San Marcos 7

1Pa lhechesh pa nachey japi fariseos shi' japi vanqu'eyjatsjanesh pava lhfanishlhavach japin tôlhey ja Jerusalén. 2Japi lhech yivanesh japi napu' Jesús t'eyjatsjanjas ti ninvôômcôc'ôya ti tsaccunch'e pa yiyôytanesh ts'ivee. 3(Lhayaash ti tayôjijanesh japi fariseos shi' lhacôm'a japi judíos ca nivôômcôc'oya ca natsaccuntajch'een, lhech t'ônashem papi vatjutsa' judíos. 4Meelh ti tapequ'in ti tôlhey pa vatcasha'vat, nilhayishlhaa ca natsaccunch'e tatsha, vooy ti yijutsjat ti vômcôc'oya. Pa nôque pav'elhcha lhanyôjijatesesh ts'ivee ca lhfanisheesh, lhech lha lhjunashesh shta pava t'iyôjatshiyis, pava lhôjquey shi' pant'ajôôj pav'elh yichenesh ts'ivee yijutsjat ti yicleshesh pa yinôôt jaspa yichenesh.) 5Pa niyôsesh japi fariseos shi' japi vanqu'eyjatsjanesh pava lhfanishlhavach ja Jesús pa yit'esh:

—¿Ta lhayaash ti nint'ujanesh napi eyjatsjanjas cava niyôjitajeshjooy papi p'alha' catsinavot, lhan'e pa ninvôômcôc'oya ts'ivee lhpa yucuve ti tuj?

6Pa yicuulh ja Jesús pa yit'esh:

—Yivo'yesh'ôcji ti lhech t'ônashesh pa chiytôyjata pava ti vaclan lhey Isaías, ti yit'eshelh'a ajôts'ôclônjanjaselh avaatsheelh. Meelh ti yi'sesh'e cavôque lhclishay:

Papuque nivacle vooy pava lhashic tsôclôjesh,

lhan'e pava lhcachic toseyyic'oya.

7Chalheesh ti tsôclôjtajesh,

ti vanqu'eyjatsjanesh cava lhayôjijates

napi nivacle,

nintôlh'yi ca yiyôjijatesa.#7.6-7 Is 29.13.

8Lhayaash ti lhavôômjelhjop avaatsheelh cava lhayôjijates ja Dios, pa nequetsen ti lhenelh cava lhayôjijates napi nivacle ti lht'ujaneshelh: nan lhjunash ti chiycleshch'e pava tnôjquey shi' pava t'iyôjatshiyis shi' pav'elh matas lhech afanisheshelh.

9Pa yit'esha ja Jesús:

—Naavôômjelh nava anyôjijateselh ti t'ashjateshelh apee cava Dios lhayôjijates. 10Eem ti yit'esh ca Moisés: ‘Ya aj ca atsopeesh pa atata shi' lhpa amimi', lhan'e ‘Papu yapun pa lhtata shi' lhpa lhamimi’, lhech pa chiyclôn jayu’.*xc* *xd* 11Lhan'e avaatsheelh pa lhteetshelha ca nitajulhelhey'am ti yit'esha pa nich'ayech pa lhtata shi' lhpa lhamimi: ‘Tanca qu'efeneshelh, lhayaash ti lhacôm'a pava caaj ti chiyit'esha corbán’ (côque ya'clish nôque yich'e': “chitisesh pa Dios ti t'ajuytajelh'a”). 12Lhteetshelha papu ti lhech lhfanishlhavach ca nisuyeeshi t'ôyish'e ca nefen pa lhtata shi' lhpa lhamimi. 13Nôque lhjunash ti navômjateshelh cava Dios lhayôjijates, tôlh'ejop cava lhasnatshelh anyôjijateselh. Pa acloj pav'elh ti lhech afanisheshelh. #7.10 Ex 20.12; Dt 5.16.,#7.10 Ex 21.17; Lv 20.9.

14Meelh ti tôney'in japi nivacle pa yit'esha:

—Ach'anshelhyi jum, avôntôyitelhch'e shta: 15Nilhecha pa ti tim pa nivacle ca nisasiyan. Vooy pa ti tôlhshaam pa vatacachi lhech lhavaatsha ti yisasiyan. 16Avaatsheelh ca nicaajtajelh'am pava acfeyelh, pa ach'anelhch'e cavôque.

17Meelh ti tayjop ts'ivee japi nivacle pa yamey ja lhajpôyich, pa lhechesh ti niyôsesh japi t'eyjatsjanjas pan yovalheyjop atesha. 18Pa yit'esh ti yicuulh:

—¿Mônlheesh ti ninatô'yelhc'oya vitsha? ¿Na aychavalhelhch'e natane pa ti tôôlhfach'ee ti yitshaam pa nivacle ti tanca nisasiyan, 19lhayaash ti tanca nôcjaam pa lhcachi', vooy lhpa lhavts'e' yitshaam pa nashch'e pa lhavaac pan t'ajuyey pa vatshae pa ti chiyvôôm?

