Misako 12
12
Bekuingizia Petelo mu Kikando.
1Mu bindi bibio mukota Helode alingile kusungia bantu bamozi ba ekelezia. 2Nu eitile Yakobo iselenzi wa Yoana na bupanga. 3Nu kubuno amonine buatananizizie baYuda, akokomezizie nu akatile Petelo. Nu biabezaga bindi bia tumpampa tutagaga. 4Nu gamukatile, amubikile mu kikando, nu amukatizie bakoloboyo ikumi na mutuba buno bamulange; akengelaga kusila kua Kisagulo kiesuluko nti amubasia ku bantu. 5Umpanga Petelo alangilue mu kikando: tondo ekelezia bamusegede nunse na komanizia. 6Nu nkungu zezo Helode gatundaga kumutikia busi bubo Petelo abezaga eiyombeka gasamba bakoloboyo babili, akandua na makoki mabili: nu balangi lisa na luibi balangaga kikando. 7Nu mugenzi wa Mukota emene buigi nage, nu kiengi kiasanine mu busio: alibuide Petelo ku mpege, nu amuyukizie, atendile bune, Sasia kuzanzuka. Nu makoki mabezaga ku maboko mage maketukile. 8Nu mugenzi amubuide bune, Ikande, zuala bisalapata biobe. Nu akitile bubo. Nu amubuide bune, Vuala nsulu zobe, nu unyange. 9Nu atukile nu amuyangile; nu ntamenyine buno buligo bubo buakitaga mugenzi; tondo akengede buno amona tugu ku kalolesio. 10Nu gabatingile mulangi mutangi nu wa babili, babasile ku luibi lua kiuma lua kuingilila mu muino; luabegukide loluinyene; babasile kumbuga, nu batingile ku nzila imozi; nu kazanga kongo mugenzi amusigile. 11Nu Petelo gamenyine, atendile bune, Kano kaluma namenya lebelebe buno Mukota ansingila mugenzi wage nu anonezie ku Helode, nu ku kulindila kua bantu ba baYuda. 12Nu gasilile kukengela bubo, avule ku numba za Malia nina wa Yoana, wamanagua Malako, nu bantu beingi babezaga bakundamana nu bekusega. 13Nu gazumizie ku luibi, mukiti umozi izina liage Loda, avule kunguilila. 14Nu gamenyine iyuki lia Petelo, nteguide luibi kubuno abezaga na mbogimbogi, tondo asubizie lubilo nu abatendile buno, Petelo uwemana ku luibi. 15Nu bamubuide bune, Uli musile. Tondo eidangizie bubibu, buno buligo. Nu batendile bune, Mugenzi wage tugu. 16Tondo Petelo eitide kuzumia: nu gabeguide luibi nu bamumonineko bangamine. 17Tondo we abatengezizie kuboko buno beikale kibibi, abasambalide lukita luamutikia Mukota ku kikando. Nu atendile bune, Endazi, musambalile Yakobo misagu zeno, nu mibuto zeitu. Nu atukile, nu endile ku kingo kiziki. 18Nu gabeide busi buakia, bakoloboyo bazangilezangile nunse, kuni kuenda Petelo. 19Helode gamulondile, nu ntamumonineko, abuzizie balangi, nu abasengezezie buno beitue. N u atukile ku Yudaya nu endile ku Kaisalia, nu eikede kuko.
Kukua kua Helode.
20Nu ongedue nunse bantu ba Tula nu Sidona: nu bamuvuilide na mutima umozi, nu babezaga bakita bulemba na Balasoto mulangi wa nkiko za mukota za kuiyombeka, nu batundile bubobelelo, kubuno kisi kiabo kialisizibue na kisi kia mukota. 21Nu busi bubo buasombuedue Helode azualile nsulu za bukota, eikeide ga kisumbi kia bukota, nu abasambalide musagu. 22Nu bantu balalukile bune, Lili iyuki lia kango kalaga, ta lia bantu. 23Nu kazanga kongo mugenzi wa Mukota amulibuide, kubuno ntakasile Kalaga lutanuno; alidue na minsobobo, nu alekeine.
24Tondo idagi lia Kalaga lietide nunse nu liatalikidue.
25Nu Balanaba nu Saolo basubizie kutuka ku Yelusalema, gabasilile bugenzi buabo, nu bavule na Yoana wamanagua Malako.
Currently Selected:
Misako 12: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
