Atos 15

Yusĩa betsa betsapa husiaibu pewai Jerusalém anu Jesusũ kuxipayabu itxanibukiaki, na hãtxarã

1habiatiãri habũ Jesus ikũwaĩ judeubu betsa Moisés yusĩa txibãkĩ abuhairamisbu Judéia anua Antioquia anu buxĩshũ Jesus ikũwaĩbu habũri hatu yusĩkĩ: “Judeubumã tsuabũra mã nukubetã Jesus ikũwaĩburã, Moisés nuku yununi beya habũ hina kubitxi biabumarã, Deusũ hatu meketirumaki”, iki hatukiri hãtxaibũ 2hanushũ Paulo inũ Barnabẽ haska hatu yusĩaĩbu danaĩ hatube yuinamei ha itxakayamai itimaskaibũ haska abuama atimas ikũwaĩbu itxatã Paulo inũ Barnabé inũ ikũwaĩ betsabu katushũ hau haska yusĩa husiaibu pewakĩ Jesusũ kuxipaya betsabu inũ mekenikabu Jerusalém anuabubetã pewai hau hatube hãtxatanũbũ hatu yunukĩ 3nitxiãbu bui Fenícia mai pakea inũ Samaria mai pakeakiri bukĩ judeubumã haska hatũ xinã txakabu henetã Jesus txibãxinabukiri hatuki txanikubainaibũ mae tibi anushũ ikũwaĩbũ haska waxinabukiri habũ kaka nĩkai benimatxakayamakubainaibũ

4hanua Paulo inũ Barnabé inũ hatube buaibu Jerusalém anu hikiabu Jesusũ kuxipayabu inũ, mekenikabu inũ, dasibi Jesus ikũwaĩbu betsabũ hatu i pewatã hatube itxabu Deusũ hatu merabewaya judeubuma Jesuskiri hatu yusĩayã habũri ikũwãkubaĩxinabukiri Paulo inũ Barnabébe hatuki txaniaibũ 5hatu haska yuiaibũ judeu shuku betsa fariseubũ Moisés hãtxa txibãhairabiamisbũ ma hatiribũ Jesus ikũwãkĩ txibaĩbu betsa benikawã hatu yuikĩ:

—Mã haskakiri hatu yuiairã, nawabu Jesus mã hatu ikũwãmaiburã, haska Deusũ Abraão yununi keska hau hatũ hina kubitxi binũbũ hatu yunukãwẽ. Ha inũ, Moisés nukũ shenipabu yununi beya hau txibãrianũbũ hatu yunuriakubaĩkãwẽ— hatu wa

6haskai nĩkatã ha beyakiri hatu husimapaiabu ha unãnepabu Jesusũ kuxipayabu inũ mekenikabu besti pewanũ ika ana itxatã 7haikaimas xinã betsa betsapaibu Simão Pedrõ hatu nĩka keyutã atimas hari benitã hatu yuikĩ:

—Ẽ betsabu inũ ẽ puibuũ, Deusũ kakape hawẽ bake Jesuskiri judeubumãri hau ikũwanũbũ matu anua Deusũ ea katushũ ea yunushũ ea hatu yusĩmayama mã unaiĩ. 8Ha Romano shanẽ ibu Cornéliõ hiwe anushũ ẽ hatu yusĩayã habũ Jesus ikũwaĩbu Deusũ dasibi nukũ xinã unãmistũ ha judeubumari hawenabu wakĩ ikũwãmakĩ nuku keskari wakĩ kuxipa wakĩ hawẽ Yushĩ Pepa hatu inãkĩ hatu atximayamaki. 9Nukunã, nũ Jesus ikũwaĩbu Deusũ nukũ huĩti pepawamis keska wakĩ habũri Jesus ikũwaĩbu Deusũ hawa hatu danãma hawa nuku pashkakĩ betsa wama habiaskas xinã hatube nuku waikiki. 10Haskawẽ taeshũ ha Moisés nukũ shenipabu yusĩni beya habũ txibãtiruma ipaunibuki. Habiaskari nũ Israelbũ nũ txibãtirubumariki. Haskakĩ Deusũ hatu haska wamabiakẽ matu Deus keskakĩ judeubumã Jesus ikũwaĩbu mã hatu yunuai? Hatu haska wayamakãwẽ. 11Natiã nuku inũ habukiri xinãnanãkãwẽ. Nukubũ nũ ikũwaĩ mekea hayarã, hawama hamẽhaira nũ ikanaii. Haska keskari wakĩ habu judeubumari habias nũ ikai keskari wakĩ nukũ Shanẽ Ibu Jesusũ habu duawaikiki, hawẽ pepawenã— hatu wa