Nôque lhjunash ti chiyit'esha lhacôm'a pa vatôc ti isshi. 20Pa yit'esh:

Vooy pa ti tôlhshaam pa lhcachi' pa nivacle, lhech ti yisasiyan lhavaatsha. 21Eem ti tôlhshaam pa vatacachi' pa vataychavalhjayash niysa', nan lhjunash pa vatvômcavômjayash, shi' pa vatcunjatayash, shi' pa vatvôncaclônjayash, 22shi' pa vatcutsjayash, shi' pa nivatfunchayasha, shi' pa nivatôyiyasha, shi' pa nivatvôncatôyjayasha, shi' pa vatcuts'aji, shi' pa vatvancajuctsenjayash, shi' pa vachayjayash, shi' pa vataanvacleyash, shi' pa vatcamenjayashesh pa vatjôtsôclônjayash. 23Cavôque lhacôm'a tôlhshaam papu ti namjateshfach'ee, lhech lhavaatsha ti yisasiyan pa nivacle.

Pa nilhcacujayasha lhpa nivacche nijudioche'a

(Mt 15.21-28)

24Pa lhech tôlh'e ti yichvatich'e, t'ajuyey ja cotsjaat yie' java yitsates ve'lha ja lhey Tiro, vooy jaelh Sidón. Pa yitsavalhey ja ve'lha jpôyich, ninteetajesh ca chintô'ya ti lhech yie', taj ti chitô'ya tatsha. 25Yitô'ya tatsha lhja ôcjeclô, lhjô lhech caaj lhpa lhôse lhjô lhech yi'shi' pa tsich'e'. Lhjô lhech yichey ja Jesús pa t'acjatsuy'e t'ajuyish. 26Lhjô lhech ôcjeclô sirofenicia lhavoque. Pa vatants'aclansha ja Jesús ca nayjatemshi pa tsich'e' lhja lhôse. 27Lhan'e ja Jesús yit'esha:

—Ajutsjatelh cum napi vatacles ca nape'sha'ne, lhayaash ti nintajulhtajey ca chinanjôclesh napi vatacles lhpa yucuve ca chinjutey nava nuu lhcles.

28Yicuulh vitsha pa yit'esh:

—Yijô, yinvacle; ninyôytanesh nava nuu lhcles ti yich'ôcjic'oya pa vatsaccunjavat ti yovalheshc'oya napi vatacles pava lhca't'iyas ti tujqu'e'.

29Pa yit'esha ja Jesús ti yicuulh lhja ôcjeclô:

—Tajulhey ca lhteesh; meey lhpa ôse ti tayshi ja tsich'e'.

30Pa yijô t'emnajô, meelh ti yamey lhja ôcjeclô pa lhajpôyich, pa yi'van lhpa lhôse ti yijô'apee pa lhmôjôvat ti p'alha ti tayshi pa tsich'e'.

Pa Jesús yivatsjanchat pa clishaclayech, peeychelhôjesh shta

31Meelh ti tay'e ja Tiro pa nash'e atesha ja Sidón ti t'ajuyey ja lhjôvcha, lhey Galilea, nacheyjop ja cotsjaat Decápolis. 32Lhech chinchajey'e ja peeychelhôj, clishaclayech'esh shta. Japi lhech vatants'aclanema ja Jesús ca nan'apee java lhpôcôtôy. 33Pa t'acum'e ja Jesús jô lhech peeychelhôj pa yeclôteshc'oya japi nivacle. Meelh ti vi'sesh lhavach pa t'ajayeshch'e lhacfey lhja lhpasche pa tiqu'in'esh shta ti t'ach'iy'ejop lhja lhpasche pa t'ajayesheyshi ja t'ach'aclech. 34Pa yovalhesheychisham na vôôs ti t'aalh ts'am pa yit'esh:

—¡Efata!—, côque yich'e': ¡Atatc'atsham!

35Pa tatsha ti tpeeyche'yesh java lhacfey shi' ja t'ach'aclech pa isjop shta ti yivo'yeshch'e ti tasinôy. 36Ja Jesús yeetajeshem cum ca ya aj ca nanfacleem papu; pa yijô' pa vanc'ôyitesh'in ti nifaqu'in tanyôjijaytajesh ca ya aj ca nanfac. 37Uj ti tamp'oyeshem pa yit'eshvatsham'in:

—“Is jum ca lhfanishlhavach. ¡Yipeeycheyansha'ne japi peeychelhôs, yasinôyansha'ne japi clishaclayjes!”

Pa Jesús yicunjansha'ne papi cuatro mil nivacle

(Mt 15.32-39)

Currently Selected:

San Marcos 7: NIVA

Highlight

Copy