San Marcos 6

1Pa tay'e ja Jesús pa yi'taj'e pa yamelhey japi t'eyjatsjanjas ja lhavtsaat japi lhchifas. 2Meelh ti yama ca nalhu ti chit'ichay pa vanqu'eyjatsjan'ôcji ja vatvanqu'eyjatsjanjavat. Acloj japi nivacle tamp'oyeshem ti yipe'yeesh pa lhavanqu'eyjatsjayash, pa yit'esh ts'ivee:

—¿Ta t'e tôlhesh'e cavôque? ¿Jô'tajesh na lhcajôysha ti naô pa tôlhesh'e, shi' nava ninvôôtôyesha ti yivclanjat? 3¿Nilhecha t'e ja yiclôy lhavoesh lhapesh, ja lhaôs lhja María, lhchecla'esh ja Jacobo, ja José, ja Judás shi' ja Simón? ¿Shi' shta japi lhch'injavot ôcjeclôy yijôtshi? Pa lhe'naa ti ninancôtsita'yesh jô lhech. 4Pa yit'esh ja Jesús ti yicuulh:

—Lhacôm'a pap'elh ti yen pa nivacle chiytôyjata pava ti vaclan a'lheesh papi yiey pa yitsôt'ajesh lhavtsaat shi' papin yie' pa lhajpôyich lhtatvelhavot.#6.4 Jn 4.44.

5Lhech yie' ti ninavclanjat pa ca ve'lhaa java nimatasa papu ca nitô'yish, pa lhapa' japi napu' yilhjensha'ne aôytesvatsham'in. 6Ja Jesús tamp'oyeshem jum japi lhchifas ti tcacujansha'ne.

Yichen pa Jesús papi doce t'eyjatsjanjas ca nivanqu'eyjatsjansha'ne

(Mt 10.5-15; Lc 9.1-6)

Pa lhechesh pa yichey ts'ivee ja Jesús java shalhaa yitsates pa vanqu'eyjatsjan'e. 7Pa tôney japi doce t'eyjatsjanjas pa yinpunat ts'ivee ti nayichenshi, pa yijutey shta pa t'unajjop pava tsich'es jaspa nicaôvjoychishi ca nisa'semfach'ee papu. 8Pa yit'esha japi t'eyjatsjanjas ca ya aj ca nichaajlhach'esha'ne pa'na ve'lhaa pa lhavcôjat. Ya aj ca nichaaj lhpa lhcatinôj shi' lhpa yucuve shi' pa lhnucfat ca nanch'e lhpa lhpeso.*xv* 9Tajulhey ca nit'aacfiyiysha'ne, pa ya aj ca nichaaj pava napu' t'uyjatshiyis. 10Pa yit'esha shta:

—Ca uytajelheyshi pa jpôyich, pa lhech amônlheeelh'e pa amjelhey ca anôcjayutajelhc'oya. 11Ca amtajelhey paelh jpôyich ca nichintôntajeelh'ach'e pa ayishlhaaelh, pa asichateshelh nava afoclelh pa cotsjaat, cavôque lhtôychetelha ti tameneshlhavach jayu pa cat'eelhtajeesh. Yijô' na jayeetshelh'a, pa cat'eelhtajeesh ca namtajey lhac'o' pava nalhus chiyclôyit jayu papi nintônelh'ach'e, ya'sheshc'oya jayu papi Sodoma shi' papi Gamorra lhavos.#6.8-11 Lc 10.4-11.,#6.11 Hch 13.51.

12Pa yichvatich'e pa vanqu'eyjatsjanesh ca chintatvaych'aclaja pa is vatjunash. 13Jô'tajesh ti yisaasfach'een pava acloj tsich'es, pa acloj japi tayyashaysha'ne ti t'ajayesha pa lhape' pa yivatsjanchatsha'ne.#6.13 Stg 5.14.

