Atos 21
21
Jerusalémkiri Paulo kanikiaki, na hãtxarã
1hanushũ Jesus ikũwaĩbu hatu henebaini niwe shashu ewapaki nũ ana nanekaini natukã betsa hawẽ kena Cós anu kayãbis besusi nũ pukea hanu ushaxini ana kai natukã betsa hawẽ kena Rodes anu ushariakaini hanua ana kai mae betsa Pátara anu hikishũ 2niwe shashu ewapa betsa Feníciakiri kanũ ika neshea betxitã hawẽri kanũ, ika haki maekĩ hawẽ ibu pakatã hatube nũ ana kai 3ana patãbaĩkatsi ikama besusi pukei natukã ewapa hawẽ kena Chipre yusiuri daĩbaini mai kesua Síria anu patãkubauni Tiro anu hatũ mabu apakatsis iki hanu hikikaũ keti ikẽ 4hanua ikũwaĩbuki nukutã hanu mapekeyuxina sete dia besti hatuki nũ bayuaya Deusũ Yushĩ Pepatũ bebũkiri ikũwaĩbu yuia habuã Paulo yuikĩ: “Jerusalém anu kayamayuwe”, akĩ keyuabu 5hanua sete dia ma keyuaya: “Ẽ ma kaii”, nũ hatu wa nuku nitxĩnũ ika hatũ mae anua habũ ikũwaĩ hunibu inũ hatũ aĩbuaibu inũ hatũ bakebuya dasibibũ nuku txibãbirã iãnẽwã kesha anu bea maxĩ nukube dãti itã nukubetã Deus kuxipa yukatã 6nuku haska washũtã nũ kai penũ nuku nitxĩkĩ nuku shashũ ainitã hanua habu hatũ hiwekiri txĩtũbainaibũ
7hanua Tiro anua kai mae betsa Ptolemaida anu keti itã ha shashuwẽ nũ huai henetã ikũwaĩbu nũ hatu betxima benimakĩ nuku yukabu hatuki bayui hanu ushaxini 8hanua mexukiri Paulobe bestẽkaini ana kai Cesaréia anu hikitã Jerusalém anushũ ha sete merabewanikabu wakĩ hatu katunibu betsa hawẽ kena Filipẽ Deusũ hãtxa hatu yuikubaũmistũ hiwe anu hikitã haki bai nũ hanu iyukẽ 9hawẽ aĩbu bake dabe inũ dabe beneyariabumã Deusũ hãtxa hatu yuiriakubainaibũ 10hanua shaba eskarabes kaya Judéia mai pakea anua tashnikirani Deusũ hãtxa hatu yuiriakubaĩmis hawẽ kena Ágabo hua hikia 11nuku uĩtanũ ika hushũ Paulõ nanesheketi bitã hawẽ tae inũ hawẽ mekẽ ibubis meneshtã yuikĩ:
—Deusũ Yushĩ Pepatũ ea yuixina matu yuinũ nĩkakãwẽ. Na ẽ akai keska wakĩ Jerusalém anushũ na nanesheketi ibu judeubũ atxishũ neatã Romanonawabu anu inãshãkanikiki— ikaya
12nĩkatã Jerusalém anu hau ana hari kayamanũ nuku inũ Cesaréia anuabũ nũ nemakĩ baxibiakubaina 13Paulõ nuku kemakĩ:
—Haskai ewẽ taea kashakĩ mã ea huĩti nixmawakanai? Jesus ikũwãkĩ ẽ txibãmiswẽ taea Jerusalém anushũ ea atxishũ neashanaibuwẽ ẽ dateamaki. Hakia ẽ Jesus dayashũkũkaĩmiswẽ taea ẽ haria mawariashũtiruki— nuku wa
14haska washũ hawẽ xinã betsa wamatima hau haskaratanũ nema henetã yuikĩ:
—Nukũ Shanẽ Ibũ xinãnẽ iwe— nũ wa
15habe kanũ ishũ nukũ mabu pewatã Jerusalémkiri kakũkaini nũ mapekeaya 16Cesaréia anua ikũwaĩbu hatiri nukube buxĩshũ huni betsa Chipre anua kaĩni hawẽ kena Mnasom ma bari itxapa Jesus ikũwãpakemistũ hiwe Jerusalém anu nũ habe iyunũ nuku hari iyukĩ
Paulo Tiagoki banikiaki, na hãtxarã
