسُّپئے کرّا آتکنت و پادانی کپتنت و گوَشتِش: ”ما تئیی گُلام اێن.“ 19بله ایسُّپا گوَشت: ”متُرسێت. من هُدا وَه نه‌آن. 20شمئے نیّت منی تاوان دئیگ اَت، بله هُدائے نیّت نێک اَت. آییئے نیّت همِش اَت که بازێن مردمێئے ساه برَکّیت. اے کار، همِش اِنت انّون بئیگا اِنت. 21گڑا متُرسێت. من شمئے و شمئے چُکّانی زلورتان پورهَ کنان.“ براتی دلجَمی داتنت و گۆن آیان په شَرّی هبری کرت.

ایسُّپئے مَرک

22ایسُّپ گۆن وتی پتئے لۆگئے سجّهێن مردمان مِسرا نِشت. یکّ سَد و دَه سال اُمری کرت و 23اِپراێمئے چُکّانی سئیمی پُشتی دیست. مَنَسیئے نُماسگ، ماکیرئے چُکّ هم که پێدا بوتنت، ایسُّپئے کُٹّا دئیگ بوتنت.

24ایسُّپا گۆن وتی براتان گوَشت: ”من مِرَگی آن، بله دلجم آن که هُدا په شمئے مَدتا کئیت و شمارا چه اے مُلکا دێم په هما مُلکا بارت که آییئے بارئوا گۆن اِبراهێم و اِساک و آکوبا سئوگندی وارتگ.“ 25ایسُّپا گۆن اِسراییلئے چُکّان گوَشت: ”سئوگِند بوَرێت که وهدے هُدا شمئے مَدتا کئیت، منی هڈّان چه اے جاگها برێت گۆن.“

26ایسُّپ یکّ سَد و ده سالئے اُمرا مُرت، گڑا آاِش مۆمیایی کرت و تابوتێا واپێنت و مِسرا اێرِش کرت.

Currently Selected:

پێدایش 50: HPKB

Highlight

Copy