Pa lhavafjayash pa Juan Vatnayjayash lhavo'

(Mt 14.1-12; Lc 9.7-9)

14Pa tpeeycheyesh ja Herodes ja Jesús, lhayaash ti lhnetôna'ch'esh jum. Pa yit'esha ja Herodes:

—Neetsham shta ca Juan Vatnayjayash lhavo', lhe'naa ca nitô'yish'apee lhavaatsha nava nimatasa papu ca nitô'yish.

15Pap'elh yilheclôjtajesh ca lhecha pa Elías.

Vooy pap'elh yit'esha:

—Jô lhech nivacle chiytôyjata pava ti vaclan, nalhjunash papi vatjutsa' nivacle chiytôyjata pava ti vaclan.#6.14-15 Mt 16.14; Mr 8.28; Lc 9.19.

16Meelh ti tpeeycheyesh ja Herodes pa yit'esh:

—Lhech jayu ca Juan netshaam shta, jan jayiyôjijanesh ca'na can chiyt'ôvôsey lhshatech.

17Lhech ja Herodes ti yicheney japi lhcavos ca Juan ca nôcfa' ca nichaajey lhpa vatvanc'ôcfajayte, tôlh'ejop lhja Herodías, lhch'acfa ja lhch'inish Felipe, lhjô lhech lhjayaesh. 18Lhayaash ti yit'esha ca Juan ja Herodes:

—“Nintajulhey ti ajayaesh lha ach'inish lhch'acfa.”#6.17-18 Lc 3.19-20.

19Lhech tôlh'ejop ti yicônitshi lhja Herodías ca Juan, yentaj ca chinclôn, taj ti sasemjop. 20Nijovayjulh ja Herodes ca Juan, lhayaash ti yitôôysha ti is jum lhavaatsha, jô'tajesh ti yivo'yeshch'e nava matas; lhe'naa ca nôcfa' atesha, ampa ca lhanfanasha. Aclôjesh ti yipe'ya ti vanqu'eyjatsjan pa yitacshinjayan'in, taj ti yeetajesh jum ca nach'ana. 21Nôqueesh yi'van lhja Herodías pan tanachanesh pa ca lhfanisheesh, lhayaash ti yisnatesh ja Herodes pa lhclôyjayash, yaychavalheshch'e ti nich'a nivat'aj. T'alheyjop japi lhcavosesh lhanvaclesesh shita, shi' japi lhcaanvaclesesh'e ja cotsjaat Galilea. 22Pa nach'ôcji lhja lhôse lhja Herodías pa tclôôy, yisvuneshi jum ja Herodes shi' japi yielh'e ja lhtsaccunjavat. Pa yit'esha ja lhcaanvacle lhja lhutsja:

—A'lhesh'yi pan lhen, pa jajut'ay jayu.

23Ninclôquiemch'e ti nifaclem pa yit'esh:

—Pa ca aalhtajeshyi, pa jajut'ay jayu lha'ma ca alhechiyan na yivtsaat, jajut'ay jayu na lhcachivateshi. 24Pa yichfach'ee lhjô lhech, yichey lhja lhamimi pa niyôsesh:

—¿She t'e ca jaya'lha jayu?

Pa yicuulh lhja lhamimi pa yit'esh:

—Aalhsha ja lhshatech ja Juan Vatnayjayash lhavo'.

25Pa vapecleyshi tasha shta ja lhcaanvacle pa t'a'lha pa yit'esh:

—Jayeesh ca anjutyi tatsha nôqueesh ja Juan lhshatech nôvji'yam pa titech.

