Atos 14

Paulo inũ Barnabé Icônio anushũ hatu yusĩnibukiaki, na hãtxarã

1Icônio anu Paulo inũ Barnabé buxiã hanu judeubu itxamisbu anu hatube hikitã Jesus mekenã bestikiri shabakabi haska nĩkaisbuma hatu pe yusĩkĩ meshtãmaibũ judeubu itxapabu inũ judeubuma itxapabũri nĩkakĩ ikũwaĩbũ 2hanushũ ha judeu betsabũ hatũ hãtxa danãkĩ nawabuki txani txakakĩ Jesus ikũwaĩbuki xinã txakakĩ hatukiri txakabu yuibaunaibũ 3hatu haska wabiabu Jesusũ kuxipayabu Paulo inũ Barnabé habube shaba itxapa hiweyushũ nukũ Shanẽ Ibuki txiti itã hawa dateama Jesuskiri txani txakama hawẽ hãtxawẽ hatu ashũkĩ haska Deus nuikipakiri txanikĩ hatu unãmaya, hanushũ Deusũ hatu merabewakĩ kuxipa wakĩ dami atimaska betsa betsapa hatu ashũkĩ uĩmaya 4Icônio anu hiweabu yurabu pashkatã hatiritũ judeubũ hãtxa nĩkakĩ Jesusũ kuxipayabu Paulo inũ Barnabé danaĩbũ betsabu hatiritũri habũ hatu nĩkakĩ ikũwaĩbũ 5hanua nawabu inũ judeubu mae shanẽ ibubube hatube yubakatã nuitapawakĩ itxakawakĩ mãkãwẽ hatu tsakanũ ikaibu 6hanushũ Paulo inũ Barnabẽ banabitã pashai mae Listra inũ Derbe inũ mae betsa betsapa Licaônia mai pakea anu bushũ 7harishũri Deusũ hãtxa kakape hawẽ bake Jesuskiri hatu yusĩriaibũ

Listra anushũ mãkãwẽ Paulo tsakanibukiaki, na hãtxarã

8ha mae Listra anu huni betsa tae dabe txakabu habiaska kaĩni hawa haska nisma tsaushũ 9Paulõ yusĩaĩ nĩkahairaya: “Ha hunĩ ikũwãyã ẽ kaya watiruki”, ikĩ hawẽ xinã uĩhairatã 10Paulõ hui kuxipawẽ yuikĩ:

—Ha mĩ tae mĩ habiaska kaĩnirã, beniriwe— aka

ha huni dashka iki ixtxutã ti itã nikaunaya 11yurã kaiãnẽ Paulõ haska wai uĩkĩ kẽwaĩ hatũ Licaônia hãtxa kuxipawẽ yuinamei:

—Nai anua na yushĩ dabe hunikirã nuku anu damitã butuxinabuki. Pehairaki— ikĩ

12Barnabé metukĩ yuikĩ:

—Harã, nukũ mekenika yushĩ Júpiterki— akĩ Paulo meturiakĩ: —Ha hatũ nuku hãtxa wairã, nukũ mekenika yushĩ Mercúrioki— akaibũ 13ha Júpiterbe hawenabu hãtxashunikatũ hawẽ kẽwãti hiwe mae hikiti anua ina awa bene dabe huawẽ dauwabu beshũ hawenabubetã Paulo inũ Barnabé ha yushĩ dabe kẽwãkĩ benimawanũ, iwanã, detetã kuakĩ hawẽ kẽwãnũ ikaibũ 14haska washunaibu uĩkĩ tapĩtã ha Jesusũ kuxipaya dabetã yurabu hatu kẽwãmakatsi ikama hatũ tari uxnitã yurabu naxui ikaĩ nemakĩ hui kuxipawẽ Gregõ hãtxawẽ hatu yuikĩ:

15—Hunibuũ, hawakĩ mã nuku haska wai? Nuku haska wayamakãwẽ. Nukurã, matu keskari nũ habias huniki. Ha yushĩ dabe mã kẽwãmistũ matu hawa washũtirumaki. Haskawẽ taeshũ mã kẽwãmis henetã Deus hiweatũ nai inũ, mai hirabi inũ, iãnẽwã dasibi inũ, hanu hiweabu dasibi damiwani matũ xinã betsa watã mã kẽwãkubaĩshanũbũ hakiri hawẽ bakekiri kakape matu yusĩtanũ ika nũ huxiãki. 16Ũ unu bari betsatiã mai hirabi anu yura betsa betsapabũ hatũ xinãnẽs hawara txibãkubainaibu Deusũ hatu beruwẽs uĩyukubaĩbiakĩ 17hawa matu heneama haska pepawamiswẽ shabakabi naiuria ui matu imashũkĩ mibã mã banaima matu pe benemashũkĩ mã piaibu matu yaniwamakĩ betsa betsapawẽ matu benimawakubaĩmiski. Haskawẽ taeshũ Deus hiwea besti kẽwãkubaĩkãwẽ— iwanã, 18hatu haska wabia nĩkamas ina awa bene deteshũ yushĩ dabe benimawati kuashũyupanãbũ betsa betsa wakĩ hatu beshteaibũ

19ha hatu haska waibũ judeubu Antioquia anua inũ Icônio anuabu beshũ Paulo inũ Barnabékiri txani txakakĩ yurabu parãkĩ hatu xinã betsa wamatã hatu itimaska wamabaũkĩ Paulo besti betxishũ mãkãwẽ tsaka tsaka akabu Paulo di ikaya: “Ma mawaki”, ishũ txaka urẽmisbu anu sharabaĩ urẽtanabu dakakẽ 20hanua ikũwaĩbu itxashũ Paulo kebaũshũ uĩaĩbũ Paulo besteĩ benitã hune ha mae anu hikia habianu ushaxini hanua bestẽtã Barnabébe mae betsa Derbe anu kashũ

21harishũri Deusũ hãtxa hawẽ bakekiri kakape hatu yusĩa hanushũ Derbe anushũ hatũ hãtxa abukĩ itxapabũ nĩkakĩ ikũwaĩbũ haria txĩtũkirani Listra inũ, Icônio inũ, Antioquia anu bekubirãkĩ 22mae tibi anushũ hau habũ hatu yusĩshanũbũ ikũwaĩbu yusĩkĩ hatu mestẽwãkĩ yuikĩ:

—Eskaki, nĩkakãwẽ. Deus shanẽ ibuaiki nũ dasishanaibu nuku itxakawakubaĩshãkanikiki. Habiaskaki. Habiaskabiakẽ hawa datei txĩtuãma Jesus ikũwãpakeshãkãwẽ— akĩ menetã 23hanu ikũwaĩbu itxamisbu tibi anua mekenikabu hatu katutã hatube samakekĩ Deus dayuikĩ habũ Jesus ikũwaĩbu hau nukũ Shanẽ Ibu Jesusũ hatu merabewakubaĩshanũ Paulo inũ Barnabẽ kuxipa hatu yukashũkubiranibukiaki.

Paulo inũ Barnabé mae ewapa Antioquia mai pakea Síria anu ana txĩtũbiranibukiaki, na hãtxarã

24Hanua bei mai pakea betsa Pisídia kapukebirani mai pakea betsa Panfília anu hikixĩshũ 25hanushũ mae betsa Perge anushũ Jesuskiri kakape hatu yusĩtã hanua mae betsa Atália anu hikixina 26hanua Antioquia anushũ hau yusĩtanũbũ Deus hatuwẽ nuiai anu hari hatu yunuimabu anu bukubaũkĩ Jesuskiri hatu yusĩkubaũtani menebirani hanua niwe shashuki nanetã Antioquia anu txĩtũbirani 27keti itã mapekexinabũ hanushũri Jesus ikũwaĩbube itxashũ bukubauni haskatãxinabu inũ habu judeubumã hau habũri Jesus ikũwanũbũ natiã Deusũ hatu kenaya shabakabi haska hatu yusĩkubaũtãxinabu dasibi hatuki txanitã 28habianu hatube baxikuyuima Paulo inũ Barnabé ushe itxapa ikũwaĩbu hatu yusĩ hiweyuaibũ

Currently Selected:

Atos 14: cbsBR

Highlight

Copy