Misako 8

Kabebe Kabalanganizie Bantu ba Yesu Babezaga mu Yelusalema.

1Nu Saolo abezaga ekuitabizia lukuo luage, nu mu busi bubo muabede lusungio lunene ku ekelezia liabezaga mu Yelusalema; nu babalanganizibue ku biziki binsania ku Yudaya nu ku Samalia, tondo basingua tababalanganizibue. 2Nu bakatizia ubayikile Setefano, nu bamulilide bubibu nunse. 3Tondo Saolo asungizie ekelezia, nu kuingila mu numba na numba, kubuluta bamulume nu bakikulu nu kubabika mu kikando.

Bantu ba Yesu Babalangene Neidagi lia Kalaga. Buakitaga Filipo.

4Tondo babo babalanganaga ku kiziki na kiziki basambede idagi. 5Filipo agelile ku muino wa Samalia, nu kubasambalila musagu wa Klisto. 6Nu musanganano unsania wonguilide na mutima umozi bubo buatendaga Filipo, bongule nu bamonine ku migeleko zakitaga. 7Kubuno basumbu ba nsese batukile beingi mu babo babezaga nabo, balalukile na moki manene, nu bantu beingi babezaga boma biganza nu bitunga, bonezibue. 8Nu mu muino wozo muabeide mbogimbogi nnene.

9Tondo mu wozo muino muabezaga muntu umozi izina liage Simona, abezaga ekukita bugila, nu angamagia bantu baSamalia, atendile wenyene buno, eli munene; 10nu bamunguililaga bansania, kutukila ku bana bato nu ku bakulu banene, nu batendile bune, Muntu wono amanagua buno, Magala Manene ma Kalaga. 11Bamunguilide, kubuno abezaga ekubangamia na buganga buage. 12Tondo gabakatizizie Filipo, gabasambalilaga musagu musoga wa bukota bua Kalaga nu izina lia Yesu Klisto, nu babatizizibue na mazi, bamulume nu bakikulu. 13Nu Simona wenyene akatizizie: nu abatizizibue, ayangene na Filipo; nu aganineganine gamonine ku migeleko nu maganogano makitagua.

14Nubo basingua babezaga mu Yelusalema gabongule buno, baSamalia beitabizia idagi lia Kalaga, basingile Petelo nu Yoana kubeli; 15nubo, gababasile, babasegede buno bakasue Muuza Wasililila: 16kubuno wabezaga tagubagelela; tugu babezaga babatizibua muizina lia Mukota Yesu. 17Nu bababikile maboko geitoe, nubo bakasilue Muuza Wasililila. 18Wozo Simona gamonine ku bubo buno bantu bakasua Muuza Wasililila ku kubikua maboko na basingua, atundile kubakasa bikulo, 19atendile bune, Nkasazi nunne buangato bubuno, buno na muntu na muntu unabikage maboko mane geitoe, nti akasua Muuza Wasililila. 20Tondo Petelo amubuide bune, Bikulo biobe bizimine nobe, kubuno ukukengela tugu buno lukaso lua Kalaga lunakasanua ku bikulo. 21Ntuli na nkindi aba kibombo mu bubuno, kubuno mutima wobe ta musoga ku Kalaga. 22Kasi iyanie tanga ku mibi zobe, nu sega ku Mukota, embe anakusigilila ku mamano makengelo mobe. 23Kubuno nkumona buno, uli na lubaba, nu uli mu kikando kia bubi. 24Simona amuakuide bune, Kasi nsegelazi ku Mukota, buno bubuno bumuantenda bunavua kumbasila.

25Nubo, gabasilile kulongeka nu kuigisia idagi lia Mukota, basubizie ku Yelusalema, nu beigisizie, nu kusambala musagu musoga mu mino mingi za baSamalia.

Filipo nu Muntu wa Etiopia.

26Nu mugenzi wa Mukota atendile na Filipo, amubuide bune, Emanuka, nu enda mu nzila zatuka ku Yelusalema nu zenda ku Gaza: nu kuko kuli kalula. 27Nu emanukile nu endile, nu mu nkungu zezo amonine ku muntu wa Etiopia wabezaga wakua muntembele, abezaga mulangi wa Kandake, mukikulu mukota wa Etiopa, wozo uwabezaga mulangi wa bikulo biage binsania, nuwe endaga ku Yelusalema kukumbamina; 28nu mu kusubia kuage, abezaga ga ngondangonda zage, nu asomaga mukanda wa mulengania Yesaya. 29Nu Muuza abuide Filipo bune, Sigelela buigi na zezo ngondangonda, nu ubakame gazo. 30Nu Filipo eitumine lubilo kueli, nu ongule kuakusoma mu mukanda wa mulengania Yesaya, amubuzizie bune, Ndi ukumenyinina bukusoma? 31Nu amubuide bune, Buni bunamenyinine nu nsili na muntu ukundolesia? nu asegile Filipo abakame gago geli. 32Nu masanzo masomaga mabezaga bubuno,

Asondelezizibue anga mukoko ukuenda kusesua;

Nu anga muana wa mukoko utakulaka na wozo ukumusesa mioza,

Bubo nuwe ntalimbuidue kanua.

33Mu kubota kuage lusungio luage luatukizibue:

Nazi unasambala kibuti kiage?

Kubuno kalamo kage katukizibue mu kisi. #Yesaya 53:7, 8.

34Nu wozo wabezaga wakua muntembele akuide Filipo bune, Nkukubuzia buno, wozo mulengania atendaga musagu wa nazi? ndi musagu wage wenyene aba wa ungo muntu? 35Nu Filipo alimbuide kanua, alingide ku lilio isanzo, amusambalide musagu wa Yesu. 36Nu gabendaga mu nzila, babasile gabezaga mazi; nu wozo wabezaga wakua muntembele abuide Filipo bune, Kikizi lingo kinkulindila nsiabatizibua na mazi mamano meli gano? 37Nu Filipo amubuide bune, Ndi wakatizia mu mutima wobe unsania bunakulungana buno ubatizibue. Nu eitabizizie bune, Nakatizia buno Yesu Klisto eli muana wa Kalaga. 38Nu emanizie ngondangonda: nubo babili bagelile ku mazi, Filipo nu wozo wabezaga wakua muntembele, nu amubatizizie. 39Nu gabatukile ku mazi, Muuza wa Mukota atukizie Filipo; nu wozo wabezaga wakua muntembele ntamumonineko lingo, nuwe endile na mbogimbogi nunse. 40Tondo Filipo amonekede ku Azota: nu mukuenda kuage endaga eigisia musagu musoga mu mino insania, na buabasile ku Kaisalia.

Currently Selected:

Misako 8: NTKI57

Highlight

Copy