پێدایش 49
49
آکوب وتی چُکّان برکتَ دنت
1آکوبا وتی چُکّ گْوانک جت و گوَشتنت: ”یکجاه بێت، من شمارا گوَشان که آیۆکێن رۆچان چے بیت.
2یکجاه بێت و گۆش دارێت،
او آکوبئے چُکّان!
وتی پت اِسراییلئے هبران گۆش دارێت.
3او روبِن! تئو منی ائولی چُکّ ائے،
منی واک و تْوان ائے،
منی مردانَگیئے ائولی نشان ائے،
مڑاه و زۆرئے شان ائے.
4چۆ آپا بێلَگام ائے،
مستر نون تئو نمانئے،
که وتی پتئے نپادان، منی گَندَلان سر کپتئے و
پَلیتِت کرتنت.
5شَمون و لاوی برات اَنت،
زَهمِش شِدّتی سِلاه اَنت.
6هچبر اِشانی مجلسا منِنداتان،
گۆن اِشان همدیوان مباتان،
که چه وتی هِژما مردمِش کُشتگ‌اَنت و
په وتی دِلوَشّیا سانڈِش#49:6 سانڈ، بزان زۆرمندێن نرێن گۆک یا گامێش. لَنگ کرتگ‌اَنت.
7نالَت بات اِشانی ترُندێن هِژما،
اِشانی بێرَهمێن کَهرا.
آکوبئے مُلکا یکّ یَکِّشَ کنان،
اِسراییلئے مُلکا شِنگ و شانگ.
8او یَهودا! تئیی برات ترا نازێننت،
تئیی دست دژمنانی گُٹّا سکَّ بیت،
تئیی پتئے چُکّ تئیی دێما کۆنڈانَ کپنت.
9یَهودا شێری گُلُّڑے.
او منی چُکّ! تئو چه شکاران آتکگئے.
یَهودا چۆ شێرا سْراپَ کنت،
چۆ مادگێن شێرا کَمینَ کنت.
کئیی مجال اِنت که پادی بکنت؟
10بادشاهی اَسا چه یَهودائے دستا نرئوت و
هاکمیئے دَزلَٹّ چه آییئے پادانی دێما دورَ نبیت
تان هما وهدا که اَسلیگێن واهُندَ کئیت و
کئوم آییئے پرمانبردارَ بنت.
11آ وتی هرا انگوری درچکێا بندیت و
کُرّگا گچێنی شاهڑێا،
وتی پۆشاکان گۆن شرابا شۆدیت،
وتی پُچّان گۆن انگورئے هۆنا.
12آییئے چمّ چه شرابا سُهرتِرَ بنت و
دنتان چه شیرا اِسپێت‌تِر.
13زِبولون تئیاب‌دَپا جَهمنندَ بیت،
په بۆجیگان بَندِنے#49:13 بَندِن، بزان تئیابئے هما جاگه که بۆجیگَ اۆشتنت. بیت و
سیمسری تان سئیدونا سرَ بیت.
14ایسّاکار زۆرمندێن هرے
که دوێن تَنگانی#49:14 تَنگ، بزان هر یا اُشترئے بارئے یکّ نێمگے. نیاما تَچک اِنت.
15گندیت که آرامجاه شَرّ اِنت و زمین وشّ،
وتی بَڈّا په بارا اێرَ دنت و
په بیگاریا تئیارَ بیت.
16دان#49:16 دان آکوبئے چُکّێئے نام اِنت. اِسراییلئے کَبیلهے بیت و
په وتی مردمان اِنساپَ کاریت.
17دان رهسرا مارے بیت،
کِشکئے کَشا سْیَه‌مارے،
اَسپانی سْرُمبان#49:17 سْرُمب، بزان دَلوَتئے پادئے پنجَگ، سُم. ڈنگَ جنت
که سوار پُشتکا بکپیت.
18او هُداوند! وداریگ آن
که تئو برَکّێنئے.
19اُرُش کنۆک جادا اَنگِرَّ کننت،
بله جاد آیانی پادانی پونزانی سرا بیڑَ#49:19 بیڑ، بزان ترُندێن اُرُش، هَمله. بارت.
20آشِرئے نگن چرپَ بیت،
مهلوکا شاهی وراکَ دنت.
21نَپتالی آزات بوتگێن آسْکے#49:21 آسْک، بزان آهو، آهوگ. و
ڈئولدارێن آسکَلُکَ کاریت.
22ایسُّپ پُرسَمرێن اَنگورے،
چَمّگئے لَمبا برآوَرێن اَنگورے.
شاهڑی، دیوالان سرَ کپنت.
23تیرکَمان جنۆکان په زهرناکی آییئے سرا اُرُش کرت و
په بدواهی تیرِش جت.
24بله ایسُّپئے کَمان برجاه منت و
باسکی مُهر و مُهکم اَتنت،
آکوبئے زۆرمندێن هُدائے دستئے برکتا،
اِسراییلئے شپانکئے برکتا،
اِسراییلئے تَلارئے برکتا،
25تئیی پتئے هُدائے برکتا، که ترا مدتَ کنت،
پُرواکێن هُدائے برکتا، که ترا برکتَ دنت.
گۆن آسمانئے برکتان، چه بُرزا،
گۆن جُهلانکیئے برکتان، چه جَهلا و
گۆن چُکدان و گْوَرانی برکتان ترا برکتَ دنت.
26تئیی پتئے برکت
چه اَبدی کۆهانی برکتان بالاتر اَنت،
چه کوَهنێن جُمپانی نْیامَتان گێشتر اَنت.
اے سَرجما ایسُّپئے سرا بگواراتنت،
ایسُّپئے پێشانیگئے سرا
که وتی براتانی شهزادگ اِنت.
27بِنیامین دِرّۆک و وَرۆکێن گُرکے،
سُهبان شکار اێرَ بارت و
بێگاهان آوار بهرَ کنت.“
28اے اِسراییلئے دوازدهێن کَبیله اَتنت و اے هما هبر اَتنت که آیانی پتا برکت دئیگئے وهدا گۆن آیان کرتنت. هر یکّێارا هماییئے هسابا برکتی دات.
آکوبئے مَرک
29نون آکوبا وتی چُکّ چۆ سۆج داتنت: ”من گۆن وتی مُرتگێن مردمان هئوار بئیگی آن. منا منی پت و پیرُکانی کرّا، هما گارا کبر کنێت که اِپرون هیتّیئے ڈگارا اِنت، 30هما گارا که مَکپێلَهئے ڈگارا، مَمرِهئے نزّیکّا، کَنهانئے مُلکا اِنت و اِبراهێما چه اِپرون هیتّیا گۆن ڈگارا هۆر بها زرت که کبرستانے بکنتی. 31اۆدا اِبراهێم و آییئے جَن سارَه کبر کنگ بوتگ‌اَنت، اِساک و آییئے جَن رِبِکّا کبر کنگ بوتگ‌اَنت و من لیاه هم همۆدا کبر کرتگ. 32ڈگار و آییئے تهئے گار چه هیتّیان بها زورگ بوتگ‌اَنت.“
33وهدے آکوبا وتی چُکّانی سۆج دئیگ هلاس کرت، نپادئے سرا وتی پادی تچک کرتنت، گُڈّی دَمی کشّت و گۆن وتی مُرتگێن مردمان هئوار بوت.
Currently Selected:
پێدایش 49: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