17hanua Jerusalém anu hikitã Mnasomẽ hiwe anu nuku iyuabu ikũwaĩbu nukuwẽ benimabirã nuku iabu 18hanu ushaxini Jesusũ betsa Tiago nũ haki bai ka habianuri dasibi mekenikabu nũ hatuki nukua 19hatube yuka itã hanubi Paulõ hatu hãtxa wakĩ haska Deusũ merabewakĩ dayamakĩ hamapai betsa tibi judeubuma anushũ Jesus hatu ikũwãmakubainai binumakubaĩxina hatuki txaniai 20nĩkabaikĩ hanushũ Deus kẽwãtã habu betsã Paulo yuikĩ:
—Nukũ betsaã, mia yuinũ nĩkawe. Nukunabu judeubu mirimabũ Jesus ma ikũwãbiakĩ hawẽ nemati inũ hawẽ yunuti Moisés nukũ shenipabu yusĩni meke pewashũ henekatsi ikama txibãpakemisbũ 21mĩ akaikiri mia yuãkĩ yuikĩ: “Nukunabu nawabube hiwea Paulõ hatu yusĩkĩ Moisés yusĩni hau ana txibãyamanũbũ inũ hatũ bakebu hau hatũ hina kubitxi ana meshteyamanũbũ hatu yusĩkĩ yunumiskiaki”, ibirã ibirãmisbuki, mikiri txani beshũ yuikinã. 22Natiã mĩ ma hua nĩkatã yurabu miki sinatakĩ mia danãtirubuki. Haska mia uĩaĩbũ hawawẽ nũ mia haska watirumaki. 23Mĩ haska wakĩ hatu daewanũ mia yuinũ nĩkawe. Nukũ betsabu quatro huni Deusbe yubakaima ma keyui kemai na habia tsauwabuki. 24Haskakẽ mia hatube kashũ Templo anu hatube pepakĩ Deusbe nukunabu hãtxashunikabũ nukũ beya txibãkĩ hau Deus ana matuki sinatayamanũ Deus yubaimabu hatu pakashũtã habũ bu hatu mashtemakĩ mãkuamashãwẽ. Mĩ hatu haska washũkẽ judeubũ Jesus ikũwãkĩ dasibibũ uĩkĩ Deusũ hãtxa Moisés yusĩni kaneama mĩ txibãmis inũ hamẽmẽs mikiri txani txakamisbu unãshãkanikiki. 25Haska inũ, judeubumã Jesus ikũwaĩbukiri hau nukũ beya txibãyamanũbũ nũ ma hatu bebũkiri keneshunimaki, xinã besti watã eska wakinã: “Yushĩ dami betsa kẽwãkĩ nami inãmisbu piyamashãkãwẽ. Ha inũ, himi ayamashãkãwẽ. Ha inũ, yuinaka teneshabu piyamashãkãwẽ. Ha inũ, aĩyãkĩ haska Moisés nuku nemakĩ keneshuni txibãshãkãwẽ, hau nukunabu berabĩrabeyamanũbunã”, nũ hatu waniki— aki Tiago hãtxa meneaya hawẽ hiwe anua kaĩkaini Mnasom hiwe anu nũ ka
Templo hemaĩtĩ anushũ Paulo tenãnũ, iwanã, atxinibukiaki, na hãtxarã
26hanua ushaxini bestẽkaĩ Paulõ ha quatro hunibu iyui hatube pepanũ, iwanã, Templo hemaĩtĩ anu kashũ haska Deusbe hawenabu hãtxashunikabube hãtxanamei pepatikiri hatube yubakashu taewaibũ hanua ha quatro yubakaimabu habu meneaitiã ha quatro huni tibitũ hawẽ inãkuĩ betsa betsapa bui Deusbe hawenabu hãtxashunikabu anu bestibu bushuãbu Paulõ hatu banabima
27ma sete shaba keyui kaya Templo hemaĩtĩ anu Paulo nikaunai Ásia mai pakea anua judeubu bexĩshũ betxitã yurabu hatu itimaska wanũ ishũ pubẽkaĩ Paulo atxitã 28hãtxa kuxipawẽ hatu yuikĩ:
—Israelbuũ, nuku merabewai bekãwẽ. Na huninã, mae tibi anushũ yurabu hatu yusĩ txakakĩ nukukiri inũ, Moisés yusĩnikiri inũ, na nukũ Templokiri hau xinã betsa wanũbũ hatu yuikubaũmiski. Ha dikabi nukũ Templo anu Gregobu hatu iweshũ nukũ Templo meribi ma hatu atimapa wamaikiki— ikinã, 29haska yuirã, ha dukũ Éfeso anua judeubuma Gregonawa hawẽ kena Trófimobe Paulo Jerusalém bai tanabiranai uĩxĩshũ ha huni Templo anu iyua dabanẽ marias xinãkĩ kaneirã.
