Luka 7

1Henyihaha habahudishe mīsambo ye yoso mu matwi a bantu, batwēle mu Kahenauma. 2Biabia mpika a mulami a basalai lukama abadi n’e kifulo, badi na busungu hehi na kufwa. 3Habahushishe mukāndu wa Yesu, batumine bakulu ba bena Yuda kwadi kumusendela’shi, afikye ahashe mpik’ande. 4Abo, habafikile kwi Yesu, abamwiyayile’nka hanka’shi: E muhwandjikile biodia kumukitshina biabia. 5Mwanda e mukumine mwilo wetu, betwibakile kitumbwilo. 6Binyibiabia Yesu bayile n’abo; na habadi hehi ku nshibo, mulami a basalai lukama batumine bakūku be kwadi’shi: A Nfumu, tokalakalanga; mwanda’mi nkimuhwandjikil’obe ku twela mu nshibo mwande, ooo. 7Biabia namu nkimutentekyesha’shi, nyi muhwandjikile kufika kodi, ooo: anka wakul’eyi, na mpik’ande akahanda. 8Mwanda’mi namu nyi muntu mutulwe mushi mwa matalwa; nyi na basalai mushi mwande, ami nalungula mungi’ shi: Nda, biende; na kwi mungi’nyi’shi: Fika, biafiki; kwi mpik’ande namu’shi: Kita biabia, biakitshi. 9Habahushishe Yesu biabia, bamukanyine, bealulwile kwi kibumbu kibamulondanga’shi: Nenulungula’shi: Nkimusañane lukuluhilo lukata biabia, ooo, sunga mu Isalele. 10N’abo abatuminwe, hakwaluka ku nshibo, abasañene mpika badi akumbu tadi musangēla.

11Bitabibakitshine h’efuku dia kulonda, bayile mu kibalo akilumbwa bu Naine; na bangi ba bana-be-ba-bukishi abayile n’e, na bantu be bungi. 12Binyibiabia habafikile hehi ku kibelo kia kibalo, talai, kubadi kutwadibwe mufwe hasha, badi mwan’eleka a nyin’e; namu badi mukashi a mufwe; na bantu be bungi ba mu kibalo abadi n’e. 13Nfumwetu habamumwene, bamukwatshile lusa, bamulungwile’shi: Todilanga mpolo. 14Befubwile hehi, bakumine muselo, babadi batwale abemene. E bakwile’shi: Obe nsongwalume nakulungula’shi: Buka. 15Na yawa badi mufwe babukile, ashala, babangile kwakula. Bamutule kwi nyin’e. 16Boso abakwatshibwe na moo; abatumbishe Efile Mukulu’shi: Mutemuki mukata bamweka munkatshi mwetu; dimonyi’shi: Efile Mukulu basamba bantu be. 17Yino nkumo y’e yibahalakene moso mu Yudea, na ku mpese yoso yibadi hehi.

18Biabia bana-ba-bukishi ba Yoano abamulungwile yino myanda yoso. 19Binyibiabia Yoano baitanyine bana-beba-bukishi babidi, bebatumine kwi Yesu’shi: Obe nyi winyi atutengyelanga kufika, su atutengyela mungi? 20Habafikile baba bana balume kwadi, abakwile’shi: Yoano Mubatshishi betutumu kodi’shi: Obe nyi winyi atutengyelanga kufika, su atutengyela mungi? 21Ku yawa nguba bahashishe bebungi ku masungu, na ku bihuha, na ku mikishi yibi; na kwi bampofu bebungi bebahele meso. 22Henyihaha Yesu biakibālula’shi: Ndai mwishinda dienu, nulungule Yoano bianubamono na bianubahusha; mubatambwila bampofu meso, basha bilema abatambuka, basha kifwi abatoshwa, basha bitwi abahusha, bafwe ababushibwa, na kwi balanda kubalungulwa mukānduwibuwa. 23Mwabi kwi yawa shī muntombokyele.

