Yoane 13

1En’oso bon’elambedya, Yesu aeyaki’oka esike enande emoyela lacina aume ena loko lone ko acu eneyali Bafango. Ende aokaki banandamene banayaaki ena loko nganji, ko amaoka nganji yengoko nsimbo. 2Koko en’elelo ena toma tona likolo, eneki Satana oilaka lokanyi en’otema bona Yudasa, bise Keliota, bon’ona Simona, lacina aangele Yesu; 3ko eneki Yesu oeyak’oka Bafango amomofa bikambwa bihitu en’akas’anande, ko aeyoka ayaki eneyali Yakomba, ko lakina angocoa nk’eneyali Yakomba; 4aemala en’elelo ena toma, ko aambya bisenda binande, aotamba itambala, ko aokakel’iho en’okeke’onande. 5Nkwaho aangol’asi ena salani, ko aomatsa lisonga bakaka ban’akili, ko aolifol’aho l’itambala iniki’nd’okakelaka en’okeke’onande. 6Koko aoya eneyali Simona Petelo. Ende amosumola, ate, Nkolo, E osonga nde bakak’anami? 7Yesu amokutwela, ate, Yoi linakamb’emi ofanonganya isanga: ongononganya nde ena mbusa. 8Petelo amosumola, ate, Ofasongaki bakak’anami tu. Yesu amokutwela, ate, Yomb’emi mpakosonge, ofana liondo l’emi tu. 9Simona Petelo amosumola, ate, Nkolo, ef’akak’anami kei: song’akas’anami ko l’ote nkoho. 10Yesu amosumola, ate, Boto onokaki basi, akolana lacina asonga bakaka kei, ko amboyala soto mene; ko ino boyali soto, ohonde ef’inatu. 11Lacin’oka aeyaki boto’oho onocoa oyangela; la ncina eho ate, Ino boyali soto, koko ef’inatu.

12Koko eneki’nd’osongaka bakak’aniyo, aotamba bisenda binande, aokisase lakina ena toma, ko amalokwela, ate, Ino bomononganya nde ekambwa eneki’m’okokambelak’ino? 13Ino bontang’emi Bolaki la Nkolo: yok’oho botenda nk’olotsi, lacin’emi nde nde nkoho. 14Koko yomb’emi, Nkolo la Bolaki, nsongaki bakak’anino, akoli eneyal’ino bosongelana bakaka nk’o samb’oho. 15Lacin’oka mokof’ino ndembi, lacina ino bile yoka bosamb’onoki’m’okilelak’ino. 16Solosolo, solosolo, lakosumol’ino, boombo afaleki nyangetuke enande, ko ekima afaleki ende onotomaki. 17Yomb’ino bomeya baoyi’ane, ko bokamba baho, ino boyali l’ekiko. 18Mpatende lacin’en’inatu: leya banaki’m’osonaka; nde, lacina Bitengelo bina Yakomba biilame, eneki yoi otengamaka, ate, Ende onola mampa l’emi amompomela ncinji ena likaka linande.

19Lakosumol’ino yoi line isanga, kuma liho litilame, lacin’eho enengi liho oilama ino bimedy’oka emi nde nde nk’ende.

20Solosolo, solosolo, lakosumol’ino, onongotamb’ende onongi’m’otoma, antamb’emi; ko onontamb’emi, atamb’ende onontomaki.

21Eneki Yesu otendaka yok’osamb’oho, aoka bolito bike mene en’olimo, ko aotenda yoi, ate, Solosolo, solosolo, lakosumol’ino, omoi’onino angonjangela. 22Bakili baolendana ta, ko baokandakanda lacin’ena boto’oho onom’end’oilak’oka angangela. 23Omoi’ona bakili onoki Yesu ookaka nganji ayaaki ena mesa ena toma, nko njekama ena ntolo ena Yesu. 24Simona Petelo ailel’ende ndembi la likasa, aufole Yesu boto onom’end’otangaka. 25Koko bokili’oho onekama ena ntolo ena Yesu, amufola, ate, Nkolo, boto’oho nai? 26Yesu aokutola, ate, Nk’ende onongi’m’otutela etate, njofe. Ko aotamba etate, aotut’eho, ko aofa Yudasa, bon’ona Simona, bise Keliota. 27Ena mbusa en’etutelo, Satana aotua eneyali Yudasa. Nkwaho Yesu amosumola, ate, Yoi linakamb’e, Ila liho nk’isanga. 28Koko efan’oniyo banakisak’ase ena mesa ena toma oneyaki ncina eneki’nd’otendaka l’ende yok’osamb’oho; 29koko lacina eneki Yudasa otolaka ntombe, bamoi baokanel’oka Yesu amolosumola, ate, Coaka oyotosombele toma tona elambedya; yombo lacina afe bato biinda iyema imoi. 30Koko ende, eneki’nd’otambaka etate eneki Yesu otutaka, aofola isasanga. Eyaaki nko boco.

31Eneki’nd’ofolaka, Yesu aila, ate, Isanga Bon’on’oto aokumyama, ko Yakomba aokumyama lacin’enande; 32koko yombo Yakomba aokumyama laci n’enande, Yakomba angokumya eneyal’endamene, ko angookumya isasanga. 33Ban’anami ban’asali, nongoyala l’ino nk’ilalela; ino bongompona, ko yok’onoki’m’osumolaka Ba-Yuda, emite, Enaco’emi, ino bofayelisa meho; isanga lakosumol’ino nk’osamb’oho. 34Lakof’ino lisangya lina litoto, lacina bokana nganji; yok’onoki’m’okookak’ino nganji, ino bokana nganji nk’osamb’oho. 35Yok’osamb’oho bato bahatu bangey’oka ino boyali bakili’anami, yombo bokana nganji.

36Simona Petelo amosumola, ate, Nkolo, ocoa meya? Yesu amokutwela, ate, Bili bonaco’emi, ofankilisa meho isanga; ohonde ongonkila en’esike ena mbusa. 37Petelo amosumola, ate, Nkolo, ncina enefakokilis’emi isanga eka nai? Nongambya liiko lonami lacin’ene. 38Yesu amokutwela, ate, Ongambya liiko lone lacin’enami fo! Solosolo, solosolo, lakosumol’e, kuma nkoko ena mpame eteke, ongonjangan’emi beangana besaso.

Currently Selected:

Yoane 13: BBY62

Highlight

Copy