Misako 9

Kugaluka kua Paolo.

Misako 22:1-16; 26:9-18.

1Tondo Saolo, abezaga eki etia beigisibua ba Mukota boba, nu alondaga kubeita, nu endede sankoga munene, 2nu asegile mukanda kuenda ku Damaseke ku numba za misanganano, buno embe amone ku bantu ba meigisia mamano, bamulume aba bakikulu, buno abalusie ku Yelusalema buno bakandue. 3Tondo mu lugendo, gabezaga esayangilila kubasa ku Damaseke: kitangala besi kiengi kiatukile kuigulu nu kiamusanine: 4nu aguide gansi, nu ongule kuiyuki liamubuide bune, Saolo, Saolo, kubuni kukumbabazia? 5Nu atendile bune, Uwe unazi, Mukota? nu atendile bune, Nne u Yesu ukubabazia: 6tondo zanzuka, wende ku muino, nu wasambalilue bunsania buwakite. 7Nu bamulume bendaga nage bemanine bakatile mukobi, bongule kuiyuki, tondo tabamonine ku muntu. 8Nu Saolo, azanzukile; nu galimbuide meiso, ntamenyaga kumona lingo; nu bamukatile ku kuboko, bendile nage Damaseke. 9Nu atingizie bindi bisatu ntakumona lingo, nu ntaliaga nu ntanuaga.

10Nu ku Damaseke kuabezaga muigisibua umozi, izina lage Anania, nu Mukota amubuide mu kalolesio bune, Anania. Nu eitabide bune, Nili gano, Mukota. 11Nu Mukota amubuide bune, Zanzuka, nu wende mu nzila zikumanua Zisa, nu nti wabuzia ku numba za Yudasa kuli muntu umozi ukumanua Saolo, muntu wa Taliso: kubuno ekusega; 12nuwe amonine ku muntu izina liage Anania engila, amubikile maboko, buno amone lingo. 13Tondo Anania akuide, Mukota, nungule ku misagu za muntu wono ku bantu beingi buno, ekukitila basuagibua bobe bubi buingi ku Yelusalema. 14Nu eli na buangato gano bua ku basankoga banene kukanda bansania bekusegaga kuizina liobe. 15Tondo Mukota amubuide bune, Enda, kubuno ese musombolua wane, kuenda neizina liane ku baBilongo, nu ku bakota, nu ku bana ba Isalele: 16kubuno namulolesie mbabazio inga zakababazibua ku kabamba keizina liane. 17Nu Anania endile, nu engide mu numba; nu amubikile maboko mage, nu atendile bune, Mubuto wane Saolo, Mukota Yesu, wakubaside mu nzila ansinga, buno umone lingo, nu kuiyazibua na Muuza Wasililila. 18Nu kazanga kongo ku meiso mage kuakolokile biasusania anga magamba, nu amonine lingo, nu azanzukile nu abatizizibue; 19nu alile idia, nu abeide na magala. Nu eikeide bindi bimozi kuko na beigisibua babezaga ku Damaseke.

Paolo Ekulinga Mulimo Wage.

20Nu kazanga kongo asambede musagu wa Yesu mu numba za misanganano, buno we eli Muana wa Kalaga. 21Nu bansania bonguaga buakutenda bangamine, nu batendile bune, Ta uwono ukuitaga babo bekusegaga kuizina lilino mu Yelusalema? nu avua tugu gano, buno abeke ku kikando ku basankoga banene. 22Tondo Saolo eitide kuba na magala, angamizie baYuda beikalaga ku Damaseke, akokomezie buno wono eli Klisto.

23Aba bindi bingi biatingile, baYuda bakalile luango buno bamuite: 24tondo kulongeka kuabo kuamenyinue na Saolo. Nu balangile ku nibi musi nu kindi, buno bamuite: 25tondo beigisibua bage bamutolile mu kindi, nu bamugezizie mu kitutu mu luzi.

Paolo Ekuenda ku Yelusalema nu ku Taliso.

26Saolo gabasile ku Yelusalema, atundile kugomia na beigisibua: tondo bamukule boba bansania, aba tabakatizizie buno eli muigisibua, 27Tondo Balanaba amutolile, nu endile nage ku basingua, nu abasambalide lukita luamonine ku Mukota mu nzila, nu buno atendile nage, nu lukita luasambede na luatu kuko ku Damaseke kuizina lia Yesu. 28Nuwe endaga nabo kankanka mu Yelusalema, 29nu asambede na luatu muizina lia Mukota: atendile na baYuda batendaga mutendezi wa ba Geleka, endile nabo miango: nu batundaga kumuita. 30Tondo mibuto zage gabongule ku misagu zeno, bendile nage ku Kaisalia, buno ende ku Taliso.

31Umpanga ekelezia liabobelede ku Yudaya unsania, nu ku Galela nu ku Samalia, balindizibue; nu beitide, nu batabangile nu kuanza Mukota, nu mu kubobelezia kua Muuza Wasililila.

Aenea Onezibue.

32Nu gabeide Petelo ekutinga ku biziki binsania, agelile ku basuagibua babezaga ku Lidia. 33Nu kuko amonine ku muntu umozi izina liage Aenea, wiyombekaga ku mugu miaka kinana; kubuno abezaga na lusambo lua koma kiganza. 34Nu Petelo amubuide, Aenea, Yesu Klisto akonia; zanzuka, nu wanze mugu wobe nu kazanga kongo azanzukile. 35Nu bantu bansania bekalaga ku Lidia nu ku Salona bamumonineko, nu bagalukile ku Mukota.

Bekuyukia Dolokasa ku Bakuzi.

36Nu kuabezaga mu Yopa, muigisibua wamanagua bune, Tabita, buisulilua bualio Dolokasa; mukikulu wono abezaga eiyala na misako misoga, nu mponga zakitaga. 37Nu gabede bindi bibio, abezaga na lusambo, nu akule: nu gabamogezie, bamubikile mu busio bua kuigulu. 38Nu kukuba Lidia eli buigi na Yopa, nubo beigisibua bongule buno Petelo eli kuko, bamusingide bantu babili, bamusegile buno asasie kuvua kubeli. 39Nu Petelo atukile, nu endile nabo. Nu gavule, bendile nage ku busio bua kuigulu: nu misigala insania bemanine buigi nage, bekulila, nu balolesizie nkanzu nu nsulu zalukaga Dolokasa, gabezaga nabo. 40Tondo Petelo atikizie bansania, akomine mazu, nu asegile; nu agalukide ku kitumba, atendile bune, Tabita, Yuka. Nu alimbuide meiso; nu gamonine ku Petelo ayukile. 41Nu amulambizizie kuboko, nu amuzanzuide; nu amanine basuagibua nu misigala, nu amubikile lisa nabo ese na kalamo. 42Buakukene ku Yopa unsania: nu bantu beingi bakatizizie Mukota. 43Nu Petelo eizizizie ku Yopa mu numba za muntu umozi wamanagua Simona, mukulumizi wa bikoba.

Currently Selected:

Misako 9: NTKI57

Highlight

Copy