Luka 6

1Bitabibakitshine h’efuku dia Sabado dia kabidi, badi akidi mu mafuba a ngano, na bana-be-ba-bukishi abadi abakulu ngano, tabeyikunyu maasa, badianga. 2Bangi ba ku Bafadiseo abebehwishe ’shi: A nkinyi kianukitshi ki shidikwe h’efuku dia Sabado? 3Yesu bebālulwile’shi: Tanwibabale sunga kiakia kibakitshine Dafidi habadi na nsala, e na mwinyi n’aba babadi n’e. 4Mubatwelele mu nshibo y’Efile Mukulu, āta mampa aleshwe ku meso kw’Efile Mukulu, e adia, e aha namu babadi n’e, ao abadi ashidikwe kishila kudibwa, anka kwi batshiite-bakwidi buhenka. 5Biabia bebalungwile’shi: Mwan’a muntu namu nyi Nfumu a Sabado.

6Bitabibakitshine ha dingi dia Sabado namu batwēle mu kitumbwilo, alambukisha: Mwanka mubadi muntu badi na mboko ye yibalume yifwe. 7Biabia bafundji-bamikanda na Bafadiseo abamutadile su akahwisha h’efuku dia Sabado; bamone mwabadia kumwimukila. 8Ank’e beukile binangu biabo, balungwile muntu badi mufwe mboko’shi: Ebwe, wemane hankatshi. Biabia bebwele, emana hanka. 9Binyibiabia Yesu bebalungwile’shi: Nankenwihusha mwanda umune; Nkihwandjikile mwifuku dia Sabado kukita bibuwa’nyi, su nkukita bibubi? kuhasha muwa, su nkwiulwisha? 10Hakutala boso, abadi bamwifunye, balungwile winyi muntu’shi: Ola mboko yobe; bakitshine biabia, na mboko ye yibahandjile bu yikwabo. 11Biabia abakwetwe na nsungu yikalabale, tabelungushena mwabadia kukitshina Yesu.

12Bitabibakitshine mu aa mafuku, bayile ku ngulu mu kuteka; batosheshe bufuku boso na luteko kw’Efile Mukulu. 13Habubatokyele, betamine bana-beba-bukishi, basangwile ekumi na babidi munkatshi mwabo, bebaudikile bu batumibwa. 14Shimono (abaudikile namu bu Petelo) na mukwabo Andeleo, na Yakoba, na Yoano, na Fidiha, na Batolomyu, 15na Mateo, na Tomase, na Yakoba, mwan’a Alafeasa, na Shimona ayitanyinwa bu Selote. 16Na Yudasa (mukwabo) na Yakoba, na Yudusa Isakadiota, winyi badi mwihulukile. 17Balalele n’abo, bemene mwibanda, na kibumbu kia bana-be-ba-bukishi, na kibumbu kikata kia bantu ku mpese yoso ya Yudea na ku Yelusalema, na ku bukunkula kwa mema a Tyila na Sidona abafikile kumuhusha, na huhashibwa ku masungu abo. 18N’abo abamweshwanga malwa na bikudi bia butete abahashibwe. 19Biabia kibumbu kioso kibakyebele kumukuma; mwanda bukome bubatukile kwadi bwa kwibahasha boso.

20Henyihaha babushishe meso e ha bana-be-ba-bukishi’shi: Mwabi wikale kwi’nwe balanda, mwanda bufumubw’Efile Mukulu mbwenu. 21Mwabi ngwenu (anwe) be nansala binobino, mwanda anukēkuta. Mwabi ngwenu (anwe) abadidi binobino, mwanda anuka sehela. 22Mwabi ngwenu habakenushikwa kwi bantu, na habakenulamuna (munkatshi mwabo,) na kwinutohēka, na kusumbula eshina dienu bu dibi, ha mwanda wa Mwan’a Muntu. 23Nusehele mu diadi’efuku, nutumbukye mwanda wa tuseho; mwanda bwedi bwenu mbukata mwiilu; mwanda bashabo-kulu abakitshine anka biabia kwi batemuki. 24Anka mpombo kwanudi anwe bampeta! mwanda nubahu kutambula kisambilo kienu. 25Mpombo kwanudi anwe bēkute, mwanda anukakwatwa na nsala. Mpombo kwanudi anwe abasehela binobino! mwanda anukōkakana na kudila mpolo. 26Mpombo kwanudi ahakenwakwila bantu boso buwa! mwanda biabia nyi bibakitshine bashabo-kulu kwi batemuki ba madimi.