24Habakatukile mikiendji ya Yoano babangile kwakula kwi bibumbu ha mwanda wa Yoano’shi: A nkinyi kianubayidile kumona mu kabāka? Elengye adisanyishibwa na luhahi su? 25Anka a nkinyi kianubayidile kutala? Nyi muntu mufwale bifwalwa bibuwa bukalabale su? Talangai, abo abafwadikwa na bifwalwa bibuwa bukalabale, be na muwa wabo mu buheta, be mu mpoho ya banfumu. 26Anka nkinyi kianubayidile kumona? Mutemuki su? Ee, nenulungula’shi: E mukididīle mutemuki. 27Unonyi (winyi) bafundjilwe’shi: Talai, natumine mukiendji wande ku mpala kobe, aukakulumbulwila eshinda diobe ku meso kobe. 28Mwanda nenulungula’shi: Munkatshi mwa batandjibwe na bakashi, takwi mutemuki mukile Yoano Mubatshishi bukata; anka yawa ’mukile buhela mu bufumubw’Efile Mukulu nyi mukile e bukata. 29Biabia bantu boso abahushishe, na balambushi-ba-milambu ababingishe Efile Mukulu, abadi ababatshishibwa na lubatshisho lwa Yoano. 30Anka Bafadiseo na bahatudi-ba-bishila, abo ba na bene abatune binangu bi’Efile Mukulu, mwanda tababadi babatshishibwe (kwi Yoano).

31Biabia Nfumwetu bakwile’shi: Nankahwandjikisha bantu ba kino kihungilo bu kinyi? A mbefwane kinyi? 32Mbefwane bana bakinga bashale mu kisalwe, abeitanyishena, na kwakula’shi: Tubeñombela, anka’nwe tanwibāshe, tubenudīla, anka’nwe tanwibadīle. 33Mwanda Yoano Mubatshishi bafikile, tabadi adi mampa sunga nkutoma nfinyo: anwe tanwakula’shi: E na kikudi kibi. 34Mwan’a muntu mufikye kwete kudia na kutoma; anwakula’ shi: Talai nkipyafi na bu ntomi a nfinyo, kūku a balambushi-ba-milambu na balwishi! 35Anka binangu bibabingishwe kwi bana ba’bio boso.

36Biabia umune a ku Bafadiseo bamwihwishe kudia n’e. Batwēle mu nshibo ya Mufadiseo, bashalele ku bidibwa. 37Biabia talanga mwana mukashi a mu kibalo, badi mulwishi, habeukile’shi, (Yesu) mushale kudia mu nshibo ya Mufadiseo, bafikile na kalangi (k’ebwe) di’alabasata kabadi mwimu wa malashi. 38Bemene ku ngwa ye, kunyima tadidi mpolo, babangile kusula ngwā ye na mpolo (ye), beyikumwine na nyene ya ku mutwe we, banyishishe kumufifya ku ngwā ye, na kwiyishinga mwimu. 39Binyiabibia winyi Mufadiseo bamwitamine kudia n’e, habamwene biabia, bākwile munda mwe’ shi: Uno (muntu) su ekalanga mutemuki, badia kwiuka uno mwana mukashi na nyikashi ye biabamukumu, mwanda e mulwishi. 40Biabia Yesu bamwālulwile’shi: Shimona, nyi na mwanda kukulungula. E bakwile’shi: Mulambukishi akula. 41Kubadi mwāhushi, badi mwāhuiwe na bantu babidi, umune badi na kishio kia ndenadi ya bu nkama yitano, mungi makumi atano. 42Hababakutshilwe biakumufuta, bebalekyelele bubidi bwabo. Binyibiabia ndungule akakidi n’e kifulo ku baba babidi? 43Shimona bamwālulwile’shi: Nahwandjikisha’shi, anka yawa abalekyela yikile. Biabia (Yesu) bamulungwile’shi: Botshibi bibuwa. 44Bealulwile kwi mwana mukashi, balungwile Shimona’shi: Omono uno mwana mukashi? Natwēle mu nshibo yobe, twemumpe mema a kusula ngwā yande, ank’e beyitohesha na mpolo, na kwiyikumuna na nyene ya ku mutwe we. 45Obe twemunyimune lwimu lwa ku kanwa, anka uno mwana mukashi, kashā ntwele tamulekye kunyimuna ku ngwā yande na lwimu lwa nkanwa. 46Obe twemufikinye mutwe wande mwimu; ank’uno mwana mukashi bafikinya ngwā yande na mwimu. 47Nyi ha mwanda uno nankulungula’shi: Milwisho ye yi bungi yibamulekyelwa; mwanda badi na kifulo kikata: anka kwi yawa mulekyelwe bihela (e namu) e na kifulo kihela. 48Biabia bamulungwile’shi: Milwisho yobe yibalekyelwa. 49Binyibiabia aba babadi bashale n’e ku bidibwa, ababangile kwakula munda mwabo’shi: A uno namu alekyela milwisho nanyi? 50Henyihaha balungwile mwana mukashi’shi: Lukumino lobe lubakuhasha; nda na kufukama.

Currently Selected:

Luka 7: NTLK52

Highlight

Copy