Baefeso 2
2
Lonio Lukutuka ku Mponga.
1Nuinyue mualekanukile na Kalaga ku kabamba ka buagi, nu ku misako za buagi bueinyu, 2uzezo zimuakitaga wakalazi ku kuyanga lukita lua kisi kikino, nu kuyanga mukota wa magala ma mpelela, muuza wozo ukukita mulimo kano kaluma mu babo bekunana; 3nu isue bansania tuikalaga gano wakalazi mu ntundo za bumba bueitu bua buagi, gatuazindilizagia ntundo za bumba bueitu bua buagi nu za makengelo meitu, nu ku bumba bueitu tunazugidue anga bango. 4Tondo Kalaga, eli na kiombo nunse, ku lutundo luage luatutundile, 5aba nkungu zezo zitualekanukile na Kalaga, ku kabamba ka buagi, atulamizie na Klisto (ku mponga monezibue), 6atuyukizie nage, nu atuikazizie nage muigulu, mu Klisto Yesu: 7buno mu nkiko zavue alolesie iguma lia bikulo bia mponga zage nu busoga buage kutuli mu Klisto Yesu. 8Kubuno ku mponga monezibue, ku bukatizio; nu bubuno tabuatukile kumuli mubenyene, buli lukaso lua Kalaga; 9ta ku makitilo, muntu unsania anavua kuikaka. 10Kubuno isue tuakitilue mueli, tuabumbilue mu Klisto Yesu, tukite makitilo masoga, malingile kukakizia Kalaga tutabange mumo.
Bantu baBilongo nu baYuda Bakundamanizibue ku Kalaga mu Lukuo lua Klisto.
11Ku bubuno kengelazi buno, wakalazi muabezaga bantu baBilongo ku lukita lua mubili, muamanagua buno Batamonesibua na babo beimanaga buno Bamonesibua, kuko kuakitilue ku mubili na maboko; 12buno ku nkungu zezo mualekanukile na Klisto, muabezaga muabandukana na kilongo kia balsalele, nu bageni ku luango luidagano, tamuabezaga na kilemanizio nu tamuabezaga na Kalaga mu kisi. 13Tondo wakalazi muabezaga bulazi, kano kaluma mu Klisto Yesu museli buigi mu mikila za Klisto. 14Kubuno we eli bubobelelo bueitu, watukitile isue babili buno tube umozi, enduide kitutu kiabezaga gatusamba. 15Na mubili wage asilile kutikia bubo buiti, u mulembe wikakizio uli mu meigisia; buno babili babe muntu umozi muto mueli, nu bubo abagomanizie; 16nu akulumanizie babili ku Kalaga mu mubili umozi ku muti wa magu, ku kuita buiti kugo. 17Nu avule kubasambalila bumugomania inyue babezaga bulazi, nu babo babezaga buigi: 18kubuno mueli isue bansania tuseli buigi nelsi mu Muuza umozi. 19Umpanga tamuli lingo bageni aba batingi, tondo muse banyabo na basuagibua, bantu ba kikanga kia Kalaga, 20mukulindibua ga kibanza kia basingua nu balengania, Klisto Yesu wenyene eli ikozi inene lia kapindapinda; 21mueli kubaka kunsania kuakulumanibua, nu kukula buno kube numba nsoga mu Mukota; 22mueli nuinyue mualindibua buno mube kiziki kia Kalaga mu Muuza.
Currently Selected:
Baefeso 2: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