12hanua dasibibũ haska nĩkai pes nesei keyutã ana hawa yui hãtxabumakẽ hanushũ Barnabé inũ Paulo Deusũ hatu merabewaya judeubuma anushũ dami atimaska betsa betsapa hatu uĩmakubainimakiri hatu yuikĩ 13meneaya Jesusũ betsa Tiagõ itxabu hãtsiri hatu yuikĩ:

—Ẽ betsabu inũ ẽ puibuũ, eãri matu yuinũ nĩkakãwẽ. 14Jesus ikũwaĩbu Deusũ hawenabu hatu wariakĩ merabewani hau nukube ikubaĩshanũbũ haska bebũkiri tatesmakĩ Deusũ judeubumari katuyama Simãonẽ ma nuku yuishuki. 15Eãnã, habiaskari bebũkiri Deusũ hãtxa yuishunikabũ kenenibu ẽ haska xinaiĩ, Deusũ hãtxa haska yuiairã:

16‘Israelbu kupitã ana hushũ

Davi shanẽ ibu ini keska wakĩ

hawẽ baba betsa merabewakĩ kuxipa wakĩ

ha hiwe di ini keskabu ẽ ana hatu benishanaii.

17Ẽ hatu haska waya nawa shukuabu tibibu inũ

tsuabũra ẽ Yavé Deusũ kenayabũ ea yukai habũ ea benatirubuki.

18Haska bebũkirihaira ẽ Yavé Deus hãtxakĩ hatu yubairã,

txanima ẽ hatu ashunũbariaii’,

ikai nĩkatã nuku keneshuniki— iwanã

19—Haskawẽ taeshũ nũ xinãnũbũ matu yuinũ nĩkakãwẽ. Judeubumã hatũ xinã txakabu henetã Jesus ikũwãkĩ Deus txibaĩbu haska nũ judeubu nukũ beya txibaĩ nũ hiwemis yunukĩ hatu bikawayamanãkãwẽ. 20-21Hakia bari itxapa ma hari judeubu judeubumã mae tibi anushũ huĩrukũti tibitiã haska Moisés hatu keneshuni hatu yusĩ hatube beyamisbuwẽ taeshũ hau judeubumã judeubu hawaira hau berabĩ dabeyamanũbũ na besti nemakĩ hatu keneshunãkãwẽ, eska besti hatu beshtekinã. Yushĩ dami betsa kẽwãkĩ nami inãmisbu hau piyamanũbũ inũ, habu aĩyãkinã, haska Moisés hatu nemani hau txibanũbũ inũ, yuinaka teneshabu mawa hau piyamanũ inũ, yuinaka himi hau ayamanũbũ haska besti hatu nemakĩ keneshũ judeubuma dasibi anu bumanãkãwẽ— hatu wa

Judeubuma yusĩkĩ hatu bikawaibukiri hatu kene bumanibukiaki, na hãtxarã

22hanushũ Jesusũ kuxipayabu inũ mekenikabu inũ ikũwaĩ dasibibũ Tiagõ hãtxa nĩkakĩ abutã Antioquia anu Paulo inũ Barnabébe hau butanũbũ habubetã ikũwaĩbu anua huni dabe unãnepa Judas hawẽ kena betsa Barsabás inũ Silas katutã

23hatu bumakatsi hatu keneshũkĩ:

“Nũ Jesusũ kuxipayabu inũ mekenikabu nũ matubetã ikũwaĩbunã, nũ matu kene bumai uĩkĩ nĩkashãkãwẽ. Judeubuma mã Antioquia mae ewapanu hiweabu inũ, Síria inũ, Cilícia mai pakea anu hiweabũ nukubetã Jesus mã ikũwaĩbu nũ matu xinaiĩ. 24Haskakẽ nenuari nukunabu nũ hatu yunuamabia buimashũ hatũ beyakiri matu yusĩkĩ matu itimaska waibu nũ nĩkaxinaki. 25Haskawẽ taeshũ nukũ nũ matu merabewanũ ishũ habias xinã itxawatã nukubũ nũ xinã pekẽ hau habũri haskakiri matu merabewashanũbũ ishũ nuku anuari huni dabe katutã nukũ haibu Barnabé inũ Paulobe nũ habube nitxiaiĩ. 26Nukũ haibu Barnabé inũ Paulõ hatũ hiwea yauxiama bikahaira mesebiakẽ nukũ Shanẽ Ibu Jesus Cristo dayashũkĩ yusĩkubaĩmis mã unaiĩ. 27Habu nũ matu anu yunuai haska nũ matukiri xinaĩ Judas inũ Silas hikitã matu shabakabi yusĩ pewashãkanikiki. 28Hakia haska mã judeubumãri Jesus ikũwaĩ unãnuma mã hiwenũbũ Deusũ Yushĩ Pepatũ nuku xinãmaya ana nukũ beyakiri hawa betsa matu yunuama na besti nũ matu nemai nĩkakãwẽ, mã judeubube berabinãrabeyamanũbunã. 29Yushĩ dami betsa kẽwãkĩ nami inãmisbu ana piyamakubaĩshãkãwẽ. Ha inũ, yuinaka teneshabu piyamariashãkãwẽ. Ha inũ, yuinaka himi ayamariashãkãwẽ. Ha inũ, aĩyãkinã, haska Moisés nuku nemani ha txibãriakubaĩshãkãwẽ. Haska besti mã mekearã, hawa txakabuma mã pe besti hiweshãkanaii. Hau Deusũ matu pe mekekubainũwẽ”,

hatu washũtã

30habu butanũbũ keneya hatu nitxĩkĩ yunu pewabu Antioquia anu hikixĩshũ ikũwaĩbu itxawashũ kene hatu inãbu

31hanushũ ikũwaĩbũ ha kene bitã yui hatuwẽ nuikĩ hatu daewaibu nĩkai benimaibũ

32Jesusũ kuxipayakĩ Judas inũ Silasĩ Deusũ hãtxa pe hatu meshtamamiswẽ taeshũ ikũwaĩbu hatu merabewakĩ hatu benimawaya ikũwaĩbũ habũ hãtxa abuhairaibũ 33hanushũ hau hatu yusĩyunũbũ ushe itxapama baximashũ ma buaibũ ha habũ hatu yunuimabu anu habu hiwei peabu hau hatu yuitanũbũ, iwanã, unãnuma hau butanũbũ hatu nitxiã buaibũ

34-35hanua Paulo inũ Barnabé Antioquia anua ana kama niti iki baxikuyuimashũ ikũwaĩbu betsabubetã kakape Jesuskiri yurã kaiã hatu yusĩpakekubainibukiaki.

Paulo Barnabébe kũyã irabetã pashkabainibukiaki, na hãtxarã

36Hanua Antioquia anu usha itxapa Paulo hiweyukĩ Barnabéki txanikĩ:

—Hanu Jesuskiri nũ yusĩkubaũtanima anu ikũwaĩbu haskaramẽkaĩ ana hatu uĩkubainãwẽ— aka

37Barnabẽ kemakĩ:

—Kakinã, João Marcos nũ ana iyutirumẽ?— aka

38bebũkiri hatubetã yusĩ ka Panfília anushũ hatu shunũbirãkĩ henebiranimawẽ taeshũ Paulõ ana iyukatsi ikamakẽ

39hanua hawẽ taea iyunũ ika habe kũyã irabetã pashkai henenamerabetã Barnabẽ Marcos iyui Chipre anu niwe shashuwẽ inatã kaya

40haska wabainaya Paulõ hawena meribis xinãtã Silas iyukatsis ikĩ katutã ikũwaĩbuki txaniaya habũ yuikĩ:

—Mã haska kainairã, peki. Mã hatu yusĩ kaya nukũ Shanẽ Ibu matuwẽ nuikĩ hau matu merabewakubainũwẽ— akĩ hatu nitxĩkĩ yunuabu hanua kaĩbaini maĩ bui 41Síria inũ Cilícia mai pakea kapukekubaĩkĩ Jesus ikũwaĩbu itxati hiwe tibi anushũ hatu yusĩkĩ hatu benimawakubauni kai

Currently Selected:

Atos 15: cbsBR

Highlight

Copy