San Marcos 8

1Pa lhech t'aplhuqu'e ti tc'a'vane shta japi aclôj nivacle pa ampa ca nituj ts'ivee. Pa tôney ja Jesús japi t'eyjatsjanjas pa yit'esh:

2—Jaycavts'aclayesh jum napuque nivacle, lhayaash ti lhapa pu'jana nalhus ti yi'yijop ts'ivee, vatclôyitesha'ne pa lhayipcu. 3Ca niycunjantajasha'ne lhôn ca yichenesh'in pa lhayipcun, pa tanca nit'untajjulh ts'ivee, pa na ca nancôôtaj'ech'esha'ne, lhayaash ti caaj napi tosc'oyaan.

4Yicuulh japi t'eyjatsjanjas pa yit'esh:

—¿Ta ca nitôôlhshi lhpa yucuve ca chincunjanesh? Lhayaash ti ampapu ca nôv'e' na shtanam'e.

5Pa niyôsesh ja Jesús japi t'eyjatsjanjas:

—¿Ta t'ajôôj pava acôselh yucuvec?

Pa yit'esh ts'ivee:

—Napu'yama.

6Pa yiyôjaa japi nivacle ca nôvqu'esha'ne, pa t'acum'e java napu'yama yucuvec pa yijutey pa t'ishamiesha pa Dios. Pa nôcôsshisha'ne pa yijutey japi t'eyjatsjanjas, ca nitiseshch'e japi nivacle. 7Pa Nôque yie' shita java napu' sajech lhcles, pa t'acum'e pa t'alh'apee pa yiyôjiesha ca nitiseshch'e shta japi nivacle. 8Japi lhech tsaccunch'e yape'sha'ne lhacôm'a. Pa chintôqu'e' cava lhcat'iyas pa yanch'e' java napu'yama sisenlhiy. 9Yichatjulhsham mil pa t'ajôôjjam japi nivacle ti tsaccunch'e. Japi lhech yichen'in nôqueesh. 10Pa lhech t'aplhuqu'e ti yieelhshi japi t'eyjatsjanjas lhja lhôvjatshi, pa yamey ts'ivee ja cotsjaat Dalmanuta.

Papi fariseos t'aalhsha pa Jesús ca nitônôclitshem pava nimatasa papu ca nitô'yish

(Mt 16.1-4; Lc 12.54-56)

11Lhechesh pa nachey japi fariseos pa yic'alhtantajesha ca ninôclitem pan lhjunash ti yiey pa vôôs, pa naashelhvanôcji ja Jesús.*xe* 12Pa lhech t'aplhuqu'e ti yu'joplhayalh ja Jesús pa yit'esh:#8.11 Mt 12.38; Lc 11.16.,#8.12 Mt 12.39; Lc 11.29.

—¿Ta t'e lhayaash ti t'aalhtajeshyi napuque nivacle pava nimatasa papu ca nitô'yish? Yijô' ti jayeetshelh'a, napuque nivacle tan pa cat'elheesh ca chinôclitem pava nimatasa papu ca nitô'yish.

13Pa tayjop ja Jesús capuque pa yichey lhja lhôvjatshi ti yishi ts'ivee, pa yichenshey pacham shta ja lhjôvcha.

Pa yicap'ofiyanshi lhpa yucuve, yitsôt'ajesh papi fariseos

(Mt 16.5-12)

14Japi t'eyjatsjanjas nitôvaclee ca nichaaj pava yucuvec, pa t'eshey ti ve'lha lhja yucuve ti yieyshi lhja lhôvjatshi. 15Pa yiyôjaa ja Jesús pa yit'esh:

—A'va, anujumatsenelhjulh japi fariseos pa yijuyjata lhpa yucuve ti yicap'ofiyanshi, shi' pa yitsôt'ajesh ja Herodes.#8.15 Lc 12.1.

16Pa tasinôych'e ts'am japi t'eyjatsjanjas pa yit'esh:

—Jaspa lhech t'ônash t'ejum, lhayaash ti nishtanchaaj pava yucuvec.

17Lhan'e ja Jesús yitôyc'oya tatsha pa yit'esha:

—¿Ta t'e lhayaash ti naashanaeshelha ti naanchajeelh java yucuvec? ¿Jôjjeclay na t'ôyiy na acajôyshayelh ca natô'yelhc'oya? ¿Mônlheesh shta ti ninôcjaam nava acachi'clelh? 18¿Caaj aven nava atôsjeyelh ti naavanchayeshelh, caaj aven shta nava acfeyelh ca apeeycheyeshelh? ¿Na aychavalhelhch'e natane?*xh* 19Ti jacunjanesh java ve'lhanôjesh yucuvec japi ve'lhanôjesh mil nivacle, ¿ta jôque t'ajôôj java sisenlhiy tapoojqu'esha'ne cava yucuvec t'iyas? #8.18 Jer 5.21; Ez 12.2; Mt 4.12.

Pa yicuulh ts'ivee pa yit'esh:

—Doce.

20—Shi' shita ti jacunjanesh cava napu'yama yucuvec japi yichatjulh mil nivacle, ¿ta jôque t'ajôôj java sisenlhiy tapoojqu'esha'ne cava yucuve t'iyas?

Pa yicuulh ts'ivee pa yit'esh:

—Napu'yama.

21Pa yiyôjeeshaan shta ja Jesús japi t'eyjatsjanjas pa yit'esh:

—¿Jôjjeclay na t'ôyiy ninatôyelhc'oya cavôque?