27Anka nenulungula’nwe abahusha, ami’shi: Ikalai na kifulo kwi benushikwe; nukite bibuwa kwi be n’enu mushikwa. 28Nuele mwabi kwi abenuele muloa, nutekyele abenuhombola. 29Kwi’wa akukuhila kwi’tama dimune, omwa lulwile dingi namu; akukwata mutwelo wobe, tomutunanga kuata ekotshi diobe namu. 30Kwi muntu oso enutekye, omuhe; n’awa akukwata bintu biobe, tomukyendanga. 31Bianukyebe bantu kwinukitshina, biabia anwe namu kebakitei anka biabia namu. 32Mwanda su nwi na kifulo kwi be n’enu kifulo, anukatumbulwa na minyi? mwanda balwishi namu be na kifulo kwi be n’abo kifulo. 33Su anukitshi bibuwa kwa’benukitshi bibuwa, anukatumbulwa na minyi? mwanda balwishi abakita anka hamune. 34Su anwāhusha kwi ’banukuluhila kutambula dimonyi, anukatumbulwa na minyi? mwanda balwishi namu abeahushā kwi balwishi ha mwanda wa kutambula kilombane dimo. 35Anka’nwe nwikale na kifulo kwi be n’enu mushikwa, nukite bibuwa; tanwahushanga na kutengyela dimonyi sunga mpahēla, biabia bwedi bwenu abukekala bukata, anukekala bana ba Mukile boso bukata, mwanda e na kalolo kwi bashī na lutumbu na kwi balwishi. 36Binyibiabia nwikale na kanya, bu Shyenu namu e na kanya. 37Tanuhwandjikishanga (muntu mwanda), biabia anwe (namu) tanukahwandjikishwa: tanuhīshanga (muntu) n’anwe (namu) tanukahīshwa: nulekyele, biabia anwe (namu) anukalekyelwa. 38Nuhane, anukahebwa, kihimo kibuwa, kifitshinwe, kikonkwe hamune, kikwete kusumbuka akikenuhebwa na ku kiadi kienu. Mwanda ku kiakia kihimo kianuhimi, akikenuhiminwa kwanudi dimonyi. 39Biabia bebēle lukindji’shi: Mpofu euku kukunkusha mpofu n’e su? tabakahono boso m’bwina? 40Mwan’a bukishi takilā mulambukishi e bukata; anka ese muntu mulombane akekala bu mulambukishi e. 41A nki nyi kiotala kasoma ke mwīso dia mukwenu, anka bokutwa kumona mulamba wi mwīso diobe’be na mwinyi? 42Ouku na minyi kwamba mukwenu’shi: A mukwetu, okyebe nkukatushe kasoma ke mwīso diobe, obe na mwinyi twemumone mulamba wi mwīso diobe’u. Obe nsesa, badila kukasha mulamba wi mwīso diobe, biabia okamono biya mwa kukashisha kasoma ke mwīso dia mukwenu. 43Mwanda mutshi wibuwa tauheya bikuba bibubi sunga mutshi ubi tauheya bikuba bibuwa. 44Mwanda mutshi woso awiukibwa ku bikuba biao. Mwanda bantu tabakulā bikuba bia kikuku ku mitshi ya milobo, sunga kwahula bikuba bia mioshi ya nfinyo ku tusanyungu. 45Muntu ebuwa atusha bibuwa bu mwabidi bilombeleshwe bibuwa mwishimba die, na muntu mubi atusha bibubi bu mwabidi bilombeleshwe bibubi mwishimba die; mwanda ku bifwime bi mwishimba die, nyi kwe bikulu ku kanwa kwe.

46A nkinyi kianuntemwina’shi: Nfumu, Nfumu, anka tanukitshi mwanakwila? 47Awa afiki kwandji’mi na kuhusha bishima biande, na kwibikita, nankenulesha adi mwifwane. 48E mwifwane muntu baibakile nshibo, babundwile mula, batudile kibangilo ha lubwebwe; na habaule mema na mu mambwe, myeshi yibakuhile bikata ha yaya nshibo, yibakutshilwe kwiyisanyisha, mwanda yibebakilwe ha lubwebwe. 49Anka yawa ahusha, na takitshi, e ’mwifwane muntu baibakile nshibo ye ha nsenga yishī na kibangilo: biabia myeshi yibeyikuhila bikata, na kahindji n’āka yibahone; biabia mulwikilo wa yaya nshibo ubadi ukata.

Currently Selected:

Luka 6: NTLK52

Highlight

Copy