Misako 16

Paolo Asanga Timoteo.

1Nu abasile ku Delebe, nu ku Lusta: nu kuabezaga muigisibua umozi wamanagua Timoteo, muana wa mukikulu mu Yuda, mukatizia; tondo isi abezaga muGeleka. 2Muntu wozo abezaga ekulumbibua busoga, wamenyinue na mibuto zage ba ku Lusta nu ku Ikonio, 3Wono Paolo atundile kuenda gamozi nage; nu amukatile nu amumonesizie ku kabamba ka baYuda babezaga mu kiziki kikio: buno bansania bamenyine isi buno abezaga muGeleka. 4Nu gababezaga bekutinga mu mino bababuide mamo makakizio makakizizibue na basingua nu bakulu babezaga ku Yelusalema. 5Bubo ba ma ekelezia balindizibue mu bukatizio, nu beitide beingi busi na busi.

Muuza Wasililila Ekubalolesia Kubeta. Paolo Amanua mu Kalolesio Kuenda ku Makedonia.

6Batingile mu kisi kia Fulugia, nu kia Galatia kubuno bazugidue na Muuza Wasililila kusambala musagu musoga mu Asia; 7gababasile buigi na Musia, bagelekile kuenda mu Bitinia, tondo Muuza wa Yesu tawabakasile buangato; 8nu batingile ku Musia, bendile ku Telua. 9Paolo amonine ku kalolesio mu kindi: Amonine ku muntu wa Makedonia emana, ekumusega, atendile bune, Soka, Uvue ku Makedonia nu utukasie. 10Nu gasilile kumona ku kalolesio, kazanga kongo tuatundile kuenda ku Makedonia, kubuno tuamenyine buno Kalaga atumana buno tuende kubasambalila musagu musoga.

Paolo nu Sila Beli ku Filipo.

11Gatuatukile ku Telua, tuasokile nu tuendile tuemana nunse ku Samotelaki; gabuakeide, tuabasile ku Neopoli; 12nu tuatukile, nu tuendile ku Filipo, muino watinga engo mino za mu kisi kia Makedonia ku bunene; nu kikio kisi kiabezaga kunsi kua baLoma; nu tuizizizie mu muino wozo. 13Nu busi bua sabato, tuabasile ga luibi lua mu mukolo buigi na luzi, kiziki kituakengelaga buno, ku kusegua; tuikalile gansi, nu tuasambede na bakikulu bakundamanineko. 14Mukikulu umozi izina liage Lidia, mukunzia wa nsulu zakisimana, muntu wa muino wa Tuatilo, wakumbaminaga Kalaga, nugue atunguilide: nu Mukota akanduide mutima wage kungua bunsania buatendaga Paolo, 15Nu gasilile kubatizibua na ba numba zage, atubuzizie bune, Ndi muamona buno niseli mukatizia wa Mukota, kasi ingilazi mu numba zane, nu nti muikala muzo. Nu atulutile.

16Gatuabezaga tuse tuenda ku kiziki kia kusega, mukikulu mukobe umozi atusangile abezaga na musumbu wa kumenya bitondo, avuilaga bakota bage na mutali muingi ku kubulengania buage. 17Wozo atuyangile, isue nu Paolo, alalukile bune, Bantu babano beli bakobe ba Kalaga uli muigulu nunse, bekumusambalila nzila za lonio. 18Nu akitaga bubuno bindi bingi. Tondo Paolo, akutilue nage, agalukile nu atendile wozo musumbu bune, Nakukakizia kuizina lia Yesu Klisto, tuka mueli. Nu amutukile mu zezo nkungu.

19Tondo bakota bage gabamonine buno kilemanizio kia mutali wabo kiabazimina, bakatile Paolo nu Sila, nu bababulutile kuisoko ku bakota ba mu muino. 20Nu babalusizie ku basungia, batendile bune, Bantu babano bekulubikania muino, nubo beli baYuda, 21nu lingo bekuigisia lukita luteli lua bumba bueitu buno tulukate nu kuluyanga, tondo beisue tuli baLoma. 22Nu musanganano unsania wabemanukide; nu ngatu babakunguide nsulu zabo, nu bakakizizie basusulue na tususu. 23Nu gabasilile kulibulua bubibu bababikile mu kikando, bakakizizie balangi ba kikando buno, babalange nunse; 24nu mulangi nuwe akakizibue, nu ababikile mu busio, nu abakandile magulu mu mbabu.

Kugaluka kua Mulangi wa Numba za Kikando.

25Tondo munkatini mua kindi Paolo nu Sila basegile nu bembide Kalaga nimbo za lutanuno, nu bakandua babonguilide; 26nu kitangala besi kuabezaga kaningini kanene katengezietengezie kisi, aba mango ma kikando matengiletengile: nu kazanga kongo nibi insania zigukile; nu makoki ma bantu bansania makandukile. 27Nu mulangi wa kikando, gayukile nu kumona ku nibi za kikando ziguka, atolile bupanga buage atundaga kuiyita, akengelaga buno bakandua batina. 28Tondo Paolo alalukile neiyuki inene bune, Ntuniyita: kubuno isue bansania tuli gano. 29Nuwe asegile tusuku, nu eingide mu numba na boba nu agiliminaga, awede lisa na Paolo nu Sila, 30nu ababasizie kumbuga nu atendile bune, Bakota, buni bunikita bunonibua? 31Nu batendile bune, Katizia Mukota Yesu nu uwe nti wonibua, uwe nu ba numba zobe. 32Nu bamusambalide idagi lia Mukota nu bansania babezaga ku numba zage. 33Nu endile nabo nkungu zezo mu kindi, nu asugile biulu biabo; nu abatizizibue, we nu kikanga kiage kinsania kazanga kongo. 34Nu avule nabo mu numba zage, nu abayikide idia, nu abogilebogile nunse, we nu bansania ba numba zage, kubuno ese akatizia Kalaga.

35Tondo gakede busi, ngatu basingile bakoloboyo banene, batendile bune, Sigazi bantu babo bende. 36Nu wozo mulangi wa kikando asambalide Paolo bubuno, atendile bune, Ngatu batenda buno tumusige muiyendele; umpanga kano kaluma tukazi, nu muiyendele na bubobelelo. 37Tondo Paolo abatendile bune, Batulibuide nti bantu bansania bekumona nu tatusungibua, nu isue tuli baLoma, nu batubikile mu kikando; nu kano kaluma bekututikia ku lumbisombiso? kilo; tondo bobenyene bavue tugu kututikia. 38Nu bakoloboyo banene babuide ngatu bubo: nu bakule boba gabongule buno beli baLoma; 39nu bavule nu beiyongile kubeli; nu gabababasizie, babatendile batuke mu muino wozo. 40Nu gabatukile mu numba za kikando, beingide mu numba za Lidia: nu gabamonine ku mibuto zabo, babalindizie, nu bendile.

Currently Selected:

Misako 16: NTKI57

Highlight

Copy