30Hanushũ yurã kaiã itimaskai kuxibirã Templo hemaĩtĩ kene meribi anua Paulo atxitã shabakã kaĩmakĩ sharabainaibũ Templo shui beputi mekenikabũ hawaira bepuaibũ 31haska Jerusalém anushũ Paulo tenãnũ, iwanã, kuxa kuxa akĩ ma tenaĩ buanaibu mae hirabi itimaskaibũ Romano soldadobu shanẽ ibũ haskaibu banabimabu nĩkatã 32hawaira hawẽ soldadobu inũ soldado shanẽ ibu beshmasbu hatu itxawatã hatube kuxikaĩ ha yurã kaiã itxa itimaskaibu anu maputuxitã hatu uĩabũ Paulo kuxa kuxa akaibu hatu mepãmatuxitã 33hanushũ soldado shanẽ ibu Pauloki kematã hawẽ soldadobu yunua haki niri iki keyutã mane dispi txiwetameya dabewẽ meneshkĩ huneshaibũ shanẽ ibũ hatu yukakĩ:
—Narã, tsuamẽ? Hawa matu txakabuwaimẽkaĩ?— hatu wa 34habũ hawa unãmabia unãnumas hãtxa betsa betsapa yuiakeakekĩ hawa tapĩmakĩ pewabuma hawẽ soldadobu hatu yunukĩ:
—Hanu nukũ mixki hiwe kuxipa anu iyukãwẽ— hatu wa iyuaibũ 35yurabu mesebainaibũ Paulo soldadobũ iashũ tapaitiwẽ mapemabainaibũ 36yurã kaiã haki sinatai hatxũ bukĩ hui kuxipawẽ yuikubaĩkĩ:
—Tenãkãwẽ! Tenãkãwẽ!— ikubainaibũ
Hawa txakabumakiri Paulõ hatu yuinikiaki, na hãtxarã
37hanushũ soldadobu hanu mekei hiwemisbu mixki hiwe anu Paulo bitxi buaibũ Gregõ hãtxawẽ Paulõ Romano shanẽ ibu yukakĩ:
—Eska ẽ mibe hãtxatirumẽ?— aka
shanẽ ibũ kemakĩ yuikĩ:
—Aa, mĩ Gregõ hãtxayaraka? 38Haskakenã, miarã, Egitonawa betsa shanẽ ibukĩ nukũ mae nuku mebinũ ika hawẽ 4.000 soldadobu hanu tsua hiweabumanu hatu iyutanimarã, mĩ ha dabanẽbĩ ẽ ikai— aka
39Paulõ kemakĩ:
—Ẽ hamaki. Earã, ẽ judeubĩ. Mai pakea betsa Cilícia anu mae kuxipa Tarso anua ẽ kaĩniki. Ea haska wama ha yurabu ẽ hãtxa wayuai ea heneyuwe— aka
40shanẽ ibũ hani:
—Iwe— akĩ heneyua
mixki tapaiti kesha nishũ hawẽ mekẽ meneshekerabea sanãtã hatu nemakĩ pes wakĩ keyua mapuabũ judeũ hãtxa Hebreowẽ Paulõ shabakabi hatu yuikĩ:
Currently Selected:
Atos 21: cbsBR
Highlight
Share
Copy
Want to have your highlights saved across all your devices? Sign up or sign in
NT © 1980-2006, Wycliffe Bible Translators, Inc.
OT portions © 2006, Wycliffe Bible Translators, Inc.
