Yoane 12

1Koko bekol’otoa en’oso bon’elambedya ena Etelo, Yesu aoyela ena Betania, bola bona Lazalo onoki Yesu oetolaka en’ewedi. 2Ko bamofumbela elambedya meho; ko Malata amakambya la toma, koko Lazalo ayaaki omoi’oniyo banakisaki’ase ena mesa ena toma l’ende. 3Koko Malia aotamba bauta bana mpimbo en’olotsi, yoka kilo emoko, bauta ban’otuya mene, ko aohinya bakaka bana Yesu l’aho, ko aolifol’akak’anande la lifo linande; ko botumba bolola la nsole en’olotsi en’aut’aho. 4Koko Yudasa, bise Keliota, bon’ona Simona, omoi ona bakili’anande, nk’ende onongangel’ende, aila, ate, 5Baut’ane batatekyama la deniers bekam’esaso lacina nai? ko francs iho yokafama eneyali bato biinda? 6Aotenda yok’osamb’oho, efa lacin’oka aokaki bato biinda isei: aotend’oho lacin’oka ayaaki liya, ko lacina amonyaki ntombe, ko atolaki francs inik’iy’osongaka meho. 7Nkwaho Yesu ate, Bocike; amomonya baho lacin’ena bina bon’ekunjelo enami; 8lacina bato biinda bayali l’ino bisike bihitu; koko bofambat’emi bisike bihitu.

9Bik’ike bona Ba-Yuda baey’oka Yesu ayali meho; ko baoya, efa lacin’ena Yesu kei, ohonde lacin’eho baene Lazalo, onoki’nd’oetolaka en’ewedi. 10Ko nkanga ina toome baang’eango lacin’eho bayake Lazalo nkoho; 11lacin’oka bike bona Ba-Yuda bamacik’iyo, ko baimedya Yesu, nko lacin’enande.

12En’ina bona loi, bik’ike bon’ato, enek’iy’ookak’oka Yesu amoya ena Yelusalema, 13baotamba baanga ban’atoko, ko baocoa oyukana l’ende kuma bayalolua, iy’ate, Hosana! Ende onoyayi ena lina lina Yawe, Lifoka lina Roi lina Yisalaele, aosakelama bosako! 14Koko Yesu aosungya bon’ona mpunda, ko aotalamel’eho, yok’onoki yoi otengamaka, 15Taangake, e bon’on’oyoto ona Siona, lenda, lifoka line aoya, nko ntalama ena bon’ona mpunda. 16Koko bakili’anande batanonganya baoyi’ane en’oso; ohonde eneki Yesu oyelaka en’okonde’onande, iyo baofwaki’oka baoyi’ane batengamaki’ale lacin’enande, ko bato bailaki baoyi’a ne eneyal’ende. 17Bato’aho bik’ike banayaaki l’ende eneki’nd’oelelaka Lazalo ena nketa, ko eneki’nd’eetolaka en’ewedi, baenyanya baoyi’aho; 18ko la ncina ene, bato bik’ike baocoa oyukana l’ende, nk’enek’iy’ookak’oka akambaki ekambwa eho. 19Nkwaho Bafalusi baotendana, iy’ate, Benaka, bofalonge tu; mbo lenda, loko lohalotu lomocoa okilana l’ende.

