Atos 13

Barnabé inũ Saulo Deusũ hatu yunua txai yusĩkĩ taewai buaibu hatu nitxĩnibukiaki, na hãtxarã

1Antioquia anushũ ikũwaĩ itxaibu habũ hatu yusĩaĩnã, eska hayanibukiaki, Deusũ hãtxa meshtãmanikabu inũ habũ kakape Jesuskiri hãtxa yusĩnanãmisbu betsa betsapaburã. Hatũ kenarã, Barnabé inũ, Simeão hawẽ kena betsa Mexupa inũ, Cirene anua huni betsa Lúcio inũ, Galiléia shanẽ ibu Herodesbe ewani Manaém inũ, Saulo inibukiaki. 2Hanua ana shaba betsatiã habu itxatã samakekĩ Deus kẽwaĩbũ Deusũ Yushĩ Pepatũ hatu yuikĩ:

—Barnabé inũ Saulo daya betsa ma ẽ hatu kenani ẽ hatu yunukatsis ikaya hau dayatanũbũ meribi hatu nitxĩkãwẽ— hatu wa

3hanushũ samakeyabi hau Deusũ hatu mekekubaĩshanũ habũ hatu yunuaibũ yukashũtã hau dayatanũbũ meribi wakĩ mamepishũ hatu nitxiãbu

Natukã Chipre anushũ Barnabé inũ Saulõ hatu yusĩnikiaki, na hãtxarã

4hanushũ Deusũ Yushĩ Pepatũ Barnabé inũ Saulo Antioquia anua nitxĩkĩ yunua hatũ merabewanika João Marcos iyui iãnẽwã maikiri kesha anu mae betsa Selêucia anu hikitã natukã ewapa hawẽ kena Chipre anu kakatsi pakatã niwe shashu ewapawẽ inatã besusi pukei kai 5mae betsa Salamina bai butuatũ keti itã hanu hikixĩshũ hanu judeubu itxamisbu tibi anushũ Deusũ Messias Cristo mekenãkiri hatu yusĩ taewatã hatu yusĩkubauni 6hanua natukã mae tibi anu Barnabé inũ Saulo uĩ bukubaini atimas ha natukã shanẽ ibũ mae hawẽ kena Pafos anu hikiabu hanu judeu betsa hawẽ kena Barjesus, hawẽ Grego kenarã, Elimas, huni mukayai txani txakai: “Deusũ hãtxa yuishunika nikapai ẽ hawẽ kuxipayaki”, ikĩ hatu parãmis 7hanu Romano shanẽ ibu Sérgio Paulobe ha huni mukaya ha dayashũmis hiwekẽ ha shanẽ ibu unãnepa xinã pepayatũ Barnabé inũ Saulokiri kakaibu nĩkatã Deusũ kakape Jesuskiri hãtxa nĩkakatsis ikĩ hau hatu ishũtanũbũ yunua hatu iweabu beshũ 8hanushũ hatu yuikĩ taewaibũ Romano shanẽ ibũ Jesus ikũwaĩ nemanũ ika huni mukayatũ Barnabé inũ Saulokiri hãtxai daketapakĩ hatu ha akaya 9hakia Saulo, hawẽ kena betsa Paulo, Deusũ Yushĩ Pepatũ kuxipayatũ beri ikama beishairakĩ 10huni mukaya Elimas yuikĩ:

—Diabo Satanásã bakeẽ, parananaĩ txani txakai dasibi pepaki mĩ sinatamiski. Haskai Yavé Deuskiri txani txakai Deuskiri bai mĩ nuku yushtu wamakatsis ikai? 11Mĩ haskaiwẽ taeshũ natiã Yavé Deusũ mia kupikĩ bari txasha mĩ uĩyamanũ mia bekũwãyuikiki— akaya

hawaira mexũ bepua hawa uĩyama hanua: “Tsuã ea metsũbainimẽkaĩ?” iki mexã atanikiaki, ma bekũwanã. 12Haskai uĩtã inũ Jesuskiri yusĩaĩ pepa ma hatu nĩkatã: “Habaa!”, ikĩ Romano shanẽ ibu Sérgio Paulõ Shanẽ Ibu Jesus ikũwãnikiaki.

