Atos 20

Macedônia inũ Grécia mai pakea anushũ Paulõ yusĩkĩ hatu xinã txãkãwanikiaki, na hãtxarã

1Éfeso anua itimaskabai ma heneabũ hanushũ Paulõ ikũwaĩbu hatu yusĩ pewanũ ishũ hatu itxawashũ hatu xinã mestẽwãmatã Deus hatu yukashũtã Éfeso anua kaĩkaĩni Macedônia mai pakea anu kaxiã 2hanushũ hatu uĩkubaũkĩ ikũwaĩbu yusĩ hatube hãtxakĩ hatu benimawakĩ xinã txãkãwãkĩ keyutã, hanua huni betsa betsapa hatu iyui atimas Grécia mai pakea anu Corinto dapi hikitã 3hanu hatuki nukutã hiweyukĩ ushe dabe inũ besti nitxĩtã hariri Síria mai pakea anu kanũ ika yubakatã niwe shashu ewapaki inai kapanã hanushũ judeubũ Paulo detekatsi yubakaxinabu Paulõ bana nĩkatã xinã betsa watã ana Macedôniakiri mananã hawẽri ana txĩtũkaĩni maĩ kaya 4haska kainai habũ txibãbainai Beréia anua Pirrõ bake Sópatro inũ, Tessalônica anua Aristarco inũ Segundo inũ, Derbe anua Gaio inũ, Timóteo inũ, Ásia mai pakea anua Tíquico inũ Trófimo habe bui 5hatiri bebũkiri pukeshũ mae betsa Trôade anushũ nuku manaibũ 6hanushũ judeubũ misi shashama pi besi nawai nũ hatube iyuaya hanua Filipos anua Paulobe ẽ kai niwe shashu ewapawẽ pukei shaba cinco dia binutã keti itã Trôade anu hatuki ana nukutã sete dia ikũwaĩbuki bai nũ hanu iyuniki.

Trôade anushũ Paulõ hatu yusĩnikiaki, na hãtxarã

7Habianuari domingo mexu merã haska nuku yunubaini Jesus nuku mawashuni xinãmati misi tũkeshũ pikatsi ikũwaĩbubes nũ itxa mexukiri kanũ ishũ Paulõ nuku yusĩ yamenapũ hãtxa heneriamakẽ 8hari dĩtu ewapa hiwe keyatapa manaũri anu bĩ itxapa hari haya, harishũ dekuabu anu nuku itxawakẽ 9hiwe keyatapa tapa dabe inũ besti uĩti shui anu berunã hawẽ kena Êutico tsaushũ Paulõ yusĩ txaipawai nĩkai usha tenei hanua ushatxakayama manaũria kawani tĩ ikaya beninũ ika hawaira butukirã ma mawa betxiabu 10hakia Paulo buturiakirã haki beukaĩ teikutã ikũwaĩbu hatu yuikĩ:

—Hawẽ dateyamakãwẽ, hiweakirã— hatu wa ana hiwea uĩaĩbũ

11Paulo ana nukube inakaĩ Jesus nuku mawashuni xinãmati misi tũkeshũ nuku pimatã ana nuku yusĩ nukube hãtxaxini ma shabaya hãtxa menetã nũ kaya 12berunã kawana ana hiwea iyui dasibi benimahairai inũ buaibũ

Trôade anua Mileto anu Paulo kanikiaki, na hãtxarã

13hanua Paulõ nuku dukũ nuku nitxiã niwe shashuwẽ kai Assôs mae anu bebũkiri nũ kanũ Paulõ nuku yunutã hanua nuku yuikĩ:

—Shashũ buãtãkãwẽ, ẽ kapakeairã, haria ea ibaĩkashunã— nuku wa niwe shashu ewapawẽ kai 14ma Assôs anu Paulo kapakea haria nukuki shashũ inakaini Mitilene anu keti ika hanu ushaxini 15ana kai natukã hawẽ kena Quios kema shashũ ushariaxini ana kai natukã betsa hawẽ kena Samos anu keti ika ushaxini hanua bestẽkaini Mileto txaimakẽ hanu hikitã 16Jerusalém anu Pentecostes shekiwã bimi betsa ha dukũ kanimistiã judeubu besi nawamisbutiã hatube besinũ ika hĩ hĩ ikĩ Ásia anu usha itxapai ana baxikukatsi ikamawẽ taea Éfeso anu Paulo kama Mileto anu niti ishũ hatu manakĩ

Éfeso anuabu mekenikabuki Paulo hawẽ henei hatuki txaninikiaki, na hãtxarã

17Éfeso anua ikũwaĩbu mekenikabu hau Mileto anu bea hau habe hãtxai benũbũ Paulõ hawẽ hãtxa hatu keneshũ bumakẽ 18uĩbirani Mileto anu mekenikabu beabu Paulõ hatu yuikĩ:

—Matũ mae pakea Ásia anu ẽ matu anu hiki taeyama haska ẽ hiwekũkaĩmis mã unaiĩ. 19Earã, matu anushũ ẽ xinãnẽ xinaĩ txikixi hawa keãma ẽ Shanẽ Ibu Jesusũ ea yununi duawai nĩkabumabiakẽ matuya kashai beũ hene habakĩ judeubũ ea itxakawabiabu matu anushũ bikahaira tenei ẽ Jesus dayashũkũkaĩyamaki. 20Ea haska wabiabu dasibibũ besuuria inũ matũ hiwe betsa betsapa anushũ matu yusĩkĩ matu merabewanũ, iwanã, hawa meseki dakeama ẽ matu yusĩ heneama iniki. 21Haska inũ, Deuskiri txakabumisbũ hau xinã betsa watã nukũ Shanẽ Ibu Jesus inũ Deuskiri xinã betsa watã mã ikũwanũbũ judeubu inũ judeubuma ẽ matu yusĩhairaniki. 22Hakia eskatiã Deusũ Yushĩ Pepatũ Jerusalém anu ea yunutxakayamaiwẽ taea hari ẽ uĩ kaii. Ẽ hari hikia tsuabura haskarara eki tanabu ẽ unãmaki. 23Hakia mae tibi anu ẽ ka Deusũ Yushĩ Pepatũ bebũkiri ea hatu unãmakĩ bitxiti hiwe anu ea bitxishanaibu inũ betsa betsapawẽ ea bika tenemashanaibu ea yuimisbuki. Ha besti ẽ unaiĩ. 24Habiaskabiakẽ earã, ẽ hiweawẽ nui yauxiama ẽ daya Jesusũ ea yununiwẽ taeshũ Deus yurabuwẽ nuikĩ haska wakĩ hawenabu hatu wakatsis ikaikiri punu nukama benimai heneama ẽ hatu yusĩkĩ keyukatsis ikũkainaii.

25—Haska inũ, Deus shanẽ ibuaikiri ẽ matu yusĩkubaũyama tsuã mã ea ana uĩyama ishanai ẽ matu yuiaii. 26-27Haskakẽ ikis matu yuinũ nĩkakãwẽ. Dasibi Deusũ yurabu yubani hawa huneama shabakabi ẽ matuki txanimiswẽ taeshũ tsuãra habũ danãkĩ Jesus ikũwãbumawẽ taeshũ Deusũ ea kupiama ishanikiki. 28Haskakẽ ibubis mekekĩ Deusũ Yushĩ Pepatũ matu katua merabewakĩ ikũwaĩbu mekekubaĩshãkãwẽ. Deusunabu hatu wakatsi ikĩ hawẽ bake yunua mawashũkĩ hawẽ himiwẽ hawenawakĩ meribi hatu wani hatu putama hatu uĩrashũshãkãwẽ.

29—Hamẽ betsarã, ẽ ma kaĩkainikẽ kamã inu pubẽ keskabu beshũ txashuwã shukua yamawamis keska wakĩ ikũwaĩbu txashuwã keska atxishũ tenãkĩ yamawanũ ika imisbu keska beshãkanikiki. 30Matu ibubis matu anua hanubi benitã shanẽ ibutã: “Ea txibãkãwẽ”, ishũ matu parãkĩ matu txani yusĩshãkanikiki. 31Haskawẽ taeshũ ano dabe inũ besti matube hiweyushũ mã kaneai tibi ẽ matu meshtamakubaĩkĩ matu yusĩkubaĩkĩ bariri inũ mexu merã matuya kashabetanã ẽ matu haska wani hakimayamakãwẽ. Eskatianã, hanũ ibubis beru mestẽwãrikãwẽ.

32—Ẽ betsabu inũ ẽ puibuũ, ẽ matu hãtxa wai ma hatishũ ẽ matu keyuai nĩkakãwẽ. Natiã Deus ẽ matu yukashunaii. Hawẽ hãtxa pepa nuimis mã unãyã haska dasibi yubakani Deus matuwẽ dayakĩ hawẽ kuxipawẽ matu amashanikiki, mã hawenabu meribi ewai unãnepanũbunã— itã

33—Daketapakĩ ibubis matũ pei inũ matũ mabu matu bianũ ika kemuama 34hakia haskama ea ẽ hatube dayai hawa hatu bika tenemama haska ea inũ habũ hamapai hayama bikatsis ikĩ mekenẽ dayakĩ ẽ bikubainima mã nuku unaiĩ. 35Haska inũ, nukũ Shanẽ Ibu Jesusũ nuku yusĩkĩ yuikĩ: “Tsuara nuitapakĩ hawara bi benimamisbuki. Hakia tsuãra nuitapaibu merabewakĩ inaĩ benimatxakayamamisbuki”, hatu wani xinaĩ: “Txikixama dayakĩ nuitapaibu merabewakubaĩshãkãwẽ”, akĩ ẽ matu yusĩkũbaĩmiski— iwanã,

36hatu yusĩ menetã Paulo dãti ikaya habe dãti iki keyuabu hau Deusũ hatu mekekubaĩshanũ Paulõ hatu yukashũtã meneaya 37hanua dasibitũ teikutã haya kashabetanã Paulo tãtsu atã: 38“Ana mã ea uĩyama ishanaii”, ikĩ hatu yuishuwẽ taea hawẽ nuitxakayamai ana benimama punu nukatã habiaskabia nitxĩnũ ika iãnẽwã kesha anu shashu anu Paulo iyuabũ

Currently Selected:

Atos 20: cbsBR

Highlight

Copy