San Mateo 21

1Meelh ti yujeey ts'ivee ja Jerusalén pa yamey ja yitsaat Betfagé, tajulhshi lhja utiyuc ja Olivochat. Pa yicheney ja Jesús japi napu' t'eyjatsjanjas, 2pa yit'esha:

—Meelhey na yitsaat ti palha nôcley. Lhech lhavanelh'e jayu lhpa cuvôyutache vanôôcfa, yi'jop shta pa lhaôs. Anuqueeshelh pa anchajeelhyi. 3Ca nicaajtaj papi naniyôseshelh, pa at'eshelh: Tayôjijanesh ja Lhcaanvacle. Pa lhecheesh pa nivashanelh'am jayu.

4Cavôque vaclan yôfisch'e ca t'ônashesh pa chiytôyjata pava ti vaclan, ti yi'sesh'e:

5At'eshelha na yitsaat Sión:

“A'va, nach'ay na Anvacle,

vanits'aclayan lhavaatsha, pa

yiapee lhpa cuvôyutache, shi' shta pa cuvôyutaj lhaôs,

lhpan yo'yesh pava caclec ti chiyan'apee.”#21.5 Zac 9.9.

6Pa lhechesh pa yichey japi t'eyjatsjanjas pa yisnatesh pa nit'ônasheshem ja Jesús. 7Nichaaj lhja cuvôyutache shi' ja lhaôs, pa yan'apee java t'uyjatshiyis pa yiapee ja Jesús. 8Vooy jap'elh acloj nivacle yich'aneshch'ec'oya java t'uyjatshiyis ja nôyish. Vooy jap'elh yit'ovôsch'e java lhavôôysey java aacjuy pa yich'aneshch'ec'oya shta ja nôyish. 9Japi nivacle japin vanôyinc'oya shi' shta japin nijooylhach'e, pa tônesh'in ti yit'eshvatsham'in:

¡Tanshamiiy na Lhaôs ca lhcaanvacle David!

¡Chiy'isiyan nan nameshjooy pa lhey pa Lhcaanvacle!

¡Tanshamiiy pa Dios!#21.9 Sal 118.25-26.

10C'oya ti yamey ja Jesús ja Jerusalén pa lhacôm'a ti ya'savatsha'ne pa uj ti taniyôseshch'e:

—¿She t'e nôque?

11Pa yit'esh japi nivacle:

—Lhech na chiytôyjata pava ti vaclan Jesús, tôlhey ja Nazaret ve'lheelhch'e ja Galilea.

Pa Jesús yisclan'ôcji pa vatishjanjavat

(Mr 11.15-19; Lc 19.45-48; Jn 2.13-22)

12Pa yich'ôcji ja Jesús ja lhajpôyich pa Dios, pa yisaasfach'ee lhacôm'a japi lhavcashanjas shi' japi tcashaytaj'in. Yic'umajeshch'esha'ne java yi'shi'sha'ne java pesoc, shi' java lhc'oovtes japi tcashayesh'in java ofotas; 13pa yit'esha:

—Yit'esh java Vani'sesh'e: ‘Na yijpôyich lheya vat'alhjavat'esh.’, taj avaatsheelh pa lhjônelhch'e lhpa lhôvjôque papi vancaclônjanjas.*xc* #21.13 Is 56.7.,#21.13 Jer 7.11.

14Pa lhech'e ti yiey ja vatishjanjavat pa nachey ja Jesús japi napu' taclujuy shi' japi napu' ancojoy, pa lhechesh pa yilhjensha'ne. 15Meelh ti yivanesh japi lhanvaclesesh japi vatcasinôc shi' japi vanqu'eyjatsjanesh java lhfanishlhavach java nimatasa papu ca nitô'yish ti yisnatesh, shi' ti yipe'ya shta japi taôvclas ti tôn'ôcjiin ja vatishjanjavat pa yit'esh: “¡Tanshamiiy na Lhaôs ca lhcaanvacle David!”, pa lhechesh pa uj ti tavôcôya japu lhech 16pa yit'esha ja Jesús:

—¿Lhpe'ya nava yit'esh napuque?

Pa yicuulh ja Jesús pa yit'esh:

—Jech, jape'ya. Taj ti ¿naaclôvalhelhshi nataney java Vani'sesh'e? Ti yit'esha:

‘Lhasnatesh japi tiqu'icsha'ne taôvclas

shi' japi chiyfitsjansha'ne ti yôclôj'ay.’#21.16 Sal 8.2.

17Pa lhechesh pa vômesh japu lhech, pa tay'e ja yitsaat pa yichey ja Betania, pa lhech yijoe ti tulh'in.