Paulo inũ Barnabé Antioquia mae ewapa Pisídia mai pakea anushũ hatu yusĩnibukiaki, na hãtxarã

13Hanua Paulo hawẽ haibuaibube Pafos anua niwe shashu ewapaki inabaini iãnẽwã besusi pukei mai pakea betsa Panfília anu kai mae Perge anu keti iki kai buaibũ hanushũ João Marcõs hatu henebaini Jerusalém anu ana txĩtũkiranaya 14hanua Perge mae anu niti ikama bui mai pakea betsa Pisídia kapukebaini mae ewapa betsa Antioquia anu hikixinabũ hanua huĩrukũti sábadotiã hanu judeubu itxamisbu anu hikia hatube tsauwabũ 15hanushũ Moisés keneni inũ Deusũ hãtxa yuishunikabũ kenenibu una anua yusĩkĩ hatu yui menetã habũ yusĩmisbu shanẽ ibubũ Paulo inũ Barnabé yuikĩ:

—Ẽ betsabuũ, mã hawa nuku yusĩtanũ ika huxiãmẽkaĩ? Nukunabube benimawakĩ ikis nuku yuirikãwẽ— hatu wa

16hanua Paulo benitã hau pesnũbũ hawẽ mekẽ sanãtã hatu yuikĩ:

—Israelbu inũ dasibi nawabu habu mã Deusũ kuxipaki mesemisbuũ, matu yuinũ nĩkakãwẽ. 17Habias Yavé Deusũ nukũ shenipabu katunishũ habiatũri Egito anu hatu iwenishũ nawabu keska hiwemakĩ harishũ hatu pahairawa hanu hiwekubainaibũ hanushũ hawẽ kuxipawẽri nawabu nematã ha mai anua hatu tsekabirãkĩ 18hanu tsua hiweabuma anu hatu iweimashũ iake iakemakĩ 40 ano nitxĩkĩ Deus bikawabiabu hawa hatu danãma hatu mekekubainikiaki. 19Hanushũ mai pakea betsa Canaã anu sete nawa shukua tibi hatu mebĩmakĩ hatu yamawamatã ha mai nukũ shenipabu ibuwani 20ha habu haska wakubirãkĩ 450 ano nitxiĩ bikanibukiaki.

Hau hatu merabewayunũ mekenikabu besti wakĩ Deusũ habu yunukubaĩmis hawẽ henea Deus hãtxashunika Samuelĩ hatu mekeriaya 21hanushũ habuã hau hatũ mai hirabi mekẽnũ huni hatũ shanẽ ibuhairawanũ ika Deus ea akaibũ Benjamimnẽ baba Quisĩ bake Saul Deusũ katushũ yunua shanẽ ibukĩ 40 ano nitxiãyã 22hanushũ Saulõ Deus ana pe txibãmawẽ taeshũ ana Deusũ merabewama hawẽ kuxipa mebĩtã hanushũ Jessẽ bake Davi hau ha mai hirabi shanẽ ibunũ, iwanã, kẽwãkĩ Deusũ yuikĩ: “Davĩ haska ẽ akatsi ikai akĩ ea benimawamistũ ẽ hãtxa txibãkĩ hatũ Israelbu pe mekekubaĩshanikiki”, hatu waniki. 23Haska yubakanishũ Davĩ bababu anua betsã Israelbu dasibi hau hatu merabewakĩ hatũ txakabu buashũtã mekeshanũ— iwanã —yuini natiã Deusũ Jesus yunuyamaki. 24Hanua Jesusũ hatu yusĩriamakẽ Naximanika Joãonẽ ha dukũtũ hawẽ kaka pepakiri Israelbu hatu yusĩkĩ yuikĩ: “Matũ xinã betsa watã Deuskiri mã txakabumis henerikãwẽ. Mã haskaya ẽ matu naximashanaii”, hatu wakubaini 25ma hawẽ daya menei kawãkĩ Joãonẽ ana hatu yuikĩ: “Ha matũ merabenã Deusũ yunushanai yuiniburã, ẽ, eamẽ mã ea xinaĩ? Ẽ hamaki. Hakia shanẽ ibu kuxipahairatũ ea binũa txipu hushanikiki. Haskawẽ taea earã, hawẽ tsumapã hawẽ daya ashũmis keska wakĩ ẽ hawẽ hawaumahairatũ eã merabewakĩ ẽ duawatirumaki, hawẽ bitxi tae meshpũ tsitaushũ ẽ pekashũtirumarã”, hatu waniki.