20Bato’amoi bana Elene bayaaki l’iyo banacoaki en’elambedya okumya Yakomba. 21Iyo baoya eneyali Filipo, bise Betesaida, ecimo emoi ena Ngalilaya, ko bamufola, iy’ate, Nkolo, tolanga tene Yesu. 22Filipo aoya, aosumola Andelo, ko Andelo la Filipo baoya osumola Yesu. 23Yesu amakutwela, ate, Esike emoyela lacina Bon’on’oto akumyame. 24Solosolo, solosolo, lakosumol’ino, Yombo lino lin’asongu lifakwa ena loko, ko lifawu, liciki nko lihoamene kei; koko yombo liho yowa yot’emamo bike. 25Ende onongolanga lacina aundamele liiko lonande, angungya loho, koko ende onoka liiko lonande bowe ena loko lone, angomonya loho nko lacin’ena liiko lonelofakale. 26Nko boto ankambel’emi bikambwa, ankilake; ko enayal’emi, bosali’onami angoyala nko meho. Nko boto ankambel’emi bikambwa, Bafango’onami angokumy’ende. 27Isanga bolimo’onami boka bolito bike mene, ko yoi linalingi’m’otenda nai? Nongila nde, Bafango, ombikya ena heure ene? Ohonde ncina eneki’m’oyaka ena heure ene nd’ene. 28Bafango, kumya lina lineamene. Nkwaho lofoso loya ena loola, ate, Mokumya liho, ko nongokumya liho lakina. 29Bato’aho bik’ike banemalaki ko banokaki, baila, iy’ate, Likungola nde liho; bamoi, Mbo ekima ena loola atendaki l’ende. 30Yesu aotenda, ate, Lofoso lone lotaya lacin’enami: loyaka lacin’enino. 31Isanga etendelo en’akambo ban’ato bana loko lone emoyela; isanga lifoka lina loko lone angofodyama. 32Koko emi, yombo liledyama ena liko lina loko, nongosuma bato bahatu eneyal’emi. 33Aotenda yoi line lacina aatume bokotua bon’ewedi benengi’nd’owa. 34Bato’aho bik’ike bamokutwela, iy’ate, Tomoka en’asangya Masiya angoyala nko njalama; iya, enil’e oka Bon’on’oto angiledyama, ncina eka nai? Bon’oho bon’oto ayali nai? 35Koko Yesu amasumola, ate, Fololo eyali l’ino nk’ilalela kei: boongya likenda kuma fololo eyali l’ino, lacina liucu litokokwel’ino; lacina ende onoyakende ena liucu afanonganya mboka enaco’ende. 36Bimedyaka Fololo, kuma boyali l’eho, lacin’eho boyalame ban’ana fololo. Yesu aotenda baoyi’ane, ko aocoa oyafisamela.

37Koko iyo, kanga ende akambaki bikambwa bine bike bina mpefa nk’en’aiso’aniyo, batiimedya tu;

38nko lacin’eho yoi linaliki Yesaya bosumoli otendak’ale yilame, ate,

Nkolo, onimedyaki hosimo’oniso oka nai?

Ko lo lona Yawe lomenya eneyali nai?

39La ncina ene, iyo batinya yimedya, lacin’oka Yesaya atendaki lakina, ate,

40Amokomba baiso’aniyo, ko amocilingitanya betem’eniyo;

Batongoyena l’aiso’aniyo, ko batongononganya l’etem’eniyo,

Batongohelengwa,

Ko ntongoyaikya.

41Yesaya atendaki baoyi’ane lacin’eneki’nd’oenaka bokoka bonande; ko atendaki lacin’enande. 42Koko bike bona bafoka nkoho bamimedya; ohonde bateyanya imeedyo iniyo ena fololo lacin’ena Bafalusi, batongofodyama ena sunagoga; 43lacin’oka baoka lokumo lon’ato mposa eneleki mposa enek’iy’ookaka lokumo lona Yakomba.

44Yesu aololua, ate, Ononjimedy’emi, afanjimedy’emi: aimedy’ende onontomaki. 45Ko ononjen’emi, aen’ende onontomaki. 46Emi moya yoka fololo ena loko, lacina boto l’oto ononjimedya afayalamaki lakina ena liucu. 47Yomb’oto’on’etaketaka aoka baoyi’anami, ko afamony’aho, emi mpatendel’ende likambo, lacin’emi ntaya oyotendel’ato bana loko bakambo: njaki oyaikya. 48Ende onontembol’emi, ko afatambe baoyi’anami, ayali l’omoi onomotendela bakambo: yoi linaliki’m’otendaka, liho lingokoiy’ende likambo en’ina bona nsimbo; 49lacin’oka ntatenda yoi linamamene: Bafango onontomaki, ende ampaki bosimo bonongi’m’osumol’ato, ko la yoi linalingi’m’otenda. 50Ko emi ley’oka lotomo lonande loyali nko liiko lonelofakale; lacin’eho, baoyi’aho banatend’emi, latenda nk’eyok’o noki Bafango ontomaka lacina ntende.

Currently Selected:

Yoane 12: BBY62

Highlight

Copy