I Batesolonike 5
5
Bantu Tabeizi Busi Bukavua Mukota; Bamulemanine Busi na Busi.
1Tondo ku musagu wa nkungu nu nkiko, mibuto zeitu, nsikutunda namusanzila. 2Kubuno inyue benyene muizi buno, busi bua Mukota buavue anga bukuvuaga muibi mu kindi. 3Kubuno nkungu zibekutenda buno, kuli bubobelelo nu kuli bulonge bukata, ugago kubiga kukabavuila kitangala besi, anga bukuvuilagua muimisu na lubaba, nu tabakakutina. 4Tondo inyue, mibuto zeitu, tamuli mu kapilo, buno busi bubo bunamusanga anga muibi: 5kubuno inyue bansania muli bana ba kiengi, nu bana ba musi; tatuli bana ba kindi, aba bana ba kapilo; 6umpanga tatuiyombeke, anga bukuiyombeka bango, tondo tukesiazi ntende nu tatukue na maku. 7Kubuno babo bekuiyombekaga, bekuiyombekaga mu kindi; nu babo bekukatagua na maku bekukatagua na maku mu kindi. 8Tondo, isue tuli ba musi, tatukue na maku, tuzuale bukatizio nu lutundo ku bukuba; nu nkumbu zeitu zibe kilemanizio kia lonio. 9Kubuno Kalaga ntatongedue, tondo tonibue mu Mukota weitu Yesu Klisto, 10watukuilide, buno tulame mueli, ndi tuakesia ntende aba ndi tuiyombeka. 11Upanga bobelezaniazi, lindaniazi, anga bumukukita.
Paolo Ekubakengelezia.
12Tondo, mibuto zeitu, tukumusengezia, buno muanze babo bekukita mulimo wa Mukota nu bekumuangata nu bekumuana; 13nu kubanza nunse mu lutundo ku kabamba ka mulimo wabo. Mube na bubobelelo bueinyu bueinyu. 14Nu tukumusengezia, mibuto zeitu, anazi babo batakukita buakulungana, lindiazi babo batamba, gugumaniazi basosu, ikalilazi bantu bansania. 15Umpanga, tamusubanizanie mibi kuingo; tondo kitanazi busoga bindi binsania, nu ku bansania. 16Bogazibogazi bindi binsania; 17segazi na komanizia; 18simazi mu binsania: kubuno kukuno u kusombola kua Kalaga mu Klisto Yesu kumuli. 19Tamunanie Muuza; 20tamubenge bulengania; 21lindikazi binsania; buli busoga ubumukita; 22idekanukiazi na bubi bua lukita na lukita.
23Nu Kalaga wa bubobelelo wenyene amusuagie nunse; nu muuza weinyu unsania, nu uwe uwenyene, nu mibili zeinyu insania zilangue, geteli mabingo aba nu kuvua kua Mukota weitu Yesu Klisto. 24We eli mukatizia ukumumana, nu akabukita.
25Mibuto zeitu, tusegelazi.
26Sambiziazi mibuto zeitu na mbogimbogi. 27Nkumukakizia ku Mukota buno somenazi mibuto zeitu insania mukanda wono.
28Mponga za Mukota weitu Yesu Klisto zibe neinyu.
Currently Selected:
I Batesolonike 5: NTKI57
Highlight
Share
Copy
Want to have your highlights saved across all your devices? Sign up or sign in
Nouveau Testament en Kilega © Bible Society of the Democratic Republic of Congo, 1957.
