Misako 7

Setefano Ekubula Ngatu bua Lusombo Luabo.

1Nu sankoga munene atendile bune, Ndi bubuno buligo? 2Nuwe atendile bune, Mibuto zane, nu batatane, unguililazi: Kalaga wa lutanuno abaside tateisue Abalahama, gabezaga ku Mesopotamia, nti nteikala ku Halana, 3amubuide bune, Tuka mu kisi kiobe, nu mu kikanga kiobe, nu enda ku kisi kinakulolesie. 4Umpanga atukile mu kisi kia Kalalia, nu eikalile mu Halana: nu atukile kuko kusila kua lukuo lueisi, Kalaga amuigizie mu kisi kikino kimuikile mukio kano kaluma: 5nu ntamukasile bupieni mukio, aba kabe keibikila ga magulu mage; nu amulagile buno amukasekio buno kibe buangato buage, nu bua kikanga kiage kumbusa kuage, gabezaga ntebuta. 6Nu Kalaga atendile buno, kikanga kiage kikeikala mu kisi kite kiabo, nubo bakaba bakobe babo bakabakitila bubi miaka nkama inazi. 7Nu kilongo kikababika bakobe nkakisungia, ubuatendile Kalaga: nu kusila kua bubo bakatuka, nu bakankumbamina mu kiziki kikino. 8Nu amukasile idagano lia kumonesibua: nu Abalahama abutile Isaka, nu amumonesezie gabezaga ese bindi kinana; nu Isaka abutile Yakobo, nu Yakobo abutile batateisue ikumi na babili. 9Nu batateisue, babeide na lugi ku Yosefu, bamukunzizie ku Ezipeto: nu Kalaga abezaga nage, 10nu amutikizie mu milondo zage insania, nu amukitide mponga nu amukasile menge ku Falao mukota wa Ezipeto; nu amubikile muangati wa Ezipeto nu wa numba zage insania. 11Nu kuabeide munganda mu kisi kinsania kia Ezipeto nu Kanana, nu milondo mingi: nu batateisue tababezaga neidia. 12Tondo gongule Yakobo buno, Kuli idia ku Ezipeto, alingile kusinga batateisue. 13Nu ku lia mabili Yosefu eimenesizie ku beiselenzi nu muto wage; nu kikanga kia Y osefu kiamenyinue na Falao. 14Nu Yosefu abasingile, nu amanine isi Yakobo, nu kikanga kiage kinsania, babezaga bantu bakuka makumi mutuba kamo nu batano. 15Nu Yakobo abasile ku Ezipeto, nu akule, nu batateisue nubo bakule; 16nu bekilue aba ku Sikeme, nu bayikilue mu nsinda zakunzaga Abalahama ku bukunza bua feza ku bana ba Emola wa Sikeme. 17Tondo gakukile nkungu zeidagano lia Kalaga lialagile Abalahama, bantu betide kuba beingi mu Ezipeto, 18aba nu ungo mukota wangatile mu Ezipeto, utamenyaga Yosefu. 19Wozo akitide kikanga kietu bubi, nu asungizie batateisue, nu abakakizizie buno beise bana bato babo, buno banakivua kulama. 20Mu zezo nkungu, Mose abutilue, abezaga muana musoga nunse; alisizibue miezi isatu mu numba zeisi: 21nu gesilue, mukinga wa Falao amusongezie, nu amulisizie anga muana wage. 22Nu Mose eigisizibue menge mansania ma Ezipeto; nu abezaga mubibu ku kutenda kuage nu mu makitilo mage. 23Tondo miaka zage gazakukile miaka makumi manazi, akengede mu mutima wage buno atabangide mibuto zage, bana balsalele, 24Nu gamonine mubuto wage ekukitua bubi, amukasizie, nu amusubile, nu alibuide wozo muEzipeto wabengaga mubuto wage: 25akengelaga buno, embe mibuto zage banamenyinina buno, Kalaga abakasa bukuluzi ku kuboko kuage, tondo tabamenyinine. 26Nu bungo busi asangile bekusaka, atundaga buno abasunge, nu atendile bune, Inyue bakota bane, muli mubutua, buni bumukukitilana bubi? 27Tondo wozo wagilaga munyage amusindikile, nu atendile bune, Nazi wakubika mukota nu ngatu zeitu? 28Ndi ukutunda kunita anga buwitile muEzipeto walubi? 29Nu Mose atinine gongule ku bubo, abeide mugeni mu kisi kia Midiane, nu abutile bana babili kuko. 30Nu gasilile miaka makumi manazi mugenzi wa Mukota wamubaside mu kalula ku muiduko wa Sinai, mu ngulumina za keiya mu kilindi. 31Nu Mose gamonine ku bubo, angamine na bubo buamonine kubo: nuwe asigelede buigi buno amone, nu iyuki lia Mukota liamubaside bune, 32Nne Kalaga wa baso, Kalaga wa Abalahama, nu wa Isaka, nu wa Yakobo. Nu Mose agilimine, nu ntavuamine kulola, 33Nu Mukota amubuide bune, Gondola bisalapata ku magulu mobe: kubuno kiziki kiwemana gakio kili kisi kiasuagibua. 34Lebelebe namona ku mbabazio za bantu bane beli mu Ezipeto, nu nongua ku kutonga kuabo, bubo ubunagela kubatikia: nu kano kaluma nakusinga buno wende ku Ezipeto. 35U wozo Mose ubasombaga, bamutendile bune, Nazi wakubikile mukota nu ngatu zeitu? uwozo wasingilue na Kalaga kuba mukota nu monia ku kuboko kua wozo mugenzi wamubaside mu kikio kilindi. 36Wozo uwabatikizie, gakitaga migeleko nu tulolesio ku Ezipeto, nu mu kitatenge kia Kisimana, nu mu kalula miaka makumi manazi. 37W ozo Mose uwabuide bana balsalele bune, Mukota Kalaga weinyu akamusakikila mulengania munkatini mueinyu, anga bundi. 38We eli wozo wabezaga mu ekelezia mu kalula gamozi na wozo mugenzi watendaga nago ku muiduko wa Sinai, nu na batateisue; uwakatile idagi lia kalamo, buno atukasilelio; uwakasilue makakizio ma kalamo, buno atukasemo: 39nu batateisue tabatundile kumuanza, tondo bamusindikile, nu makengelo mabo mabeide ku Ezipeto, 40nu babuide Alona bune, Tukitile tulaga, buno tutusondelezie; kubuno wozo Mose watutikizie mu kisi kia Ezipeto, tatuizi lingo kueli. 41Nu bakitile muana wa ngombe bubo busi, nu bakasile kisansa ku zezo nkisi, nu babogedebogede milimo za maboko mabo. 42Tondo Kalaga abasigile bakumbamine iyombo lia mpelela; anga buasanzilue mu mukanda wa balengania bune,