26Pa yitacshinjayan'in jum ja lhcaanvacle ti yipe'yach'e cavôque; teya ti yit'eshem jum ca ninclôquiaemch'e pa ca nit'aalhsha, jô lhôn vapeneshem shta japi yielh'e ja lhtsaccunjavat ca nivômjatshi pan t'ônashem lhja lhutsja. 27Pa lhechesh pa yicheney tatsha ja lhcaanvacle ja lhcavo ca Juan ca nit'ôvôsey ca lhshatech ca nanchajey shta. 28Jô lhech yichey pa yiesh'e lhja vatvanc'ôcfajayte ti yit'ôvôsey ca lhshatech, pa nichaaj ti yanshi' pa titech. Pa yijutshey lhja lhutsja, lhan'e lhjô lhech pa yijutshey vitsha lhja lhamimi.

29Meelh ti tpeeycheyesh cavôque japi t'eyjatsjanjas ca Juan, pa yicheyvatich'e ti nichaaj pa lhavu'vat pa tishc'oya ts'ivee.

Pa Jesús yicunjansha'ne papi cinco mil

(Mt 14.13-21; Lc 9.10-17; Jn 6.1-14)

30Meelh ti tapequ'in shta japi Jesús t'eyjatsjanjas pa nifaclemch'e ja Jesús pant'ajôôj pava lhfanishesh pa lhcumjayash shi' pava vanqu'eyjatsjanesh. 31Pa yit'esh ja Jesús:

—Atatvoelhyich'e, shnôquelhey ja nintanash'e, pa lhech icha'yelh'e cum.

Lhayaash ti yuyeyvanôcji ts'ivee pa nachan ca nichintsaccunjayana. 32Pa yishi'jop lhja lhôvjatshi pa yicheyshi ts'ivee pa nintanash'e. 33Taj ti yivanch'e japi nivacle ti yichvatich'e pa nitôfacch'e. Cavôque yaya'esh japi acloj nivacle pa t'ôs'ejop cotsjaat ti nashch'elhavôôjjop ja lhjôvcha; pa nôque lhjunash pa p'alha ti tsitenaj'ec'oya ja Jesús. 34Meelh ti t'ôsfach'ee ja Jesús pa yi'van japi acloj nivacle pa tcavts'aclayesha'ne, lhayaash ti lhjunashjulh pava tashinshtas ti ampapu ca niclôvalh. Pa lhechesh pa yeyjatsjanesh pava matas.*xa* 35Meelh ti tanjuyshicham na jumcuclaay pa yit'esha japi t'eyjatsjanjas ja Jesús: #6.34 Nm 27.17; 1 R 22.17; 2 Cr 18.16; Jr 50.6-7; Ez 34.5; Zac 10.2; Mt 9.36.

—A'va, nichinôv'e' na shtanamey, lhapa nuut.

36Anfacleem cum napi nivacle ca nôquey ts'ivee java yitsates ca natcasha'ya pa lhôc, lhayaash ti ampa ca nituj jayu.

37Pa yit'esh ja Jesús ti yicuulh:

—Acunjanelh avaatsheelh.

Pa yicuulh ts'ivee:

—¿Ca jaycashaayshelha jayu ajalh nava docientos denarios pava yucuvec pa yijutajelhey t'e ca nituj ts'ivee.?

38Pa yit'esha ja Jesús:

—¿Ta ajalh t'ajôôj pava acôselh yucuvec? Ajôchiqueelhey ajaalh.

Meelh ti yi'van pa t'ajôôj pa nifaclem pa yit'esh:

—Ve'lhanôjesh java yucuvec, napu' java sajech.

39Pa yiyôjisham ja Jesús ca nôvqu'esha'ne na lhpôc'ôcleevatsham ca nôv'ech'esha'ne na yitjataj. 40Pa nôque lhjunash ti yich'esha'ne ts'ivee cienva'neen japi yich'esha'ne shi' japi cincuentava'ne ti yich'esha'ne. 41Pa lhechesh pa t'acum'e ja Jesús cava ve'lhanôjesh yucuvec shi' cava napu' sajech, pa yovalhesheychisham na vôôs ti t'aalh pa yijutem pa t'ishameesh, pa nôcôsshisha'ne cava yucuvec pa yijutey japi t'eyjatsjanjas ca nitiseshch'e japi nivacle. Shi' shta cava napu' sajech tiseshch'e japi nivacle. 42Pa tuj lhacôm'a pa yapeesha'ne. 43Vooy ti yapeesha'ne pa nit'ôqu'e cava lhcat'iyasesh cava yucuvec shi' cava sajech, doce java sisenlhiy tapoojqu'esha'ne cava lhcat'iyasesh. 44Japi lhech tsaccunch'e cinco mil pa t'ajôôjjam japi nivacle.

