دَرگوَز 1
1
اِسراییلی زُلم و زۆرئے آماچَ بنت
1آکوبئے هما مردێن‌چُکّ#1:1 اَسلیگێن اِبرانی نبشتانکَ گوَشیت: اِسراییلئے مردێن‌چُکّ. اِسراییل، آکوبئے دومی نام اَت. که هر یکّێا وتی لۆگئے مردم زرتنت و گۆن آکوبا مِسرا شت گۆن، آیانی نام اِش اَنت: 2روبِن و شَمون و لاوی و یَهودا و 3ایسّاکار و زِبولون و بِنیامین و 4دان و نَپتالی و جاد و آشِر. 5آکوبئے چُکّ و نماسگ سَرجمیا هپتاد اَتنت. ایسُّپ چه پێسرا مِسرا اَت. 6ایسُّپ مُرت و سجّهێن براتی هم مُرتنت و آییئے هم‌اُمرێن سَرجمێن نَسل هم مُرت. 7بله بنی اِسراییل پُرسَمر اَت. آیان چُکّ و بَر کرت، وَدّان بوت و سکّ باز بوتنت. مِسرئے مُلک چه اِسراییلیان پُرّ بوت.
8نون مِسرئے سرا نۆکێن پِرئونے بادشاهی تَهتا نِشت. اے بادشاه ایسُّپئے بارئوا سرپد نه‌اَت. 9آییا گۆن وتی مهلوکا گوَشت: ”بچارێت، بنی اِسراییلئے مردم چه ما باز گێشتر و زۆرمندتِر جۆڑ بوتگ‌اَنت. 10باید اِنت په هۆشمَندی اِشانی دێما بدارێن، اگن اے گێشتر ببنت و مارا جنْگے بگیپت، اے مئے دژمنانی همراهَ بنت و گۆن ما جنْگَ کننت و پدا چه مئے مُلکا تچنت و رئونت.“
11بادشاه و آییئے مَنسبداران#1:11 مَنسَبدار، بزان کارێئے زِمّهوار، اُگدَهدار.، بیگارگیر#1:11 بیگارگیر، بزان هما مردم که دگه مردمان په زۆر کارَ بندیت. اِشانی کارمستر کرتنت که اِشانی سرا زۆراکی بکننت و گرانێن کارِش ببندنت. بنی اِسراییلیان په پِرئونا#1:11 پِرئون هچّ بادشاهئے جندئے نام نبوتگ. اَهدی زمانگان، مِسرئے هر بادشاه پِرئون گوَشگ بوتگ. دو شهر اَڈّ کرت. یکّێئے نام پیتوم اَت و یَکّێئے رَمِسێس. دوێن اَمباری شهر#1:11 اَمباری شهر، بزان هما شهر که اۆدا وراک و سامان امبار کنگَ بیت. اَتنت. 12مِسریان آیانی سرا همینکس که گێشتر زۆراکیَ کرت، اِسراییلی گێشتر بئیان و شِنگ بئیانَ بوتنت. گڑا مِسریان چه اِسراییلیان تُرست. 13مِسریان اِسراییلی په بێرَهمی کارَ بَستنت. 14هِشت و بَتانَهئے#1:14 بَتانه، بزان هِشتانی لِچّێنگئے گِل یا سِمٹّ اَڈّ کنگِشَ پرماتنت و ڈگارانی سرا هر دابێن گرانێن کارِشَ گپتنت و آیانی زندگی‌اِش اَزاب کرت. سجّهێن کارِش په بێرَهمی پرماتنت.
15مِسرئے بادشاها گۆن اِبرانی#1:15 اِبرانی، بزان اِسراییلی. جَنبۆگان#1:15 جَنبۆگ، بزان داییگ، دائِگ، دینَّبۆگ، چُکّ پێدا کنۆکێن بَلُّک. هبر کرت. یکّ جَنبۆگێئے نام شیپرَه اَت و دومیئے پووَه. 16گۆن اِشان گوَشتی: ”وهدے شما اِبرانی جنێنان چُک‌ماتَ کنێت، چِلّگیئے بَشانَها بچارێت، اگن چُکّ بَچکّے، بکُشێتی و اگن جنکّے، بِلّێتی.“ 17بله جَنبۆگان چه هُدایا تُرست و آ ڈئولا نکرتِش که مِسرئے بادشاها گوَشتگ‌اَتنت و مردێن‌چُکِّش نکُشتنت. 18گڑا مِسرئے بادشاها جَنبۆگ لۆٹاێنتنت و گۆن آیان گوَشتی: ”شما چێا چۆ کرت و مردێن‌چُکّ زندگا اِشتنت؟“ 19جَنبۆگان گۆن پِرئونا گوَشت: ”اِبرانی جنێن مِسری جنێنانی پئیما نه‌اَنت. ڈَڈّێن زال اَنت و چه جَنبۆگانی رسَگا پێسر چُکّا پێدا کننت.“
20گڑا هُدا جَنبۆگانی سرا مهربان بوت. اِسراییلیان چُکّ و بَر کرت و سکّ باز بوتنت. 21جَنبۆگان چه هُدایا تُرسِت، پمێشکا هُدایا آیانی لۆگ آباد کرتنت.
22گڑا پِرئونا وتی سجّهێن مردم هُکم دات و گوَشتنت: ”هر اِبرانی مَردێن‌چُکّے که پێدا بیت، آییا نیلّئے کئورا دئور بدئیێت، بله اِبرانی جنکّان بِلّێت.“
Currently Selected:
دَرگوَز 1: HPKB
Highlight
Share
Copy
Want to have your highlights saved across all your devices? Sign up or sign in
© 2016-22 Wycliffe Bible Translators, Inc.
