Baefeso 1

Mukanda Wasingaga Paolo ku balifeso, Paolo Ekubasambizia.

1Paolo, musingua wa Klisto Yesu, ku kusombola kua Kalaga, ku basuagibua beli ku Efeso, nu bakatizia mu Klisto Yesu: 2Mponga zibe kumuli nu bubobelelo bukutukaga ku Kalaga Tateisue nu ku Mukota Yesu Klisto.

Kalaga Asombuede Buno Babe na Mbogimbogi za Lonio.

3Kalaga aganunue, Isi wa Mukota weitu Yesu Klisto, watukitide mponga insania za Muuza, mu biziki bia muigulu mu Klisto: 4anga buatusombuede mueli gabezaga kisi takiba, tube basililila beteli na kabalibango kueli mu lutundo. 5Atusombuede kutukila wakalazi, buno tubikue bana bage wenyene mu Yesu Klisto, anga ku mbogimbogi nsoga za kusombola kuage, 6bubuno ku luganuno lua lutanuno lua mponga zage, zatukitide kuitabizibua mu Mutundua wage. 7Mueli tuli na bukuluzi mu mikila zage, isigililo lia misako za buagi, ku buingi bua mponga zage; 8anga buatutalikide mu menge mansania nu mu bumenyinino bunsania. 9Asilile kutumenesia kakungu ka kusombola kuage, anga buabezaga buamutananizia, anga buakengede wenyene, 10buno nkungu zezo gakakuka nkiko akakundamania binsania mu Klisto, bili mu meigulu, nu bili mu kisi. 11Mueli nuisue tuli na bupieni, tuasombuedue kuikengelo lia we ukukitaga binsania ku luango lua kusombola kuage; 12isue mueli tube luganuno luage, isue balingile kubikila Klisto kilemanizio kietu. 13Mu wono nuinyue nunse, gamuasilile kungua musagu wa bulili, musagu musoga wa lonio lueinyu, lingo gamuamukatizizie muabikilue kamenyikilo na Muuza Wasililila weidagano, 14uli kalingilo ka bupieni bueitu, aba nu gakakulula bage, ku luganuno lua lutanuno luage.

Paolo Ekubalolesia Lutanuno lua Ekelezia Luli mu Mubili wa Klisto.

15Ku kabamba kako nunne, kutukila, ganungule musagu wa bukatizio bueinyu mu Mukota Yesu, nu lutundo lueinyu ku basuagibua bansania, 16nsikukutua na kumusima, nu nkumusegela; 17buno Kalaga wa Mukota weitu Yesu Klisto, Isi wa lutanuno, amukase muuza wa menge nu kulolesia mu kumumenya; 18menyininazi mu mitima zeinyu, buni buli kilemanizio kia mubila wage, nu buni buli bugumi bua lutanuno lua bupieni buage mu basuagibua, 19nu buni buli kuitila kua magala mage kutuli isue bekukatizia, anga buli magala mage, 20malolesizie mu Klisto, gamuyukizie ku bakuzi, nu kumubika ku kuboko kuage kuidume muigulu, 21kutinga nunse makota mansania, nu buangato, nu magala, nu bangati, nuizina neizina likutekulua, ta ku nkiko zeno tugu, tondo nu mu zezo zavue: 22nu amukasile buangato bua binsania, nu amubikile muangati wa binsania ku kabamba ka ekelezia. 23Ulilio lili mubili wage, kusililila kuage kuasililila mu binsania.

Currently Selected:

Baefeso 1: NTKI57

Highlight

Copy