Pa Jesús yovalhjat'in pa tacluuc yiey pa Betsaida

22Pa yamey ts'ivee ja Betsaida; pa lhech chinchajey'e ja tacluuc, pa t'aalhsha ts'ivee ja Jesús ca natpacuna atesha. 23Pa t'acum'e t'ituuc ja Jesús ja tacluuc pa yitojonesh pa yônjatshi atesha ja yitsaat. Pa lhech yiesh'e ti yip'aclanesh'apee java lhtôsjey pa t'a'ch'i, pa t'ajayesha shta java lhpôcôtôy pa niyôs pa yit'esh:

—¿Caaj pava lhavan clee? 24Jô lhech nic'aatsham ti'ma java lhtôsjey pa yit'esh ti yicuulh:

—Ja'van napi nivacle. Taj ti nisa'sha'neyam ca nit'ôtay, lhjunashjulhyam java aacjuy.

25Pa lhechesh pa t'ajayem'apee shta java lhtôsjey pa isis'apee jum java lhtôsjey, pa lhech t'aplhuqu'e ti vatsjan. Tamatsej t'ima shita nôqueesh, tojey pa yam'e pa lhtôôvtiyish. 26Pa yicheney pa lhajpôyich ca napecley, taj ti yit'esha ti yiyôjaa:

—Ya aj ca atsavalhsham na yitsaat, ya aj ca anfacleem shta napi tôlhshaam.

Yinôôclhanita pa Pedro pa Jesús ti Cristo

(Mt 16.13-20; Lc 9.18-21)

27Pa lhechesh pa yiche'lhey ja Jesús japi t'eyjatsjanjas java yitsates nashch'e lhavôôj ja yitsaat Cesarea yiey ja cotsjaat Felipo. Nôyishi ti niyôs ja Jesús japi t'eyjatsjanjas pa yit'esh:

—¿She t'e papi tsilheclôjesh napi nivacle?

28Japi lhech yicuulh pa yit'esh:

—Nalheclôj'ash ca alhecha ca Juan Vatnayjayash lhavo'; jap'elh yit'esha ca alhecha pa Elías; jap'elh nalheclôj'ash ca alhecha papi vatjutsa' chiytôyjata pava ti vaclan.#8.28 Mr 6.14-15; Lc 9.7-8.

29Pa niyôs shta japi t'eyjatsjanjas pa yit'esh:

—¿She papi lhaslheclôôjelh avaatsheelh?

Pa yicuulh ja Pedro pa yit'esh:

—A'lhech avaatsha a Cristo.#8.29 Jn 6.68-69.

30Pa yit'esh ja Jesús ti yiyôjaa ts'ivee:

—Ya aj ca anfaclelhem cum papu cavôque.

Pa Jesús yasinôqui pa lhavafi jayu

(Mt 16.21-28; Lc 9.22-27)

31Pa lhech t'aplhuqu'e ti nich'a yasinôquiem japi t'eyjatsjanjas ti uj ti chiyclôyit jayu na Lhô'sesh na Nivacle. Yit'esha shta ti yicônitshi jum japi lhcaanvacles, shi' japi vatcasinôc lhanvacles, shi' japi vanqu'eyjatsjanesh pava lhfanishlhavach. Jô'tajesh ti yiclôn jayu shta, taj ti ca nôjtajeshch'e pava pu'jana nalhus pa netshaam jayu shta. 32Yinôôclhanitch'esha'ne jum java yit'esh'in. Meelh ti yipeyeesh ja Pedro cavôque pa tac'uyesh clee ja Jesús pa yiyôjitajaan jum ca ya aj ca lhech lhfanishalhavach. 33Pa Jesús tatvaych'aclajjulh pa yovalhsha'ne japi t'eyjatsjanjas pa yiyitesha pa yit'esha ja Pedro:

—¡Ayyijop, Satanás!, lhayaash ti nintôlhey ja Dios pa aychavalhjayash, tô'lha jô napi nivacle.

34Pa lhechesh pa tôney ja Jesús japi t'eyjatsjanjas shi' jap'elh nivacle pa yit'esha:

—Papu ca niteetajesh ca nits'ôfistajeshch'e, pa istaa ca nantôvaclulhavne, pa natcum'e yitsha lhpa cruz, ca nanjoojyich'esha'ne.*xk* 35Lhayaash papu ca naôytajesh pa lhamônlhajayash, pa lhech yac'oyesh jayu. Lhan'e vitsha papu ca nitôôlhtajyi ca chinclôntaj, ja't'ajesha ca natmeneshlhavach cava isis Dios lhasinôc, ca lhech lha'yasha ca chinclôn lhôn; papi lhech lhavaatsha jayu ca nilhjenesh pa lhamônlhajayash ôyjôlhôyech.*xl* 36Cha'lhatajeesh'apee pa nivacle ca nitsôt'ajesh lhacôm'a na cotsjaat, ca vo'ya lhôn pa lhsôc'ôclit ca nac'oyesh. 37¿Ja't'ajesha, she t'e taj lhôn pa ca nichenjulh pa nivacle pa lhsôc'ôclit ca ninachajlhavne? 38Papu ca nivapentajeshem papi nivacle niysisasha'ne, sasch'e lhavos, ca yey shi' cava yasinôc, pa lhech pôque nivacle ti vapenem jayu vitsha p'alha na Nivacle Lhô'sesh ca natpectajshicham, ca nitôôlhtajeyjop pa lhatjumtseyash ja Lhtata ca nitanôychitajelh japi isis ángeles. #8.34 Mt 10.38; Lc 14.27; Jn 12.24.,#8.35 Mt 10.39; Lc 17.33; Jn 12.25.

Currently Selected:

San Marcos 8: NIVA

Highlight

Copy