Pa Jesús vaclech'apee pa yinôôt

(Mt 14.22-27; Jn 6.16-21)

45Nôjeshch'e atesha cavôque, pa yiyôjiesha ja Jesús japi t'eyjatsjanjas ca nôcjaam lhja jocjayej ca nôyineyc'oya ts'ivee ja Betsaida yiey pacham ja lhjôvcha, lhan'e pa jôjjeclay vatsevatjop'in japi nivacle ti vaneecjuelhsha'ne. 46Meelh ti tifeshch'e ti vaneecjuelhsha'ne, pa yichey lhja utiyuc pa lhech yiesh'e ti t'aalh.

47Vooy ti tulh'in pa yamji lhcachi'vat ja lhjôvcha lhja lhôvjatshi, lhan'e pa ve'lhasha'ne ti mônlhee pan yie'. 48Pa yivansheylhavc'oya japin yi'shi' lhja lhôvjatshi ti vaniyitjulh jum ti yiccha'c'oyaan, lhayaash ti t'ajuyesh'ôcji ja lhaviim. Vooy ti lhavôôjjulh ja nalhu pa yôfiis ja Jesús, lhan'e lhavaatsha t'ôtay'apee ja yinôôt, pa yeetajesh ca ninaashjop atesha. 49Meelh ti yivanjulh ts'ivee ti vaclech'apee ja yinôôt, pa nijovayem ts'ivee, lhayaash ti yilheclôjtajesh ca vatsôcôclit'a, pa yafshiyanch'e ts'ivee; 50Lhayaash ti yi'van ts'ivee lhacôm'a, pa uj ti nitôyiyjat. Taj ti yiyôjeelhavc'oya tatsha ts'ivee jô lhech, pa yit'esh:

—¡Avatfiyitelh; ya aj ca anjova'yelhyam, ya'lhech!

51Pa lhechesh pa t'ôsshaam vitsha lhja lhôvjatshi, pa jaspa vô'mesh tatsha ja lhaviim. Cavôque tamp'oyeshem jum ts'ivee. 52Eem ti nintôyishc'oya ts'ivee pava nimatasa papu ca nitô'yish pan lhfanishesh java yucuvec, lhetipaesh ti ninach'anesha pava lhcachic.

Pa Jesús yivatsjanchatsha'ne papi aôytesvatsham'in yiey pa Genezaret

(Mt 14.34-36)

53Meelh ti yichelhey pacham ja lhjôvcha pa yama ja cotsjaat lhey Genezaret, pa lhech yôcfee' lhja lhôvjatshi. 54Meelh ti t'ôsfach'ee pa tôntôfacliy tatsha ja Jesús. 55Pa tatsha ti vacumajeyvatich'e ja yitsaat japi nivacle, pa nicha'jesh ts'ivee java lhamôjôvtes japi aôytes'in yiey pan yie' ja Jesús. 56Meelh ti yamey ts'ivee java yitsates pa chiyanfach'eec'oyaan japi aôytesvatsham'in pa chit'aalhsha ca chint'ajaya atesha lhja t'uyjatshiy; pa vatsjansha'ne lhacôm'a japi t'ajaya lhja t'uyjatshiy.

Pava yisasiyan pa nivacle

(Mt 15.1-20)

Currently Selected:

San Marcos 6: NIVA

Highlight

Copy