San Marcos 5

1Pa yameypacham ts'ivee ja lhjôvcha, pa yameyshi ja lhcootsjat pa lhey Gadara. 2Meelh ti t'ôsfach'ee ja Jesús ti tayshi lhja lhôvjatshi, pa lhechesh pa vacumajjulh ja ve'lha nivacle tôlheyshi pava nivalhjey, jô lhech yi'shi' pa tsich'e'. 3Jô lhech nivacle nintaych'e lhpa tinjôquec'oya papu ti vaf. Pa ampapu ca isa'emjop ca nôcfa' jô lhech nivacle, ey ca lhecha pava calenac ca nivi'jatan. 4Aclojesh ti chiyc'alhtantajesh ti vanôôcfatajesh java t'itjuy shi' java lhcaclôy, taj ti yajatesh ti yecjetshisha'neen pava calenac, pa ampapu ca nanfayu'em ca nash'apee. 5Java nalhus shi' java tulhis ti yichey'in java uticuy shi' java nivalhjey, pa ujesh ti tôn'in pa vat'ijô'jesh'in pava utes. 6Meelh ti yivanjulh ti jôjjeclay tojjulh ja Jesús, pa vacumajjulh pa yu'janejop t'acjatsuy, 7pa uj ti yisitsenesh ti yiyôjaa:

—¿She pa lhnacheshyiy avaatsha, ti a'lhech a Jesús, Lhôs'ash pa Dios ti yash'apee jum pap'elh? ¡Jetôn'ajop pa Dios, ca ya aj ca ascômclôqui jô!

8Yeetajesh côque, lhayaash ti palha yit'esha ja Jesús:

—¡Tsich'e', ayshi nôque nivacle!

9Pa niy'ôs ja Jesús pa yit'esh:

—¿Ta ey?

Pa yicuulh pa yit'esh:

—Yeyyesh Legión, lhayaash ti ya'aclojelh'esha'ne.

10Pa vatants'aclansha ti t'aalhsha ca ya aj ca nayjat'e jô lhech'e cotsjaat. 11Lhech yie' java acloj vojotas tac'utch'elhavôôj lhja utiyuc. 12Pava tsich'es vatants'aclansha ja Jesús ca nit'iyjatsham java vojotas.

13Pa yicu'lhesh ja Jesús, pa lhechesh pa tayshi ja nivacle pava tsich'es, pa vooy java vojotas pa vat'iyshamsha'ne. Lhan'e java vojotas pa t'ecletshamsha'ne ja tovôc pa yiyôlhp'ojisha'ne. Java lhech vojotas dos mil jat'ajôôjjam.

14Lhan'e japi yiclôvalhtaj java vojotas pa nijovayvatsham'in, pa yichey ts'ivee java yitsates ti nifaclemch'e jant'ajôôj java yi'van. Pa nacheyvatich'e japi nivacle jaspa yi'van pa lhjunash. 15Pa namey ts'ivee ja Jesús, pa lhech yivan'e ja nivacle nichinaa ti yi'shi' pava tsich'es, yi'van ti cano ti yi'sha'ne ti tcajôyshay shta, jô'tajesh ti nich'aesh ti t'uyjatshiyiy; pa nijovay'ôcji ts'ivee. 16Japi yivanesh nifaclemch'e nôqueesh pa lhjunashesh jô lhech nivacle yi'tajshi pava tsich'es, shi' pa lhjunashesh cava vojotas. 17pa yiyôjaa ts'ivee ja Jesús ca nitay'e ja lhavtsaat.

18Meelh ti t'ôsshaam ja Jesús lhja lhôvjatshi, pa yit'esh ja nivacle jan nich'a tayshi pava tsich'es, pa niyôstajesh ca nitanôycheelhsha'ne. 19Taj ti ninuesha ja Jesús, pa yit'esha:

—Mapecley cum pa ajpôyich shi' papi avelhavot ca anfaclemch'e ti ya'shesh ti uj ja Dios na lhfanish'ash ti tcavts'aclay'ash.

20Pa lhechesh pa yich ja nivacle, yichey ts'ivee java yitsates yiey ja cotsjaat lhey Decápolis, pa nifaclemch'e ti ya'shesh ti uj ja Jesús pa lhfanishesh; papi lhech tamp'oyeshem.

Lhpa lhôse pa Jairo shi' lhpa ôcjeclô lhpa t'ajaya lhpa t'uyjatshiy ja Jesús

(Mt 8.18-26; Lc 8.40-56)

21Meelh ti tapecley pacham shta ja lhjôvcha ja Jesús, pa lhech yitsôyin'ec'oya japi nivacle lhan'e pa vatsevat'e lhavôôj ja lhjôvcha. 22Pa namey ja ve'lha lhanvacleesh ja vatvanqu'eyjatsjanjavat pa lhey Jairo; meelh ti yi'van ja Jesús pa t'acjatsuyshichamjop, 23pa vatants'aclansha ti t'aalhsha pa yit'esh:

—Meeycum yiyaam lhja yôse, lhayaash ti yujeey ca nivaf; istaa ca shtatanôycheey ca an'apee nava apôcôtôy pa jaspa nivatsjan.

