Misako 13

Muuza Wasililila Ekumana Balanaba nu Saolo.

1Mu ekelezia lia Antiokia muabezaga balengania nu basozi u babano, Balanaba, nu Simiona wamanagua Nige, nu Lukio mu Kulene, nu Manaene muida wa mukota Helode, nu Saolo, 2nubo gabakambide Mukota nu tabaliaga Muuza Wasililila atendile bune, Mbikilazi Balanaba nu Saolo ku mulimo wozo gunabamanine kugo. 3Bubo, gabasegile nu kutalia bababikile maboko geitoe nu babasingile buno bende.

Saolo nu Balanaba Bekuenda ku Kusambala.

4Nubo, basingilue na Muuza Wasililila, bendile ku Sulukia; nu kutuka kuko bendile na buato ku Kupulio. 5Nu gababezaga ku Salameni, basambede musagu wa Kalaga mu numba za misanganano za baYuda: nu Yoana abakitilaga. 6Nu gabasilile kutinga mu biziki binsania bia kisanga aba nu ku Pafo, bamonine ku muntu umozi mugila, mulengania wa buza, muYuda, izina liage, BalaYesu; 7wabezaga gamozi na muangati Segio-Paolo, muntu wa menge. We uwamanine Balanaba nu Saolo buno bavue kueli, atundile kungua kuidagi lia Kalaga. 8Tondo Elemasi, wozo mugila (kubuno bubo ubukuisulua izina liage), endile miango nabo, atundaga kugalukia wozo muangati buno asige bukatizio. 9Tondo Saolo, nuwe lingo eli Paolo, eiyeide na Muuza Wasililila, amulolile kisozi, 10atendile bune, Uwe wiyala na menge mansania ma bubi, muana wa Liabo, u Satana, musombi wa kuisanana kunsania, ndi ntualekele nunse kugalukia nzila zisa za Mukota Yesu? 11Kano kaluma, kuboko kua Mukota kuli kuguli, nu wabe kiuku, ntuamone ku kisongo kia busi bindi bimozi; kazanga kongo muizi wamubaside nu kapilo; nu atimbiletimbile, nu alondile muntu wa kumukata ku kuboko nu kumusondelezia. 12Nuwe muangati, gamonine ku bubo buakitua, akatizizie, angamine na meigisia ma Mukota Yesu.

Paolo Ekubula Bantu Idagi lia Kalaga mu Numba za Musanganano wa ku Antiokia, nu wa ku Pisidia.

