Misako 15

Basingua nu Bango Banyabo Bekukala Luango lua Kumonesibua.

1Nu bantu bamozi batukile ku Yudaya nu beigisizie mibuto zabo bune, Ndi tamuamonesibua ku lukita lua mulembe wa Mose, tamunavuama konibua. 2Nu gabezaga Paolo nu Balanaba bakuakanania nabo nu kubuzania nabo, mibuto zabo bakakizizie Paolo nu Balanaba, nu bango, bende ku basingua nu bakulu beli ku Yelusalema kubabuzia bubuno. 3Nubo belekezizibue na ekelezia, nu batingile ku Foiniki nu ku Samalia, basambede kugaluka kua baBilongo: nu babogeziebogezie mibuto zabo nunse. 4Nu gababasile ku Yelusalema, basambizizibue na ekelezia nu na basingua nu na bakulu, nubo basambede lingo bunsania buaba kitide Kalaga. 5Tondo bantu bamozi bemene ba kikanga kia baFalese bakatizizie, batendile bune, Buatunganana kubamonesia, nu kubakakizia buno banze mulembe wa Mose.

6Basingua nu bakulu bakundamene kukengela bubo. 7Nu kuabezaga mbuzio ningi, Petelo emene, nu abatendile bune, Mibuto zane, muizi buno, Kalaga mu bindi bia kulinga, asombuede mumuli buno, baBilongo bongue ku kanua kane idagi lia musagu musoga, nu kulikatizia. 8Nu Kalaga, uwizi mitima, abalongekede, nu abakasile Muuza Wasililila, anga buatukasile nuisue; 9nu ntengukanizie gatusamba nabo, asugile mitima zabo na bukatizio. 10Umpanga kano kaluma kubuni kumukugeleka Kalaga, nu kubika kisanga muikosi lia beigisibua kitavuamine kueka batateisue aba isue? 11Tondo isue makatizia buno ku mponga za Mukota Yesu, tukonibua, nubo bakonibua bubo. 12Nu musanganano unsania weikede kibibi; nu bonguilide Balanaba nu Paolo bubabasambalilaga misagu za migeleko nu maganogano, mabakitide Kalaga ku baBilongo. 13Nu gabeikede kibibi Yakobo abuide bune, Mibuto zane, nunguililazi. 14Simeona asila kutusambalila lukita lualingile Kalaga kulola ku baBilongo, buasombuede bantu munkatini muabo kuizina liage. 15Nu moki ma balengania meli bumozi na mamano anga bumasanzilue bune,

16Kusila kua bubuno nasubie,

Nu nobake lingo numba za Davidi, zawede,

Nu nobake lingo bindi biazo biaguide,

Nu nazimike:

17Nkakita bubo ku bana ba bantu basigeide bekulonda Mukota,

Nu baBilongo bansania bekumanua kuizina liage;

18Ubukutenda Mukota, ekumenesia binsania bia wakalazi. #Amose 9:11, 12.

19Ku bubuno nikukakizia buno, tunakivua kuzangiazangia baBilongo bekugaluka ku Kalaga; 20tondo tubasanzile mukanda, bebembukie na nsese za nkisi, nu kuibembukia ku butazi, nu nyama zakamua, nu mikila. 21Kubuno Mose kutukila ku wakalazi aba nu kano kaluma eli na basozi bekusambala musagu wage ku numba za misanganano mu mino insania, nu bekusomaga na busi na busi bua sabato.

22Umpanga basingua nu bakulu nu bansania ba ekelezia bakengede buno, buli busoga kusombola ba mu kibombo kietu, nu kubasinga na Paolo nu Balanaba ku Antiokia; basingile Yuda wamanagua Basaba, nu Sila, babezaga bantu banene munkatini mua mibuto zabo: 23nu basanzile mukanda bubuno nu basingile mu maboko mabo bune, Basingua, nu bakulu, nu mibuto zeitu, ku mibuto beli ku baBilongo ku Antiokia, nu ku Sulia, nu ku Kilikia bekumusambizia. 24Kubuno tungule musagu buno, bango ba kutuli bavule kumuli bamuzangiziezangizie na moki mabo, batundaga kugalukia makengelo meinyu; isue tatuabakakizizie bubo; 25tuakalile luango lumozi, tuakengede buno, busoga tusombole bantu, tubasinge kumuli na batundua beitu, Balanaba nu Paolo, 26babo bakasene kalamo kabo ku kabamba keizina lia Mukota weitu, Yesu Klisto. 27Tuasinga Yuda nu Sila, bamusambalile misagu zeno bobenyene. 28Kubuno buatananina Muuza Wasililila, nuisue buno, tatubike ungo muzigo kumuli tondo wozo wakuka: 29mubembuke binsania biabikua ku nkisi, nu mikila, nu binsania biakamua, nu butazi, ndi muizugile ku bibino nti muakite busoga. Musigale busoga.

30Nubo gabasile kukasua buangato, bavule ku Antiokia; bakundamanizie musanganano unsania nu babakasile mukanda. 31Nubo gabagusomine, babogilebogile neiyano lilio. 32Nu Yuda nu Sila babezaga balengania nubo, banine mibuto zabo bubibu bitondo bingi, babalindizie nunse. 33Nu gabeizizizie kuko, mibuto zabo babalagile bune, Endazi na bubobelelo ku basingua. 34Tondo Sila atundaga kuikala kuko. 35Nu Paolo nu Balanaba bekeide ku Antiokia, kuigisia nu kusambala musagu wa Mukota na bango bantu beingi.

Paolo Ekulinga Lugendo Lueibili: Ekuenda na Sila.

36Nu gasilile bindi bimozi, Paolo abuide Balanaba bune, Tusubie, tuende kulola mibuto zeitu nu mino insania zituasambalaga muidagi lia Mukota, nu tulole bubekukita. 37Nu Balanaba atundile kuenda na Yoana wamanagua buno, Malako. 38Tondo Paolo akengeide buno, ta busoga kuenda na muntu wabasigaga mu Pampulia, nu ntendile nabo ku mulimo. 39Nu gabezaga na miango, buno balekanukile, Balanaba endile na Malako, asokile nage ku Kupulio: 40tondo Paolo asombuede Sila, nu endile, nu asegedue na mibuto zage buno akitue mponga na Mukota. 41Atingile ku Sulia nu ku Kilikia, nu endaga alindia ba ekelezia.

Currently Selected:

Misako 15: NTKI57

Highlight

Copy