Misako 11

Petelo Ekuibingia ku Basingua Banyage.

1Umpanga basingua nu mibuto zabo babezaga mu Yudaya bongule buno baBilongo bese neidagi lia Kalaga nubo. 2Nu Petelo gabakamine ku Yelusalema, babo bamonesibua bendile nage miango, 3batendile bune, Wingide ku bantu batamonesibua, nu walile nabo. 4Tondo Petelo alingile kubasambalila bukebuke, atendile bune, 5Nabezaga mu muino wa Yopa nkusega: nu nendile kalengoe namonine ku kalolesio, nyungu zagela, anga nsulu nnene zagezibua kutuka kuigulu na zakatua ku ntungo inazi; nu zanvuilide: 6nazilolile kisozi, nakengede, nu namonine ku nyama za kisi zili na magulu manazi, nu nyama nkali, nuzo zikugelegetaga nu tuzoni tua mpelela. 7Nu nongule kuiyuki liantendile bune, Yuka, Petelo; sesa nu gulie. 8Tondo natendile bune, Tabubo, Mukota: kubuno kinsania kili na nsese aba kinteizi, takingilaga mu kanua kane nunse. 9Tondo iyuki lianakuide lingo kutuka kuigulu bune, Biasuagibua na Kalaga ntubimane nsese. 10Nu bubuno buabeide mambizi masatu: nu binsania biabakamizibue lingo kuigulu. 11Nu kazanga kamozi bantu basatu bemanine lisa na numba zituabezaga muzo, basingilue kundi kutuka ku Kaisalia. 12Nu Muuza antendile bune, Enda nabo na mutima umozi. Nu babano mibuto zane mutuba nubo bendile gamozi nanne; nu tuingide mu numba za muntu wozo: 13nu atusambalide buamonine ku mugenzi wemana mu numba zage, nu wamubuide bune, Singa bantu ku Yopa kumana Simona, ukumanua Petelo; 14akusambalile bugunona, uwe nu numba zobe insania. 15Nu ganabezaga nkitenda, Muuza Wasililila abagelede, anga bualingile kutugelela. 16Nu nakengede idagi lia Mukota, buatendile buno, Yoana abatizizie na mazi; tondo inyue mukabatizibua na Muuza Wasililila. 17Ndi Kalaga abakasile lukaso anga buatukasilelo, gatuakatizizie Mukota Yesu Klisto, nne u nazi, unavuamine kuzugila Kalaga? 18Nu gabongule ku bubo bakatile mukobi, nu baganuine Kalaga, batendile bune, Umpanga, Kalaga asila kukasa baBilongo nubo kuiyania buno babe na kalamo.

Ku Antiokia Bekulinga Kumana Bakatizia Buno, Baklisto.

19Nu babo babalanganizibue ku nsungio zalingile ku Setefano bendile aba ku Foiniki, nu ku Kupulio, nu ku Antiokia, basambalaga wozo musagu tugu ku baYuda. 20Tondo bamozi ba ku babo, babezaga bamulume ba Kupulio nu ku Kulene, nubo babasile ku Antiokia, batendile na baGeleka buno babasambalile musagu wa Mukota Yesu. 21Nu kuboko kua Mukota kuabeide nabo: nu bantu beingi bakatizizie, bagalukide Mukota. 22Nu misagu zeno za bubo zabasile ku ekelezia liabezaga mu Yelusalema: nu basingile Balanaba buno ende ku Antiokia: 23nugue, gabasile, nu kumona ku mponga za Kalaga, abogilebogile; nu anine bansania buno, bagomie na Mukota na mutima umozi; 24kubuno abezaga muntu musoga, eiyeide na Muuza Wasililila nu bukatizio: nu bantu beingi batalikidue ku Mukota. 25Nu endile ku Taliso kulonda Saolo; 26nu gamumonine, nu avule nage ku Antiokia. Nu basilile muaka umozi bakukundamana na ekelezia, nu beigisizie bantu beingi; nu beigisibua balingile kumanua buno baKlisto ku Antiokia.

BaEkelezia lia ku Antiokia Bekukasia BaEkelezia lia Yelusalema.

27Mu bindi bibio balengania batukile ku Yelusalema nu kuenda ku Antiokia. 28Nu umozi wa kubeli izina liage Agabo, emanukile, nu alolesezie mu Muuza buno kuabe munganda mu kisi kinsania: nu bubo buabede mu bindi bia Kalaudio. 29Nu babo beigisibua, muntu na muntu anga buamonaga, bakengede kueka nkaso ku mibuto zabo beikalaga ku Yudaya: 30bakitile bubuno bazisingile ku bakulu na Balanaba nu Saolo.

Currently Selected:

Misako 11: NTKI57

Highlight

Copy