26Abraãonẽ bababũ enabu inũ dasibi nawabu mã Deusũ kuxipaki datemisbuũ, nukũ txakabuwẽ taeshũ hau Deusũ nuku kupiyamashanũ hawẽ bakekiri kakape nukunaki. Matu yuinũ nĩkakãwẽ. 27Huĩrukũti sábado tibitiã hanu itxamisbu anushũ Deusũ hãtxa yuishunikabũ kenenibu hatu yuimisbu inũ habuã hatu yuibiamisbũ hawa tapiãma Jerusalém anuabu inũ hatũ shanẽ ibubũ xinãkĩ hawa unãma Jesus hau tenãnũbũ, iwanã, danãnibuki, haska hawẽ hãtxa yuishunikabũ bebũkiri yuini keska wakĩ menekinã. 28Hanushũ hawawẽ taeshũ tenãtirubumabia haska watima hau tenãnũbũ Romano shanẽ ibu Pilatos yunuabu 29Pilatõs hawẽ soldadobu yunua haska bebũkiri hakiri kenenibu keska wakĩ cruzki mastashũ tenãbu hanushũ hawẽ yura butetã bushũ maiwanibuki. 30Hakia Jesus tenãxinabu Deusũ ana hiwemakĩ bestẽwãkẽ 31Jesus Galiléia anua kaya Jerusalém anu habe buimabu hatu uĩmai shaba itxapa hawẽtxaĩs Jesus hatuki nukukirãkiranaiwẽ taea ma hiwea unãtã habuã natiã Jesuskiri yurabu hatu yusĩkubaĩkanikiki.

32Na habias kaka pepa bexĩshũ nũ matu yuiairã, Deusũ nukũ shenipabu yubanirã, 33nuku ma ashuĩmaki, nũ hawẽ bababu anurã. Haska bebũkiri hawẽ xinãmati wakĩ shanẽ ibuhaira bena Deusũ katua tibi hau shanẽ ibui taenũ hawenabũ yunua hawẽ tsauti anu ainikubainibuki. Haska keskari wakĩ Deusũ hawẽ bake kayabi katua huni Salmos 2 anua yuiai keska wakĩ yuikĩ: “Mĩ ẽ bakerã, natiã ẽ hiwea mia inãkĩ ẽ mia yunuaii”, anirã, nuku ma ashuĩmaki. 34Deusũ ma bebũkiri yui txaniniwẽ taeshũ hawẽ yura txaputimawakĩ ana bestẽwaniki. Haska bebũkiri hawẽ hãtxawẽ pewakĩ yuikĩ: “Hawa kaneama Davi ẽ yubani keska txanima ẽ matu washanaii”. 35Haska inũ, Davĩ Salmos kene betsa anuri mã haya yuikĩ: “Mai anua hau hawẽ yura txapuyamanũ mĩ tsuma pepa abuhairakĩ mĩ heneama ishanaii”, abiani 36txanima Deusũ Davi yunua shanẽ ibukĩ hawenabu merabewakubaini atimas mawa maiwabu hawẽ shenipabuki nukutã hawẽ yura beniama txapuni natiã mã unaiĩ. 37Hakia Jesus mawa Deusũ bestẽwãtã hawẽ yura ana hawa txaputimawaniki— iwanã, 38-39—Enabuũ, Moisés nuku keneshuniwẽ nukũ txakabu buakĩ nukũ xinã xarabu pewatirumaki. Hakia Jesuswẽ taeshũ Deusũ hau matũ txakabu matu buashũshanũ unãkĩ ha txibãkãwẽ. Hanushũ tsuabũra Jesus habũ ikũwaĩbu Deusũ hatũ txakabu buashũkĩ hatu pepawakĩ keyushanikiki. 40Haska Deusũ hãtxa yuishunikabũ kenenibu keskai ibubis matũ txakabuwẽ mã Deus kupimatiruki. Uĩrakãwẽ, haska kenenibu keska wakĩ:

41‘Matunã, uĩrakãwẽ.