Pa Jesús yipôfiyu lhpa higoyuc ti nintaay

(Mr 11.12-14, 20-26)

18C'oya ti nich'a nalhu, pa vapecley ja yitsaat ja Jesús, pa nichavayey pa lhayipcu'. 19Pa yi'van lhja higoyuc, shalheema ja nôyish, pa yichey. Taj ninvan lhpa ca lhaa, tsi'sha java lhsashay. Pa lhechesh pa yit'esha ja Jesús lhja higoyuc:

—¡Tanca t'ôyisheey ca nicaaj pava ca aya!

Pa tatsha ti vafshaam lhja higoyuc.

20Meelh ti yi'van cavôque japi t'eyjatsjanjas, tamp'oyeshem pa niyôsesh ts'ivee ja Jesús:

—¿Ta t'e lhayaash ti vafshaam tatsha lhja higoyuc?

21Pa yicuulh ja Jesús pa yit'esh:

—Yijô' ti jayeetshelh'a, ca nicaajtajelh'am pa niacacujayasheelh jô, pa tanca ve'lhaaey navôque nava jayeetsha lha higoyuc ca natôôyshelh, caaj jayu shta pav'elh. Ca eetajeshelh ca ayôjitajelha anôque utiyuc: ‘Ataattsojquisham ca ac'uysham pa lhjôvcha’, pa lhech lhjunash nequ'ishamelh'am jayu.*xf* 22Lhacôm'a pava lhta'lhelhey ca aalhtajelha, pa lhavanelh jayu. #21.21 Mt 17.20; 1 Co 13.2.

Pa t'unaj pa Jesús

(Mr 11.27-33; Lc 20.1-8)

23Pa lhechesh pa yich'ôcji ja Jesús ja vatishjajavat pa yeyjatsjan japi yi'ôcji. Pa nachey japi vatcasinôc lhanvacles shi' japi lhanvaclesesh nitaôvclaseesh japi judíos, pa niyôsesh ts'ivee:

—¿She t'e papi yiyôjeesh'a ti lhech afanish'avach? ¿She t'e papi yijut'ay pa unaj ti lhech afanish'avach?

24Pa yicuulh ja Jesús pa yit'esh:

—C'aniôseshelh jayu vitsha pa ve'lha ya'clish; ca ascuulhtajelh pa jaspa c'acuulhshelh jayu vitsha, pa janfaclelh'am jayu jan jatôôlhsha ja yunajjop ti lhech yifanishyivach. 25¿She papi yiyôjaa ca Juan ti vancanajayan? ¿Ja Dios, ja't'ajesha papi nivacle?

—Pa lhechesh pa tasinôych'e ts'am ts'ivee, pa yit'esh:

—“Ca shtat'esh lhôn yiyôjiesha pa Dios, pa yit'esh jayu ca shincuulhtaj: ‘¿Ta t'e lhayaash niueshelha?’ 26Ca shtat'esh lhôn yiyôjeesha papi nivacle, côque pa nijovaych'e japi nivacle; lhayaash ti yit'esha japi nivacle ca Juan ti yijô' ti uj ti chiytôyjata pava ti vaclan.” 27Pa lhechesh pa yit'eshats'ivee ja Jesús:

—Ninôstôyeshelh.

Pa yicuulh vitsha ja Jesús pa yit'esh:

—Pa tan jayu t'em vitsha ca nifaclelh'am jan jatôôlhsha na yunajesh ti lhech yifanishyivach.

Pa chiyovalheyjop atesha papi napu' vatacles

28Pa yit'esha ja Jesús:

—¿She pa lhaychavalhelhey? Ve'lha pa nivacle napu' papi lhcles. Pa yit'esha pa ve'lha: ‘Yaôs, meey nôqueesh ca acum'eyam pa anclanshi java ôtjayetas.’ 29Pa yicuulh pa lhaôs pa yit'esh: ‘¡Am, niyit'esh!’ Pa yalhalha ti yaychavalhey ti yichey ti t'acum'in. 30Pa lhetlha t'ônashem shta peelh lhaôs; pa yicuulh pa lhech: ‘Jech, lhcaanvacle, jôquey jayu.’ Taj ti tanca nôquey. 31¿Ta yie' napuque napu' papi niqu'ishamesh pava yiyôjiesha pa lhtata?

Pa yit'esha ts'ivee:

—Vooy pa vatjutsa'.

Pa lhechesh pa yit'esha ja Jesús:

—Yijô' ti jayeetshelh'a ti c'ôôjlheem japi yivoyanesh pava lhpesoc pa lhcaanvacle japin chiyapun, shi' japi afcosjanjas ti yamey jayu ja lhanvacleyash ja Dios, a'lheesh avaatsheelh. 32Lhayaash ti nam ja Juan Vatnayjayash lhavo' pa neyjatsjaneshelh pava afanishelh'avach jayu, taj ti lhcacueshelh. Vooy japi yivoyanesh pava lhpesoc pa lhcaanvacle japin chiyapun, shi' japi afcosjanjas nincacuesh. Taj ti avaatsheelh lhavantajelh cavôque, taj ti naat'eshelh shta ca atatvaych'aclajshelh pava afanishelh'avach jaspa avôômtajeshelh ti lhcacueshelh.#21.32 Lc 3.12; 7.29-30.

