Atos 22

1—Ẽ betsabu inũ ẽ epabuũ, haska ẽ txakabuma ekiri matu yuinũ ea nĩkakãwẽ— hatu wa 2habũ hãtxa Hebreowẽ hatu yuia nĩkai ana hawa banama pes ikama nĩkaibũ Paulõ hatu yuikĩ:

3—Earã, ẽ judeuriki. Mai pakea betsa Cilícia anu mae ewapa Tarso anua ẽ kaĩbiani na Jerusalém anu ea iwenishũ na habianushũ ea yumewanibuki. Haska Deusũ hãtxa Moisés nukũ shenipabu yusĩni Gamalielĩ ea yusĩ pehairawakubainai tapĩnishũ ẽ Deus dayashũkatsis ikũkainaii, na habiatiã mã Deus dayashunai keskariairã. 4Uatianã, Deus dayashunũ, iwanã, tsuabũra Bai Bena Jesuskiri ikũwaĩbu hatu tenãnũ, iwanã, hunibu inũ aĩbuaibu atxishũ bitxiti hiwe anu hatu yunukĩ ẽ hatu itxakahaira wakĩ ẽ hatu nuitapa waniki. 5Ẽ hatu haska waya Damascokiriari Jesus ikũwaĩbu benabaũkĩ atxitã nenu iwetã ẽ hatu kupishanũ ea kuxipa wakĩ Deusbe nukunabu hãtxashunika shanẽ ibuhaira inũ nukũ mekenikabũ Damasco anu shanẽ ibubukiri ea keneshũ ea inãtã hari ea nitxĩnibuki. Na habiabu Deusbe nukunabu hãtxashunika shanẽ ibuhaira inũ nukũ mekenikabũ ea yununibũ ẽ haska akubaini unãkĩ matu yuitirubuki.

6Hanua ea kuxipa wakĩ kene ea inãbu bui haya kai Damasco bai tanabaini ma ẽ kemaya bari mananãbi nai anua bĩ txasha kuxipahaira peshekirã ea datxashaya 7ẽ maĩ di ika dakashũ nĩkaya hui tashnikĩ ea yuikĩ: “Sauloõ, Sauloõ, haskakĩ mĩ ea itxakawakubainai?” ea wa 8eãri yukakĩ: “Shanẽ ibuũ, mĩ tsua iki ikai?” ẽ wa hanushũ ea ana yuikĩ: “Habia ea ikũwaĩbu mĩ hatu itxakawakubainairã, ẽ Jesus Nazaré anuaki”, ea waya 9ha hunibu ebe bukĩ bĩ txashai uĩbiai hawẽ hãtxa nĩkabumakẽ 10eãri yukakĩ: “Shanẽ Ibuũ, haskapa?” ẽ aka ẽ Shanẽ Ibũ ea yuikĩ: “Benikaini kai Damasco anu karitãwẽ, harishũ mĩ haskakũkaĩshanai tsuãra mia yuishanikikirã”, ea akaya 11ha bĩ txashapã ea beru nuka wakĩ ea mexu bepua ẽ ma bepeshebia ẽ uĩyamakẽ ẽ haibuaibũ metsũshũ Damasco anu ea iyunibuki.

12Hanu ẽ hikixĩkẽ huni betsa hawẽ kena Ananiasĩ Moisés hãtxa pe txibãmis judeu betsabũ hanu hiweshũ kẽwãmisbu 13Ananiasĩ ea merabewatanũ ika hua ea dapi nishũ yuikĩ: “Sauloõ, Jesus ikũwaĩ ma mĩ nukũ betsaki. Ana mĩ beruwẽ uĩ bena wariwe”, ea waya samama ẽ beru kayatiwatã ẽ ha uĩayã 14ana ea yuikĩ: “Ha nukũ Deus nukũ shenipabũ kẽwãpaunibu habiatũri mia katunishũ mia unãkĩ hau hawẽ xinãwẽ hawẽ bake pepa Jesus mĩ uĩnũ hawẽ huiwẽ mia hãtxa waxinaki. 15Haskawẽ taeshũ mianã, hawara uĩkĩ mĩ nĩkaxina yurabu mai hirabi anu hiweabu mĩ hatuki txanikũkaĩshanaii”, iwanã, 16“Haskakenã, ana hatishuĩra manama mĩ Deuskiri txakabukũkaĩmis hau mia buashunũ Jesusũ kenawẽ taeshũ ẽ mia naximai kanũ beniriwe”, ea waniki.