Ndi muankasile nyama zitilue nu za bisansa

Miaka makumi manazi mu kalula, inyue numba za Isalele?

43Nuinyue muekile numba za nsulu za Moleke,

Nu lukenikeni lua kalaga kako Lefani,

Nkisi zimuakitile buno muzikumbamine:

Nunne nikamuigia buno muende bulazi kutinga Babelona.#Amose 5:25-27.

44Lulo lusu lua bulongeki luabezaga na batateisue mu kalula, anga buakakizizie wozo watendaga na Mose, buno akite anga lukita luamonineko. 45Nubo batateisue balukasene, nu baluingizizie na Yosua mu bukota bua baBilongo, babo beimbibagua na Kalaga ku batateisue, aba ku busi bua Davidi; 46nuwe atananizizie Kalaga, nu asegile kulondela Kalaga wa Yakobo kiziki kia kumobakila. 47Tondo Solomo uwamubakide numba. 48Tondo wozo Munene uli muigulu ntaneikala mu numba zakitilue na maboko anga buatendile mulengania bune,

49Igulu lili kisumbi kiane,

Nu kisi kili kiziki kia kubikila magulu mane;

Numba nkizi zimukanobakila? ubuatendile Mukota:

Aba kiziki kikizi kinikomunua mukio?

50Ndi ta kuboko kuane ukuakitile bibio binsania? #Yesaya 66:1, 2.

51Inyue beli na makosi mabibu, batamonesibua mu mitima, aba matuzi meinyu, mukunana Muuza Wasililila; anga bubo buakitile basoinyue, nuinyue abumukukita, 52Mulengania mukizi utasungizie basoinyue? nubo beitaga babo beigisagia musagu wa kuvua kua wozo Wisanana; bubo nuinyue museli bagabuzi nu muamuitile: 53inyue muakasilue mulembe ku kukakizia kua mugenzi, nuinyue tamuaguanzile.

Bekuita Setefano nu Saolo Ekuitabizia Bubo.

54Nubo gabongule bubo, beinine mitima, nu bamulimbanizizie meinyo. 55Tondo we eiyeide na Muuza Wasililila, nu agalamine muigulu, amonine ku lutanuno lua Kalaga, nu Yesu emana ku kuboko kuaseidume kua Kalaga, 56nu ababuide bune, Lolazi, namona meigulu makandulua, nu Muana wa muntu emana ku kuboko kuaseidume kua Kalaga. 57Tondo balalukile na moki manene nunse, nu bazibile matuzi mabo, nu bamusolobokeide na mutima umozi; 58nu bamusindikile kuisula lia muino, nu bamulibuide makozi: nu balongeki babikile nsulu zabo ku magulu ma musikila umozi wamanagua Saolo. 59Nu balibuide Setefano makozi, nuwe, asegile, atendile bune, Mukota Yesu, sekela kalamo kane. 60Nu akomine mazu, alalukile neiyuki inene bune, Mukota, ntubike buagi bubuno kubeli. Nu gasilile kutenda bubo alekene.

Currently Selected:

Misako 7: NTKI57

Highlight

Copy