Misako 10

Konelio Ekumona ku Kalolesio Kakuganiagania.

1Kuabezaga mu Kaisalia, muntu umozi izina liage Konelio, mukota wa bakoloboyo, beiyombo lia Itali, 2muntu musoga, nu anzaga Kalaga gamozi na numba zage insania, akasaga bantu nkaso ningi, nu asegaga ku Kalaga bindi binsania. 3Amonine mu kalolesio, anga buigi na nkungu mbula za musi, ku mugenzi wa Kalaga engide kueli nu amubuide bune, Konelio. 4Nu gamulolile akule boba, atendile bune, Buni, Mukota? Nu amutendile bune, Masego mobe nu nkaso zobe biabasa kuigulu kuba kakengelezio ku Kalaga. 5Nu kano kaluma singa bamulume kuenda ku Yopa, nu bavue na Simona, ukumanua Petelo: 6ekuikalaga mu numba za Simona, mukulumizi wa bikoba, numba zage zili ku ntungo kua kitatenge. 7Nu gatukile wozo mugenzi watendaga nu Konelio, amanine bakiti babili ba numba zage, nu mukoloboyo musoga mu babo bamukambilaga bindi binsania; 8nu gasilile kubasambalila bunsania, abasingile kuenda ku Yopa.

Petelo Ekumona ku Kalolesio ka Nsulu Zakatua ku Ntungo Inazi.

9Gakeide busi, gababezaga mu nzila buigi na muino, Petelo abakamine gantata ga numba kusega, buigi na nkungu mutuba: 10nu akule na nzala nunse, nu atundile kulia; tondo babezaga bekiyika idia, nu endile kalengoe; 11nu amonine igulu liguka, nu nyungu anga nsulu nnene zikugela ku kisi gansi zakatua ku ntungo inazi; 12nu muzo muabezaga nyama insania za magulu manazi ku binsania bikugelegetaga gansi nu tuzoni tua mumpelela. 13Nu iyuki liamubuide bune, Petelo, yuka, sesa, nu gulie. 14Tondo Petelo atendile bune, Tabubo, Mukota; kubuno nsiliaga kili na nsese aba kinteizi. 15Nu iyuki liamubuide lingo bune, Kinsania kiasuagibua na Kalaga ntukimane nsese. 16Nu bubuno buabeide mambizi masatu: nu kazanga kongo nyungu zezo zasubizie muigulu lingo.

Petelo nu Basingua ba Konelio.

17Nu gabezaga Petelo ekuganagana na buisulilua bua kako kalolesio buno kabe buni, nu babo bantu basingaga Konelio, babuzizie numba za Simona, bemanine ku luibi, 18nu bamanine nu babuzizie buno ndi Simona, ukumanua Petelo, eli kuko? 19Nu gabezaga Petelo ekukengela kalolesio kamonagako, Muuza amutendile bune, Unguilila, bantu basatu bekukulonda. 20Tondo zanzuka, nu ugele, nu wende nabo na mutima umozi; kubuno nne uwabasinga. 21Nu Petelo agelile, nu atendile na babo bamulume bune, Nne u wozo umukulonda: muavua ku kikizi? 22Nu batendile bune, Konelio, mukota wa bakoloboyo, muntu wisanana, nu ukuanzaga Kalaga, akulumbibua busoga ku kilongo kinsania kia baYuda, aninue na mugenzi wasililila kusinga bantu kuguli, buno wende ku numba zage, ongue buwamutende. 23Nu abeingizizie mu numba, nu abanzide, nu gakeide busi Petelo endile nabo, nu mibuto imozi zage za ku Yopa, bamuelekezizie.

Petelo Ekuenda ku Konelio.