Chiyovalheyjop atesha papi vatcumjayash lhavos niysisa

(Mr 12.1-12; Lc 20.9-19)

33“Ach'anelhch'e neelh chiyovalheyjop atesha:

—Ve'lha pa nivacle caaj pa lh'ôtjayetachat pa yit'iyjatch'e pava ôtjayetacuy lhanus pa nashclôfjop. Tiish shta lhpa tinjôque t'ajuya pa ôtjayetas t'i'. Yisnatshem shta pa tojquisham jpôyich papin yiclôvalhchiyinesh. Pa yiclôvalhchiyinesh atesha papi vatcumjayash lhavos, vooy lhavaatsha yichey peelh yitsaat.*xh* 34Meelh ti yameyjop pan t'aplhu' ti yôquench'e pava ôtjayetas, pa lhechesh pa yicheney papi lhcavos. Yichenshey papi ôtjayetachat lhavos ca nancha'jeshey pava yivenchatem. 35Taj ti papi vatcumjayash lhavos t'acum'evatam papin chiychentajey pa yit'ijôj'in pa ve'lha, vooy peelh yiclôn, vooy peelhcha shta yôôtjatesh'in pava utes. 36Pa lhechesh pa yicheney shta pa lhcaanvacle pap'elh acloj lhcavos. Taj ti papi vacumjayash lhavos lhetlha lhafanishesh shta yiey pan lhjunash pap'elh. #21.33 Is 5.1-2.

37“Pa nijooylha ti yicheney pa ve'lha lhaôs, pa yaychavalhtajey ca nitanfunchay, pa yit'esh: ‘Tanfunchay jayu na yaôs.’ 38C'oya ti yivants'ivee pa lhaôs papi vatcumjayash lhavos, pa yit'esh ts'ivee: ‘Na lhech tcôyôjanesh jayu navôque. Istaa ca shtaclôn jaspa shtantsôt'ajesh na ôtjayetachat.’ 39Pa lhechesh pa t'acum'e ts'ivee pa lhech pa yayjatshi pa ôtjayetachat pa yiclôn.

40Pa lhechesh pa niyôsesh ja Jesús:

—Ca namtaj jayu pan lh'ôtjayetachat, ¿ta lhfanishesh jayu napuque vatcumjayash lhavos?

41Pa yit'esh ts'ivee:

—Yiclônsha'ne jayu papi vatcumjayash lhavos niysisa, pa yiclôvalhchiyinesh atesha jayu shta pap'elh vatcumjayash lhavos. Vooy papi lhech yijutshey jayu pava yivenchatem ca namtajeyjop pan t'aplhu' ti yôquench'e pava ôtjayetas.

42Pa lhechesh pa yit'esh ja Jesús:

—¿Nive'lhaaesh ca aclôvalhelhshi nava Vani'sesh'e? Ti yit'esh:

‘Lhja utej, lhan yapun papi jpôyjey lhavos,

yalhpan'e ti chiyan'e lhpa lhacoesh pa jpôyich.

Cavôque tôlha ja Lhcaanvacle ti lhech lhfanishesh,

pa lhjunashjulhjoom ti uj ti lhasnôyjes atesha.’*xi*

43Nôquen lhayaash jayeetshelhaam, na lhanvacleyash ja Dios chinajôôcshelh jayu pa chinjutey jayu pap'elh, papin tcufayesh pa vatcavcalhech t'ajuya pa vatvacleyash. 44Papu ca nataj'apee anôque utej pa yipôcjetsha'ne jayu. Vooy ca nancôôtajsha'ne lha utej ca nat'apee pa nivacle, pa tsi'sha jayu ca lhamôqu'eesh. #21.42 Sal 118.22-23.

45Meelh ti yipe'yach'e japi vatcasinôc lhanvacles shi' japi fariseos java yovalhemeyjop atesha ja Jesús, pa tatsha ti yitôych'e ti lhavaatsha ti chiyasinôqui. 46Pa yeetajesh ca natcum'e, taj ti nijovayalhavach japi lhech, lhayaash ti yitôysha japi nivacle ti yit'esha ti lhech pa chiytôyjata pava ti vaclan.

Pa chiyovalheyjop atesha pa vatajayayash

(Lc 14.15-24)

Currently Selected:

San Mateo 21: NIVA

Highlight

Copy