17Hanua Jerusalém anu ẽ ana txĩtũkirãxina Deusbe hãtxanũ ika Templo hemaĩtĩ anu ka ẽ habe hãtxai nia namai keskakĩ 18Jesus ẽ uĩayã ea yuikĩ: “Nenushũ mĩ ekiri hatu yusĩayã mia nĩkama ishãkanikiki. Haskakẽ menã hawaira Jerusalém anua tashnirikaĩtãwẽ”, ea wa 19eã yuikĩ: “Shanẽ Ibuũ, hanu itxamisbu hiwe tibi anushũ mia ikũwaĩbu atxishũ bitxiti hiwe anu hatu bitximashũ hatu kupikĩ ẽ hatu kuxa kuxa amakubaĩxina dasibitũ ea unãkanikiki. 20Ha inũ, mĩ hãtxa yuishunika Estêvão mãkãwẽ tsaka tsaka akaibu uĩkĩ habũ akai keska xinãkĩ hatũ tari ẽ hatu mekeshũxinaki”, ẽ wa 21ẽ Shanẽ Ibũ ea nemakĩ: “Txaihaira yurabu betsa betsapa judeubuma anu ẽ mia yunuaii. Hari karitãshãwẽ!” ea waniki— hatu wai

Paulo Romano documentoya hatu unãmanikiaki, na hãtxarã

22ha judeubu itxabũ hatishũ besti Paulõ hãtxa nĩkashũtã ana judeubumakiri nĩkakatsi ikama hakiri sinatakĩ unãshubima yuikĩ:

—Ha hunirã, nũ ana hiwea uĩkatsi ikamaki! Tenãkĩ yamawarikãwẽ!— iki

23heneama keketikubaĩkĩ haki sinatai nashuku paepakĩ hatũ peyabukumisbu tari pekatã mai bekux bekux akĩ kuru sa sa akaibũ 24haskarawẽ taea dasibibu haki sinataibu unãkatsis ikĩ Romano shanẽ ibu comandantẽ soldadobu yunukĩ:

—Nukũ meketi hiwe uke merã mistuyukãwẽ. Harishũ haskai haki sinatai biski ikanimẽkaĩ hau nuku yuinũ bitxi kuxatiwẽ kuxa kuxa akĩ txanimakãwẽ— hatu wa 25bitxishũ hawẽ nea pekatã hanushũ kuxakatsi pewaibũ hanua shanẽ ibu beshmas capitão ha dapi nia Paulõ yukakĩ:

—Romano huni documentoyabiakenã, unãti wariama mã kuxa kuxa atirumẽ? Ha dikabi hawa txakabu waxina unãmari mã ariatirumẽ? Haska mã yunuai? Earã, ẽ matũ documentoyakirã— aka

26haska wa capitãonẽ nĩkabaĩ hawẽ shanẽ ibu comandante anu ka haki txanikĩ yuikĩ:

—Ha hunirã, Romano documentoyakiaki. Txanimamẽkaĩ, yukatãwẽ— aka

27shanẽ ibu comandante kashũ Paulo yukakĩ:

—Txanima mĩ Romano documento hayamẽ? Ea yuiriwe— aka

Paulõ kemakĩ:

—Hawaikika! Ẽ hayabĩ!— aka

28hanushũ shanẽ ibu comadantẽ Paulo yuikĩ:

—Ena bikinã, pei itxapawẽ pakatã ẽ biniki— aka

Paulõ ana yuikĩ:

—Enarã, haskamaki. Romano ẽ kaĩyã hawa pakama ẽ documento ea inãnibuki— ikai

29nĩkatã datei kuxatiyabũ henebainaibũ hatu neamashũwẽ taea Romano shanẽ ibu comandante datebetanã Paulo hawa wama duawakĩ hau pe mekenũbũ hawẽ soldadobu yunubaina

Sinédrio judeu shanẽ ibubuki Paulo txaninikiaki, na hãtxarã

30hanua shanẽ ibu comandantẽ ushaxini penaya haskaya Paulo txitexinabumẽkaĩ, iwanã, tapĩhairakatsis ikĩ mane dispi txiwetameyawẽ neshaxinabu comandantẽ hawẽ soldado hatu pekamatã Deusbe hawenabu hãtxashunika shanẽ ibubu inũ Sinédrio dasibi hatu itxawatã Paulo kaĩmabaĩ hatu anu iyushũ hatũ besuuri nitxiã

Currently Selected:

Atos 22: cbsBR

Highlight

Copy