24Gakeide busi babasile ku Kaisalia. Nu Konelio abalindide, akundamanizie kikanga kiage, nu beida bage. 25Nu geingide Petelo mu numba za Konelio, nu Konelio amusekeide, akomine mazu mage, nu amukumbamine. 26Tondo Petelo amuemanukizie, atendile bune, Emanuka; nili muntu anga uwe. 27Nu mukusambala nage, eingide nu amonine ku bantu beingi bakongana: 28nu abatendile bune, Inyue muizi buno, tabuakulungana muYuda kuikala na muntu wa kingo kilongo aba kusigelela buigi nage; tondo Kalaga andolesia bune, Ntumane ungo muntu buno eli nsese aba buno, ntumuizi: 29kubuno navua na mutima umozi gamuamanine nkubuzia kimuamaninaga. 30Nu Konelio atendile bune, Lelo u kindi kia binazi kutukila naganisegela aba nu nkungu zeno, nu nkungu za mubula nabezaga nkusega ku numba zane; nu wamulume emanine lisa nanne, abezaga na nsulu zenga, 31nu atendile bune, Konelio, masego mobe mongubua, nu nkaso zobe zakengelua ku Kalaga. 32Bubo singa bantu kuenda ku Yopa kumana Simona ukumanua Petelo, avue gano; ekuikalaga mu numba za Simona mukulumizi wa bikoba, buigi na kitatenge. 33Nu kazanga kongo nasingile bantu kuguli; nuwe wakita busoga wavua. Kano kaluma isue bansania tuli gano, nu Kalaga ekutumonako, nu tukunguilila buwakakizibue na Mukota.

Petelo Ekusambalila Bantu mu Numba za Konelio Bubanonibua.

34Nu Petelo asuide kanua, nu atendile bune, Lebelebe namenya kasi Kalaga ntakukutia bantu bamozi: 35tondo mu kilongo kinsania wamuanza, nu kukita buisanana, nti eitabizibua nage. 36Idagi lilino liasingilue ku bana ba Isalele, abasambalide musagu musoga wa bubobelelo mu Yesu Klisto (eli Mukota wa bansania)— 37idagi lilino mualimenyine liasambedue mu Yudaya unsania, lialingile ku Galela, gasilile bubatizio buasambalaga Yoana; 38musagu wa Yesu wa Nazaleta, lukita luamubongezie Kalaga na Muuza Wasililila nu buangato; we watingaga kuno nu kuko kukita milimo misoga, nu onezie bansania babo bangatagua na Liabo, u Satana, kubuno Kalaga abezaga nage. 39Nuisue tuli balongeki ba binsania biakitaga mu kisi kia baYuda, nu mu Yelusalema; wozo ubeitile nu ubatakile ku muti. 40Kalaga ayukizie wono kusila kua bindi bisatu, nu amulolesizie, 41tondo ta ku bantu bansania, tondo ku balongeki balingile kusombolua na Kalaga, isue babano, tualiaga nage nu tuanuaga nage gabeide esayuka ku bakuzi. 42Nu atukakizizie buno tusambalile bantu, nu kulongeka buno u wozo wabikilue na Kalaga buno abe Ngatu za balami nu bakuzi. 43W ono walongekedue na balengania bansania buno kuizina liage muntu na muntu wamukatizia nti asigililua misako za buagi.

44Gabezaga Petelo akitenda bubuno, Muuza Wasililila agelede bansania bonguaga ku lilio idagi. 45Nu babo bamonesibua bakatizizie bangamine, ubabo bavule gamozi na Petelo kubuno lukaso lua Muuza Wasililila luakubulua ku baBilongo. 46Nubo kubuno bongule bubatendaga ku mitendezi, nu baganuine Kalaga. Ububo Petelo ababuide bune, 47Nazi unabazugila ku mazi, buno babano tababatizibue, bantu bakasua Muuza Wasililila anga isue? 48Nu akakizizie buno babatizibue kuizina lia Yesu Klisto. Nu bamusegile buno eizizie bindi bimozi.

Currently Selected:

Misako 10: NTKI57

Highlight

Copy