13Umpanga Paolo nu banyage batukile ku Pafo na buato nu babasile ku Pelega mu Pampulia; nu Yoana abasigile, nu asubizie ku Yelusalema. 14Tondo babo, gabatukile ku Pelega, bendile ku Antiokia wa Pisidia; beingide mu numba za musanganano busi bua sabato, nu beikeide gansi. 15Nu gasilile kusomua mulembe nu mikanda za balengania, nu bangati ba numba za musanganano babasingide muntu, batendile bune, Mibuto zeitu, ndi mukuana babano bantu, nti muatenda. 16Nu Paolo emanukile, abatengezezie kuboko, atendile bune, Bamulume balsalele, nu inyue bakuanzaga Kalaga, unguililazi: 17Kalaga wa bantu babano balsalele asombuede batateisue, nu asakikile bantu babezaga bageni mu kisi kia Ezipeto, nu ku kuboko kua magala abasondelezizie buno batuke kuko. 18Nu abalisizie miaka makumi manazi mu kalula. 19Nu gasilile kuita bilongo mutuba kamo bia kisi kia Kanana, abakasile kisi kiabo buno kibe bupieni buabo miaka nkama inazi nu makumi matano: 20nu kusila kua bubo abakasile ngatu aba nu kuika ku mulengania Samuele. 21Nu basegile buno babe na mukota: nu Kalaga abakasile Saolo muana wa Kishi, muntu wa kilongo kia Benzamini, ku miaka zakuka makumi manazi. 22Nu gamutikizie, asakikile Davidi buno abe mukota wabo; nu bubo amulongekede nu atendile bune, Namona ku Davidi muana wa Yese, wamulume wantananizia, ukakita kusombola kuane kunsania. 23Kalaga asombuede kikanga kia wamulume wono asakikide balsalele Monia, uwono Yesu, anga bualagile; 24gabezaga Yoana ekusambala musagu ku bantu bansania halsalele wa kubatizia kua kuiyania nti ntevua. 25Nu gabezaga Yoana esasililizia mulimo wage, atendile bune, Mukukengela buno nili nazi? Nsili wozo. Tondo unguililazi, kumbusa kuane kuavue umozi, nunne nsinatananina kukandula bisalapata bia magulu mage. 26Mibuto zane, bana ba kikanga kia Abalahama, nuinyue bekuanzaga Kalaga, musagu wa lonio luluno wasingilue kutuli. 27Bekuikalaga mu Yelusalema nu bangati babo, kubuno tabamenyine wono aba moki ma balengania mekusomagua busi na busi bua sabato, bamazindilizizie mu kumusungia. 28N u tabamonine ku bumozi buanakuila, tondo basegile Pilato buno, amuite. 29Nu gabasilile kuzindilizia bunsania buasanzidue, bamugezizie ku muti, nu bamubikile mu nsinda. 30Tondo Kalaga amuyukizie ku bakuzi: 31nu amonekileko bindi bingi na babo bavuaga nage kutukila ku Galela aba nu ku Yelusalema, beli kano kaluma balongeki bage ku bantu. 32Nuisue tuamuvuila na musagu musoga weidagano lialagilue ku batateisue, 33Kalaga azindilizie ku bana beitu idagi lilino, gayukizie Yesu ku bakuzi; anga buasanzilue mu luimbo lueibili bune, Uli muana wane, nakubutile lelo.#Luimbo 2:7. 34Nu kubuno amuyukizie ku bakuzi, nu ntasubie lingo buno abole, atendile bubuno bune, Nakukase mbogimbogi za Davidi.#Yesaya 55:3. 35Kubuno atendile mu lungo luimbo, Ntukasiga Wasililila wobe buno abole.#Luimbo 16:10. 36Kubuno Davidi gasilile kukitila kibuti kiage mu kusombola kua Kalaga, akule nu abikilue gamozi na beisi, nu abolile: 37tondo wozo wayukizibue na Kalaga ntabolile. 38Umpanga mibuto zane, menyazi buno, ku muntu wono mukusambalilua isigililo lia misako za buagi bueinyu: 39nu mu wono na muntu na muntu unsania wamukatizia nti abingibua mu misako insania, tamunabingibua ku zezo ku mulembe wa Mose. 40Umpanga, idangazi buno bubo buatendile balengania tabumubele,

41Unguililazi, inyue babengi, nu muganegane, nu muzimine,

Kubuno nkukita mulimo mu bindi bienyu,

Ndi muntu ekumusambalilago, tamukukatizia.#Luimbo 2:7.

42Nu gababasile, babasegile buno babasambalile bubuno bungo busi bua sabato. 43Nu gabalangene musanganano, baYuda beingi nu bagalukizie mitima zabo ku bulili bayangile Paolo nu Balanaba; nubo, batendile nabo, babalutile kuikala mu mponga za Kalaga.

44Nu gabezaga bungo busi bua sabato, buigi na bantu bansania ba muino bakundamene kungua kuidagi lia Kalaga. 45Tondo baYuda gabamonine ku musanganano, babeide na lugi, nu bakanizie buatendaga Paolo, nu balingeine. 46Paolo nu Balanaba basambede na luatu bune, Buatananine idagi lia Kalaga lilinge kusambalua kumuli. Tondo kubuno mukulisomba tamukuikengela kutananina kalamo katanakuzinda, unguililazi, tuagaluka ku baBilongo. 47Kubuno ububo butuakakizizibue na Mukota bune,

Nakubikile buno ube kiengi kia baBilongo,

Buno ube lonio aba kuzinda kua kisi.#Yesaya 49:6.

48Nu gongule baBilongo bubuno, babogilebogile, nu baganuine idagi lia Mukota: nubo basombuedue ku kalamo katanakuzinda bakatizizie. 49Nu idagi lia Mukota liakukile mu kisi kikio kinsania. 50Tondo baYuda balutile bakikulu banzagua, nu bamulume banene ba muino, nu balingile kusungia Paolo nu Balanaba, nu babatikizie mu miaga zabo. 51Tondo babatitibulide mukungu wa magulu mabo, nu bendile ku Ikonia. 52Nu beigisibua beiyazizibue na mbogimbogi nu na Muuza Wasililila.

Currently Selected:

Misako 13: NTKI57

Highlight

Copy