Deusũ atimaska betsa betsapa akubainikiri matuki txanibiaibũ nĩkabiakĩ

danaĩ Deuski kashei shetxakakĩ mã ikũwãkatsi ikamaki’,

atã nuku keneshunibuki— hatu watã

42hanua hanu judeubu itxamisbu hiwe anushũ hatu hãtxa menetã Paulo inũ Barnabé hatube kaĩbainaibũ Paulõ hãtxa ana nĩkakatsis ikĩ yurabũ yukakĩ: “Huĩrukũti sábado betsatiã hanu nũ itxamis anushũ habiaskari nuku ana yusĩshãwẽ”, akaibũ 43hanushũ judeubu itxapabu inũ nawabũ judeubũ beya txibãmis itxapabũri Jesuskiri kakape hãtxa ikũwãkĩ Paulo inũ Barnabé nĩkakubainaibu txĩtuãma hau pepawẽ Deus benimawakubaĩshanũbũ hatu yusĩnibukiaki.

44Hanua ana sábado betsatiã Jesuskiri kaka pepa hãtxa nĩkanũ ika ha mae ewapanua keyu bebiai hatiri niti ikabũ habu beabũ kakape nukũ Shanẽ Ibukiri nĩkaibũ 45hanua judeu shanẽ ibubũ haskaibu uĩkatsi ikama Paulõ hatu haska wai abuama haki sinatakĩ ha itxabu shabakabi hatu ha akĩ: “Txani txakakĩ matu paraĩkiki”, ikaibũ 46hanua Paulo inũ Barnabé hawa dateama dasibibũ nĩkaibũ judeu shanẽ ibubu haskaibu hatu kemakĩ:

—Deusũ kakape hawẽ bakekiri mã judeubu dukũ nũ matu yusĩ taewanũ Deusũ nuku yunukĩ nitxĩbiaimakẽ nũ matu yusĩaĩ nukũ yusĩa danãkĩ hawẽ pepai hiweibi hiweti mã bikakatsi ikabumaki. Mã haskaya matu henebaĩ nawabu judeubuma anu nũ hatu yusĩ kaii. 47Hamẽ bebũkiri nukukiri Yavé Deusũ Isaías hãtxamakĩ yuini nĩkakãwẽ:

‘Nawa betsa betsapa txaihaira hiweakeakeabu haskai hiwekuĩtirubu mĩ hatu yusĩkubaũshanũ mia yunukĩ ẽ mia bĩ keska waii, hau mĩ hãtxa shabakabi mai hirabi anushũ nĩkashanũbunã’,

akaya Isaíasĩ nĩkatã nuku keneshuniki— hatu wa

48hanushũ hatu haska wai nĩkatã judeubumã nĩkai xinã txãkaĩ benimakĩ yuikĩ:

—Deusũ kakape pehairaki— ikaibu dasibi habu Deusũ katushũ hiwekuĩa hatu inãshanai habuã Jesus ikũwãnibukiaki. 49Haskabiaibũ Deusũ hãtxa nukũ Shanẽ Ibukiri ha mai pakea anu nati ikĩ hatu yusĩkubainaibũ 50Paulo inũ Barnabẽ hãtxa judeu shanẽ ibubũ danãkĩ hau hatu nitxĩnũbũ, iwanã, aĩbuaibu pepa inũ huni shanẽ ibubu hatunabubetã txani txakakĩ hatu sinatamatã hanushũ Paulo inũ Barnabé hatũ mai pakea anua hatu putamaibũ 51hatu haska wabu Paulo inũ Barnabẽ hau hawa unãma habiaskasi hiwekubaĩshanũbũ hatu unãti wakĩ Antioquia anuabuki hatũ bitxi tae pekatã hatuki mai mixpu tabaini mae betsa hawẽ kena Icônio anu bunibukiaki. 52Hakia habũ Jesus ikũwaĩbu Antioquia anuabu Deusũ Yushĩ Pepatũ hatu merabewaya benimahairakubainibukiaki.

Currently Selected:

Atos 13: cbsBR

Highlight

Copy