24Pa yichelhey ja Jesús; taj ti acloj japi voqu'eetsham japi lhech yicôt'atvatam. 25Yicshenshi lhja ve'lha nivacche lhjô lhech doce pava lhnincôpesesh ti nôtshiin. 26Lhjô lhech ôcjeclô acloj papi vatcafetatsiy lhavos ti titsintajey'in lhavach, tiflhnôcji pava lhavanjas; taj ti nisecl'eesh clee pa ca lhjunasha. 27Meelh ti tpeycheyesh ja Jesús pa yitsavalhshamjop japi voqu'evatich'e, pa tôlhey t'ôyiish ja Jesús ti t'ajaya lhja t'uyjatshiy. 28Pa yit'eshlhavne ts'am: “Ca jayajaytaja atesha lha t'uyjatshiy pa javatsjan jayu.” 29Nichinaa ti t'ajaya lhja t'uyjatshiy, pa vômesh tatsha ti natsha'ne pava lhavoyey, nicha'vayeshlhach'e jum ti vatsjanesh pa lhayyasha. 30Nicha'vayey tatsha ja Jesús ti tayshi pa t'unaj, pa tatvaych'aclaja japi nivacle pa yiyôjisham pa yit'esh:

—¿She papi t'ajaya lha yuyjatshiy?

31Pa yicuulh japi t'eyjatsjanjas pa yit'esh:

—Lhavan napi nivacle ti nacôt'at, pa lhteesh: “¿She papi t'ajayyi?”

32Lhan'e ja Jesús pa vo'tajesha'ne ti nayovalhtajeshiin papin t'ajaya. 33Lhan'e lhja ôcjeclô pa nijovayshi, ts'ananan'in jum, lhayaash ti yitô'yishlhach'e pa lhjunashesh. Pa yichey t'ajuyish ja Jesús pa t'acjatsuyshichamjop pa yit'eshem lhacôm'a pa yijô'. 34Pa yit'esha ja Jesús:

—Yôse, navatsjanchat na niacacujayasha. Môôj na ac'usiyash'in, lhayaash ti lhavatsjanesh ca ayyasha.

35Jôjjeclay tasinôyelh'in lhja ôcjeclô, pa nam japi lhcavos jan lhanvacleesh ja vatvanqu'eyjatsjanjavat, nayjateshey pa yit'esh:

—Apis ti vaf lhca ôse. ¿Ta t'e lhayaash ca cha'lhatajesh ca imaj'e na Vanqu'eyjatsjan?

36Pa Jesús tach'anch'e cava ya'clishay pa yiyôjaa ja lhanvacleesh ja vatvanqu'eyjatsjanjavat ti yit'esh:

—Ya aj ca anjovaayshi; ya aj ca acacujan.

37Pa lhetlha yijôjiyan ti yaôychi japi Pedro, ja Jacobo shi' ja Juan, ja lhch'inish ja Jacobo. 38Pa yamey ts'ivee ja lhajpôyich ja lhanvacleesh ja vatvanqu'eyjatsjanjavat pa yivaneylhavc'oya japi yipvatsham'in shi' japi tafshiyvatsham'in. 39Pa yich'ôcji ja jpôyich pa yit'esh:

—¿Ta lhayaash ti lhtafshiyelhjop'in lha lhutsja? Ninvaf, yimô' jô.

40Pa yilhôquiin japi lhech. Pa lhechesh pa yichenfach'ee lhacôm'a japi yi'taj'ôcji ja jpôyich. Pa vooy ja lhtata shi' lhja lhamimi lhja lhutsja, pa nôque yie' japi tanaôycheelh t'eyjatsjanjas yichelh'ôcji ja jpôyich jan yi'ôcji lhja lhutsja. 41Pa t'acum'e ja lhpôcôt lhja lhutsja pa yit'esha ti yiyôjaa:

—Talita cum (côque yich'e: “Lhutsja, jayeesh'a ca aneetsham.”)

42Pa netshaam tatsha lhja lhutsja pa t'otaaysha'ne. Lhjô lhech doce java lhnincôpes. Pa uj ti nitôyijat ts'ivee ti yivanesh. 43Pa yiyôjiesha ja Jesús ca ya aj ca nanfaclemch'e papu, pa tayôjijanesh shta ca chintsaccunjayan lhja lhutsja.

Pa Jesús yie' pa Nazaret

(Mt 13.53-58; Lc 4.16-30)

Currently Selected:

San Marcos 5: NIVA

Highlight

Copy